APOSTOLO 2
2
1Muze tangwa lia Pentekoste hiliaheta, o eswe apwile hamuwika ni mbunge yimuwika muma mumuwika. 2Susumuku kwakatukile mwilu lundunjila ngwe kutakumuka cha fuji ya tachi, chazalishile zuwo lieswe, muze atwamine. 3Mba kwasolokele kuli ayo malimi a kupula, ngwe a kahia; o atwamine hali ayo eswe, umwe ni umwe. 4O eswe azalile tò ni Spiritu Musandu, aputukile kuhanjika mu malimi eka, ngwe Spiritu waahele kuhanjika.
5Achi, mwatwamine mu Yerusaleme A-Yunda, akwa kuwayila, a ku mavungu eswe mushi lia lilu. 6Muze evwile liji lino, chizavu akungamine, o achingashanyine, mumu mutu ni mutu waavwile nikuhanjika mu limi lienyi mwene. 7Eswe alishikishilile, akomokene, nikuliamba umwe kuli mukwo ni mukwo ngwo, Wano eswe anahanjika hi A-Ngalileya ko, nyi? 8Ngwe kuchi yetu tunevu mutu ni mutu mu limi lienyi mwene, lize twasemukine nalio? 9Ni A-Parto, ni A-Media, ni A-Elame, ni waze akutwama mu Mesopotamia, ni Yundeya, ni Kapandosea, ni Ponto, ni Eshia. 10Ni Fwikia, ni Pamafwilia, ni Engitu, ni yihanda ya ku Pute, yize yakusulangana ni Sevwene, ni njize a ku Roma, ni A-Yunda, ni akwa kutayiza a ku mavungu, 11ni A-Krete ni A-Arabia, tunaevu nikuhanjika mu malimi ja yetwene yuma yinene ya Zambi. 12O eswe, alishikishilile nikukakashana chikolo, nikuliamba umwe kuli mukwo ni mukwo ngwo, Kuchi chinalumbunuka? 13Akwo nikuchimbunguna ambile ngwo, Kanazala tò ni vinyu yiyema.
14Alioze Petulu, nikukatuka hamwe ni kumi ni kashi wakololokele, nikwamba kuli ayo ngwenyi, Yenu A-Yunda, ni yenu eswe nwakutwama mu Yerusaleme, nyingikenu chino, panjikenu ku maliji jami. 15Mumu wano kazengeweleko, ngwe yenu nunashinginyeka; mumu hapwa ola yamuchitatu lume ya mwalwa; 16alioze chino hanachihanjika ku kanwa lia profeta Joele ngwenyi,
17Kumuchikapwa ha matangwa a kusula,
chocho anambe Zambi ngwenyi,
Kumungukazukula Spiritu yami hali atu eswe;
ni anenu a malunga ni anenu a mapwo kumakaprofeteza,
ni akweze jenu kumakamona usolwelo,
ni makulwana jenu kumakalota yilota:
18ewa, ni chipwe hali ndungo jami a malunga ni hali ndungo jami a mapwo mungukazukwila Spiritu yami
ha matangwa aze;
no kumakaprofeteza;
19mungukalweza yipekesa mwilu, ni yilayi hashi;
manyinga, ni kahia,
ni chishichishi cha mwishi:
20tangwa kumulikalumuka milima,
ni kakweji kumakalumuka manyinga,
shimbu tangwa lia Mwene kanda liza,
tangwa lize linene ni liakusolola uhenya.
21Mba kumuchikapwa, mweswawo matambika ha jina lia Mwene kumakamulamwina.
22Yenu A-Izalele, ivwenu maliji ano: Yesu Ka-Nazare, lunga ashindakenyene kuli Zambi ni yipupu ni yipekesa, ni yilayi yize Zambi walingile ku kwoko lienyi mukachi kenu, chizechene ngwe nunanyingika yenwene; 23iye, se amukunjikile kushi nikulita ni upale ni chinyingi cha Zambi, yenu nikumukwata ni moko ja yingulungulu, hinunamuhachila ha kulusu, hinunamushihi; 24mwenawo Zambi hanamuhindwisa, nikukasulula yikola ya kufwa, mumu te kahashile kukwachika ni tachi jacho. 25Mumu David yamba ha kutwala kuli iye ngwenyi,
Namwene mwe Mwene kumeso jami matangwa eswe;
mumu iye kwali ku kwoko liami lia chindume, hanga chichi kakokoloka;
26kashika, mbunge yami yevwile chiseke, ni limi liami lialikwijile;
ewa, musunya wami nawa kumuukahwima ni kutalatala:
27mumu yena kuchi kahichika alma yami mu Heteze,
chipwe kuchi katayiza Musandu we kumona kupola.
28Yena hiunangunyingikisa majila ja mwono; mukanguzalisa ni chiseke kumeso je.
29Mandumbu, ngutayizenu kama, nguhanjike kuli yenu ha kutwala kuli kalamba David, ngwami, Hanafu hanamufundu nawa, ni fuka lienyi hamwe ni yetu lili ndo musono. 30Kashika, se iye wapwile profeta, kananyingika ngwe Zambi walishingile kulu kuli iye ni shingo ngwo, Wa kuli ana jenya makatwamisa umwe ha ngunja yenyi; 31iye nikumona Shimbu-kanda, wahanjikile ha Uhindukilo wa mwe Kristu, ngwo, Kahichikile alma yenyi mu Heteze, chipwe musunya wenyi kuwamwene kupola. 32Yono Yesu, Zambi hanamuhindwisa, hali iye yetu eswe tuli yela. 33Kashika se hanamunangamisa ku kwoko lia chindume lia Zambi, ni se hanatambula kuli mwe Tata chilakenyo cha Spiritu Musandu, hanazukula chino, nunamono, nunevu haliapwila. 34Mumu David kazezukile mu malilu; hindu iye kanambe ngwenyi,
Mwe Mwene wambile kuli Mwene wami ngwenyi, Twama ku kwoko liami lia chindume,
35ndo mungusa akwa kole je chitwamo cha yiliato ye.
36Kashika, akwa zuwo lieswe lia Izalele anyingike chamwenemwene ngwo, Yono Yesu, nwamuhachilile ha kulusu, Zambi hanamupwisa ni Mwene ni Kristu.
37Achi, muze evwile chino alichokele mu mbunge, o ambile kuli Petulu ni apostolo ngwo, Mandumbu, kuchi mutulinga? 38Petulu wambile kuli ayo ngwenyi, Likonyekenu, anupapachise mutu ni mutu wa kuli yenu mu jina lia Yesu Kristu, ha ukonekeno wa milonga; mba kumunukatambula chawana cha Spiritu Musandu. 39Mumu kuli yenu chilakenyo kuchili, ni kuli ana jenu, ni kuli waze atwama kusuku, ni kuli waze eswe mwe Mwene Zambi yetu makatambika kuli iye. 40Iye ni maliji anji akwo washindakenyene chikolo, waashinjilile ngwenyi, Lilamwinenu ku chisemuko chino cha uhenge. 41Hohene waze atambwile liji lienyi kanawa, aapapachishile, awezele kuli ayo ha tangwa lize liene ngwe tununu atatu a atu. 42O anyongonwene mu longeso lia apostolo, nikuliendela, ni upatwilo wa mbolo, ni kulemba.
43Ni woma wejile hali atu eswe, ni yipekesa ni yilayi yinji ayilingile ku moko ja apostolo. 44Ni waze eswe afulielele apwile hamuwika, apwile ni yuma yeswe hamuwika. 45O alanjishile upite wo ni yikumba yo, ayanyinyine kuli eswe, nikulita ngwe mutu ni mutu wahonene. 46O, tangwa ha tangwa, nikunyongo nona ni mbunge yimuwika mu tembele, nikupatula mbolo ku zuwo ni zuwo, alile kulia cho ni uwahililo ni kutuwika cha mbunge, 47nikuhalisa Zambi, nikuwana vumbi kumeso ja atu eswe. Mba Mwene wawezele ku chikungulwila tangwa ha tangwa waze apwile nikulilamwina.
Currently Selected:
APOSTOLO 2: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
