मरकुस 14

प्रभू यीशू खे थाँम्बड़णों का कैड़ा

(मत्ती 26:1-5; लूका 22:1-2; यूहन्ना 11:45-53)

1दू देसो बेत्तणों गाशी फ़सह अरह् बिना खटाई की रोटी को तियार थियों, प्रधान-याजक अरह् यहूदी-निय्म के शिखाँणों वाल़े ईयो ताक दे थिऐ, के प्रभू यीशू किऐ-किऐ छल़-कप्ट, शे थाँम्ड़ियों मारी ज़ाईदे। 2परह् से जाँणो थिऐ, के तियारंह् के देसे ने, मार्णीं थी, किन्देंखे के ऐशो ने हऐयों के लोगो मुँझी भगंद्ड़ ने मंचो।

बैतनिय्याह दा प्रभू यीशू का सूस्वागत्

(मत्ती 26:6-13; यूहन्ना 12:1-8)

3जबे प्रभू यीशू बैतनिय्याह दे शमौन जू आगे कोढ़ी थिया, तेस कागी खाँणों खाँदे बऐठी रूऐ थिऐ, तबे तेथै ऐक तिरंई संग-मरमर की कुँन्ड़ीं दो, सूँ-गद्लो तेल लियाओं जू के शुद्ध थियों, अरह् बैजाऐ मंह्गो थियो, तिऐं तिरंई ऐ सेजी कुँन्ड़ीं फूटाल़ियों, सेजो सूँ-गोंद्लो तेल प्रभू यीशू के मुँढो गाशी पेरोह्। 4परह् तेथै बईठे अंदे कुँऐं-कुँऐं लोगो के तिन्दे की बड़ी डाह्-जल़्ण लागी अरह् से आप्णे सासो दे बुल्दे लागे के ऐजो किम्त्ती तेल कैई बिकाओं? 5किन्देंखे के सेजो तेल तअ बैजाऐ मंह्गो थियों, मतल्व तेथू च़ीन षौ दीनार को बिको ज़ाँदो थियों; अरह् आँमें गरीब कंगालो खे बाँडी देंदे थिऐ, अरह् सेजे लोग तियों तिरंई झ़ीड़क्दें लागे। 6प्रभू यीशू ऐ बुलो, “ईयों छुड़ी दियों, ईयो कैई फींट्की लऐ? ईऐं तअ मेरी गईलो आछो करीलों। 7गरीब कंगाल तअ तुँवारी गईलो सदा रंह्दें, अरह् तुवाँरा जबे भे मंन करला, तबे तिनकी मंदत् करी सको, परह् हाँव तुँवारी गईलो सदा ने रंह्दा। 8जू ईयाँरें किऐ करियों थियों, ईऐं सेजो ही करो, ईऐं मेरी दाब्णो के तियाँरी खे, आगे ही मेरी देह्-शरीर दो तेल लाऐ लो। 9हाँव तुँओं खे ऐक खास बात बुलू, के बादी संईसारी दे जेथी केथी खुषख्बरी प्रचार हली, तेथै याँरी ईयों काँम-काज़ के चर्चा भे याँरी चिताँव्णी खे हली।”

यहूदा का छल़-कप्ट, अरह् धोखा

(मत्ती 26:14-16; लूका 22:3-6)

10तबे यहूदा इस्करियोती जू तिनू बारंह् चैले मुझ्षा ऐक थिया, प्रधान-याजकों कैई हुटा, जू प्रभू यीशू मसीया तिन कैई शा थँह्बड़ाया ज़ाँव। 11से ऐजो शुणियों खुशी हुऐ, अरह् तेस्खे रूपिया देणों खे राजी हुऐ, अरह् से तेसी मोंकें-ताक दे रंह् थिऐ, के प्रभू यीशू मसीया केशे दाँई थाँह्बड़े ज़ाँव।

प्रभू यीशू चैले आरी फ़सह के तियारंह् के आखरी जूँन खाँव

(मत्ती 26:17-25; लूका 22:7-14,21-23; यूहन्ना 13:21-30)

12अखमीरी बिना खटाई की रोटी को तियारह् के आगले देसे, यहूदी लोग फ़सह खे ऐक छ़ैल़टू को बल़ाकरू दियों ज़ाँव थियों, चैले ऐ प्रभू यीशू मसीया शो पुछो, “आँमें तुओं खे फ़सह की चून केथै तियार करह्-तुँवारी हिछ़या का असो?” 13प्रभू यीशू ऐ आप्णे चैले मुँझ शे दो चैले ऐजो बुलियों डियाल़े, के “नंगर दे ज़ाव, अरह् तुँओं ऐक पंण्यारा भेंटदा, जेस्के काँह्नों गाशी घड़ा हंदा, तुँऐं तेसी ही पाछी ज़ाऐं: 14अरह् से जेसी घर दा ज़ाला, तेसी घर के मालिक खे बुले, के गुरू जी! बुलो, के मेरी पहणाँई खे कुँण्जों घर असो, जेथै हाँव आप्णे चैले आरी फ़सह के जून खाऊँ; सेजो घर आँमों कैई शो ऊडो दे:खाव। 15से आपु ही तुँओं कैई शो च़ीप्रें घर को गाशलो घर दे:खाला जुण्जों आगे ही सजो-धंजों अंदो हलो, तेथै तुँऐं आँमों खे जून बाँण्णों के तियारी करह्।” 16दुईनें चैले साथी नंगर दे आऐ, अरह् जेष्णों प्रभू यीशू ऐ बुलो थियों, तिनू तेष्णों ही भेटो, जेष्णों के प्रभू यीशू मसीया ऐ तिन कैई बुलो थियों, अरह् तिन्ऐं तेथी ही फ़सह के तियारह् के जून बाँणी। 17जबे संद पढ़ी, तअ प्रभू यीशू मसीया आप्णें तिनू चैले आरी तेथै आऐ। 18जबे प्रभू यीशू चैले आरी बईठे अंदे थिऐ, तअ तिन्ऐं तिनखे बुलो, “हाँव तुओं कैई ऐक खास बात बुलू; तुओं मुँझी जुण्जे मेरी गईलो खाणा-खाँदें बऐठी रूऐ, तुओं ही मुँझ्षा कुँऐं मुँखे धोखा देंदा।” 19बादे चैले सूँह्च दे पढे़, अरह् तिनू बहारी चैले मुँझ्षे ऐक-ऐक करियों प्रभू यीशू कैई बुल्दे लागे, “कियों हाँव असो”? 20प्रभू यीशू ऐ तिनखे बुलो, “तुँओं बहारी चैले मुँझ शा कुँऐ ऐक-सेजा ही जेने मेरी गईलो बैलुऐ दी रोटी डुबऐ लऐ। 21किन्देंखे के आदमी के बैटे खे, तअ जेष्णों तेस्खे हिज़्को बाँणों अंदो असो, तेष्णों ही हंदों, परह् नीरभाग असो! सेजा आदमी जेस्के कारण आदमी का बैटा थँम्बड़ाया ज़ाला; ईन्देशो आछो तअ तेस्खे ऐजो थियों; के सेजा आदमी पय्दा ही ने हंदा, तेस्खे ऐजो आछो हंदों थियों।”

प्रभू भोज, (ज़ज्ञा)

(मत्ती 26:26-30; लूका 22:14-20; 1 कुरिन्थि 11:23-25)

22भोजन कर्णो खे बऐठियों प्रभू यीशू मसीया ऐ रोटी करियों अरह् धन्यबाद करियों च़ूडी अरह् बाँडदी बई बुलो, “आगू करह्, ऐजी मेरी देह्-शरीर असो।” 23तिन्दें पाछी, प्रभू यीशू मसीया ऐ बैलुवा करा, अरह् धन्यबाद करा, अरह् चैले खे दिता, अरह् सभी ऐ तिन्दें शो पीयों। 24प्रभू यीशू मसीया ऐ तिनखे बुलो, “ऐजो बाय्दे को मेरो सेजो लह्ऊँ असो; जुण्जो भहीते की ताँईऐं बुवाऐ थो। 25हाँव तुँओं खे खास बात बुलू, के दाख्ह्-अंगूरोह् का ऐजा रंस हेबी शुभा तेसी बख्त्तों तोड़ी ने पीदी, जाँव तोड़ी हाँव आप्णें पिता के राज्य दा तुँवारी गईलो नुवाँ रंस ने पीऊँ।” 26ऐक भगती को गीत गाऐयों से ज़ैतून धारह् गाशी हुटे।

पतरस के भाज्णो के बरंम्बाणीं

(मत्ती 26:31-35; लूका 22:31-34; यूहन्ना 13:36-38)

27तिनखे प्रभू यीशू मसीया ऐ बुलो, “तुँऐं बादे झोणें मेरा साथ छुड़ियों हुट्दे, जेष्णों के पबित्र-ग्रन्थों दो लिखी थो:

हाँव भैंड़वाल़ा मारी देऊँबा, अरह् भैड़ो को रेऊँड़ खिदर-बिदर हऐ ज़ाली।

28“परह् हाँव आप्णे जीऊँणों गाशी तुँओं शा आगे गलील खे ज़ाऊँबा।” 29पतरस ऐ प्रभू यीशू मसीया खे बुलो, के ओके “तुवाँरे चैले तुओं छुड़ियों ज़ाले, तअ ज़ाले, परह् हाँव तुओं छुड़ियों कद्दी ने ज़ाँदी।” 30प्रभू यीशू मसीया ऐ तेस्खे बुलो, “हाँव ताँव खे खास बात बुलू, के ऐतलो ही रात्ती, तू कुक्ड़े के दू बोई बाँक देणों शा आगे, तू च़ी बई, भाजी ज़ाईदा के हाँव ने जाँण्दे के ऐ कुँण असो।” 31परह् पतरस ऐ हजो पाको करियों बुलो; के “जे हाँव तुँवारी गईलो मरी भे ज़ाँऊ, तबे भे हाँव भाज्दा ने,” ऐष्णों ही तिनू ओकी सभी चैले भे बुलो।

गत्तसंमनी दी प्रभू यीशू के प्रार्थना

(मत्ती 26:36-46; लूका 22:39-46)

32तबे प्रभू यीशू अरह् चैले गत्तसंमनी नाँव के ऐक जागे दे हुटे, अरह् तिन्ऐं आप्णे चैले खे बुलो, “ईथै बईठे रंह्, जाँव तोड़ी हाँव प्रार्थना करू। 33अरह् प्रभू यीशू ऐ पतरस, याकूब, अरह् यूहन्ना, आप्णी गईलो नींऐं, अरह् बैजाऐ बैच्यन अरह् ब्याकूल हुऐ। 34अरह् प्रभू यीशू ऐ बुलो, मेरा मंन बैजाऐ बैच्यन अरह् ऊदास असो, तिऐं ज़ूगा के मेरे पराँण निकल़्दे लागे, तुँऐं ईथै बईठो अरह् बीऊँजी रंह्।” 35तबे से आपु दाँणिक आगुड़े हुटे, अरह् धनियों पड़ियों प्रार्थना कर्दें लागे, के जे ऐशो हदो, के मेरा ऐजा बख्त्त टल़ी ज़ादा। 36अरह् बुलो, “हे अब्बा, हे बाबा! तुँओं शो तअ सब-कुछ हऐ सको; मेरे साम्णें थुवा अंदा ऐजा बैलुवा आगु करह्, तबे भे मेरी ने परह् तुँवारी हिछ़या पुरी हों।” 37जबे प्रभू यीशू मसीया तेथै पाछू आऐ, तअ चैले सुत्तें अंदे दे:खियों, पतरस खे बुलो, “ओ शमौन, तू सुत्ती रूवा? कियों तू ऐक घाण्टा भे बीऊँजी रंऐ ने सकी! 38सतिखे बीऊँजी रंह्, अरह् प्रार्थना करिया करह्, के तुँवारी परख-अजमाईश ने हों। आत्त्मा तअ तियाँर असो; परह् देह्-शरीर कंम्मजोर असो।” 39अरह् प्रभू यीशू हजो पाछू हुटे, अरह् तैष्णी ही प्रार्थना करी। 40तबे हजो पाछू आऐयो प्रभू यीशू मसीया ऐ सेजे आप्णें चैले हजो भे सुत्तें अंदे दे:खे, से घहरशाऐ रूऐ थिऐ, तबे तिनू चैले के ऐजी बैसम्झी गऐ, के प्रभू खे का जबाब दियों। 41जबे च़ीज़ी बई प्रभू यीशू मसीया चैले कैई पाछू आऐ, तअ तिन्ऐं तिनखे बुलो, “हेबी भी सुत्ती रूऐ? ऐबे सुत्ती रंह्, अरह् बिषाँव-अराँम करह्! बैस सेजी घड़ी आऐ पुज़ी; दे:खो आदमी का बैटा पापी के हाथै थँह्बड़ाया ज़ाँदा! 42बिऊँजो चालो! दे:खो, मेरे थँह्बड़ाणों वाल़ा नंजीक आऐ गुवा।”

प्रभू यीशू छल़-कप्ट, शे थह्बड़ाऐ

(मत्ती 26:47-56; लूका 22:47-53; यूहन्ना 18:3-22)

43प्रभू यीशू ऐ ऐजो बुली ही लई थियों, के यहूदा इस्करियोती जू बारंह् चैले मुझ्षा च़ूँणें-छाँटे अंदे आरला थिया, तेने आप्णी गईलो प्रधान-याजकों, यहूदी-निय्म के शिखाणों वाल़े, अरह् ठग्ड़ै के डियाल़े अंदे किऐ लोग तैख्णी तरवारी अरह् डिंगैं थागियों आऐ। 44प्रभू यीशू के थह्बड़ाणों वाल़े, ऐ ऐजा ईशारा दिता, के जेस दे हाँव खुप्टी देऊँबा, सेजा ही असो; तेसी थाँह्बड़ियों सपाँईयों की रख्वाल़ीं दा नीऐं। 45यहूदा आया, अरह् तैख्णी प्रभू यीशू कैई आऐयों बुलो, “हे रब्बी” मतल्व गुरू जी! ठग्ड़ै अरह् हगाँल़ी देऐयों तिन दी खुप्टी दिती। 46तबे तिन्ऐं प्रभू यीशू मसीया दी पाच्चीं पाई अरह् तिनू थाँह्ब्ड़ियों बाँनी दिते। 47तिनू मुँझ्षे जुण्जे मसीया के नंजीक खड़े थिऐ, तिन मुँझ्शी ऐकी ऐ तरवार गाड़ी, अरह् महाँ-याजक के दास-बैठू दी लाऐ, अरह् तेस्का ऐक काँन दुरका ही पाया। 48प्रभू यीशू मसीया ऐ बुलो, “कियों रे, तुँऐं डाकू जाँणियों मुँह थाँह्बड़दे डिंगें, तरवारी लई आऐ रूऐ। 49हाँव तअ रोज देऊँठी दा तुँवारी गईलो रंऊँ थिया, तंदी तअ तुँऐं मुँह थाँह्बड़ी ने, परह् ऐबे जू हंदो लागो, से ईन्देंखे हंदो लागो के पबित्र-ग्रन्थों का सेजा लिखा पुरो हों।” 50ऐजो दे:खियों बादे चैले प्रभू यीशू मसीया ऐक्ली छुड़ियों भागी लागे। 51ऐक जुवाँन आदमी थिया, जुण्जा प्रभू यीशू पाछ़ी-पाछ़ी आँदा लागा थिया, तेने आपु बाईरा ऐक चादंरी का फैटा ही पाऐ थुवा थिया, जबे तिनू लोगे तेसी थाँह्बड़णा चहाया; 52तअ से आप्णी चादंर छुड़ियों नाँगा ही भागा।

खत्ती के बड़ी खुँम्ल़ी दे प्रभू यीशू नींऐं

(मत्ती 26:57-68; लूका 22:54,55,63-71; यूहन्ना 18:13-14,19-24)

53तबे तिन्ऐं प्रभू यीशू मसीया महाँ-याजक के साम्णें नीऐं, तेथै बादे प्रधान-याजकों, अरह् ठगड़ै, अरह् यहूदी-निय्म के शिखाणों वाल़े लोग कठै थिऐ। 54अरह् पतरस भे चुप्पी-चुप्पी दुर्के शा प्रभू यीशू मसीया पाछी महाँ-याजक के आँगणों दा हुटा, अरह् तेथै जगवाल़े-रख्वाल़े दास-बैठू की गईलो आगी के आँऊड़ों कैई आग सेंकदा बऐठी गुवा। 55प्रधान-याजकों अरह् बादी बड़ी खुम्ल़ी के लोग प्रभू यीशू मसीया खे मंऊँत्ती की सजा देंणों की ताँईऐं झूठे गुवाह्-शाज़्त दियाँणों की ताक दे थिऐ, परह् झूठे गुवाह्-शाज़्त ने तिनू भेटी। 56बैजाऐ भहीते लोग प्रभू यीशू मसीया के बारे दे झूठी गुवाह्-शाज़्त देंदे खड़े हुऐ, परह् तिनकी सेजी गुवाऐ-शाज़्त ऐक भाँत्ती ने थी। 57तबे कंई लोगे खह्ल़ियों तिनके बिरूध दी झूठी गुवाऐ-शाज़्त दिती। 58“आँमें ऐसी ऐजो बुल्दे शुणा, के हाँव ऐजी हाथो के बाँणी अंदी देऊँठी ढाल़ी देऊँबा, अरह् च़ीज़े देसो भीतरी हजो ऊकी देऊँठी बाँणूबा, जू हाथो के बंणी अंदी ने हों।” 59ईन्दें गाशी भे तिनके गुवाह्-शाज़्त ऐक भात्ती ने थी। 60तबे महाँ-याजक ऊबा बीऊँजा अरह् बीचो ठाँई खड़ा हुवा, अरह् तबे प्रभू यीशू मसीया शा पुछ़दा लागा, “कियों तुवाँरे आप्णें बंचाव दो किऐ ने बुल्णी, किन्देंखे के ईनू सभी ऐ तुवाँरे बिरूध दी केशी-केशी गवाई-शाज़्त देऐ लई?” 61परह् प्रभू यीशू चुप्पी रूऐ, अरह् तिन्ऐं किऐ जबाब ने दिती; तबे महाँ-याजक ऐ दया-रंय्म करियों हजो बुलो, “कियों तू मसीया असो, परंम-पिता पंणमिश्वर का बैटा?” 62प्रभू यीशू मसीया ऐ बुलो, “होर, हाँव ही असो! तुँऐं आदमी का बैटा सर्वशंक्त्तिमान के सोऐं ढबे बईठा अंदा अरह् असमाँनों शा बाद्ल़ो मुँझी आँदे दे:ख्ले।” 63तबे महाँ-याजक ऐ आप्णे खोट्णों चीरियों बुलो; ऐबे अमाँरे गुवाह्-शाज़्त शो का लणों? 64तुँऐं ऐजी नीदया शुणीं। तुवारी का राऐ असो? सभिऐं ऐक मंत्त आरी बुलो; होर, ऐ काटणों खत्त्म कर्णो ज़ूगा असो। 65कईऐं तअ प्रभू यीशू दो थूको, अरह् कईऐं प्रभू यीशू को मुँह दबाड़ो अरह् तिन्दी मुँट्कूरे लाई, अरह् तिनखे बुल्दे लागे, “बरंम्बाणीं करह्”! अरह् कऐ जगवाल़े-रख्वाल़े ऐ भे तिन्दी थाप्पै लाई।

पतरस के भाज

(मत्ती 26:69-75; लूका 22:56-62; यूहन्ना 18:15-18,25-27)

66जबे पतरस ऊदा दाई आँगणें दा थिया, तेथै ऐक महाँ-याजक की दासी-बैठू तिरंई आऐ। 67अरह् तिऐं पतरस आगी सेक्दिऐं नींह् जाऐयों दे:खा, अरह् बुल्दी लागी, “तू भे तअ नासरत के यीशू आरी थिया।” 68परह् पतरस भाजी गुवा, “हाँव ने जाँण्दा के तुँऐं का बुली लो”, तबे से बाऐर देऊल़ी गाशी हुटा, तेई कुक्ड़े बाँक दिता। 69ऐकी बई हजो सेजी दासी-बैठू तिरंई पतरस दे:खियों, उडे-पुडे खह्ल़ी अंदे लोगों खे बुल्दी लागी, “ऐजा भे ईन्ही आरला ऐक असो।” 70पतरस हजो भे भाजी गुवा, बिस्तड़े जै-तोड़े तेथै नंजीक खह्ल़ी रूऐ थिऐ, तिन्ऐ हजो पतरस खे बुलो, “जरूर सतिऐ तू भे ईन्ही आरला कुँऐं ऐक असो” किन्देंखे के तू भे तअ गलील इलाके का गलली असो। 71तबे पतरस षोंह्-कस्म करदा लागा, के “हाँव ऐसी आदमी के बारे दो किऐ ने जाँण्दा, के तुँऐं का बुली लों पता ने।” 72तबे तैख्णी कुक्ड़े ऐ दुज़ाल़िऐं बाँक दिता, अरह् पतरस के प्रभू यीशू मसीया के बुली अंदी सेजी बात चींत्ते आऐ: के “कुक्ड़े के बाँक देणों शा आगे तू च़ीं बई, भाजी ज़ाँईदा, के हाँव ने ऐसी जाँण्दा” अरह् पतरस ईयों बातो सुचियों पट्की-पट्कियों रूदा लागा।

Currently Selected:

मरकुस 14: sri

Highlight

Copy