Génesis 32
32
Saꞌá túꞌva Jacob sáva naketáꞌán re̱ꞌ jín ñaniꞌ re̱ꞌ Esaú
1Jee Jacob chi kua̱ꞌa̱nꞌ re̱ꞌ ichi nu̱u̱nꞌ kua̱ꞌa̱nꞌ re̱ꞌ, jee nna̱ketáꞌán rá najiáꞌáꞌ ííꞌ Ndiosíꞌ maáréꞌ. 2Jee sáá niniꞌ Jacob rá najiáꞌáꞌ ííꞌ vá, jee nkachiꞌ re̱ꞌ: “Yaꞌá kúvi nu̱u̱nꞌ kínóo ejército najiáꞌáꞌ ííꞌ Ndiosíꞌ,” nkachiꞌ Jacob, saáva nsi̱kúnání re̱ꞌ súví nu̱u̱nꞌ ñuꞌun yukuán Mahanaim. #32:2 Mahanaim kuíni káchíꞌ: u̱vi̱ꞌ nu̱u̱nꞌ kino̱o ejército. 3Jee nchu̱ichí Jacob sava rá te̱e kua̱ꞌa̱nꞌ jín tu̱ꞌun nu̱u̱nꞌ ñaniꞌ re̱ꞌ Esaú, nu̱u̱nꞌ ñuunꞌ Seir, ya̱ kúvi ñuunꞌ sánitɨ́ɨn ñuunꞌ Edom. 4Jee nta̱túníꞌ Jacob ya̱:
―Suꞌva kachiꞌ rán nu̱u̱nꞌ i̱toꞌoꞌ ni̱ꞌ Esaú: “Suꞌva káchíꞌ musúꞌ nú Jacob, nneeꞌ ni̱ꞌ kuéntáꞌ to̱ꞌo̱ꞌ jín Labán jee nkino̱o ni̱ꞌ yukuán ne̱ vitan. 5Jee íyó xi̱ni̱kɨ̱ꞌ ni̱ꞌ, jín burrúꞌ ni̱ꞌ, jín sa̱na̱ꞌ líꞌí ni̱ꞌ, jín rá te̱e jín rá ñaꞌan ya̱ kúvi musúꞌ jiátíñú saɨn ni̱ꞌ. Tájí ni̱ꞌ rá tee yaꞌá sáva nakani ráa rá tu̱ꞌun yaꞌá nu̱u̱nꞌ i̱toꞌoꞌ ni̱ꞌ sáva koo ma̱ni̱ꞌ iniꞌ nú kune̱ꞌyá nú nuꞌuꞌ” ―nkachiꞌ Jacob sákachiꞌ rá te̱e vá nu̱u̱nꞌ Esaú.
6Jee sáá nni̱kó rá te̱e ya̱ ña̱ꞌa̱nꞌ jín tu̱ꞌun jee nkachiꞌ ráa nu̱u̱nꞌ Jacob:
―Ña̱ꞌa̱nꞌ ránꞌ ña̱ne̱ꞌyá ránꞌ ñaniꞌ nú Esaú, jee ya va̱ji maáréꞌ jín kumí sientúꞌ (400) rá te̱e sáva kitaꞌanꞌ re̱ꞌ noꞌó ―nkachiꞌ ráa nu̱u̱nꞌ Jacob.
7Jee nyu̱ꞌví nasɨ́kuitɨꞌ Jacob, jee nnu̱kuíꞌyáꞌ víꞌí iniꞌ re̱ꞌ, saáva nta̱sáva re̱ꞌ u̱vi̱ꞌ grupo rá ñɨvɨ kútáꞌán jín re̱ꞌ, jín suni rá sa̱na̱ꞌ líꞌí, jín rá xi̱ni̱kɨ̱ꞌ, jín rá kameyúꞌ. 8Chi nkaꞌvi iniꞌ re̱ꞌ ya̱ retú va̱ji Esaú kantáꞌán re̱ꞌ si̱kɨ̱ꞌ ɨɨn grupo, jee inka ka̱ꞌ grupo kuvi kaku ráa, nkaꞌvi iniꞌ Jacob. 9Jee kuíre nkaꞌanꞌ re̱ꞌ jín Ndiosíꞌ, jee kachiꞌ re̱ꞌ:
―Ndiosíꞌ ya̱ néñu̱ꞌun tájííꞌ ni̱ꞌ Abraham jín tátáꞌ ni̱ꞌ Isaac, Noꞌó ya̱ kúvi I̱toꞌoꞌ ni̱ꞌ ya̱ nkachiꞌ nu̱u̱nꞌ ni̱ꞌ ya̱ “nikó nú nu̱u̱nꞌ ñuꞌun rá táꞌán nú jee saꞌá váꞌa ni̱ꞌ jín noꞌó”. 10Ntu̱ví íyó ni̱ꞌi̱nꞌ ni̱ꞌ ya̱ koo ma̱ni̱ꞌ iniꞌ nú kune̱ꞌyá nú nuꞌuꞌ jín nɨꞌɨ ya̱ nɨ́ɨ́nkání nsi̱kúnkuvi na̱a̱ꞌ nú jín nuꞌuꞌ. Kúvi ni̱ꞌ musúꞌ saɨn nu̱u̱nꞌ nú, chi maáníꞌ jee njia̱ꞌa ni̱ꞌ nute káꞌnú Jordán yaꞌá jee kua̱chi kuitɨꞌ karútíꞌ ni̱ꞌ vá nééꞌ ni̱ꞌ, jee vitan jee nkenta kúmí ni̱ꞌ ne̱ u̱vi̱ꞌ grupo ñɨvɨ jín rá sa̱na̱ꞌ.
11’Vitan jee kova̱ꞌa xá iniꞌ nú sikáku xá nuꞌuꞌ xi̱ntíín ñaniꞌ ni̱ꞌ Esaú, chi yúꞌví ni̱ꞌ ya̱ sa̱naanꞌ kiji re̱ꞌ saꞌá kini re̱ꞌ nuꞌuꞌ jín rá kuáchí jín rá nánáꞌ ráa. 12Jee maánú nkachiꞌ nú nu̱u̱nꞌ ni̱ꞌ ya̱ “saꞌá ni̱ꞌ ya̱ kɨ̱ꞌɨ̱nꞌ va̱ꞌa jín nú, jee saꞌá ni̱ꞌ ya̱ kukueꞌeꞌ nasɨ́kuitɨꞌ rá kiji kuvi ichiyúkúnꞌ nú kuéntáꞌ ñuítɨ́ káá yuꞌú nteñúꞌún ya̱ ntu̱ví kúvi kaꞌvi maa” ―nkachiꞌ Jacob nu̱u̱nꞌ Ndiosíꞌ.
13Jee yakuááꞌ ki̱vɨ̱ꞌ yukuán nkino̱o Jacob yukuán, jee nu̱u̱nꞌ rá nantíñú ya̱ kúmí re̱ꞌ ntɨɨn re̱ꞌ ta̱ꞌvi̱ꞌ sáva sikútaꞌviꞌ re̱ꞌ maa ñaniꞌ re̱ꞌ Esaú: 14U̱vi̱ꞌ sientúꞌ (200) rá chuvíyáꞌ, jee o̱ko̱ꞌ (20) rá chuvatúꞌ, jee u̱vi̱ꞌ sientúꞌ (200) rá lanchi sɨ́ꞌɨ́, jee o̱ko̱ꞌ (20) rá kanerúꞌ, 15jee o̱ko̱ꞌ u̱ji̱ꞌ (30) rá kameyúꞌ sɨ́ꞌɨ́ ya̱ nákayɨkɨ́n rátíꞌ, jee u̱vi̱xiko (40) rá vaca, jee u̱ji̱ꞌ rá toro, jee o̱ko̱ꞌ (20) rá burráꞌ, u̱ji̱ꞌ rá burrúꞌ. 16Jee njia̱ꞌa re̱ꞌ ta nu̱u̱nꞌ ta nu̱u̱nꞌ kitɨ kúvi rátíꞌ xi̱ntíín rá musúꞌ jiátíñú saɨn re̱ꞌ, jee nkachiꞌ re̱ꞌ nu̱u̱nꞌ ráa:
―Kaka rán kɨ̱ꞌɨ̱nꞌ rán ichinúúnꞌ ni̱ꞌ, jee xinóo núne ránú nteñu ta nu̱u̱nꞌ ta nu̱u̱nꞌ rá sa̱na̱ꞌ ―nkachiꞌ re̱ꞌ.
17Jee nta̱túníꞌ re̱ꞌ nu̱u̱nꞌ te̱e xíꞌnañúꞌún:
―Sáá naketáꞌán ñaniꞌ ni̱ꞌ Esaú ránoꞌó, jee katu̱ꞌún re̱ꞌ ránoꞌó: “¿ne̱ ɨɨn kúvi i̱toꞌoꞌ nú?, jee, ¿né núꞌ kɨ̱ꞌɨ̱nꞌ nú?, jee, ¿ne̱ ɨɨn sa̱na̱ꞌ ví rá sa̱na̱ꞌ kua̱ꞌa̱nꞌ jín nú yaꞌá?” kachiꞌ Esaú nu̱u̱nꞌ nú, 18saájee naxiníkó nú nu̱u̱nꞌ re̱ꞌ: “sa̱na̱ꞌ musúꞌ nú Jacob ví rá sa̱na̱ꞌ yaꞌá jee kúvi rátíꞌ ɨɨn ta̱ꞌvi̱ꞌ ya̱ nchu̱ichí re̱ꞌ nu̱u̱nꞌ nú, i̱toꞌoꞌ ni̱ꞌ Esaú. Jee suni va̱ji maáréꞌ ya̱ta̱ꞌ ráníꞌ” kachiꞌ nú ―nkachiꞌ Jacob nu̱u̱nꞌ musúꞌ re̱ꞌ.
19Jee suni nu̱u̱nꞌ musúꞌ re̱ꞌ ya̱ nchu̱ichí re̱ꞌ ya̱ uvíꞌ íchí, jín ya̱ uníꞌ íchí, jín nu̱u̱nꞌ ntáká rá musúꞌ re̱ꞌ ya̱ kua̱ꞌa̱nꞌ náka ta nu̱u̱nꞌ ta nu̱u̱nꞌ rá sa̱na̱ꞌ, jee nta̱túníꞌ re̱ꞌ nu̱u̱nꞌ ráa:
―Sáá naketáꞌán rán Esaú, jee sánikua̱ꞌ tu̱ꞌun nkachiꞌ ni̱ꞌ kachiꞌ rán nu̱u̱nꞌ re̱ꞌ. 20Jee suni kachiꞌ rán nu̱u̱nꞌ re̱ꞌ: “Jacob, ya̱ kúvi musúꞌ nú, va̱ji re̱ꞌ ya̱ta̱ꞌ ráníꞌ” kachiꞌ rán ―nkachiꞌ Jacob nu̱u̱nꞌ rá musúꞌ re̱ꞌ.
Chi jie̱ꞌe̱ꞌ nika̱ꞌ nkaꞌvi iniꞌ Jacob: “Xiníko ni̱ꞌ iniꞌ Esaú ya̱ kitɨ iniꞌ re̱ꞌ jín rá ta̱ꞌvi̱ꞌ ya̱ nchu̱ichí ni̱ꞌ kua̱ꞌa̱nꞌ ichinúúnꞌ ni̱ꞌ, jee kuíre kuniꞌ máá maáníꞌ re̱ꞌ. Jee sa̱naanꞌ jee suꞌva natɨɨn va̱ꞌa re̱ꞌ nuꞌuꞌ.” 21Jee suꞌva, xíꞌna ka̱ꞌ rá ta̱ꞌvi̱ꞌ kua̱ꞌa̱nꞌ ichinúúnꞌ, jee nkino̱o maá Jacob yakuááꞌ ki̱vɨ̱ꞌ yukuán nu̱u̱nꞌ ñuꞌun yukuán nu̱u̱nꞌ nkino̱o ráa.
Súkúta̱ꞌán Jacob
22Jee máá yakuááꞌ yukuán jee nnako̱o Jacob, jee nkeꞌen re̱ꞌ ni núvíꞌ rá ñasɨ́ꞌɨ́ re̱ꞌ, jín ni núvíꞌ rá ñaꞌan ya̱ kúvi musúꞌ ya̱ jiátíñú saɨn re̱ꞌ, jín ni u̱ji̱ꞌ ɨɨn rá se̱ꞌya yɨ́ɨ́ re̱ꞌ, jee nsi̱áꞌa re̱ꞌ ráa nute káꞌnú naní Jaboc nu̱u̱nꞌ káá yáxín nute. 23Jee sáá nsi̱áꞌa re̱ꞌ ráa jee kuíre nsi̱áꞌa re̱ꞌ nɨꞌɨ rá kúmí re̱ꞌ.
24Jee sáá nkino̱o métúꞌún Jacob, jee ɨɨn te̱e nsu̱ku̱ta̱ꞌán jín re̱ꞌ nekuaꞌ va̱kunijinꞌ, 25soo sáá niniꞌ te̱e vá ya̱ ntu̱ví kúneí‑i kakɨnꞌ‑ɨ ya̱ta̱ꞌ Jacob, jee njia̱ꞌa‑a nu̱u̱nꞌ ñútáꞌán yɨkɨ xiín jín yɨkɨ sɨ́ꞌɨn tíkóó Jacob, jee yukuán ví nu̱u̱nꞌ njia̱ꞌa táꞌán yɨkɨ xiín Jacob ni súkúta̱ꞌán re̱ꞌ jín te̱e vá. 26Saájee nkachiꞌ te̱e vá:
―Siaáꞌ nuꞌuꞌ, chi ya̱ va̱ji kunijinꞌ ―nkachiꞌ te̱e vá.
Jee nkachiꞌ Jacob:
―Nsáꞌ siaáꞌ ni̱ꞌ noꞌó retú ntu̱ví saꞌá nú ya̱ netuꞌ kuvi ni̱ꞌ ―nkachiꞌ Jacob.
27Jee nkachiꞌ te̱e vá nu̱u̱nꞌ Jacob:
―¿Ná naní nú? ―nkachiꞌ te̱e vá.
Jee nkachiꞌ Jacob:
―Jacob ―nkachiꞌ Jacob.
28Saájee nkachiꞌ te̱e vá nu̱u̱nꞌ Jacob:
―Nku̱nání nú ka̱ꞌ Jacob. Chisaꞌ súví nú kuvi Israel, #32:28 Israel kuíni káchíꞌ: súkúta̱ꞌán jín Ndiosíꞌ. chi nsu̱ku̱ta̱ꞌán nú jín Ndiosíꞌ jín rá ñɨvɨ jee nku̱neí nú ñakɨnꞌ nú ya̱ta̱ꞌ ―nkachiꞌ te̱e vá nu̱u̱nꞌ Jacob.
29Saájee ni̱ka̱tu̱ꞌún Jacob te̱e vá, jee nkachiꞌ‑i:
―Kachiꞌ xá ná naní súví nú ―nkachiꞌ Jacob.
Soo nna̱xiníkó te̱e vá:
―¿Na̱ jie̱ꞌe̱ꞌ chi jíkátu̱ꞌún nú nuꞌuꞌ súví ni̱ꞌ résa? ―nkachiꞌ te̱e vá, jee kuíre nsa̱ꞌá te̱e vá ya̱ netuꞌ kuvi Jacob yukuán.
30Jee Jacob nsi̱kúnání súví nu̱u̱nꞌ ñuꞌun yukuán Peniel, #32:30 Peniel kuíni káchíꞌ: nu̱u̱nꞌ Ndiosíꞌ. chi nkachiꞌ Jacob: “Niniꞌ nu̱u̱nꞌ táꞌán ni̱ꞌ jín Ndiosíꞌ, jee sú na̱sa ka̱ꞌ jee tékúꞌ i̱i̱ꞌ ni̱ꞌ.” 31Jee ntu̱u̱nꞌ nka̱niiꞌ sáá kua̱jia̱ꞌa Jacob nu̱u̱nꞌ nsi̱kúnání re̱ꞌ Peniel yukuán, jee jíka u̱ꞌvi̱ꞌ re̱ꞌ jie̱ꞌe̱ꞌ njia̱ꞌa táꞌán yɨkɨ xiín re̱ꞌ. 32Saáva ne̱ ki̱vɨ̱ꞌ vitan rá ichiyúkúnꞌ rá ñɨvɨ Israel ntu̱ví yájíꞌ ráa nu̱u̱nꞌ ñútáꞌán tu̱chi yɨkɨ xiín rá sa̱na̱ꞌ, chi yukuán ví nu̱u̱nꞌ ntaꞌanꞌ Jacob nu̱u̱nꞌ ñútáꞌán tu̱chi yɨkɨ xiín jín yɨkɨ sɨ́ꞌɨn nu̱u̱nꞌ njia̱ꞌa táꞌán‑a.
Currently Selected:
Génesis 32: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
