LUKASI 21

Pombai mpanyomba sambaʼa weʼa bemba

21:1-4

(Mrk. 12:41-44)

1Ndakomatasi i Yesu waʼa ntau anu mesua ri Banua i mPue, ndakita waʼa ntau koreʼe manawu doi ri peti mpombai panyomba. 2Ndakita woʼu sambaʼa weʼa bemba anu kaasi-asi manawu radua doi rimisi. 3Ndatoʼo i Yesu, “Ndipedongeka, weʼa bemba seʼi anu maria mpodago panyombanya nawai painaka waʼa ntau sondo setu. 4Maka anu napanyombaka waʼa ntau sondo setu podo peruunya ungka ri anu da napake. Paikanya weʼa bemba anu kaasi-asi seʼi, mampepombaikamo pura-pura ri anu lawi da napake ri katuwunya.”

I Yesu mampau kono da kagero Banua i mPue

21:5-6

(Mat. 24:1-2, Mrk. 13:1-2)

5Ri padonge i Yesu paunde ntau peawa Banua i mPue, ewambeʼi kadolidi mbatunya pai panyomba ntau mpengaya-ngaya ri Pue Ala, ndatoʼo i Yesu ri tau seʼe, 6“Mosumo temponya pura-pura anu ndikita setu da magero, bareʼemo da reʼe mau saogu watu ireʼi anu da njau tepatapi ri kareʼenya.”

Kapari pai pejeani

21:7-19

(Mat. 24:3-14, Mrk. 13:3-13)

7Napeoasi ntau seʼe ri Yesu, “Guru, impiamo da pewalinya pura-pura setu? Pai nunjaa petondoninya ane jelamo tempo da pewalinya?”

8Mesono i Yesu, “Ndipakadago neʼe boi komi ndatengosi. Maka maria tau anu da jela mampake toʼo-Ku da natoʼo, ‘Yakumo seʼi! pai jelamo temponya.’ Paikanya neʼe ndiaya tau seʼe. 9Pai neʼe ndipokaeka ane ndidonge bambari mpoʼiwali, pai ponjaʼati. Maka pura-pura setu sangaya-ngaya da mewali riunya. Paikanya incetu banya posokinya jelamo eo kiama.”

10Ndasumparaka i Yesu pasimbaju-A ndatoʼo, “Tau salemba da mampoʼiwalika tau anu salembanya pai negara anu sambaʼa da maungku negara anu ntaninya. 11Ri mbeʼi-mbeʼi da mewali lindugi anu maʼai, oro pai juʼa lele. Pai da mewali waʼa anu ndapojingki pai mampakaeka raya ri yangi. 12Paikanya ri kabareʼepanya mewali pura-pura setu, komi da ndasoko pai da ndajeani. Komi da ndakeni ri suara ntopobotusi ri raya banua mpekakai pai da ndapari ntarunggu. Pai komi da ndakeni ri suara waʼa mokole pai to poparenta ua mancuru palulumi Yaku. 13Iretumo tempo anu madago da ndipampetumbu Nuntu ngKatuwu ungka ri Pue Ala. 14#Luk. 12:11-12 Ndipakaroso rayami, neʼe ipu rayami manawa-nawa nunjaa anu da ndipesonoka. 15Yaku da mantotorakaka komi waʼa mpau pai kaloʼe ndaya setu; rantani bereʼe mau sambaʼa ri oyo iwalimi mangkoto maewa bara mancapu nunjaa anu nditoʼo. 16Komi da nanawusaka inemi pai papami, kasangkompomi pai waʼa njaʼimi. Santila komi da napepate ntau seʼe. 17Komi da napobanciika ntau ua pangalulumi Yaku. 18Paikanya mau santoko wuyuami bareʼe da tetaji. 19Ane bareʼe mogencu pai rodo rayami, komi da ndasorepaka.”

Kagero ngkota Yerusale

21:20-24

(Mat. 24:15-21, Mrk. 13:14-19)

20“Ane ndikita kota Yerusale nalimbu ncape iwali, da manotomo ri rayami mosumo da kageronya. 21Ri tempo setu waʼa ntau anu mampeari tana Yudea da molonco ri wawo buyu. Waʼa ntau anu lau ri raya ngkota da mesuwu, pai waʼa ntau anu reʼe ri sambalikunya neʼe boi mesua ri raya ngkota. 22#Hos. 9:7 Maka ri tempo setumo eo pampakanoto popahuku, ua ewanceʼe da mewalimo ewa anu ndaʼuki ri Sura Magali. 23Ara maparisa da naepe waʼa mbeʼa anu manee koronya ri tempo setu, pai waʼa ine anu ntongo mampasusu ongaanya. Da maʼai kaparinya ri tana seʼi, waʼa ntau da ndahuku i mPue Ala. 24Reʼe tau anu da mate ri mata mpenai, pai reʼe tau anu da ndatawani ri tana ntau; pai kota Yerusale da naija-ijaki ntopolamoa rantani pusa tempo anu ndapepombaika i mPue ri tau seʼe.”

Karata i Ana Manusia

21:25-28

(Mat. 24:29-31, Mrk. 13:24-27)

25 # Yes. 13:10, Yeh. 32:7, Yo. 2:31, Pepat. 6:12-13 “Da reʼe woʼu ndakita petondoni ri ogu eo, wuya pai betuʼe; waʼa ntau ri lino da maeka pai da ipu rayanya madonge pewakuu pai kaposo-poso balumba ndopo ntasi. 26Da maʼai kaeka ndaya ntolino mangkita anu da mewali ri sambawo lino seʼi, maka waʼa ngkuasa ri tongo ndaoa da sigaliganggomo. 27#Dan. 7:13, Pepat. 1:7 Maka ri tempo setumo da karata i Ana Manusia meyapi-yapi limu mampatongawa kuasa pai peawa anu bangke. 28Ane montepuʼumo mewali pura-pura setu, ndipembangumo pai ndiwangutakamo woʼomi, maka mosumo temponya komi da ndasorepaka.”

Totoraka ewa katuwu ngkaju ara

21:29-33

(Mat. 24:32-35, Mrk. 13:28-31)

29Ndapau woʼu i Yesu ri tau seʼe sambaʼa nuntu mporapa ewaseʼi, “Peolemo mpodago kaju ara pai waʼa ngkaju anu ntaninya. 30Ane ndikita montepuʼumo mesuwu londenya, inceʼe petondoni mosumo tempo mporeme. 31Ewanceʼe seʼe ri pangkitami wuwunya anu mewali, da manotomo ri rayami, mosumo da pepatongawa poparenta i mPue Ala.

32Da ndipaincani! Pura-pura setu da mewali ri kabareʼepanya pura mate waʼa ntau tuwu salapi seʼi. 33Yangi pai lino da paya paikanya nuntu-Ku bareʼe da bali rantani masae-sae.”

Da ndiponcoro-ncoro

21:34-38

34“Neʼe leba komi, podo mampasilolongani posusami, manginu-nginu baru pai mopancua bara podo mampari wawo anu da ndikatuwuka; painaka bereʼe pompatokami boi rata ncoroba eonya. 35Maka eo setu ewa patambo gala ntau pura-pura ri wawo lino seʼi. 36Ndiponcoro-ncoromo, ndipekakaimo neʼe bali-bali da ndipangkoto maliunaka pura-pura anu da mewali setu pai naka da ndileʼo mombesuara pai i Ana Manusia.”

37 # Luk. 19:47 Ane ri eo i Yesu motuntu ri Banua i mPue, pai ane mawengi njoʼu sambengi ri Buyu ngKaju Lana. 38Sampowuro-sampowuro pura-pura tau tepasambaka ri Banua i mPue da mampedongeka pompaguru i Yesu.

Currently Selected:

LUKASI 21: LAIPMF

Highlight

Copy