YOANO 20

1Achi ha tangwa litangu lia semana, Maria Ka-Mandala yaya ku fuka ha chimenemene, shimbu te kuchili milima, yamona liwe halichiza ku fuka. 2Yazomboka kashika, yaheta kuli Semone Petulu, ni kuli kambaji mukwo, yoze amuzangile Yesu, iye yamba kuli ayo ngwenyi, Hachiza Mwene ku fuka, kutwanyingikine kuze hamusa. 3Petulu kashika watuhukile ni kambaji mukwo, no ayile ku fuka. 4O aali azombokele hamuwika: ni kambaji mukwo wazombokele nikawashi kuhiana Petulu, waliangile kuheta ku fuka; 5iye ha kuhetama atalemo, yamona miya ya mahina a linyu yinapombo; hindu kanjililemo. 6Semone Petulu nawa yaheta nikumukaula, iye wanjilile mu fuka; yamona miya ya mahina a linyu yinapombo, 7ni chitambala chize chapwile ha mutwe wenyi, hi hamuwika ko ni miya ya mahina a linyu, alioze cha kuvunga homa ha kuhandunuka ukawacho. 8Hohene kashika kambaji mukwo nawa wanjilile, yoze waliangile kuheta ku fuka, neye wamwene, wafulielele. 9Mumu te kanda achinyingika chisoneko ngwe chamutamba kuhinduka hakachi ka afu. 10Tumbaji kashika ayile ku mahio.

11Alioze Maria wamanyine haze lia fuka nikulila: kashika shimbu machilila, yahetama, yatala mu fuka; 12yamona angelo aali, ni mazalo atoma kanatwama, umwe ku mutwe, ni mukwo ku yiliato, kuze wapombele mujimba wa Yesu. 13O yamba kuli iye ngwo, Pwo, kuchi te unalili? Iye yamba kuli ayo ngwenyi, Mumu hachiza Mwene wami, Chanyingikine kuze hamusa. 14Muze te hamba chino, watewulukilile kunyima, yamona Yesu kanamana, alioze kanyingikine ngwenyi, Iye Yesu. 15Yesu yamba kuli iye ngwenyi, Pwo, kuchi te unalili? Iya unafupu? Iye se kanashinginyeka ngwenyi, Yono njimi, yamba kuli iye ngwenyi, Mwene, kachi wamumbatanga kumwe, ngwambulwile kuze wamusanga, mungumutwala kweka. 16Yesu yamba kuli iye ngwenyi, Maria! Iye yatewulukila, yamba kuli iye mu limi lia Hepreu ngwenyi, Rabonai; Unalumbunuka ngwo, Longeshi yami. 17Yesu yamba kuli iye ngwenyi, Kanda ungukwata; mumu kanda nguchizezuka kuli mwe Tata: alioze yako kuli mandumbu jami, ukambe kuli ayo ngwe, Munguzezuka kuli Tata kanda Tatenu, ni Zambi yami kanda Zambi yenu. 18Maria Ka-Mandala yaya, yambulwila tumbaji ngwenyi, Hinamona mwe Mwene; hamba yino yuma kuli yami.

19Muze kashika hikwapwa chingoloshi ha tangwa lize, lie tangwa litangu lia semana, muze te hanajila mapito muze apwile tumbaji, mumu woma wa A-Yunda, Yesu wejile, wamanyine mukachi ko, yamba kuli ayo ngwenyi, Sambukila kuli yenu. 20Muze te hamba chino, walwezele kuli ayo moko jenyi ni lumbu lienyi. Tumbaji kashika awahililile muze amwene mwe Mwene. 21Yesu kashika wambile kuli ayo cheka nawa ngwenyi, Sambukila kuli yenu: chizechene ngwe Tata hanangutumu, chocho ni yami nawa ngunanutumu. 22Muze te hamba chino, wahwimine hali ayo, yamba kuli ayo ngwenyi, Tambulenu Spiritu Musandu: 23eswo munwakonekena milonga yo, kumaakonekenayo; eswo munukasa milonga yo, kumuyikashiwa.

24Achi Tomase, umwe wa kuli kumi ni aali, jina lienyi likwo, Ndilimu, kapwileko hamwe no muze Yesu ejile. 25Tumbaji akwo kashika ambile kuli iye ngwo, Hitwamona Mwene. Alioze iye wambile kuli ayo ngwenyi, Chichi kufuliela shina mungumona mu moko jenyi yito ya mbambo, shina mungusa munwe wami mu yito ya mbambo, shina mungusa kwoko liami mu lumbu lienyi.

26Kulutwe lia matangwa nake, tumbaji twenyi apwile cheka nawa muchima lia zuwo, ni Tomase hamwe no, mapito te a kwajila. Yesu yeza, yamana mukachi ko, yamba ngwenyi, Sambukila kuli yenu. 27Kulutwe lia chize yamba kuli Tomase ngwenyi, Neha munwe we, utale moko jami, neha kwoko lie, ulise mu lumbu liami: kanda upwa kushi Ufulielo, alioze pwako mukwa kufuliela. 28Tomase wamukumbulwile ngwenyi, Mwene wami kanda Zambi yami. 29Yesu yamba kuli iye ngwenyi, Mumu hiwangumona hiwafuliela; kawaha waze kangumwene hindu hanafuliela.

30Yilayi yinji yikwo kashika Yesu wayilingile kumeso ja tumbaji twenyi, yize kuyasonewene mu mukanda uno. 31Alioze yino yinasonewa, hanga nukafuliele Yesu iye mwe Kristu, mwe Mwana Zambi; hanga ha kufuliela, nukapwe ni mwono mu jina lienyi.

Currently Selected:

YOANO 20: Csa

Highlight

Copy