YOANO 5

1Kulutwe lia yino yuma kwapwile chiwanyino cha A-Yunda; ni Yesu wakandukile ku Yerusaleme.

2Achi, muchili mu Yerusaleme ku chikolo cha mapanga, Chitende, mu limi lia Hepreu ngwo, Mbeteseta, chili ni yingalala yitano. 3Muze mwene mwapombele chizavu cha mieji, ni tupuputa, ni yilema, ni akwa kusosewa, te kanatatatata kufuza cha meya: 4mumu mungelo wa Mwene wahulumukine ha mwaka ni mwaka ku Chitende, nikufujisa meya: ni mweswawo waliangile kunjilamo kulutwe lia kufuza cha meya, wapwile mungunu ku musongo weswawo wakwachikile nawo. 5Mba kwapwileko umwe mutu, te hayiza makumi atatu a miaka ni miaka nake. 6Muze Yesu amumwene kanapombo, wanyingikine iye wapwile kulu ni miaka yinji chocho, yamba kuli iye ngwenyi, Unazange kupwa mungunu, nyi? 7Mweji wamukumbulwile ngwenyi, Mwene, mutu chishi nenyi, hanga muze meya mafuza, akangunjise mu Chitende; alioze shimbu mungwiza, mukwo mapalumuka kulutwe liami. 8Yesu yamba kuli iye ngwenyi, Katuka, anda chalo che, wende. 9Haze hene mutu walumukine mungunu, wanjile chalo chenyi, wendele.

Achi, tangwa lize liapwile tangwa lia Sambata. 10Kashika A-Yunda ambile kuli yoze wahindukile ngwo, Musono lie tangwa lia Sambata; kuchalitele ni shimbi kumbata chalo che. 11Waakumbulwile ngwenyi, Yoze wangupwisanga mungunu, mwenawo kambanga kuli yami ngwenyi, Anda chalo che, wende. 12Amuhulile ngwo, Mutu yoze wambanga kuli yena ngwenyi, Anda chalo che, wende, iya? 13Alioze yoze wahindukile, kamunyingikineko; mumu te Yesu hasewunukamo, se kwapwile mbunga. 14Kulutwe Yesu yamuwana mu tembele, yamba kuli iye ngwenyi, Tala, hiwapwa mungunu: kanda ukavulumuna nawa, kuchina chuma chipi chahiana muchikuwana. 15Yoze mutu wayile, wambulwilile A-Yunda ngwenyi, Iye Yesu yoze wangupwisanga mungunu. 16Ha chikuma chino A-Yunda ahungumionene Yesu, mumu walingile yino yuma ha tangwa lia Sambata. 17Alioze Yesu waakumbulwile ngwenyi, Tata kalinga ndo haliapwila, ni yami nakulinga. 18Ha chikuma chino kashika A-Yunda afupile kuhiana kumushiha; kuchapwile mumu hatangula Sambata wika, ka, alioze wambile nawa ngwenyi, Zambi iye Tata, nikulitesa ni Zambi.

19Yesu kashika waakumbulwile, ngwenyi, Pundu, pundu, ngunambe kuli yenu ngwami, Mwe Mwana keshi kuhasa kulinga nichimwe ukawenyi shina cheswacho mamona mwe Tata kakulinga: mumu yuma yeswayo akulinga iye, yino nawa mwe Mwana kakulinga chizechene. 20Mumu mwe Tata kakufwila mwe Mwana, kakumulweza yuma yize yeswe iye mwene wakulinga: iye kumakamulweza yitanga yinene yahiana yino, hanga nukakomoke. 21Mumu chizechene ngwe mwe Tata kakuhindwisa afu, kakwapwisa ni mwono, chocho nawa mwe Mwana kakwapwisa ni mwono waze mapala. 22Mumu chipwe mwe Tata keshi kupatwila niumwe, alioze hanahana upatwilo weswe kuli mwe Mwana; 23hanga eswe akalemese mwe Mwana, chizechene ngwe akulemesa mwe Tata. Yoze keshi kulemesa mwe Mwana keshi kulemesa mwe Tata, yoze wamutumine. 24Pundu, pundu, ngunambe kuli yenu ngwami, Yoze mevwa liji liami, akafuliele yoze wangutumine, mwono wa mutolo ali nawo, kechi kanjila mu upatwilo, alioze hanakatuka ku kufwa, hananjila mu mwono.

25Pundu, pundu ngunambe kuli yenu ngwami, Ola muyiza, ni haliapwila hiyaheta, muze afu makevwa liji lia mwe Mwana Zambi; ni waze mevwa kumakapwa ni mwono. 26Mumu chizechene ngwe mwe Tata mwono akwete muli iye mwene, chocho nawa wahanyine kuli mwe Mwana nawa kupwa ni mwono muli iye mwene. 27Hanamwehe chiyulo cha kulinga upatwilo, mumu iye mwe Mwana Mutu. 28Kanda nukomoka ha chino: mumu ola muyiza, muze waze eswe ali mu matuka makevwa liji lienyi, 29makatuhuka; waze hanalingi yipema ku uhindukilo wa mwono; ni waze hanalingi yipi ku uhindukilo wa upatwilo.

30Chishi kuhasa kulinga nichimwe ukawami: ngwe nakwivwa, chocho nakupatula: ni upatwilo wami wa ululi; mumu chishi kufupa upale wami, alioze upale wa yoze wangutumine. 31Kachi mungushindakenya hali yami mwene, kachi Shindakenyo yami hi yamwenemwene ko. 32Yoze wakushindakenya hali yami, weka; ngunanyingika Shindakenyo yize akushindakenya hali yami yamwenemwene. 33Hinunatumu kuli Yoano, iye hanashindakenya ha umwenemwene. 34Alioze Shindabakayo yize nakutambula, hi ya kuli atu ko; alioze ngunambe yino yumamabanga nukalilamwine. 35Iye wapwile ndaya ya kuyila, ya kupanguka; ni yenu nwapalile ha shimbu kulikwiza mu pangu lienyi. 36Alioze Shindakenyo yize nguli nayo yinahiana yize ya Yoano; mumu yitanga yize anguhele Tata, hanga ngukayimanunune, yitanga yiyene nakulinga, kuyakushindakenya hali yami ngwo, Tata hanangutumu. 37Ni mwe Tata yoze wangutumine, iye mwene hanashindakenya hali yami. Chipwe kunwevwile liji lienyi niumwe mwaka, chipwe kunwamwene kusoloka chenyi. 38Maliji jenyi katwamine muli yenu; mumu yoze amutumine iye, kunushi kumufuliela. 39Hengulenu mu yisoneko, mumu mwe muze nunashinginyeka nuli ni mwono wa mutolo; neyo yize yakushindakenya hali yami; 40alioze kunusolo kwiza kuli yami, hanga nukapwe ni mwono. 41Chishi kutambula uhenya kuli atu. 42Alioze nakununyingika ngwe kunushi zango lia Zambi muli yenu. 43Nguneza mu jina lia mwe Tata, kunushi kungutambula: kachi mukwo meza mu jina lienyi mwene, munukamutambula. 44Ngwe kuchi munuhasa kufuliela, yenu, nwakulichichimieka umwe kuli mukwo ni mukwo, kunushi kufupa uhenya uze wa kuli mwe Zambi umuwika. 45Kanda nukashinginyeka ngwe yami mungukanusuma kuli Tata; kwali yoze wakunusuma ngwami, Mose, yoze kuli iye nwakutalatala. 46Mumu kachi nwafulielele Mose, kachi nwangufuliela yami; mumu wasonekene hali yami. 47Alioze kachi kunushi kufuliela yisoneko yenyi, ngwe kuchi munufuliela maliji jami?

Currently Selected:

YOANO 5: Csa

Highlight

Copy