UPUTUKILO 13
13
1Apalama yakatuka ku Engitu, iye ni mukwo-pwo, ni upite wenyi weswe ni Lote hamwe nenyi nikutalikisa ku Negeve.
2Apalama yapita yimuna, ni prata, ni oru yinji. 3Yenda mu jila yenyi chize ku Negeve ndo ku Mbetele, kuma kuze ajikile mbalaka yenyi hatangu, hakachi ka Mbetele ni Ehai. 4Kuma kuze kwa chilumbilo chize atungile hatangu. Kwenako Apalama yasanyika ha jina lia Yehova. 5Lote nawa yoze wendele ni Apalama, neye ni matanga jenyi a pembe ni a ngombe ni mbalaka jenyi. 6Kashika chifuchi kuchaatele akatwame hamuwika, mumu upite wo woka kashika kahashile kutwama hamuwika. 7Kwapwile kulitachika hakachi ka akwa kufunga yimuna ja Apalama ni akwa kufunga yimuna ja Lote. A-Kanana ni A-Perize achili mu chifuchi.
8Apalama yamba kuli Lote ngwenyi, Ngunaliumbu, kanda kupwa kulitachika hakachi ka yena ni yami, hakachi ka tufunga twe ni tufunga twami se tuli usoko. 9Chifuchi cheswe te kuchishiko kumeso je, nyi? Ngunaliumbu, lihandunune ni yami. Nyi yena muoya ku chimeso, ami munguya ku chindume. Nyi yena muoya ku chindume ami munguya ku chimeso. 10Mba Lote yahetula meso jenyi, yatala chana cheswe cha Yordau chatuchikile kweswe kanawa ni meya shimbu te Yehova kanda anongesa Sondome ni Ngomora; ngwe chála cha Yehova, ngwe chifuchi cha Engitu ha kutalikisa ku Zoare. 11Kashika Lote yalitongwela chana cha Yordau. Lote yatalikisa ku Chivumbuko, chocho yalihandununa umwe kuli mukwo. 12Apalama yatwama mu chifuchi cha Kanana, Lote yatwama mu membo a ha chana, yatutulula mbalaka yenyi ndo ku Sondome. 13Alioze atu a mu Sondome yingulungulu, akwa kuvulumiona Yehova kuhiana.
14Muze Lote halihandununa kuli iye Yehova yamba kuli Apalama ngwenyi, Hetula meso je utale chize kuma kuno watwama ku Norte ni ku Sule ni ku Chivumbuko ni ku Chitokelo. 15Mumu chifuchi chino cheswe unamono ngunakwehecho, ni kuli yena ni ku munyachi we ku miaka ya mutolo. 16Chikwo nawa mungwokesa munyachi we ngwe fufuta ya hashi. Nyi mutu mahasa kwalula fufuta ya hashi mba chocho mahasa kwalula munyachi we. 17Katuka wendese chifuchi ndusu, ni ku usuhe wacho ni ku utohe wacho mumu ngunakwehecho yena. 18Apalama yatutulula mbalaka yenyi, yaya, yatwama ku mitondo ya Mamare, yize yatwama mu Heprone. Kwenako yatungila Yehova chilumbilo.
Currently Selected:
UPUTUKILO 13: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
