Génesis 17
17
Circuncisión ví seña ya̱ stúvi tratúꞌ ñakɨnꞌ Ndiosíꞌ
1Jee íñɨ́ Abram ku̱mi̱xiko xa̱ꞌu̱nꞌ ku̱mi̱ꞌ (99) kui̱ya̱ꞌ jee ntu̱ví I̱toꞌoꞌ‑ó nu̱u̱nꞌ Abram jee nkachiꞌ re̱ꞌ nu̱u̱nꞌ‑u:
―Nuꞌuꞌ ví Ndiosíꞌ ya̱ níso ni̱ꞌ nɨꞌɨ ntántúníꞌ fuersáꞌ ííꞌ. Kɨtíñú nu̱u̱nꞌ ni̱ꞌ jee kueꞌnu na̱a̱ꞌ ya̱ ntu̱náꞌ kua̱chi koo si̱kɨ̱ꞌ nú. 2Kakɨnꞌ ni̱ꞌ tratúꞌ ni̱ꞌ jín noꞌó jín nuꞌuꞌ: jee nasaꞌá kue̱ꞌe̱ꞌ ni̱ꞌ rá ichiyúkúnꞌ nú ya̱ kene nu̱u̱nꞌ noꞌó.
3Jee ña̱xin nei Abram nu̱u̱nꞌ re̱ꞌ ne̱ nu̱u̱nꞌ ñuꞌún, jee nkaꞌanꞌ Ndiosíꞌ jín re̱ꞌ jee nkachiꞌ‑i nu̱u̱nꞌ re̱ꞌ:
4―Yaꞌá ví tratúꞌ saꞌá ni̱ꞌ jín noꞌó ya̱ chísóyuꞌú ni̱ꞌ nu̱u̱nꞌ nú ya̱: kuvi nú tátáꞌ jííꞌ nu̱u̱nꞌ kue̱ꞌe̱ꞌ nasɨ́kuitɨꞌ tataꞌ ichiyúkúnꞌ. 5Jee nku̱nání ka̱ꞌ súví nú Abram, chi súví nú nakuna̱ní Abraham, chi ñaniꞌ ni̱ꞌ noꞌó ya̱ kuvi nú tátáꞌ kue̱ꞌe̱ꞌ nasɨ́kuɨtɨꞌ tataꞌ ichiyúkúnꞌ. 6Jee saꞌá ni̱ꞌ ya̱ kukueꞌeꞌ nasɨ́kuitɨꞌ ichiyúkúnꞌ nú, jee saꞌá ni̱ꞌ ya̱ ne̱ nu̱u̱nꞌ noꞌó kene kéꞌín nación, jee ne̱ nu̱u̱nꞌ noꞌó kene ráa kuvi te̱e ya̱ tatúníꞌ ráa kéꞌín rá ñuunꞌ. 7Jee kakɨnꞌ ni̱ꞌ tratúꞌ ni̱ꞌ jín nuꞌuꞌ jín noꞌó jín rá se̱ꞌya nú jín rá ichiyúkúnꞌ ráa ya̱ va̱ji ichinúúnꞌ ka̱ꞌ, sáva kuvi tratúꞌ kino̱o‑o nɨ́ɨ́nkání ya̱ kuvi ni̱ꞌ Ndiosíꞌ nú jín ichiyúkúnꞌ nú ya̱ kiji tiempúꞌ ichinúúnꞌ ka̱ꞌ. 8Jee taji ni̱ꞌ nu̱u̱nꞌ nú jín nu̱u̱nꞌ ichiyúkúnꞌ nú ya̱ kiji tiempúꞌ ichinúúnꞌ ñuꞌun nu̱u̱nꞌ nééꞌ nú kuéntáꞌ to̱ꞌo̱ꞌ, ya̱ kúvi nɨꞌɨ nu̱u̱nꞌ ñuꞌun Canaán sáva kuvi ñuꞌun ráa nɨ́ɨ́nkání. Jee kuvi ni̱ꞌ Ndiosíꞌ ráa ―nkachiꞌ Ndiosíꞌ nu̱u̱nꞌ Abraham.
9Jee tukuni nkachiꞌ Ndiosíꞌ nu̱u̱nꞌ Abraham:
―Jee noꞌó chi sikúnkuvi nú tratúꞌ ni̱ꞌ ya̱ ñakɨnꞌ ni̱ꞌ jín nú. Maánú jín ichiyúkúnꞌ nú jín rá ichiyúkúnꞌ ráa ya̱ va̱ji ichinúúnꞌ ka̱ꞌ sikúnkuvi rán maa. 10Yaꞌá ví tratúꞌ ni̱ꞌ ya̱ kakɨnꞌ ni̱ꞌ jín nú jín rá ichiyúkúnꞌ nú va̱ji ichinúúnꞌ ka̱ꞌ ya̱ sikúnkuvi nú jín ráa: ya̱ íyó saꞌá circuncidar ntáká te̱e nteñu rán. 11Jee saꞌá circuncidar rán ya̱ keꞌneꞌ ti̱yu̱ꞌ rán ntíꞌ yuꞌú ñɨɨn násɨ́ꞌ xi̱ni̱ꞌ nu̱u̱nꞌ ííꞌ te̱e jee siíyo rán maa jee suvivá kuvi seña ya̱ stúvi‑i ya̱ ñakɨnꞌ ni̱ꞌ tratúꞌ ni̱ꞌ jín rán. 12Jee ki̱vɨ̱ꞌ unáꞌ ya̱ nkaku ntáká rá se̱ꞌya yɨ́ɨ́ nú jín rá ichiyúkúnꞌ nú ya̱ kiji ichinúúnꞌ ka̱ꞌ jee íyó keꞌneꞌ ti̱yu̱ꞌ rán ñɨɨn vá ntáká te̱e ya̱ kaku nu̱u̱nꞌ táꞌán veꞌi nú, jín rá te̱e nkeꞌen nú jín xu̱ꞌún nu̱u̱n ɨɨn to̱ꞌo̱ꞌ, jín ya̱ ntu kuvi ráa se̱ꞌya ichiyúkúnꞌ nú. 13Íyó keꞌneꞌ ti̱yu̱ꞌ jín siíyo ñɨɨn vá te̱e ya̱ kaku nu̱u̱nꞌ táꞌán veꞌi nú jín te̱e keꞌen nú jín xu̱ꞌún jee kuniso rán tratúꞌ ni̱ꞌ nu̱u̱nꞌ yɨkɨkúñu rán ya̱ koo nɨ́ɨ́nkání. 14Jee te̱e ya̱ nkéꞌnéꞌ‑e jín ntu sííyo‑o ñɨɨn vá, jee suvivá íyó tavaꞌ maa nteñu ñɨvɨ ni̱ꞌ, chi njia̱ꞌa‑a nu̱u̱nꞌ tratúꞌ ñakɨnꞌ ni̱ꞌ ―nkachiꞌ Ndiosíꞌ.
15Jee suni nkachiꞌ Ndiosíꞌ nu̱u̱nꞌ Abraham:
―Jee Sarai ya̱ kúvi ñasɨ́ꞌɨ́ nú, jee nsáꞌ kuna̱ní ña ka̱ꞌ Sarai, chisaꞌ súví ña kuvi Sara. 16Jee saꞌá ni̱ꞌ ya̱ netuꞌ kuvi ña, jee suni taji ni̱ꞌ ɨɨn se̱ꞌya yɨ́ɨ́ nú jín ña. Jee saꞌá ni̱ꞌ ya̱ ne̱ nu̱u̱nꞌ ña kene kéꞌín nación, jee ne̱ nu̱u̱nꞌ ña kene ráa ya̱ kuvi te̱e ya̱ tatúníꞌ ráa kéꞌín rá ñuunꞌ ―nkachiꞌ Ndiosíꞌ nu̱u̱nꞌ Abraham.
17Saájee ña̱xin nei Abram nu̱u̱nꞌ re̱ꞌ ne̱ nu̱u̱nꞌ ñuꞌún, jee ñakuꞌ re̱ꞌ jee ñaniꞌ iniꞌ ánímaꞌ re̱ꞌ: “¿Á koo ru se̱ꞌya ɨɨn te̱e ya̱ íñɨ́ ɨɨn sientúꞌ (100) kui̱ya̱ꞌ chiꞌ? Jee Sara, ¿Á sikáku ru ña ɨɨn se̱ꞌya ya̱ íñɨ́ ña ku̱mi̱xiko u̱ji̱ꞌ (90) kui̱ya̱ꞌ chiꞌ?” 18Saájee nkachiꞌ Abraham nu̱u̱nꞌ Ndiosíꞌ:
―Varésukuán jee kuvi kutekuꞌ Ismael jín ya̱ váꞌa saꞌá nú ―nkachiꞌ Abraham.
19Soo nkachiꞌ Ndiosíꞌ:
―Sara ya̱ kúvi ñasɨ́ꞌɨ́ nú sikáku ña ɨɨn se̱ꞌya yɨ́ɨ́ nú, jee sikúnání nú súví‑i Isaac, jee kakɨnꞌ ni̱ꞌ tratúꞌ ni̱ꞌ jín‑i ya̱ kúvi tratúꞌ ya̱ kino̱o nɨ́ɨ́nkání jín rá ichiyúkúnꞌ‑u ya̱ kiji tiempúꞌ ichinúúnꞌ. 20Jee jie̱ꞌe̱ꞌ Ismael, suni ntɨɨn kuéntáꞌ ni̱ꞌ ya̱ nkachiꞌ nú, jee saꞌá ni̱ꞌ ya̱ netuꞌ kuvi re̱ꞌ, jee saꞌá ni̱ꞌ ya̱ koo víꞌí ichiyúkúnꞌ re̱ꞌ jee kukueꞌeꞌ víꞌí ya̱ kene nu̱u̱nꞌ re̱ꞌ. Jee nu̱u̱nꞌ re̱ꞌ kene u̱xu̱ꞌ u̱vi̱ꞌ (12) te̱e tatúníꞌ ñuunꞌ. Jee saꞌá ni̱ꞌ ya̱ kene nu̱u̱nꞌ re̱ꞌ nación máá káꞌnú. 21Soo kakɨnꞌ ni̱ꞌ tratúꞌ ni̱ꞌ jín Isaac ya̱ sikáku Sara jín nú tiempúꞌ yaꞌá kui̱ya̱ꞌ kiji ―nkachiꞌ Ndiosíꞌ. 22Jee sáá nkuvi nkaꞌanꞌ Ndiosíꞌ jín Abraham jee nxi̱nóo re̱ꞌ Abraham.
23Jee nkeꞌen Abraham se̱ꞌya re̱ꞌ Ismael jín ntáká rá te̱e nkaku nu̱u̱nꞌ táꞌán veꞌi re̱ꞌ, jín ntáká rá musúꞌ nkeꞌen re̱ꞌ jín xu̱ꞌún re̱ꞌ, jee máá ki̱vɨ̱ꞌ yukuán nta̱jí re̱ꞌ ya̱ saꞌá circuncidar rá musúꞌ re̱ꞌ ntáká te̱e ya̱ nééꞌ jín re̱ꞌ sánikua̱ꞌ nkachiꞌ Ndiosíꞌ nu̱u̱nꞌ re̱ꞌ. 24Jee íñɨ́ Abraham ku̱mi̱xiko xa̱ꞌu̱nꞌ ku̱mi̱ꞌ (99) kui̱ya̱ꞌ sáá ñeꞌneꞌ‑e ntíꞌ yuꞌú ñɨɨn násɨ́ꞌ xi̱ni̱ꞌ nu̱u̱nꞌ ííꞌ re̱ꞌ. 25Jee se̱ꞌya re̱ꞌ Ismael íñɨ́ u̱xu̱ꞌ u̱ni̱ꞌ (13) kui̱ya̱ꞌ, sáá nte̱ꞌne̱ꞌ ti̱yu̱ꞌ ñɨɨn vá. 26Jee máá ki̱vɨ̱ꞌ yukuán nte̱ꞌne̱ꞌ ti̱yu̱ꞌ nu̱u̱nꞌ ííꞌ Abraham jín se̱ꞌya yɨ́ɨ́ re̱ꞌ Ismael. 27Jín ntáká rá te̱e ñɨvɨ veꞌi re̱ꞌ ya̱ nkaku nu̱u̱nꞌ táꞌán veꞌi re̱ꞌ, jín ntáká rá musúꞌ nkeꞌen re̱ꞌ nu̱u̱nꞌ rá to̱ꞌo̱ꞌ jín xu̱ꞌún re̱ꞌ, jín nta̱jí re̱ꞌ ya̱ keꞌneꞌ ti̱yu̱ꞌ rá musúꞌ re̱ꞌ nu̱u̱nꞌ ííꞌ ráa jín maáréꞌ.
Currently Selected:
Génesis 17: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
