Juan 16

1’Nkachiꞌ ni̱ꞌ rá tu̱ꞌun yaꞌá nu̱u̱nꞌ rán, sáva nsáꞌ kininkava rán xinóo rán kuneí iniꞌ rán ka̱ꞌ nuꞌuꞌ. 2Chi tavaꞌ ráa ránoꞌó iniꞌ rá veꞌi sinagoga nu̱u̱nꞌ kútútú rá ñɨvɨ Israel jee nkúꞌva ráa ka̱ꞌ ki̱vɨ rán nteñu ráa. Jee nsú kua̱chi sukuán ni chi kenta ki̱vɨ̱ꞌ ya̱ néni ɨɨn ráa kaꞌniꞌ‑i ránoꞌó, jee kukaꞌvi iniꞌ‑i ya̱ ɨɨn tiñu váꞌa sáꞌá‑a nu̱u̱nꞌ Ndiosíꞌ. 3Jee saꞌá ráa sukuán jín ránoꞌó, chi ntu̱ví jíníꞌ ráa iniꞌ Tátáꞌ ni̱ꞌ ni iniꞌ nuꞌuꞌ. 4Jee ya̱ nkachiꞌ ni̱ꞌ rá tu̱ꞌun yaꞌá nu̱u̱nꞌ rán, sáva sáá kenta ki̱vɨ̱ꞌ ya̱ kunoꞌo rán, jee naku̱ꞌun iniꞌ rán rá tu̱ꞌun yaꞌá ya̱ nkachiꞌ ni̱ꞌ maa nu̱u̱nꞌ rán jie̱ꞌe̱ꞌ vá.

Tiñu ya̱ sáꞌá Ta̱chi̱ꞌ Ííꞌ

’Ntu̱ví nkáchíꞌ ni̱ꞌ rá tu̱ꞌun yaꞌá nu̱u̱nꞌ rán ne̱ tiempúꞌ xíꞌnañúꞌún ya̱ nka̱jiéꞌé ni̱ꞌ nna̱kani ni̱ꞌ rá tu̱ꞌun váꞌa ni̱ꞌ, chi jie̱ꞌe̱ꞌ ni ka̱ꞌ ya̱ nku̱táꞌán ni̱ꞌ jín ránoꞌó. 5Soo vitan jee kɨ̱noꞌonꞌ ni̱ꞌ nu̱u̱nꞌ maáréꞌ ya̱ nta̱jí re̱ꞌ nuꞌuꞌ va̱ji ni̱ꞌ. Jee ni ɨɨn rán ntu jíkátu̱ꞌún‑u ka̱ꞌ nuꞌuꞌ: “Né núꞌ kɨ̱ꞌɨ̱nꞌ nú”. 6Chisaꞌ kúkuéká nasɨ́kuitɨꞌ iniꞌ rán chi nkachiꞌ ni̱ꞌ nu̱u̱nꞌ rán rá tu̱ꞌun ya̱ sukuán koo. 7Soo káchíꞌ ni̱ꞌ ya̱ naáꞌ nu̱u̱nꞌ rán ya̱ va̱ꞌa ka̱ꞌ kúvi nu̱u̱nꞌ ránoꞌó ya̱ kɨ̱ꞌɨ̱nꞌ noꞌonꞌ ni̱ꞌ, chi retánꞌ nkɨ̱ꞌɨ́nꞌ ni̱ꞌ, jee nsáꞌ kiji maáréꞌ ya̱ chineí chituvi re̱ꞌ nachuꞌun neí re̱ꞌ iniꞌ ánímaꞌ rán. Soo retú kɨ̱ꞌɨ̱nꞌ ni̱ꞌ, jee chuichí ni̱ꞌ re̱ꞌ kiji re̱ꞌ nu̱u̱nꞌ ránoꞌó. 8Sáá kiji re̱ꞌ, jee stúvi kájí‑i nu̱u̱nꞌ rá ñɨvɨ ñɨ̱vɨ́ ya̱ íyó kua̱chi si̱kɨ̱ꞌ ráa, jín na̱sa kuvi kino̱o na̱a̱ꞌ ráa nu̱u̱nꞌ Ndiosíꞌ, jín ya̱ na̱a̱ꞌ keꞌneꞌ Ndiosíꞌ kua̱chi ráa. 9Jee stúvi kájí re̱ꞌ ya̱ íyó kua̱chi si̱kɨ̱ꞌ ráa chi ntu kúneí iniꞌ ráa nuꞌuꞌ. 10Jee stúvi kájí re̱ꞌ na̱sa kino̱o na̱a̱ꞌ ráa nu̱u̱nꞌ Ndiosíꞌ chi kɨ̱noꞌonꞌ ni̱ꞌ nu̱u̱nꞌ nééꞌ Tátáꞌ ni̱ꞌ, jee nsáꞌ kuniꞌ rán ka̱ꞌ nuꞌuꞌ. 11Jee stúvi kájí re̱ꞌ ya̱ keꞌneꞌ na̱a̱ꞌ re̱ꞌ kua̱chi si̱kɨ̱ꞌ rá ñɨvɨ ñɨ̱vɨ́, chi ya̱ nkuna̱a̱ꞌ kɨ̱naanꞌ ta̱chi̱ꞌ kíni kúñáꞌnú ya̱ tátúníꞌ iniꞌ ñɨ̱vɨ́ yaꞌá.

12’Jee íyó kue̱ꞌe̱ꞌ víꞌí ka̱ꞌ jie̱ꞌe̱ꞌ tu̱ꞌun ya̱ íyó kachiꞌ ni̱ꞌ nu̱u̱nꞌ rán, soo ntu kúvi kachiꞌ ni̱ꞌ maa, chi nsáꞌ kúneí rán ka̱ꞌ kɨ̱ku̱ꞌun iniꞌ rán maa vitan. 13Soo sáá kiji Ta̱chi̱ꞌ Ííꞌ, ya̱ stúvi tu̱ꞌun na̱a̱ꞌ, jee maáréꞌ nachuꞌun re̱ꞌ ichi ránoꞌó ya̱ taji re̱ꞌ nɨꞌɨ ya̱ naáꞌ. Chi nsú ya̱ tátúníꞌ maáréꞌ vá kachiꞌ re̱ꞌ, chisaꞌ kachiꞌ re̱ꞌ rá tu̱ꞌun tésóꞌo re̱ꞌ ya̱ káchíꞌ Tátáꞌ ni̱ꞌ. Jee saꞌá re̱ꞌ ya̱ kukáꞌnú iniꞌ rán rá tiñu ya̱ kiji koo ichinúúnꞌ. 14Jee maáréꞌ vá stúvi ya̱ kúñáꞌnú nasɨ́kuitɨꞌ ni̱ꞌ, chi rá tu̱ꞌun ya̱ nkachiꞌ ni̱ꞌ jee nakachiꞌ va̱ꞌa re̱ꞌ maa nu̱u̱nꞌ rán jee kukáꞌnú iniꞌ rán maa. 15Nta̱ká ya̱ yɨ́ꞌɨ́ xi̱ntíín Tátáꞌ ni̱ꞌ, jee suni yɨ́ꞌɨ́ xi̱ntíín ni̱ꞌ ranika̱ꞌ. Jee saáva nkachiꞌ ni̱ꞌ, ya̱ ntáká rá tu̱ꞌun ya̱ nkachiꞌ ni̱ꞌ jee nakachiꞌ va̱ꞌa Ta̱chi̱ꞌ Ííꞌ maa nu̱u̱nꞌ rán, jee kukáꞌnú iniꞌ rán maa.

Tu̱nkuéká iniꞌ jee nuvi‑i ya̱ sɨ́ɨ́ꞌ iniꞌ ánímaꞌ

16’Yakuꞌ ni ka̱ꞌ kúmániꞌ jee nku̱níꞌ rán ka̱ꞌ nu̱u̱nꞌ ni̱ꞌ. Jee nsú ki̱vɨ̱ꞌ kéꞌín jee kuniꞌ tuku rán nuꞌuꞌ, [chi kɨ̱noꞌonꞌ ni̱ꞌ nu̱u̱nꞌ nééꞌ Tátáꞌ ni̱ꞌ] ―nkachiꞌ Jesús.

17Saájee sava rá te̱e súkuáꞌa re̱ꞌ ráa, ni̱ka̱tu̱ꞌún táꞌán ɨɨn inka ráa táꞌán ráa:

―¿Na̱ jie̱ꞌe̱ꞌ kúvi rá tu̱ꞌun ya̱ nkachiꞌ re̱ꞌ ya̱: “Yakuꞌ ni ka̱ꞌ kúmániꞌ jee nku̱níꞌ rán ka̱ꞌ nu̱u̱nꞌ ni̱ꞌ, jee nsú ki̱vɨ̱ꞌ kéꞌín jee kuniꞌ tuku rán nuꞌuꞌ, chi kɨ̱noꞌonꞌ ni̱ꞌ nu̱u̱nꞌ nééꞌ Tátáꞌ ni̱ꞌ?” 18Soo ¿ná kúníꞌ káchíꞌ re̱ꞌ ya̱ káchíꞌ re̱ꞌ ya̱ “yakuꞌ ni ka̱ꞌ kúmániꞌ” rúsa? Ntu̱ví jiáku̱ꞌun kuitɨꞌ iniꞌ‑ó na̱ jie̱ꞌe̱ꞌ káꞌánꞌ re̱ꞌ ―nkachiꞌ ráa.

19Jee niniꞌ Jesús ya̱ kuíni ráa ka̱ka̱tu̱ꞌún ráa re̱ꞌ, jee nkachiꞌ re̱ꞌ nu̱u̱nꞌ ráa:

―¿Á jíkátu̱ꞌún táꞌán ɨɨn inka rán táꞌán rán jie̱ꞌe̱ꞌ rá tu̱ꞌun ya̱ nkachiꞌ ni̱ꞌ yaꞌá: “Yakuꞌ ni ka̱ꞌ kúmániꞌ jee nku̱níꞌ rán ka̱ꞌ nu̱u̱nꞌ ni̱ꞌ, jee nsú ki̱vɨ̱ꞌ kéꞌín jee kuniꞌ tuku rán nu̱u̱nꞌ nuꞌuꞌ”? 20Máá nááꞌ vá káchíꞌ ni̱ꞌ nu̱u̱nꞌ rán, ya̱ kunaꞌyuꞌ rán jee nukuéká iniꞌ rán, soo rá ñɨvɨ ñɨ̱vɨ́ chisaꞌ kusɨ̱ɨ̱ꞌ iniꞌ ráa. Soo súka̱ꞌ kukuéká iniꞌ rán, jee tu̱nkuéká iniꞌ rán vá nuvi‑i tu̱ꞌun sɨ́ɨ́ꞌ iniꞌ rán. 21Kuéntáꞌ kua̱ꞌ ɨɨn ñaꞌan sáá kénta hora ya̱ kaku nchíkɨ́n ña, jee téꞌnéꞌ iniꞌ ña. Soo retú ya̱ nkaku nchíkɨ́n ña, jee ni ntu káꞌ náꞌán ña tu̱nóꞌó nnoꞌo ña, chi máá kúsɨ́ɨꞌ iniꞌ ña ya̱ nkaku ɨɨn su̱chí lúlí iniꞌ ñɨ̱vɨ́ yaꞌá. 22Jee suni sukuán ntañúꞌún kúkuéká iniꞌ rán, soo tukuni nakuniꞌ ni̱ꞌ ránoꞌó, jee kusɨ̱ɨ̱ꞌ nasɨ́kuitɨꞌ iniꞌ ánímaꞌ rán. Jee ni ɨɨn ntu̱náꞌ kuvi sííyo ya̱ kúsɨ́ɨꞌ iniꞌ rán. 23Jee ki̱vɨ̱ꞌ yukuán jee ntu̱náꞌ ka̱ka̱tu̱ꞌún rán ka̱ꞌ nuꞌuꞌ. Máá nááꞌ vá káchíꞌ ni̱ꞌ nu̱u̱nꞌ rán ya̱ nu̱u̱nꞌ maá Tátáꞌ ni̱ꞌ ka̱ka̱nꞌ rán néni ɨɨn tiñu nu̱u̱nꞌ súví nuꞌuꞌ, jie̱ꞌe̱ꞌ yɨ́ꞌɨ́ rán nu̱u̱nꞌ ni̱ꞌ, jee taji re̱ꞌ maa nu̱u̱nꞌ rán. 24Ne̱ vitan jee ni ntiáꞌan ka̱ka̱nꞌ rán nu̱u̱nꞌ Tátáꞌ ni̱ꞌ nu̱u̱nꞌ súví nuꞌuꞌ. Jee vitan jee íyó ka̱ka̱nꞌ rán jie̱ꞌe̱ꞌ yɨ́ꞌɨ́ rán nu̱u̱nꞌ ni̱ꞌ jee ni̱ꞌi̱nꞌ rán ya̱ taji re̱ꞌ nu̱u̱nꞌ rán, sáva chitú ya̱ kúsɨ́ɨꞌ nasɨ́kuitɨꞌ iniꞌ rán.

Nku̱neí Jesús nu̱u̱nꞌ nɨꞌɨ ya̱ niváꞌa íyó nu̱u̱nꞌ ñɨ̱vɨ́

25’Nkachiꞌ ni̱ꞌ nu̱u̱nꞌ rán rá tu̱ꞌun kúnkunuún káꞌánꞌ. Soo kiji rá ki̱vɨ̱ꞌ ya̱ nsáꞌ kaꞌanꞌ ni̱ꞌ ka̱ꞌ jín rán rá tu̱ꞌun kúnkunuún káꞌánꞌ, chisaꞌ kájí ni kachitu̱ꞌún ni̱ꞌ nu̱u̱nꞌ rán tu̱ꞌun jie̱ꞌe̱ꞌ Tátáꞌ ni̱ꞌ. 26Jee ki̱vɨ̱ꞌ yukuán jee ka̱ka̱nꞌ rán nu̱u̱nꞌ Tátáꞌ ni̱ꞌ nu̱u̱nꞌ súví nuꞌuꞌ jie̱ꞌe̱ꞌ yɨ́ꞌɨ́ rán nu̱u̱nꞌ ni̱ꞌ, soo nsáꞌ káchíꞌ ni̱ꞌ nu̱u̱nꞌ rán ya̱ ka̱ka̱nꞌ táꞌvíꞌ ni̱ꞌ nu̱u̱nꞌ Tátáꞌ ni̱ꞌ jie̱ꞌe̱ꞌ ránoꞌó. 27Chi maá Tátáꞌ ni̱ꞌ kúvi ya̱ ñúnúunꞌ re̱ꞌ ránoꞌó, chi jie̱ꞌe̱ꞌ ni ka̱ꞌ ñúnúunꞌ rán nuꞌuꞌ, jee suni jínúꞌ iniꞌ rán ya̱ ne̱ nu̱u̱nꞌ maá Tátáꞌ ni̱ꞌ Ndiosíꞌ nkene ni̱ꞌ va̱ji ni̱ꞌ. 28Nkene ni̱ꞌ va̱ji ni̱ꞌ ne̱ nu̱u̱nꞌ maá Tátáꞌ ni̱ꞌ, jee va̱ji ni̱ꞌ iniꞌ ñɨ̱vɨ́ yaꞌá. Jee vitan jee kene ni̱ꞌ iniꞌ ñɨ̱vɨ́ yaꞌá, jee kɨ̱noꞌonꞌ tuku ni̱ꞌ nu̱u̱nꞌ Tátáꞌ ni̱ꞌ ―nkachiꞌ Jesús.

29Jee nkachiꞌ rá te̱e súkuáꞌa re̱ꞌ ráa:

―Vitan jee kájí ni káchíꞌ nú, chi ni ntu̱ví káchíꞌ nú ka̱ꞌ rá tu̱ꞌun kúnkunuún káꞌánꞌ. 30Vitan jee jíníꞌ ráníꞌ ya̱ nɨꞌɨ kuitɨꞌ jíníꞌ nú, jee ntu̱ví jíniñúꞌún nú ya̱ ka̱ka̱tu̱ꞌún ni ɨɨn ñɨvɨ noꞌó, jee saáva jie̱ꞌe̱ꞌ vá jínúꞌ nijia iniꞌ ránꞌ ya̱ ne̱ nu̱u̱nꞌ Ndiosíꞌ nkene nú va̱ji nú ―nkachiꞌ ráa.

31Jee nna̱xiníkó Jesús nu̱u̱nꞌ ráa:

―¿Á vitan jee jínúꞌ iniꞌ rán résa? 32Vitan jee ya̱ nku̱yatin hora, jee ya̱ nkenta tiempúꞌ, ya̱ kutenuun ta ɨɨn ɨɨn rán kɨ̱noꞌonꞌ rán ta veꞌi rán, jee xinóo métúꞌún rán nuꞌuꞌ. Soo nsáꞌ kino̱o métúꞌún ni̱ꞌ, chi íyó Tátáꞌ ni̱ꞌ jín ni̱ꞌ. 33Ntáká rá tu̱ꞌun yaꞌá nkaꞌanꞌ ni̱ꞌ jín rán sáva ne̱ va̱ꞌa kino̱o ánímaꞌ rán, chi yɨ́ꞌɨ́ rán nu̱u̱nꞌ ni̱ꞌ. Chi kiji tu̱nóꞌó nu̱u̱nꞌ rán iniꞌ ñɨ̱vɨ́ yaꞌá, soo koo neí iniꞌ rán, chi ya nku̱neí ni̱ꞌ nu̱u̱nꞌ nɨꞌɨ ya̱ niváꞌa íyó iniꞌ ñɨ̱vɨ́.

Currently Selected:

Juan 16: meh

Highlight

Copy