Génesis 25
25
Rá ichiyúkúnꞌ nkene nu̱u̱nꞌ Abraham jín Queturá
1Nna̱tana̱ꞌá tuku Abraham jín ɨɨn ñaꞌan naní Queturá. 2Jee ni̱yo rá se̱ꞌya ña jín re̱ꞌ ya̱ nkuvi Zimrám, Jocsán, Medán, Madián, Isbac jín Súah. 3Jee Jocsán nkuvi re̱ꞌ tátáꞌ Seba jín Dedán. Jee rá ichiyúkúnꞌ nkene nu̱u̱nꞌ Dedán nkuvi rá ñɨvɨ Asur, jín rá letus jín rá leum. 4Jee rá se̱ꞌya Madián nkuvi Efa, Éfer, Hanoc, Abidá jín Eldá. Ntáká rá yaꞌá nkuvi ichiyúkúnꞌ nkene nu̱u̱nꞌ Queturá. 5Jee njia̱ꞌa Abraham nɨꞌɨ kuitɨꞌ ya̱ kúmí re̱ꞌ nu̱u̱nꞌ se̱ꞌya yɨ́ɨ́ re̱ꞌ Isaac. 6Soo njia̱ꞌa re̱ꞌ ta̱ꞌvi̱ꞌ nu̱u̱nꞌ rá inka se̱ꞌya re̱ꞌ níyo jín rá inka ñaꞌan ya̱ nna̱kasaɨn re̱ꞌ ráña, jee ne̱ sáá tékúꞌ i̱i̱ꞌ re̱ꞌ ka̱ꞌ jee nsa̱ꞌá sɨ́ɨ́n re̱ꞌ ráa nu̱u̱nꞌ se̱ꞌya re̱ꞌ Isaac jee nta̱jí re̱ꞌ ráa kua̱ꞌa̱nꞌ ráa nu̱u̱nꞌ rá ñuunꞌ káá nu̱u̱nꞌ kénta nka̱niiꞌ.
Ni̱ꞌi̱ꞌ Abraham jee nse̱ꞌí ráa re̱ꞌ
7Jee nɨꞌɨ kui̱ya̱ꞌ ya̱ ntekuꞌ Abraham ví sientúꞌ u̱ni̱xiko xa̱ꞌu̱nꞌ kui̱ya̱ꞌ (175), 8jee máá kuéꞌíꞌ ñáꞌnú ni̱ꞌi̱ꞌ re̱ꞌ ni sáá ya̱ nku̱ñáꞌnú víꞌí re̱ꞌ jee kúsɨ́ɨꞌ iniꞌ re̱ꞌ jee nna̱keꞌen Ndiosíꞌ ánímaꞌ re̱ꞌ nutútú‑u ichi kútú jín rá ánímaꞌ rá tátáꞌ jííꞌ re̱ꞌ yanaꞌán. 9Jee rá se̱ꞌya re̱ꞌ Isaac jín Ismael nse̱ꞌí ráa re̱ꞌ iniꞌ yaviꞌ kava ya̱ káá nu̱u̱nꞌ ñuꞌun nu̱u̱nꞌ naní Macpela yatin ñuunꞌ Mamré, jee káá kava vá ñuꞌun Efrón ya̱ kúvi se̱ꞌya Zohar ya̱ kúvi te̱e hitita. 10Jee ñuꞌun yaꞌá ya̱ nkeꞌen Abraham nu̱u̱nꞌ rá se̱ꞌya ichiyúkúnꞌ nkene nu̱u̱nꞌ te̱e naní Het jee yukuán ña̱ꞌa̱nꞌ se̱ꞌí ráa ñunéꞌyúꞌ níꞌiꞌ Abraham jín ñasɨ́ꞌɨ́ re̱ꞌ Sara. 11Jee sáá njia̱ꞌa ki̱vɨ̱ꞌ ya̱ níꞌiꞌ Abraham jee nsa̱ꞌá víꞌí Ndiosíꞌ ya̱ váꞌa jín Isaac, jee nkino̱o‑o nééꞌ‑e yatin nu̱u̱nꞌ nééꞌ sókó nute ya̱ naní “maáréꞌ ya̱ tékúꞌ ya̱ néꞌyá re̱ꞌ nuꞌuꞌ”. #25:11 Tu̱ꞌun hebreo yaꞌá kúvi‑i Beer Lajai Roi.
Rá ichiyúkúnꞌ nkene nu̱u̱nꞌ Ismael
12Rá yaꞌá kúvi rá ichiyúkúnꞌ nkene nu̱u̱nꞌ se̱ꞌya yɨ́ɨ́ Abraham ya̱ naní Ismael ya̱ níyo jín inka ñaꞌan ya̱ naní Agar, ñaꞌan ñuunꞌ Egipto ya̱ nkuvi musúꞌ ña̱tíñú saɨn Sara.
13Jee yaꞌá kúvi rá súví rá se̱ꞌya Ismael jee suꞌva níkɨ́nꞌ táꞌán rá se̱ꞌya Ismael sáá nkaku ráa: Jee se̱ꞌya xíꞌnañúꞌún Ismael nkuvi Nebaiot, jee kuíre ni̱yo Cedar, Adbeel, Mibsam, 14Mismá, Dumá, Masá, 15Hadar, Tema, Jetur, Nafis jín Quedema. 16Jee rá yaꞌá ví rá se̱ꞌya Ismael, jee rá ñuꞌun jín rá ñuunꞌ nu̱u̱nꞌ nééꞌ rá se̱ꞌya ichiyúkúnꞌ nkene nu̱u̱nꞌ ta ɨɨn rá se̱ꞌya Ismael naní kua̱ꞌ naní maá se̱ꞌya Ismael ya̱ kúvi tátáꞌ jííꞌ rá ñɨvɨ nééꞌ yukuán. Jee nkuvi u̱xu̱ꞌ u̱vi̱ꞌ (12) te̱e tátúníꞌ nu̱u̱nꞌ rá se̱ꞌya ichiyúkúnꞌ nkene nu̱u̱nꞌ rá se̱ꞌya Ismael. Jee ta ɨɨn rá te̱e vá nta̱túníꞌ re̱ꞌ nu̱u̱nꞌ rá ñɨvɨ ya̱ kúvi ráa se̱ꞌya ichiyúkúnꞌ nkene nu̱u̱nꞌ ɨɨn se̱ꞌya Ismael.
17’Jee ni̱ñɨ Ismael sientúꞌ o̱ko̱ꞌ xa̱ꞌu̱nꞌ u̱vi̱ꞌ (137) kui̱ya̱ꞌ jee ni̱ꞌi̱ꞌ re̱ꞌ, jee nna̱keꞌen Ndiosíꞌ ánímaꞌ re̱ꞌ nnu̱tútú‑u ichi kútú jín rá ánímaꞌ rá jííꞌ re̱ꞌ yanaꞌán. 18Jee ña̱kuneeꞌ ráa ne̱ rá ñuꞌun ñuunꞌ Havila jín né nu̱u̱nꞌ ñuunꞌ Sur, ya̱ kétáꞌán jín xéꞌñú ñuunꞌ Egipto, ya̱ kuáꞌánꞌ ichi ñuunꞌ Asiria. Jee ntu̱fi̱ꞌ ta̱ꞌán ráa jín nɨꞌɨ táꞌán ráa. #25:18 Áxí kúvi kachiꞌ‑ó: jee ni̱ꞌi̱ꞌ re̱ꞌ ichinúúnꞌ ntáká rá táꞌán re̱ꞌ.
Nkaku Jacob jín Esaú
19Tu̱ꞌun yaꞌá kuvi jie̱ꞌe̱ꞌ rá se̱ꞌya yɨ́ɨ́ Isaac se̱ꞌya yɨ́ɨ́ Abraham: Ni̱yo se̱ꞌya Abraham Isaac. 20Jee íñɨ́ Isaac u̱vi̱xiko kui̱ya̱ꞌ (40) sáá nta̱na̱ꞌá re̱ꞌ jín Rebeca, ya̱ kúvi se̱ꞌya sɨ́ꞌɨ́ Betuel, te̱e tataꞌ aram ya̱ nééꞌ‑e ñuunꞌ Padán‑aram jee kúvi ña ku̱ꞌva Labán, te̱e tataꞌ aram.
21Jee ni̱ka̱nꞌ táꞌvíꞌ Isaac nu̱u̱nꞌ I̱toꞌoꞌ Ndiosíꞌ jie̱ꞌe̱ꞌ ñasɨ́ꞌɨ́ re̱ꞌ Rebeca, chi ñaꞌan númáꞌ ví ña, jee ntɨɨn kuéntáꞌ I̱toꞌoꞌ, jee nanise̱ꞌya ñasɨ́ꞌɨ́ re̱ꞌ Rebeca. 22Soo rá nchíkɨ́n ñuꞌun chi̱ji Rebeca súkúta̱ꞌán ráa iniꞌ ña, jee nkaꞌvi iniꞌ ña: “Retú suꞌva kúvi yaꞌá, ¿na̱ja kutekuꞌ ni̱ꞌ ka̱ꞌ rúja?”, nkaꞌvi iniꞌ ña, saájee ña̱ꞌa̱nꞌ ña ka̱ka̱tu̱ꞌún ña I̱toꞌoꞌ. 23Jee nna̱xiníkó I̱toꞌoꞌ nu̱u̱nꞌ ña:
―Chi̱ji nú ñúꞌún u̱vi̱ꞌ te̱e ya̱ kene u̱vi̱ꞌ rá ñuunꞌ, jee kene iniꞌ nú u̱vi̱ꞌ tataꞌ jee kusɨ́ɨ́n ráa, jee ɨɨn tiɨ́kɨ́ ka̱ꞌ nsú káꞌ inka ka̱ꞌ, jee ya̱ nyɨɨ ka̱ꞌ vá kɨtíñú‑u kɨꞌɨ‑ɨ xi̱ntíín ya̱ súchí ka̱ꞌ ―nkachiꞌ Ndiosíꞌ nu̱u̱nꞌ Rebeca.
24Jee sáá nkenta ki̱vɨ̱ꞌ sikáku ña se̱ꞌya ña, saájee ñúꞌún kuatíꞌ iniꞌ ña. 25Jee maáréꞌ ya̱ nkaku xíꞌnañúꞌún jee kuéꞌé re̱ꞌ, jee ixi víꞌí kua̱íyó yɨkɨkúñu re̱ꞌ kuéntáꞌ saꞌma, jee nsi̱kúnání ráa Esaú maa. #25:25 Esaú kuíni káchíꞌ: kue̱ꞌe̱ꞌ ixi. 26Jee kuíre nkene ñaniꞌ re̱ꞌ jee ntɨɨn re̱ꞌ jín naꞌá re̱ꞌ xu̱jieꞌéꞌ Esaú, saáva nsi̱kúnání ráa maa Jacob. #25:26 Jacob kuíni káchíꞌ: xu̱jieꞌéꞌ. Jee suni kuíni káchíꞌ‑i: nákunasɨꞌ. Jee kúnkunuún tésóꞌo‑o kuéntáꞌ ɨɨn tu̱ꞌun hebreo ya̱ kuíni káchíꞌ: máñáꞌ re̱ꞌ. Jee íñɨ́ Isaac u̱ni̱xiko (60) kui̱ya̱ꞌ sáá nkaku rá se̱ꞌya re̱ꞌ.
Xíkó Esaú ta̱ꞌvi̱ꞌ ya̱ íyó ni̱ꞌi̱nꞌ se̱ꞌya xíꞌnañúꞌún
27Jee ñaꞌnu rá te̱e kuáchí, jee nkenta nkuvi Esaú ɨɨn te̱e nu̱sú na̱a̱ꞌ víꞌí nu̱u̱nꞌ re̱ꞌ tívɨ́ꞌ kitɨ yúkú jee kúvi‑i te̱e jíkanuun nu̱u̱nꞌ kuꞌúꞌ. Soo Jacob chi nkuvi ɨɨn te̱e másúꞌ iniꞌ, jee táꞌán víꞌí iniꞌ‑i kino̱o yatin‑i veꞌi sayo saꞌma nu̱u̱nꞌ nééꞌ‑e. 28Jee tátáꞌ ráa Isaac nñunu̱u̱nꞌ víꞌí re̱ꞌ ka̱ꞌ Esaú, chi táꞌán víꞌí iniꞌ re̱ꞌ kajiꞌ re̱ꞌ ku̱ñu kitɨ yúkú, soo nánáꞌ ráa Rebeca chi nñunu̱u̱nꞌ ña ka̱ꞌ Jacob.
29Jee ɨɨn ki̱vɨ̱ꞌ nsi̱kítɨ́ꞌ Jacob neyu, jee nenta Esaú ya̱ ñáꞌanꞌ re̱ꞌ nu̱u̱nꞌ kuꞌúꞌ jee jiáví víꞌí re̱ꞌ, 30jee nkachiꞌ Esaú nu̱u̱nꞌ Jacob:
―Jíkánꞌ táꞌvíꞌ ni̱ꞌ nu̱u̱nꞌ nú ya̱ taji nú ntíꞌ neyu kuéꞌé yaꞌá kajiꞌ ni̱ꞌ, chi jiáví víꞌí ni̱ꞌ ―nkachiꞌ Esaú nu̱u̱nꞌ ñaniꞌ re̱ꞌ Jacob. (Saáva suni síkúnání ñɨvɨ Esaú súví‑i Edom.) #25:30 Edom kuíni káchíꞌ: kuéꞌé.
31Saájee nkachiꞌ Jacob nu̱u̱nꞌ re̱ꞌ:
―Ntañúꞌún xi̱kó nu̱u̱nꞌ ni̱ꞌ ta̱ꞌvi̱ꞌ ya̱ íyó ni̱ꞌi̱nꞌ nú jie̱ꞌe̱ꞌ nkaku nú xíꞌnañúꞌún ―nkachiꞌ Jacob nu̱u̱nꞌ Esaú.
32Saájee nkachiꞌ Esaú:
―Kune̱ꞌyá, jíꞌíꞌ ni̱ꞌ jie̱ꞌe̱ꞌ so̱ko, ¿na̱ nu̱u̱nꞌ íyótiñu ta̱ꞌvi̱ꞌ ni̱ꞌi̱nꞌ ni̱ꞌ jie̱ꞌe̱ꞌ nkaku ni̱ꞌ xíꞌnañúꞌún rúja? ―nkachiꞌ Esaú.
33Saájee nkachiꞌ Jacob:
―Saꞌá náaꞌ nú tu̱ꞌun káꞌánꞌ nú ntañúꞌún ―nkachiꞌ Jacob nu̱u̱nꞌ Esaú.
Saájee nsa̱ꞌá náaꞌ Esaú nu̱u̱nꞌ tu̱ꞌun káꞌánꞌ re̱ꞌ nu̱u̱nꞌ Jacob, jee suꞌva nxi̱kó Esaú nu̱u̱nꞌ Jacob ta̱ꞌvi̱ꞌ re̱ꞌ ya̱ íyó ni̱ꞌi̱nꞌ re̱ꞌ jie̱ꞌe̱ꞌ nkaku re̱ꞌ xíꞌnañúꞌún. 34Saájee njia̱ꞌa Jacob i̱xta̱tíláꞌ jín neyu nsa̱ꞌá‑a jín nuchi lenteja nu̱u̱nꞌ Esaú nyajiꞌ re̱ꞌ niꞌi re̱ꞌ, jee nnakui̱ñɨ̱ꞌ re̱ꞌ jee kua̱ꞌa̱nꞌ re̱ꞌ, jee sukuán nkuniichiꞌ Esaú ta̱ꞌvi̱ꞌ ya̱ níyo ni̱ꞌi̱nꞌ re̱ꞌ jie̱ꞌe̱ꞌ nkaku re̱ꞌ xíꞌnañúꞌún.
Currently Selected:
Génesis 25: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
