YOANO 7
7
1Kulutwe lia yino yuma, Yesu wendele mu Ngalileya; mumu kazangile kwenda mu Yundeya, mumu A-Yunda afupile kumushiha. 2Achi, chiwanyino cha A-Yunda, chiwanyino cha yisakila, chapwile hakamwihi. 3Ana-akwo kashika ambile kuli iye ngwo, Katuka kuno, uye ku Yundeya, hanga tumbaji twe nawa akamone yitanga ye, yize wakulinga; 4mumu niumwe malinga chimwe ku tenga, kachi anafupu kufumana kuli eswe. Kachi wakulinga yino yuma, lisolole kuli akwa hashi. 5Mumu chipwe ana-akwo kamufulielele. 6Kashika Yesu yamba kuli ayo ngwenyi, Mwaka wami kanda uchiheta; alioze mwaka wenu kuwalulika matangwa eswe. 7Akwa hashi kahashile kunuvwila kole; alioze yami kakunguvwila kole, mumu nakushindakenya hali ayo, ngwami, Yitanga yo ya ungulungulu. 8Kandukenu ku chiwanyino chino; yami chakandukile ku chiwanyino chino haliapwila; mumu mwaka wami kanda uchimanunuka. 9Muze te hamba yino yuma kuli ayo, watwamine mu Ngalileya.
10Alioze muze te ana-akwo hakanduka, hohene iye mwene nawa wakandukile ku chiwanyino, hi kumeso ja atu eswe ko, alioze ngwe ku tenga. 11Kashika A-Yunda amufupile ku chiwanyino, o ambile ngwo, Kulihi ali? 12Kwapwile kulinyenyeta chinji hali iye hakachi ka mbunga; amwe ambile ngwo, Iye mupema; akwo ambile ngwo, Ka, alioze kakupiangula mbunga. 13Alioze niumwe wahanjikile mwazu ha kutwala kuli iye mumu ha woma wa A-Yunda.
14Alioze muze hapwile hakachi ka chiwanyino Yesu wakandukile ku tembele nikulongesa. 15Kashika A-Yunda akomokene, ngwo, Ngwe kuchi yono analongoloka se kalilongesele nilimwe tangwa. 16Kashika Yesu waakumbulwile, ngwenyi, Longeso liami hi nihami ko, alioze lia yoze wangutumine. 17Kachi umwe mapala kulinga upale wenyi, kachi makanyingika ha kutwala ku longeso, shina lia kuli Zambi, shina nakuhanjika cha kuli yami mwene. 18Yoze wakuhanjika cha kuli iye mwene kakufupa uhenya wenyi mwene: alioze yoze wakufupa uhenya wa yoze wamutumine, mwenawo wamwenemwene, ni uhenge kuushimo muli iye. 19Mose wanuhele shimbi, nyi? Hindu niumwe wa kuli yenu wakulinga shimbi. Kuchi te nunafupu kungushiha? 20Mbunga akumbulwile ngwo, Yena ndemoniu ukwete: iya unafupu kukushiha? 21Yesu waakumbulwile ngwenyi, Nalingile chitanga chimuwika mba yenu eswe nunachikomoka. 22Kashika Mose hananwehe ungalami (kuchapwile ngwe wa kuli Mose, alioze wa kuli tulamba); ni ha tangwa lia Sambata nwakupwisa mutu ngalami. 23Kachi mutu matambula ungalami ha tangwa lia Sambata, hanga kechi katangula shimbi ya Mose; nunevu matoto ni yami, mumu napwishile mutu mungunu liakulu ha tangwa lia Sambata, nyi? 24Kanda nukapatula nikulita ni meso jenu, alioze patulenu upatwilo wa ululi.
25Amwe kashika a kuli waze a ku Yerusaleme ambile ngwo, Kuma, yono hi yoze ko akufupa kumushiha, nyi? 26Kumanyi, kanahanjika mwazu, o keshi kwamba nichimwe kuli iye! Kuma, akwa kuyula chamwenemwene kananyingika ngwo, Iye mwe Kristu, nyi? 27Alioze yono tunanyingika kuze anakatuka; alioze muze Kristu meza niumwe manyingika kuze makatuka. 28Yesu wakololokele mu tembele, nikulongesa ngwenyi, Nunangunyingika; nunanyingika kuze ngunakatuka nawa; chalinjilile yami mwene, alioze yoze wangutumine, iye wamwenemwene, mwenawo kunwamunyingikine. 29Alioze ngunamunyingika; mumu kuli iye ngunakatuka, iye wangutumine. 30Afupile kashika kumukwata, alioze niumwe kamukwachile, mumu ola yenyi kanda yichiza. 31Alioze anji a ku mbunga amufulielele, o ambile ngwo, Muze Kristu meza malinga yilayi yahiana yize yono hanalingi, nyi?
32A-Fwariseu evwile mbunga nikulinyenyeta yino yuma ha kutwala kuli iye; asasendote akwa lutwe ni A-Fwariseu atumine tupita, hanga akamukwate. 33Yesu kashika wambile ngwenyi, Hindu shimbu likepe nguli hamwe ni yenu, mba munguya kuli yoze wangutumine. 34Kumunukangufupa, kunuchi kanguwana: ni kuze nguli kunwahashile kwizako. 35A-Yunda kashika aliambile umwe kuli mukwo ni mukwo ngwo, Kulihi yono maya mba kutuchi kamuwana? Maya kuli waze anamwangashana hakachi ka A-Ngresia, makalongesa A-Ngresia, nyi? 36Liji lika lino anambe ngwenyi, Kumunukangufupa, kunuchi kanguwana; ni kuze nguli kunwahashile kwizako?
37Achi, ha tangwa lia kusula, lie tangwa linene lia chiwanyino, Yesu wamanyine nikukololoka ngwenyi, Kachi umwe mevwa pwila, eze kuli yami, anwe. 38Yoze mangufuliela, ngwe chisoneko hichinambe ngwo, Muchima lienyi njiji ja meya a mwono kumujituhwoka. 39Alioze chino wambile ha kutwala kuli Spiritu, yoze waze akufuliela kuli Kristu himatambula: mumu Spiritu kanda achiza; se Yesu kanda anjila mu uhenya wenyi.
40Amwe a kuli mbunga kashika muze evwile maliji ano, ambile ngwo, Yono chamwenemwene mwe profeta. 41Akwo ambile ngwo, Yono mwe Kristu. Alioze akwo ambile ngwo, Kuma, Kristu makatuka ku Ngalileya, nyi? 42Chisoneko kuchambile ngwo, Kristu makatuka ku munyachi wa David, ni ku Mbeteleme, chihunda kuze apwile David, nyi? 43Kashika kwapwile kulihandununa hakachi ka mbunga mumu hali iye. 44Mba amwe azangile kumukwata; alioze niumwe kamukwachile.
45Kashika tupita ahilukile kuli asasendote akwa lutwe ni A-Fwariseu; o ambile kuli ayo ngwo, Kuchi te kunwamunehene? 46Tupita akumbulwile ngwo, Mutu kahanjikile chocho niumwe mwaka. 47A-Fwariseu kashika akumbulwile ngwo, Ni yenu nawa nunapianguka, nyi? 48Umwe wa kuli akwa kuyula hanamufuliela, nyi? Chipwe wa kuli A-Fwariseu, nyi? 49Alioze mbunga yino kanyingikine shimbi kashingiwa. 50Nikondemu yamba kuli ayo (yoze wejile kuli Yesu ha ufuku, se wapwile umwe wa kuli ayo), 51ngwenyi, Shimbi yetu muyipatwila mutu shina hatangu mamwivwa, akanyingike chize kakulinga, nyi? 52Amukumbulwile ngwo, Yena nawa uli wa ku Ngalileya, nyi? Hengula, utale, ku Ngalileya keshi kukatuka profeta niumwe.
53Ni mweswe wayile ku zuwo lienyi:
Currently Selected:
YOANO 7: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
