Génesis 20
20
Abraham jín te̱e tátúníꞌ Abimelec
1Nkene Abraham nu̱u̱nꞌ nééꞌ‑e jee kua̱ꞌa̱nꞌ‑a ñuunꞌ sánitɨ́ɨn Négueb, jee to̱ꞌo̱ꞌ inka ñuunꞌ ví‑i, jee nneeꞌ‑e ñuunꞌ Gerar ya̱ káá ma̱ꞌñú rá ñuunꞌ Cades jín Sur. 2Jee nkachiꞌ Abraham ya̱ ku̱ꞌva re̱ꞌ ví ñasɨ́ꞌɨ́ re̱ꞌ Sara, saájee Abimelec, te̱e ya̱ tátúníꞌ‑i ñuunꞌ Gerar, ntaji‑i ya̱ kɨ̱keꞌen ráa Sara sáva saꞌá‑a ñasɨ́ꞌɨ́‑ɨ ña. 3Soo yakuááꞌ nkenta Ndiosíꞌ nu̱u̱nꞌ Abimelec nu̱u̱nꞌ ñuma̱ꞌná jee nkachiꞌ re̱ꞌ nu̱u̱nꞌ‑u:
―Te̱e níꞌiꞌ kúvi nú, jie̱ꞌe̱ꞌ ñaꞌan ya̱ nkeꞌen nú chi ñaꞌan ya̱ ya nta̱na̱ꞌá kúvi ña jee íyó yɨɨ́ ña ―nkachiꞌ Ndiosíꞌ nu̱u̱nꞌ re̱ꞌ.
4Soo ntiáꞌan kusuꞌ Abimelec jín ña, jee nkachiꞌ‑i:
―I̱toꞌoꞌ ni̱ꞌ, ¿á suni kaꞌniꞌ nú ñɨvɨ ntu níso kua̱chi rúja? 5¿Á nsáꞌ nkachiꞌ re̱ꞌ nu̱u̱nꞌ ni̱ꞌ ya̱ “ku̱ꞌva ni̱ꞌ ví ña”, jee suni maáña nkachiꞌ ña: “ku̱ꞌva ni̱ꞌ ví re̱ꞌ” résa? Saáva íyó noo ánímaꞌ ni̱ꞌ nu̱u̱nꞌ tiñu yaꞌá nsa̱ꞌá ni̱ꞌ jee na̱a̱ꞌ nsa̱ꞌá ni̱ꞌ maa ―nkachiꞌ Abimelec.
6Jee nkachiꞌ Ndiosíꞌ nu̱u̱nꞌ re̱ꞌ nu̱u̱nꞌ ñuma̱ꞌná re̱ꞌ:
―Suni maáníꞌ chi jíníꞌ ni̱ꞌ ya̱ íyó noo ánímaꞌ nú jee nsa̱ꞌá nú yaꞌá, jee suni ntu nyɨ́netuꞌ ni̱ꞌ saꞌá nú kua̱chi nu̱u̱nꞌ nuꞌuꞌ, jee saáva ntu̱ví ntáji ni̱ꞌ ya̱ kusuꞌ nú jín ña. 7Saáva naxiníkó nú ñasɨ́ꞌɨ́ te̱e vá nu̱u̱nꞌ re̱ꞌ chi te̱e vá kúvi te̱e nákani tu̱ꞌun kéne yuꞌú máá maá ni̱ꞌ, jee ka̱ka̱nꞌ táꞌvíꞌ re̱ꞌ jie̱ꞌe̱ꞌ nú jee kutekuꞌ nú. Soo retú nnákúꞌva nú ña, jee kuniꞌ nú ya̱ kuviꞌ nijia nú jín ntáká rá táꞌán nú ―nkachiꞌ Ndiosíꞌ nu̱u̱nꞌ Abimelec.
8Saájee neꞌenꞌ nnako̱o Abimelec ya̱neꞌenꞌ, jee nkana re̱ꞌ nta̱ká rá najiáꞌáꞌ re̱ꞌ, jee nna̱kani re̱ꞌ nɨꞌɨ rá tu̱ꞌun yaꞌá ya̱ nkachiꞌ Ndiosíꞌ nu̱u̱nꞌ re̱ꞌ, jee nyu̱ꞌví nasɨ́kuitɨꞌ ráa. 9Jee nkana Abimelec Abraham, jee nkachiꞌ‑i nu̱u̱nꞌ re̱ꞌ:
―¿Ná kuvi ya̱ nsa̱ꞌá nú jín ránꞌ rúja? Jee, ¿ná kúvi kua̱chi nsa̱ꞌá ni̱ꞌ si̱kɨ̱ꞌ noꞌó, ya̱ nxi̱nínkava nú nuꞌuꞌ saꞌá ni̱ꞌ kua̱chi máá káꞌnú jín rá ñɨvɨ ñuunꞌ ni̱ꞌ rúja? Jee tiñu ya̱ jíníi̱yo saꞌá ñɨvɨ jee nsa̱ꞌá nú maa jín nuꞌuꞌ.
10Jee nkachiꞌ Abimelec nu̱u̱nꞌ Abraham:
―¿Ná kúvi ya̱ nkaꞌvi iniꞌ nú ya̱ nsa̱ꞌá nú yaꞌá rúja? ―nkachiꞌ Abimelec nu̱u̱nꞌ Abraham.
11Jee nna̱xiníkó Abraham:
―Nkaꞌvi iniꞌ ni̱ꞌ ya̱ ntu̱ví ñúyúꞌví iniꞌ rá ñɨvɨ ñuunꞌ yaꞌá Ndiosíꞌ, jee kaꞌniꞌ ráa nuꞌuꞌ jie̱ꞌe̱ꞌ ñasɨ́ꞌɨ́ ni̱ꞌ, nkaꞌvi iniꞌ ni̱ꞌ. 12Jee suni ya̱ nááꞌ ví ya̱ ku̱ꞌva ni̱ꞌ kúvi ña, chi se̱ꞌya tátáꞌ ni̱ꞌ ví ña, súnika̱ꞌ nsú se̱ꞌya nánáꞌ ni̱ꞌ ví ña, jee nkenta kúvi ña ñasɨ́ꞌɨ́ ni̱ꞌ. 13Jee sáá nsa̱ꞌá Ndiosíꞌ ya̱ kene ni̱ꞌ veꞌi tátáꞌ ni̱ꞌ jíkónúun ni̱ꞌ, jee nkachiꞌ ni̱ꞌ nu̱u̱nꞌ ña: “saꞌá nú yaꞌá sáva koo tumani iniꞌ nú kune̱ꞌyá nú nuꞌuꞌ, ya̱ ntáká nu̱u̱nꞌ kɨ̱ꞌɨ̱nꞌ‑ó, kachiꞌ nú jie̱ꞌe̱ꞌ nuꞌuꞌ ya̱ ku̱ꞌva ni̱ꞌ ví‑i.”
14Saájee njia̱ꞌa Abimelec nu̱u̱nꞌ Abraham rá sa̱na̱ꞌ líꞌí, jín rá xi̱ni̱kɨ̱ꞌ, jín rá te̱e jín rá ñaꞌan ya̱ kúvi ráa musúꞌ jiátíñú saɨn, jee nna̱ku̱ꞌva‑a ñasɨ́ꞌɨ́ re̱ꞌ Sara nu̱u̱nꞌ re̱ꞌ.
15Jee nkachiꞌ Abimelec:
―Kune̱ꞌyá, káá ñuꞌun ni̱ꞌ ichinúúnꞌ. Kuneeꞌ nu̱u̱nꞌ táꞌánꞌ iniꞌ nú.
16Jee nkachiꞌ‑i nu̱u̱nꞌ Sara:
―Kune̱ꞌyá, ya̱ njia̱ꞌa ni̱ꞌ nu̱u̱nꞌ ku̱ꞌva nú ɨɨn mil xu̱ꞌún ka̱a plata, jee sikútaꞌviꞌ ni̱ꞌ maa jie̱ꞌe̱ꞌ ya̱ nnoꞌo nú nékúvi sáva nta̱ká rá ñɨvɨ kútáꞌán jín nú ntu̱náꞌ kani niváꞌa iniꞌ ráa jie̱ꞌe̱ꞌ noꞌó chi stúvi nijinꞌ xu̱ꞌún vá nu̱u̱nꞌ ntáká rá ñɨvɨ ya̱ ntu̱náꞌ niva̱ꞌa nsáꞌá nú.
17Saájee ni̱ka̱nꞌ táꞌvíꞌ Abraham nu̱u̱nꞌ Ndiosíꞌ, jee nxi̱núvi Ndiosíꞌ Abimelec jín ñasɨ́ꞌɨ́ re̱ꞌ, jín rá ñaꞌan kúvi musúꞌ nkeꞌen Abimelec, jee ni̱yo se̱ꞌya ráa. 18Chi ñasɨꞌ I̱toꞌoꞌ Ndiosíꞌ sókó víjí nta̱ká rá ñaꞌan veꞌi Abimelec ya̱ nkóo se̱ꞌya ráa jie̱ꞌe̱ꞌ Sara ñasɨ́ꞌɨ́ Abraham.
Currently Selected:
Génesis 20: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
