लूका 1
1
1श्रीमान् थियुफिलुस जी, नमंष्कार! बैजाऐ भहिते आदमी ऐ ईनू बातो का जुण्जी अमाँरे बीच दी बिती, ईन्दे का इतिहास लिख्णों का काँम-काज़ करी, 2जेष्णों के तिन्ऐं जुण्जे आगे ही शुभे ईनू बातो के दे:ख्णों वाल़े, अरह् बचन के सेवक थिऐ, तिन्ऐं ही आँमों तड़ी पईचाल़ी। 3ईन्देंखे, मुँऐं आपु भी ऐजी बादी बातो ठीक-ठीक सुई करियों जाँणी, के तिनू बादी बातो का पुरा हाल शुरू ही शुबा सुवाँ करियों दे:खी-भाल़ियों तुओं खे लिखूँ, 4जू तुँऐं ऐजो जाँणीं पाँव, के ऐजी बादी बातो जिन्दे के तुँऐं शिक्क्षा पाऐ थंऐ, सेजी केष्णी साची अटल़ असो।
संत्त-यूहन्ना नहाँण-नहाँणों वाल़े के जन्म का ऐलान
5यहूदिया के राजा हेरोदेस के शाष्ण दो अबिय्याह के दल़ो दा ज़कर्याह नाँव का ऐक याजक थिया, अरह् तेस्की घरवाल़ी हारून की गड़ी के थी, जियारो नाँव इलीशिबा थियो। 6से दुईनें पंणमिश्वर के साम्णें धरमाँईत्त थिऐ, अरह् प्रभू के बादी अज्ञाँ-निय्म, माँनों थिऐ, से बेकसूर चाल चाल़्णों वाल़े थिऐ। 7तिनके किऐ आगाजाऐतरी अलाद ने थी, किन्देखे के इलीशिबा शूनी थे, अरह् से तबे दुईने बुड़ा-बुड़ी हऐ रूऐ थिऐ। 8जबे तेसी दल़ के मुताबिक ज़कर्याह खे ऐकी देसो की याजक बंण्णों की बारी आऐ, तअ तेने पंणमिश्वर के साम्णें भेंट चड़ाऐ लई थी। 9तबे याजक के रीति के मुँताबिक तेस्के नाँव की पार्ची निकल़ी, के प्रभू की देऊँठी दो ज़ाऐयों जोत्त धूप जल़ाव। 10अरह् धूप बाल़्णों के बख्ते बाँईडे दाई बैजाऐ लोगे कठे हऐयों प्रार्थना करी लऐ थी। 11तबे ज़कर्याह के साम्णें प्रभू का ऐक दूत्त देऊँठी दा पुजो-बैदी के सुवें ढबै पर्गट हऐयों खड़ा हुवा, तअ तेस्के तेसी दे:खाई पड़ा। 12अरह् ज़कर्याह तेसी स्वर्गदूत्त दे:ख्यों डरी गुवा, अरह् से शूंन हऐयों आईना-आईना गुवा। 13परह् स्वर्गदूत्त ऐ तेस्खे बुलो, “हे ज़कर्याह डरे ने, किन्देंखे के तेरी प्रार्थना शुणी थऐ, अरह् तेरी घरवाल़ी इलीशिबा के ऐक बैटा हंदा, अरह् तू तेस्को नाँव यूहन्ना थुऐ। 14तुऐं आनन्दित अरह् खुशी हंदे, अरह् कंऐयों तेरे बैटे के जन्म हंणों के कारण आनन्द अरह् खुशी मनाँदे। 15किन्देंखे के सेजा बालक प्रभू की नंजरी दा बड़ा माँना ज़ादा, से दाख्ह-अंगूरोह् का रंस अरह् सूर कंद्दी ने पींदी, परह् से माँ, की कुँखीं शा ही पबित्र-आत्त्मा शा भरा अंदा हंदा। 16अरह् इस्राएल की गड़ी-बंष मुँझ शे से बैजाऐ लोग तिनके प्रभू पंणमिश्वर की ढबै फेरी देंदा। 17से ऋषी-एलिय्याह के आत्त्मा अरह् शक्त्ति दा प्रभू के आगे-आगे चाल्णों वाल़ा बंणियों, बाबा का मंन अलादी की ढबै फेरी देंदा; अरह् अज्ञाँ ना माँनणों वाल़े लोग धरमाँईतों की संम्झ गाशी लियाँदा, अरह् प्रभू खे ऐक खास प्रजा तियार करदा।” 18ऐजो शुणियों ज़कर्याह ऐ स्वर्गदूत्त शो पुछो, “हाँव ऐजो केशो दाँई ज़ाणू? किन्देंखे के हाँव तअ बूड़ा असो; अरह् मेरी घरवाल़ी भे बूड़ी हंऐ रंऐ।” 19स्वर्गदूत्त ऐ तेस्खे जबाब दिता, “हाँव जिब्राईल असो, हाँव हमेशा पंणमिश्वर के साम्णें खड़ा रंऊँ”, अरह् मुँह पंणमिश्वर ऐ ताँव कैई ऐजी खुषख्बरी का प्रचार शुणाँणों खे डियाल़ी थुवा।
20अरह् दे:ख, जेस देसो तोड़ी ऐजी बातो पुरी ने हों, तेसी देसो तोड़ी तू गूँगा रंहिदा, किन्देंखे के मेरी बात जुण्जी आप्णी बख्तो गाशी पुरी हंदी, तिनका तुऐं बिश्वाष ने करी थई। 21बाँईडे दाँई लोगो के बैसम्झी ज़ाऐ रंऐ थी, के ज़कर्याह के देऊँठी दी ऐत्री देर कैई लागी? 22जबे से पूजो कैई शा बाँईडा आया, तअ तेस्के ऊबो ने बुलाई: तबे लोगे जाँणी पाव के ऐस्खे देऊँठी दा किऐ दर्शण हऐयों चंच्का हऐ रूवा; अरह् से तिनू लोगो आरी संनकाऐयों बात करदा लागा, अरह् से तबे गुँगा ही बंणा रूवा। 23जबे तेस्का भिना सेवा का बख्त पुरा हुवा, तअ सेजा ज़कर्याह आप्णें घरे हुटा। 24थुड़ै देसो पाछी तेस्की घरवाल़ी इलीशिबा के सूहंणों हुओ; अरह् ऐजो बुलियों पाँच भीनें तोड़ी से ऐकली रंऐ, 25के आदमी मुँझी मुँह बेस्त्ती हंणों शी बंचाऐ, अरह् “प्रभू ऐ मुँह गाशी ऐजी आप्णी कृपा-रंय्म की नंजर थंऐयों; मुँखे ऐष्णों करी थो।”
यीशू मसीया के पय्दा हणों के बरंम्बाणीं
26इलीशिबा के छठवें भीनें लाग्णों गाशी पंणमिश्वर की ढबै शा जिब्राईल स्वर्गदूत्त गलील के नासरत नंगर दा, 27ऐक कन्याँ-कुवाँरी कैई डेयाल़ा। जियारी सगाऐ यूसुफ नाँव के आदमी आरी पाकी हऐ रंऐ थी, जुण्जा के राजा दाऊद के घराने गड़ी-बंष का मंरोद थिया; अरह् तियों कुवाँरी-कन्याँ को नाँव मरियम थियों। 28मरियम कैई शो चंगराऐयों पर्गट हंऐयों स्वर्गदूत्त ऐ बुलो, “आँनन्द-खुशी अरह् जींत्त तेरी असो; जियों गाशी ईश्वर के कृपा हऐ! प्रभू तेरी गईलो असो!” 29ऐजो शुणियों से बैजाऐ डरी गऐ, अरह् सूच्दी लागी, के “ऐजो केष्णों बराल़िणों असो?” 30स्वर्गदूत्त ऐ तियोंखे बुलो, “हे मरियम, डरे ने, किन्देंखे के पंणमिश्वर की कृपा ताँव गाशी हऐ रंऐ। 31अरह् दे:ख! तू पेटभारी हंऐदी, अरह् तेरे ऐक बैटा हंदा, तू तेस्को नाँव यीशू थुऐ। 32से महाँन हंदा, अरह् तेस्खे परंम-पिता पंणमिश्वर का बैटा बुल्दा; अरह् प्रभू पंणमिश्वर तेस्के बाबा राजा दाऊद को सिंगास्हंण तेस्खे देंदा। 33अरह् से याकूब के घराने गड़ी-बंष गाशी सदा राज्य करला; अरह् तेस्को राज्य कद्दी भे खत्त्म ने हंदी।” 34मरियम ऐ स्वर्गदूत्त खे बुलो, “ऐजो कियो-कियो होंदो? हाँव तअ मंरोद जाँण्दी भे आथी ने।” 35स्वर्गदूत्त ऐ तियोंखे जबाब दिता, “पबित्र-आत्त्मा ताँव गाशी ऊतर्दे, अरह् (परंम-पिता पंणमिश्वर) के शक्त्ति ताँव गाशी छया कर्दे, ईन्देखे के सेजा बालक जू पय्दा हंणो वाल़ा असो, से पबित्र हंदा; तेस्खे पणमिश्वर का बैटा बुल्दा। 36अरह् दे:ख, तेरे कुड़्बे के इलीशिबा के भे बुढ़ापे दा बैटा हंणो वाल़ा असो, से सेजी जियों खे शुनी बुली थी, तियाँरे ऐबे छठा भीना असो। 37किन्देंखे के जुण्जा बचन पंणमिश्वर के ढबै शा हों, सेजा बचन कद्दी भे निष्फल़ ने हंदा।” 38मरियम ऐ बुलो, “दे:ख, हाँव प्रभू के दासी असो, मुँखे तेरे बचन के हिसाब शो हुओ चेंई।” तबे स्वर्गदूत्त तियों कैई शा आगू हुटा।
मरियम इलीशिबा कैई भेंटिंदी हुटी
39तबे तिनू देसे मरियम बीऊँजी अरह् शट्टे ही पहाड़ी देश दी यहूदा के ऐक नंगर दे हुटी। 40अरह् ज़कर्याह कागी हुटियों इलीशिबा खे नमंष्कार करा। 41जैई तिऐं इलीशिबा ऐ मरियम के नमंष्कार शुणीं, तेई तियारे पैटो दो नहाँन्ड़िया छाटियो; अरह् इलीशिबा तेख्णी पबित्र-आत्त्मा के शक्त्ति लई भरपूर हऐ गऐ। 42अरह् तिऐं बैजाऐ जुराल़ो लेल्लयाऐयो बुलो, “तू तिरोंई मुँझी भाँगोईंत असो! अरह् तेरे पेटो का जाँम्णाँ भे भागोईत असो! 43अरह् ऐजी कृपा मुँह गाशी कैथे शी हऐ, के मेरे प्रभू के माँ मुँह कैई आऐ? 44दे:ख जैई तेरा नमंष्कार मेरे काँने पड़ा, तैई मेरो नहाँन्ड़िया मेरी पेटो दो खुशी शो छाटियो। 45भागोईत असो! सेजा जेने बिश्वाष करा, के जुण्जी बातो प्रभू के ढबे शी बुली गई, सेजी परम्पार हंदी।”
मरियम को गीत,
46तबे मरियम ऐ बुलों,
“मेरे पराँण प्रभू के बड़ियाऐं करह्।
47अरह् मेरी आत्त्मा मेरे छुटकारे देणों वाल़े, पंणमिश्वर शी खुशी हऐं।
48किन्देंखे के प्रभू ऐ आप्णी गरीब दासी के गरीबी गाशी रंय्म के नंजर थऐ, किन्देंखे के दे:खो, ऐबे शुबे ज़ूगौ-ज़ूगौ के लोग मुँखे भागोईत बुल्दे!
49किन्देंखे के तिनू शक्त्तिमाँन ऐ मुँखें बड़े-बड़े काँम-काज़ करी थई, अरह् तिनको नाँव पबित्र असो।
50अरह् तिनकी दया-रंय्म तिनू गाशी जुण्जे तिन शे डरो ऐ; पीड़ी दर पीड़ी तक बंणी अंदी रंह्।
51प्रभू ऐ आप्णा बाँऊ-बल़ दे:खाया, अरह् जुण्जे आपु खे बड़े सम्झो थिऐ, तिनू खिदर-भिदर करी दिते।
52प्रभू ऐ बल़वान लोग तिन के ही सिंगाँस्णों गैष्छ़ै ऊदे रिढ़ऐं, अरह् गरीब ऊबे करे।
53प्रभू ऐ भूखे आच्छ़ी चींजो लई छकऐं दिऐ, अरह् तिन्ऐ सेठ लोग रिते हाथै आगू ड़ेयाल़े।
54प्रभू ऐ आप्णे दास इस्राएली सभाल़े के से आप्णे सेजी दया-रंय्म अरह् कृपा चिते करह्,
55जू अब्राहम अरह् तिनकी अलाद-अंष पीड़ी गाशी सदा रंह्दे, जेष्णों तिन्ऐ अमाँरे पुराँणियाऐं आरी आगे ही बाय्दा करा थिया।”
56मरियम कम से कम च़ींन भीने इलीशिबा के पाऊँणी रंह्ऐयों आप्णे घरे हुटे।
संत्त-यूहन्ना नहाँण-नहाँणों वाल़ा पय्दा हुआ
57तबे इलीशिबा के सूहंणों को चाईत्त लागो, अरह् सुईयों तियाँरें बैटा हुवा।
58तबे तियाँरें कुड़्बे, अरह् पड़ोसिऐं ऐजो शुणियों के प्रभू ऐ तियों गाशी बैजाऐ बड़ी कृपा करी थऐ, तअ तबे तिन्ऐ तियाँरी गईलो खुशी मनाऐं। 59अरह् ऐशो हऐयों के आठवें देसे जबे बालक के खतना कर्णों के बीदी-रिवाज के घड़ी आऐ; अरह् तेस्को नाँव तेस्के बाबा के नाँव गाशी ज़कर्याह थंदे लागे, 60परह् तेस्की माँ ऐं तैख्णी जबाब दिता, के “ना अमाँरें ऐस्को नाँव यूहन्ना थणों।” 61अरह् तिन्ऐं बुलो, के “तेरे कुड़बे दो ऐजो नाँव कोसी को ने आथी।”
62तबे तिन्ऐ तेस्के बाबा खे साऊँन ईशारे करियों पुछो, के “तू ऐस्को नाँव का थंणों चाँऐ?” 63अरह् तेने लिख्णों के पाट्ड़ी माँगियों लिखी दितो, “ऐस्को नाँव यूहन्ना असो,” अरह् तबे सोभी लोगो के तूरंबाणच़ूंटे। 64तबे ज़कर्याह को मुँह अरह् जीभ तैख्णी खुली गऐ; अरह् से बुल्दा अरह् पंणमिश्वर का धन्यबाद करदा लागा। 65अरह् जै-तोड़े ज़कर्याह के ईरद-गीरद खल़िअंदे थिऐ, से बादे झुणें डरी गुऐ; अरह् तियों बातो के चर्चा बादे यहूदिया के पहाड़ी देशो दे फऐली गऐ। 66अरह् बादे शुण्णों वाल़े ऐ आप्णें-आप्णें सासो दो सुचियों बुलो, के “ऐजा केष्णा बालक असो?” किन्देखे के प्रभू का हाथ के कृपा आगे ही ऐसी गाशी असो।
ज़कर्याह के ढाल-अरज अरह् गीत
67अरह् तेसी बालक का बाबा ज़कर्याह पबित्र-आत्त्मा के शक्त्ति लई भरपूर हुआ, अरह् बरंम्बाणीं करदा लागा:
68“प्रभू इस्राएल का पंणमिश्वर खे धन्यबाद; किन्देंखे के तिन्ऐ आप्णे लोगो गाशी आप्णी दया-रंय्म के नंजर थऐ, अरह् तिन खे छुट्कारा दिता।
69अरह् आप्णे सेवक-दास दाऊद की गड़ी खाँनदाँन दा आँमु खे ऐक छुट्कारे कराणों वाल़ा पय्दा करा।
70जेष्णों तिन्ऐ आप्णे पबित्र ऋषियों के मुँह ज़ात्ती शो जुण्जे ज़ूगौ-ज़ूगौ शे ऊँबे हुऐ, अरह् आऐ; तिन्ऐं बुलो थियों।
71मतल्व अमाँरे बऐरियों शो, अरह् अमाँरे सभी बऐरियों के हाथो शा अमाँरा छुट्कारा कराऐ थुवा;
72के अमाँरे नाँना-बाबा गाशी कृपा, करियों आप्णा पबित्र-वाय्दा चींत्ते कराया।
73अरह् सेजी षोंह्-कस्मँ जूण्जी तिन्ऐ अमाँरे बाबा अब्राहम शी करी थऐ थी।
74के से हाँमों अमाँरे बऐरी कैई शे छुड़ाँव, के आँमें आप्णें बऐरियों कैई शे छ़ूटियों,
75तिन के साम्णें पबित्रत्ता अरह् धार्मिक्त्ता शे जीवन भर निडर रंऐयों तिनकी सेवा कर्दे रंह्।
76अरह् तू हे बालक, (परंम-पिता पंणमिश्वर) का बंरम्बाँणी कर्णो वाल़ा ऋषी बंण्ला, किन्देंखे के तू प्रभू के बाट तियाँर करदा तिन शा आगे-आगे चाल्दा।
77के तिनके लोगों खे छ़ूट्कारे का ज्ञाँन दे, जुण्जा तिनके पापो की माँफी शा तिनू भेंटदा।
78ऐजो अमाँरे पंणमिश्वर की तियों बड़ी कृपा के कारण स्वर्गो शा आँमों गाशी प्रकाषमाँन हुवा।
79किन्देंखे के ईनाँरो अरह् मंऊँत्त की छ़या दे बंईठणों वाल़े, गाशी से प्रकाष दियों; अरह् अमाँरी भीखो संही सीधी बाटो दी चलाव।”
80अरह् सेजा टंड्का बढ़दा लागा, अरह् आत्त्मा दा बलवाँन हंदा गुवा, अरह् इस्राएल दा चग्रिणों तोड़ी से जाँगल़ो दा रंह् थिया।
Currently Selected:
लूका 1: sri
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
