UPUTUKILO 9
9
1Zambi yawahisa Noe ni anenyi, yamba kuli ayo, ngwenyi, Semenu, nuliokese, nukazalise hashi. 2Woma wa yenu ni mwongo wa yenu muukakwata tushitu eswe a hashi, ni tujila eswe a mu tetela, ni akwa kukalala eswe, ni yishi eswe a mu kalunga-lwiji. Eswe mu kwoko lie naakunjika. 3Tushitu eswe akwenda ni mwono kumapwa kulia che, ngwe nakuhele mafwo a wisu chocho ngunakwehe yeswe. 4Alioze kuchi kulia yifwo yize yikwete manyinga jayo, acho chinalumbunuka we mwono. 5Chikwo nawa manyinga jenu a mwono wenu mungwakala, ni kuli kashitu mweswe ni ku kwoko lia mutu, pundu we mwono wa mutu mungukala hali mutu ni mukwo mweswe. 6Mweswe mamwanga manyinga ja mutu neye mamumwanga manyinga jenyi kuli mutu. Mumu Zambi walingile mutu mu kulifwa chenyi. 7Alioze yenu, semenu, nukaliokese, nukapwe anji hashi nikulumbama.
8Zambi yahanjika ni Noe hamwe ni anenyi ngwenyi, 9Ni yami, usendo wami ngunakolesa ni yena ni munyachi we kulutwe. 10Ngunaukolesa ni akwa mwono eswe aze ali hamwe ni yena, ni tujila, ni yimuna, ni tushitu eswe a hashi hamwe ni yena, waze eswe matuhuka mu ulungu chipwe ni tushitu eswe a hashi. 11Kumungukolesa usendo wami ni yena, mba chichi kujimuna nawa musunya weswe ni sanga lia meya; ndo ku miaka ya mutolo kukuchi kupwa sanga lia kunongesa hashi. 12Mba Zambi yamba ngwenyi, Chino muchipwa chinyingi cha usendo uze mungukolesa hakachi ka yami ni yena ni akwa mwono aze eswe ali hamwe ni yena, ndo ku yisemuko yeswe. 13Hinasa kongolo yami mu lelwa, kumakapwa chinyingi cha usendo hakachi ka yami ni akwa hashi. 14Kumuchikapwa muze munguneha lelwa lia kuzulamina hashi mba kongolo makamoneka mu lelwa. 15Chocho mungwiwuluka usendo wami uze uli hakachi ka yami ni yena ni akwa mwono eswe a musunya weswe, mba meya kechi kapwa nawa sanga akanongese musunya weswe. 16Kongolo kumakapwa mu lelwa, ni yami mungutalako hanga ngukewuluke usendo wa mutolo hakachi ka Zambi ni akwa mwono eswe a musunya weswe atwama hashi. 17Zambi yamba kuli Noe ngwenyi, Che chinyingi chenacho cha usendo nakolesa hakachi ka yami ni musunya weswe watwama hashi.
18Ana a Noe aze atuhukile mu ulungu majina jo wano, Sheme ni Hame ni Yafwe. Hame iye tato ya Kanana. 19Wano atatu e ana a Noe mba kuli ayo atu azalishile hashi heswe.
20Noe waputukile kupwa njimi. Yalima munda wa uva. 21Yanwa ye vinyu, yazengewa. Chocho yalifukula mu mbalaka yenyi. 22Mba Hame tato ya Kanana yamona uselesele wa tato. Yaya akambulwile yayo ni mwanakwo haze. 23Mba Sheme ni Yafwe yanda hina alise ha yipaya yo, yenda unyimenyime akafuke uselesele wa tato. Meso jo anatale kunyima kamwene uselesele wa tato. 24Noe yalaula ku vinyu yenyi, yanyingika chize mwanenyi wa kanuke yamulinga. 25Yamba ngwenyi,
Kanana akashingiwe;
akapwe ndungo ya ndungo kuli ayayo.
26Yamba nawa ngwenyi,
Yehova Zambi ya Sheme akafumane;
Kanana akapwe ndungo yenyi.
27Zambi akatohese Yafwe,
akatwame mu mbalaka ja Sheme,
Kanana akapwe ndungo yenyi.
28Noe yatwama ni mwono kulutwe lia sanga lia meya makulakaji atatu a miaka ni makumi atano a miaka. 29Matangwa eswe a Noe apwile makulakaji livwa a miaka ni makumi atano a miaka, mba yafwa.
Currently Selected:
UPUTUKILO 9: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
