Génesis 23
23
Ni̱ꞌi̱ꞌ Sara jee nse̱ꞌí ráa ña
1Jee ntekuꞌ Sara sientúꞌ o̱ko̱ꞌ u̱xa̱ꞌ (127) kui̱ya̱ꞌ, 2jee ni̱ꞌi̱ꞌ ña ñuunꞌ naní Quiriat‑arba, ya̱ suni naní Hebrón, nu̱u̱nꞌ ñuꞌun naní Canaán. Jee nki̱vɨ Abraham veꞌi saꞌma nu̱u̱nꞌ káá ñunéꞌyúꞌ ña jee nnu̱kuíꞌyáꞌ iniꞌ Abraham jie̱ꞌe̱ꞌ Sara jee nnaꞌyuꞌ re̱ꞌ. 3Jee nna̱kuiñɨꞌ re̱ꞌ nkene re̱ꞌ nu̱u̱nꞌ káá ñunéꞌyúꞌ níꞌiꞌ Sara, jee ña̱kaꞌanꞌ re̱ꞌ jín rá ñɨvɨ ya̱ kúvi ráa se̱ꞌya ichiyúkúnꞌ nkene nu̱u̱nꞌ te̱e naní Het #23:3 Hitita jee nkachiꞌ‑i:
4―Kúvi ni̱ꞌ to̱ꞌo̱ꞌ inka ñuunꞌ ya̱ nééꞌ ni̱ꞌ nteñu rán. Taji xá ñuꞌun kuvi ñuꞌun ni̱ꞌ nu̱u̱nꞌ saꞌá ni̱ꞌ veꞌi ni̱yɨ sáva se̱ꞌí ni̱ꞌ ñunéꞌyúꞌ níꞌiꞌ ñasɨ́ꞌɨ́ ni̱ꞌ ―nkachiꞌ Abraham.
5Jee nna̱xiníkó rá ñɨvɨ ichiyúkúnꞌ Het nu̱u̱nꞌ Abraham, jee nkachiꞌ ráa nu̱u̱nꞌ re̱ꞌ:
6―Tátáꞌ, jee teso̱ꞌo nú xá ya̱ kachiꞌ ránꞌ nu̱u̱nꞌ nú. Jee suvinú vá kúvi ɨɨn te̱e kúñáꞌnú nteñu ránuꞌuꞌ ya̱ yɨ́tíñú nú nu̱u̱nꞌ Ndiosíꞌ, jee se̱ꞌí nú ñasɨ́ꞌɨ́ nú nu̱u̱nꞌ ñuꞌun máá va̱ꞌa ka̱ꞌ sáva kuvi veꞌi ni̱yɨ. Ni ɨɨn ránꞌ nsáꞌ kusáꞌán‑a taji‑i veꞌi ni̱yɨ sáva se̱ꞌí nú ñunéꞌyúꞌ níꞌiꞌ ñasɨ́ꞌɨ́ nú ―nkachiꞌ ráa nu̱u̱nꞌ Abraham.
7Jee nna̱kuiñɨꞌ Abraham jee ña̱xin nei re̱ꞌ xi̱ni̱ꞌ re̱ꞌ nu̱u̱nꞌ rá ñɨvɨ ñuunꞌ ñuꞌun yukuán, ya̱ kúvi ráa rá se̱ꞌya ichiyúkúnꞌ nkene nu̱u̱nꞌ Het. 8Jee nkachiꞌ re̱ꞌ nu̱u̱nꞌ ráa:
―Retú kuíni rán ya̱ se̱ꞌí ni̱ꞌ ñasɨ́ꞌɨ́ níꞌiꞌ ni̱ꞌ yaꞌá, kova̱ꞌa xá iniꞌ rán ka̱ka̱nꞌ táꞌvíꞌ rán jie̱ꞌe̱ꞌ nuꞌuꞌ nu̱u̱nꞌ Efrón, ya̱ kúvi se̱ꞌya Zohar, 9sáva xi̱kó‑o nu̱u̱nꞌ ni̱ꞌ máá yaviꞌ kava yu̱u̱ꞌ ya̱ nééꞌ ñuunꞌ Macpela. Yaviꞌ kava vá kúvi nantíñú maáréꞌ ya̱ káá ne̱ yuꞌú ñuꞌun re̱ꞌ. Jee chunáán ni̱ꞌ nɨꞌɨ sánikua̱ꞌ yɨ́yáꞌvi yaviꞌ kava vá, sáva kuvi ni̱ꞌ maa jee koo veꞌi ni̱yɨ ni̱ꞌ nteñu rán ―nkachiꞌ Abraham.
10Jee Efrón, ya̱ kúvi tataꞌ hitita, nééꞌ re̱ꞌ yuvéꞌí ñuunꞌ vá nteñu rá inka ñɨvɨ ya̱ kúvi ichiyúkúnꞌ Het, ya̱ nééꞌ ráa yukuán, jee nna̱xiníkó re̱ꞌ nu̱u̱nꞌ Abraham sáva teso̱ꞌo ntáká ráa ya̱ íñɨ́ yukuán nu̱u̱nꞌ kívɨ ráa ñuunꞌ vá, jee nkachiꞌ‑i:
11―¡Ntu̱ví, tátáꞌ! Teso̱ꞌo ya̱ kachiꞌ ni̱ꞌ. Sikútaꞌviꞌ ni̱ꞌ nu̱u̱nꞌ noꞌó ñuꞌun vá jín yaviꞌ kava nééꞌ nu̱u̱nꞌ ñuꞌun vá. Nu̱u̱nꞌ noꞌó síkútaꞌviꞌ ni̱ꞌ maa ichinúúnꞌ rá ñɨvɨ se̱ꞌya ñuunꞌ ni̱ꞌ yaꞌá jee néꞌyá jínúunꞌ ráa maa. Kuáséꞌí nú ñunéꞌyúꞌ níꞌiꞌ ñasɨ́ꞌɨ́ nú ―nkachiꞌ Efrón nu̱u̱nꞌ Abraham.
12Saájee ña̱xin nei Abraham maáréꞌ nu̱u̱nꞌ rá ñɨvɨ ñuunꞌ vá, 13jee nkachiꞌ nijinꞌ Abraham nu̱u̱nꞌ Efrón ichinúúnꞌ rá ñɨvɨ ñuunꞌ vá, jee nkachiꞌ re̱ꞌ:
―Kova̱ꞌa xá iniꞌ nú, teso̱ꞌo nú ya̱ kachiꞌ ni̱ꞌ nu̱u̱nꞌ nú. Taji ni̱ꞌ xu̱ꞌún nu̱u̱nꞌ ñuꞌun vá jee tɨɨn nú maa ya̱ taji ni̱ꞌ nu̱u̱nꞌ nú, sáva kɨ̱se̱ꞌí ni̱ꞌ ñunéꞌyúꞌ níꞌiꞌ ñasɨ́ꞌɨ́ ni̱ꞌ yukuán ―nkachiꞌ Abraham.
14Saájee nna̱xiníkó Efrón nu̱u̱nꞌ Abraham jee nkachiꞌ‑i:
15―Tátáꞌ ni̱ꞌ, teso̱ꞌo nú xá ya̱ kachiꞌ ni̱ꞌ nu̱u̱nꞌ nú, ñuꞌun vá yɨ́yáꞌvi‑i ku̱mi̱ꞌ sientúꞌ (400) xu̱ꞌún ka̱a kuíjín plata, soo ntu̱ví ne̱ íyó kaꞌanꞌ‑ó jie̱ꞌe̱ꞌ xu̱ꞌún. Kɨ̱se̱ꞌí nú ñunéꞌyúꞌ níꞌiꞌ ñasɨ́ꞌɨ́ nú ―nkachiꞌ Efrón nu̱u̱nꞌ Abraham.
16Jee ntɨɨn kuéntáꞌ Abraham ya̱ nkachiꞌ Efrón jee nchu̱ku̱ꞌva re̱ꞌ ku̱mi̱ꞌ sientúꞌ (400) xu̱ꞌún ka̱a plata sánikua̱ꞌ nkachiꞌ Efrón ichinúúnꞌ ntáká rá ñɨvɨ ya̱ kúvi rá se̱ꞌya ichiyúkúnꞌ Het, jee nchu̱náán re̱ꞌ maa nu̱u̱nꞌ Efrón. Nchu̱ku̱ꞌva re̱ꞌ maa sánikua̱ꞌ sáꞌá rá te̱e xíkó nantíñú. 17Jee suꞌva ñuꞌun Efrón ya̱ káá nu̱u̱nꞌ naní Macpela, yatin ñuunꞌ Mamré, jee ñuꞌun vá jín yaviꞌ kava vá, jín kua̱íyó rá yutun íyó nu̱u̱nꞌ xéꞌñú ñuꞌun vá, 18jee nku̱kutú ya̱ jia̱ꞌa ya̱ nááꞌ ya̱ kínóo ñuꞌun vá xi̱ntíín Abraham ya̱ kuvi ñuꞌun re̱ꞌ maa nu̱nijínꞌ ichinúúnꞌ rá ñɨvɨ se̱ꞌya ichiyúkúnꞌ Het ya̱ kívɨ ráa yuvéꞌí ñuunꞌ vá jee nteso̱ꞌo ráa. 19Jee sáá nkuvi yaꞌá jee ña̱se̱ꞌí Abraham ñunéꞌyúꞌ níꞌiꞌ ñasɨ́ꞌɨ́ re̱ꞌ Sara iniꞌ yaviꞌ kava vá ya̱ káá nu̱u̱nꞌ ñuꞌun nu̱u̱nꞌ naní Macpela, yatin ñuunꞌ Mamré, ya̱ suni naní Hebrón, ya̱ káá ñuunꞌ Canaán. 20Jee suꞌva nku̱kutú ya̱ nkino̱o Abraham jín ñuꞌun vá jín yaviꞌ kava vá ya̱ nníꞌinꞌ re̱ꞌ nu̱u̱nꞌ rá ñɨvɨ kúvi se̱ꞌya ichiyúkúnꞌ nkene nu̱u̱nꞌ te̱e naní Het, sáva kúvi‑i veꞌi ni̱yɨ re̱ꞌ.
Currently Selected:
Génesis 23: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
