लूका 8

प्रभू यीशू ऐ शिक्क्षा दिती

1तबे प्रभू यीशू नंगर-नंगर अरह् गाँव-गाँव दे रीटियों ब्खाँण कर्दे, अरह् पंण्मिश्वर के राज्य के आच्छ़ी खुष्खबरी शुणाँदें लागे, अरह् तिन के बारह् खास-चैले भे तिन की ही गईलो थिऐ। 2अरह् किऐ तिरंई भे, जुण्जी दुष्ट-आत्त्मों अरह् रोग-बीमारी शी चाँग्गी हऐयों अजाद हई थी, अरह् सेजी तिरंई ऐजी थी: मरियम जियो खे मगदलेनी बुली थी, जियो शी प्रभू यीशू ऐं सात्त दुष्ट-आत्त्मा गाड़ी थी; 3अरह् हेरोदेस का भडारी खुज़ा के घरवाल़ी योन्ना, अरह् सूसन्नाह, अरह् ऊकी भे बैजाऐ भहती तिरंई थी। जुण्जी आप्णी घरोऊँची शो खर्च करियों प्रभू यीशू अरह् तिन के चैले के सेंवा करह् थी।

बीज़ो बोणों वाल़े जिम्मदार को अनाँणों

(मत्ती 13:1-9; मरकुस 4:1-9)

4जबे लोगो के ऐक बैशुमार भीड़ कट्ठी हंदी लागी थी, अरह् नंगर-नंगर शे लोग प्रभू यीशू कैई आँदे लागे थिऐ; तबे तिन्ऐ ऐजो अंनाँणों दितो: 5“ऐक जिम्मदार खेच़ौ दो बीज़ो बोंदा हुटा। जबे से बीज़ो अईरदा-छिड़क्दा लागा, तअ किऐ बीज़ बाटो पुढो पड़ो, अरह् सेजो बीज़ लात्तो लई घीजियों, अरह् अस्माँनों के चोंचेटूऐ तैथू च़ूंणीं पाव। 6किऐ बीज़ पाथर-शगाल़ी मुँझी पड़ो, बिना बातर की माँटी दो से शुक्की गो। 7किऐ बीज़ झाड़ी-झाल्ह मुँझी पड़ो, अरह् सेजो बीज़ झाल्ह-झाड़ी आरी जाँमियों झैव दो दबी गो। 8परह् किऐ बीज़ आच्छ़ै बोंन्दरे खेच़ौ दो पड़ो, अरह् सेजो बीज़ ऊबे जाँमियों षौ गुणा फ़ल़बंन्त्त हुओ”, ऐजो बुलियों प्रभू यीशू ऐ तिन खे जुराल़ो बुलो, “जैस्के शुण्णों खे काँन हों, सेजा शुणीं पाँव।”

ऐसी अनाँणे का मतल्व का असो

(मत्ती 13:10-17; मरकुस 4:10-12)

9प्रभू यीशू के चैले ऐ प्रभू कैई शो पुछो, के तैसी अनाँणे का मतल्व का असो? 10प्रभू यीशू ऐ बुलो, “तुँओं कैई पंण्मिश्वर के राजो का भेद् देऐ थुवा, परह् ओकी कैई अनाँणे दो बुली; किन्देंखे के ‘से दे:खियो भे दे:ख्दे ने, अरह् शुणियों भे सम्झोंदे ने।’

बीज़ो बणों का मतल्व ऐजा असो

(मत्ती 13:18-23; मरकुस 4:13-20)

11“अनाँणे का मतल्व का असो: बीज़ पण्‍मेश्वर का बचन असो। 12जैष्णों बाटो पुडो पड़ो, सेजो बीज़ ऐजो असो, के जुण्जे बचन शुणों, तिन कैई शैतान आऐयों तिन के सासो शा सेजा बचन आगु नींयों; के कोदी ऐशो ने हंईयों के से तैसी बचन दा बिश्वाष करह्, अरह् से पापो शे छुट्टी ज़ाँव; 13अरह् जुण्जो बीज़ पाथरो-शगाल़ी मुँझी पड़ो, सेजो बीज़ ऐजो असो, के जुण्जे बचन शुण्दे ही तैसी बचन माँनी पाँव; परह् तैसी बचन दे से पाक्कै हऐयों जड़ ने पाक्ड़दे, से कुछ बख्तो तोड़ी तअ तैसी बचन दा बिश्वाष करह्, परह् परख के बख्ते से अट्ल़ ने रंह्दे अरह् से ऊँदे ज़ाँव। 14जुण्जो झाल्ह-झाड़ी मुँझी पड़ो, सेजो बीज़ ऐजो असो: के जुण्जे बचन तअ शुण्णों ऐ, परह् थोड़े देसो बित्त्णों गाशी से धन-दोल्त्त अरह् जीवन के भोग-बिलास दे दब्बी ज़ाँव, अरह् तैसी बचन शुणियों तिनू तिन्दें का किऐ फ़ल़ ने भेट्दा। 15परह् आच्छ़ी बोंन्दरी जीम्मी दो पड़ो बीज़ सेजो असो, जू बचन शुणियों, आप्णे साच्चे मंन शा सेजा बचन सुवाँ करियों थों, आप्णें सबैर शाँण्त्ति शा तिन्दें का फ़ल़ पाँव।

दिवे को अनाँणों

(मरकुस 4:21-25)

16“कुँऐं दिवा बाल़ियों खटियों ने थंदे, अरह् ना तैसी दिवा माँजे थाई थंदे, परह् से ऊगला दियोटो गाशी लाओ, जू भिटे आँणो वाल़े खे तिन्दें को पियाषो लागो। 17ऐषो किऐ भे चुप्पी ने रंदो, जू से पर्गट ने हों; अरह् ऐशो भे किऐ ने आथी, जू चुरियों थंईयों जिन्दें का कोसी कैई किऐ पता ने लागो। 18ईन्देंखे च़ौक्क्ष रंह्, के तुँऐं कैष्णों शुण्णों? जिनू कैई आगे भे असो, तिन खे हजो भे भेंट्लो, अरह् जिन कैई किऐ ने आथी, तिन कैई शो सेजो भे आगू कर्दो जिन्देंखे से आप्णों जाँणों।”

प्रभू यीशू के माँ अरह् भाऐ

(मत्ती 12:46-50; मरकुस 3:31-35)

19प्रभू यीशू के माँ, अरह् भाऐ तिन कैई शे भेंटिदें आऐ, परह् भीड़-भड़ाके के कारण तिन के तिन शी भेंट ने हऐ सकी। 20तबे प्रभू कैई कुँणिऐं आऐयों बुलो, “तुँवारी माँ अरह् तुवाँरें भाऐ बायर खह्ल़ी रूऐ, अरह् से तुँओं शे भेंट कर्णी चहाँव।” 21प्रभू यीशू ऐ तैस्खे जबाब दिता, “मेरी माँ, अरह् मेरे भाऐ, सेजे असो; जू पंण्मिश्वर का बचन शुण्णों, अरह् माँनों ऐ।”

ढोंढ शाँन्त्त करो

(मत्ती 8:23-27; मरकुस 4:35-41)

22ऐक देस प्रभू यीशू अरह् तिन के चैले नाव गाशी हुटे, अरह् तिन्ऐं आप्णें चैले खे बुलो, चालो, आँमें “झीलो शे पाईले ढबे ज़ाँऊबे।” तबे: से तेथै शे नाव खुलियो पाँडे पाईले ढबे ज़ाँदे लागे। 23परह् जबे नाव चाली रंऐ थी, तअ प्रभू यीशू नाव दे सुत्ती गुऐ: अरह् झीलो के बीचों दो बैगे ढोढ-बागूर फिरी, अरह् आँधी-तूफान, आया, अरह् नाव दो पाँणी भरियो, अरह् तिनकी जीयाँनी खे खतरा पय्दा हुवा। 24तबे चैले प्रभू यीशू कैई आऐ, अरह् तिनू नींज़ो शे ऊबे बीऊँजाल़्दे लागे अरह् बुलो; “हे प्रभू-हे प्रभू आँमों बचाओ” आँमें तअ डुब्दे लागे। तबे प्रभू यीशू ऊबे बींऊँजे अरह् तिन्ऐ ढोढ-बागुर, अरह् झीलो की प्रचंन्ड फालो खे डाँटी-झाड़ दिती के थंबी ज़ाव, अरह् से तैख्णी शाँण्त्त हंई। 25तबे प्रभू यीशू ऐ चैले खे बुलो, “तुवाँरा बिश्वाष केथै गुवा?” परह् से डरी गुऐ, अरह् तिन के सेजो सब-कुछ दे:खियों तुर्बाणच़ूटे अरह् आपु मुँझी बुल्दे लागे, “ऐ कुँण असो? जिन की अज्ञाँ ढोंढ-बागूर, अरह् पाँणी, भे माँनों ऐं?”

दुष्टो का भूँचा अंदा चाँग्गा करा

(मत्ती 8:28-34; मरकुस 5:1-20)

26तबे प्रभू यीशू अरह् तिन के चैले गिरासेनियों के प्रदेश दे पऊँचे, जू पाईले ढबे गलील नंगर के साम्णें असो। 27जबे प्रभू यीशू नाव गाच़्छ़ै ऊदे काट्ल़ो दे ऊत्रे तअ तैसी नंगर का ऐक दुष्ट-आत्त्माँ का भूचा अंदा आदमी तिन कैई आया; से कोद्दी शुभे खोटुणों मे बाँम्बो थिया; अरह् से घर दा ने, परह् षल़ी-मंड़ियों दा रंह् थिया। 28से प्रभू यीशू दे:खियो लेल्याऐया, अरह् तिन के साम्णिऐ ढाल-अरज करियों जुराल़ो बुल्दा लागा; “हे यीशू! परंमपिता पंण्मिश्वर का बैटा! मुँह कैई शा तुवाँरे का काम असो? हाँव तुओं कैई शी बिनत्ती करू, के मुँह ने सताऐ।” 29किन्देंखे के प्रभू यीशू ऐं तियों दुष्ट-आत्त्मा खे तैसी आदमी शी आगू ज़ाणों के अज्ञाँ देऐ लऐ थी, किन्देंखे के सेजी दुष्ट-आत्त्मा तैसी आदमी दी बार-बार प्रचंन्ड हों थी, अरह् लोग तैसी आदमी आप्णी बष दा कर्णों खे शाँगल़ी अरह् हड़ी-बैड़ी लई बाँनों थिऐ, परह् से तिन्दें के भे च़ूड़ियों रिन्डै-रिन्डै बाँणों थिया, अरह् सैजी दुष्ट-आत्त्मा तैसी आदमी खाल़ै-नाँल़ै दा नींयों थी। 30प्रभू यीशू ऐ तैच़्छौ पुछो, “तेरो नाँव का असो?” तेने बुलो, “सेना”, किन्देंखे के आँमें भहिती दुष्ट-आत्त्मा असो। 31सैजी दुष्ट-आत्त्मा प्रभू यीशू शी ढाल-अरज कर्दी लागी, के तुऐं आँमों खे नींगुऐं गाड्डै दी ज़ाणों के अज्ञाँ ने दिऐं। 32तेथै धारंह् गाशी ऐक सूँगरो को बोड़ो सूँगरेऊँड़ चरीरूओं थियो; तैथू सूँगरेऊँड़ दे:खियों सैजी दुष्ट-आत्त्मा प्रभू यीशू शी बिनत्ती कर्दी लागी, के आँमों खे ऐथू सूँगरेऊँड़ो दी ज़ाँणों के अज्ञाँ दियों; अरह् तिन्ऐं तिन खे तैथू सूँगरेऊँड़ो दे ज़ाँणो के अज्ञाँ दिती। 33तबे सैजी दुष्ट-आत्त्मा तैसी आदमी छुड़ियों तेथू सूँगरेऊँड़ो दी संमाई अरह् सेजो बादो सूँगरेऊँड़ तैख्णी तैसी धार्टे की‍ च़ूजैऊरी गाच़्छ़ौ ऊष्टियों करड़ाऐयों झीलो दो पड़ो, अरह् डुबियों से बादे मरी गुऐ। 34ऐजो दे:खियों सेजै सूँगरो के चराईया तेथै शे भागी लागे; अरह् से आप्णें नंगर अरह् गाँव दे ज़ाऐयों तियों घट्णाँ का सोभी कैई बखाँण कर्दे लागे। 35लोगे ऐजी घट्णाँ शुणियों जू तेथै हऐ रंऐ थी, तिन्दे दे:ख्दे तेथै आऐं, अरह् तिन्ऐं दे:खो के प्रभू यीशू कैई आऐयों सेजा आदमी भे जैस्शी सैजी दुष्ट-आत्त्मा निक्ल़ी थी, से भे खोटुणो बाम्बियों आछा-भला प्रभू यीशू की लात्तों कैई बईठा अंदा दे:खियों से डरी गुऐ। 36अरह् जिन्ऐं सैजी बादी घट्णा आप्णी आखिऐ दे:खी; तिन्ऐं ओकी लोगो कैई बुलो, के कैशा दा दुष्ट-आत्त्मा का भूंचा अंदा आदमी चाँग्गा हुवा। 37तबे गिरासेनियों के ईर्द-गिर्द के लोगे प्रभू यीशू शी बिनत्ती करी के अमाँरी इलाके शे आगू ज़ाओ, किन्देंखे के से बैजाऐ डरी हुऐ थिऐ: तबे प्रभू यीशू नाव गाशी बऐठियों पाछू हुटे। 38जैसी आदमी शी सेजी दुष्ट-आत्त्मा निक्ल़ी रंही थी, से प्रभू यीशू शी बीनत्ती करदा लागा, के मुँह भे आप्णी गईलो रंहणों दियो; परह् प्रभू यीशू ऐ तैस्खे बिदा कर्दे बुलो। 39“आप्णे घरे ज़ा अरह् लोगो कैई बुलियों ईन्देंखे का बखाँण करह्, के पंण्मिश्वर ऐ ताँव्खें कैष्णी बड़ी बात्त करी थऐ, अरह् से तेथै शा आगू हुटा, अरह् बादे नंगर दा बुली-बुलियों ऐजा प्रचार करा, के प्रभू यीशू ऐ मुँखे का-का करो।”

याईर के मरी अंदें बैटी जीऊँदी करी

(मत्ती 9:18-26; मरकुस 5:21-43)

40जबे प्रभू यीशू पाछू आऐ, तअ लोग खुशी शे तिन कैई शे भेंटिऐ, किन्देंखे के से बादे झुणे तिन की ठल़णाँई दे थिऐ। 41तबे तेथै ऐक याईर नाँव का आदमी आया, जू चौऊँ राल़्सी के यहूदी-च़ोंत्रै का ढिमेंदार थिया; अरह् से प्रभू यीशू के लातो गाशी पड़ा, अरह् तिन शी ऐजी बिनत्ती करदा लागा, के मेरे कागी चालो, 42किन्देंखे के तैस्के बारह् साल के लग-भग ऐक बैटी थी, जू बैजाऐ बीमाँर घड़ी लाऐयों मंर्णों वाल़ी थी; अरह् जबे प्रभू यीशू तैस कागी खे ज़ादे लागे तअ लोगो के भीड़ च़ोऊँ ढबै शी तिन गाशी पड़्दी लागी। 43अरह् तेथै ऐक तिरंऐ थी, जियाँरे बारंह् साल शा लह्ऊँ ढाल़ा थिया; अरह् तिऐं आप्णी बादी कमाँऐ गंण्णों खोज्णों, अरह् भाट-बाम्णों बैद्-जड़यारे कंई लाऐं थंऐ थी; परह् से कोसी भे ईलाजो शी आच्छ़ी ने हई। 44तिऐ तिरंई ऐ प्रभू यीशू के पाछू दाँई शी आऐयों, तिन के च़ूग्गै का पाछला पाला छुवा, अरह् से तैख्णी चाँग्गी हऐ; अरह् तियाँरा लह्ऊँ ढाल़ा तैख्णी बंद हऐ गुवा। 45प्रभू यीशू ऐ ऐक-दंम बुलो, “मुँह कुंणिऐ छ़ुवाँ?” ऊँडे-पुडे के बादे आदमी के भाज्णों गाशी, पतरस ऐं बुलो; “हे प्रभू! ऐत्रै रंष भीड़ मुँझी जिन्दें का ढोस्रोल़ा तुओं गाशी भे पड़दा लागा ऐबै का जाँण्णों के तुओं कुँणें छ़ुऐं।” 46प्रभू यीशू ऐ बुलो, “कुँणिऐ मुँह छ़ुऐं थुवा; किन्देंखे के मुँऐ चगरी पाव, के मुँह शी शक्त्ति निक्ल़ी रंऐ।” 47जबे तियों तिरंई ऐं दे:खो, के हाँव चुरियों छूटी ने बल़्दी, तबे से काँम्बलियों आऐ, अरह् प्रभू यीशू के लात्तो गाशी पड़ियों बादे लोगो के साम्णिऐ बुलो; के मुँऐ तुओं कैई छ़ुऐ, अरह् हाँव तुओं छुदे ही तैख्णी च़ाँग्गी हऐ गंऐ। 48प्रभू यीशू ऐ बुलो, “बैटी, तेरे बिश्वाषे ताँव चाँग्गी करी; ऐबै शाँन्त्ति खुशी शी ज़ा।” 49प्रभू यीशू ऐ ऐजो बुली ही लों थियो, के तैसी च़ौऊँ राल़्सी के यहूदी-च़ोंत्रै के ढिमेंदार कागशा कुँऐ आदमी आऐयों तैस्खे बुल्दा लागा, के “तेरी बैटी मंरी गऐ: ऐबे गुरू जी, खे कष्ट ने दिऐ।” 50प्रभू यीशू ऐ ऐजो शुणों, अरह् तैसी ढिमेंदार खे बुलो; “डरे ने! सिर्फ बिश्वाष थो, तअ से बंची ज़ाली।” 51जबे प्रभू यीशू तैसी याईर के घरे पंईचे, तअ तिन्ऐं पतरस, यूहन्ना, याकूब, अरह् तियों धियाँण्टी के माँ-बाबा के सुवाऐं कोसी भे आप्णीं गईलो भिटे ने आँणों दिती। 52बादे लोग तियों धियाँण्टी खे रूऐ थऐ, परह् प्रभू यीशू ऐ ति खे बुलो, “रूऐ ने! ऐ मंरी ने रंई, परह् सुत्ती रंऐ।” 53तेथै बादे लोगे तिनू हस्णों खे ठाठै पाड़्दे लागे; किन्दें खे के से सेजो जाँणों थिऐ, के सैजी धियाण्टी मंरी रंऐ। 54प्रभू यीशू ऐ तियों धियाँन्टी का हाथ थाँम्बड़ियों धाव देऐयों बुलो; “हे धियाँण्टी बींऊँज!” 55तियों धियाँण्टी के प्राण-सास पाछू फिरा, अरह् से तैख्णी ऊँबी बऐठी; प्रभू यीशू ऐं अज्ञाँ दिती के ईयों खे किऐ खाँणों खे दियों। 56तियों धियाँण्टी के माँ-बाबा के तुर्बाणच़ूटे, परह् प्रभू यीशू ऐ तिन खे ऐजी अज्ञाँ दिती के ईयों घट्णाँ के चर्चा कोसी कैई ने करे।

Currently Selected:

लूका 8: sri

Highlight

Copy