Juan 5

Nxi̱núvi Jesús ɨɨn te̱e ya̱ ntu kúvi kantaꞌ

1Jee sáá njia̱ꞌa rá tiñu yukuán, jee íyó ɨɨn viko ya̱ sáꞌá rá ñɨvɨ Israel. Jee kua̱ꞌa̱nꞌ Jesús nu̱u̱nꞌ ñuunꞌ Jerusalén. 2Jee nu̱u̱nꞌ ñuunꞌ Jerusalén vá íyó ɨɨn pila nute ya̱ naní Betesda tu̱ꞌun hebreo. Jee káá pila vá yatin ɨɨn rá yuvéꞌí nu̱u̱nꞌ ki̱vɨ̱ꞌ rá ñɨvɨ ñuunꞌ Jerusalén naní‑i Yuvéꞌí Lanchi. Jee íyó ne̱ u̱ꞌu̱nꞌ yúvéꞌi pila vá. 3Jee rá yúvéꞌi vá káá kue̱ꞌe̱ꞌ víꞌí rá ñɨvɨ kúꞌvíꞌ: rá kuáá, rá lénkó, jín rá ntu kúvi kantaꞌ, [jee káá ráa yukuán nétu ráa ya̱ ne̱yu̱ꞌ nu̱u̱nꞌ nuteñúꞌún iniꞌ pila vá. 4Chi íyó sava íchí jee kíji nkuun ɨɨn najiáꞌáꞌ ííꞌ Ndiosíꞌ nu̱u̱nꞌ pila nute vá, jee síkántáꞌ‑a nute vá. Jee ñɨvɨ xíꞌnañúꞌún ka̱ꞌ ki̱vɨ̱ꞌ nu̱u̱nꞌ nute vá retú kántáꞌ‑a, jee nuvi ñɨvɨ vá nu̱u̱nꞌ na̱ni kue̱ꞌi̱ꞌ nóꞌo‑o.]

5Jee yukuán káá ɨɨn te̱e ya̱ ya nkuvi o̱ko̱ꞌ xa̱ꞌu̱nꞌ u̱ni̱ꞌ (38) kui̱ya̱ꞌ ya̱ kúꞌvíꞌ‑i. 6Jee sáá niniꞌ Jesús maa káá‑a, jee niniꞌ re̱ꞌ ya̱ ya nkuvi kue̱ꞌe̱ꞌ víꞌí kui̱ya̱ꞌ ya̱ kúꞌvíꞌ‑i jee nkachiꞌ re̱ꞌ nu̱u̱nꞌ‑u:

―¿Á kuíni nú nuvi nú? ―nkachiꞌ Jesús.

7Jee nna̱xiníkó te̱e kúꞌvíꞌ vá:

―Tátáꞌ, ntu̱ví íyó né ɨɨn ya̱ chineí nuꞌuꞌ sikívɨ‑ɨ nuꞌuꞌ nu̱u̱nꞌ pila nute sáá kántáꞌ‑a, jee ni kua̱ꞌa̱nꞌ ni̱ꞌ xíꞌna ka̱ꞌ inka ñɨvɨ kívɨ nu̱u̱nꞌ nute nsú káꞌ nuꞌuꞌ ―nkachiꞌ re̱ꞌ.

8Jee nkachiꞌ Jesús nu̱u̱nꞌ re̱ꞌ:

―Nako̱o, jee nakeꞌen nú tu̱nchi̱só nú, jee kaka ―nkachiꞌ Jesús.

9Jee ntañúꞌún kuitɨꞌ kuísá nnuva̱ꞌa te̱e kúꞌvíꞌ vá, jee nna̱keꞌen re̱ꞌ tu̱nchi̱só re̱ꞌ, jee nka̱jiéꞌé re̱ꞌ jíka re̱ꞌ. Jee ki̱vɨ̱ꞌ nájiáví kúvi ki̱vɨ̱ꞌ yukuán. 10Saájee rá te̱e kúñáꞌnú nu̱u̱nꞌ rá ñɨvɨ Israel nkachiꞌ ráa nu̱u̱nꞌ te̱e ya̱ nnuvi vá:

―Ki̱vɨ̱ꞌ nájiáví kúvi vitan, jee ntu yɨ́netuꞌ kuniso nú tu̱nchi̱só nú ―nkachiꞌ ráa.

11Jee nna̱xiníkó re̱ꞌ nu̱u̱nꞌ ráa:

―Te̱e ya̱ nxi̱núvi nuꞌuꞌ, jee maáréꞌ nkachiꞌ nu̱u̱nꞌ ni̱ꞌ: “Nakeꞌen nú tu̱nchi̱só nú, jee kaka.”

12Saájee ni̱ka̱tu̱ꞌún ráa maa:

―¿Né ɨɨn ví ya̱ nkachiꞌ nu̱u̱nꞌ nú: “Nakeꞌen nú tu̱nchi̱só nú, jee kaka”? ―nkachiꞌ ráa.

13Jee te̱e ya̱ nnuvi vá, ntu̱ví jíníꞌ re̱ꞌ né ɨɨn ví‑i, chi nkene sɨ́ɨ́n Jesús nteñu rá ñɨvɨ kue̱ꞌe̱ꞌ ya̱ íñɨ́ yukuán. 14Jee sáá njia̱ꞌa rá tiñu yukuán jee nna̱ketáꞌán Jesús re̱ꞌ chíkéꞌi iniꞌ veñu̱ꞌun káꞌnú, jee nkachiꞌ Jesús nu̱u̱nꞌ re̱ꞌ:

―Kune̱ꞌyá, chi ya̱ nnuvi va̱ꞌa nú. Jee koto sáꞌá nú ka̱ꞌ kua̱chi, sáva nkíji inka ka̱ꞌ tu̱nóꞌó manéátúꞌún kunoꞌo nú ―nkachiꞌ Jesús.

15Jee kua̱ꞌa̱nꞌ te̱e vá, jee nkachiꞌ re̱ꞌ nu̱u̱nꞌ rá te̱e kúñáꞌnú nu̱u̱nꞌ ñɨvɨ Israel, ya̱ Jesús ví te̱e ya̱ nxi̱núvi‑i re̱ꞌ. 16Saáva jie̱ꞌe̱ꞌ yaꞌá kúvi ya̱ rá te̱e kúñáꞌnú nu̱u̱nꞌ ñɨvɨ Israel nito u̱ꞌvi̱ꞌ ráa Jesús, jee nniꞌvɨꞌ iniꞌ ráa kaꞌniꞌ ráa maa, chi sáꞌá re̱ꞌ rá tiñu yaꞌá ki̱vɨ̱ꞌ nájiáví. 17Jee nkachiꞌ Jesús nu̱u̱nꞌ ráa:

―Tátáꞌ ni̱ꞌ nɨ́ɨ́nkání sátíñú re̱ꞌ ne̱ vitan, jee suni sukuán sátíñú ni̱ꞌ.

18Saáva jie̱ꞌe̱ꞌ rá tiñu yukuán, jee saꞌ víꞌí káꞌ nniꞌvɨꞌ iniꞌ rá te̱e kúñáꞌnú nu̱u̱nꞌ ñɨvɨ Israel ya̱ kaꞌniꞌ ráa maa, chi nsú kua̱chi kuitɨꞌ jie̱ꞌe̱ꞌ ya̱ njia̱ꞌa re̱ꞌ nu̱u̱nꞌ ya̱ tátúníꞌ ráa jie̱ꞌe̱ꞌ ki̱vɨ̱ꞌ nájiáví, chisaꞌ suni nkachiꞌ re̱ꞌ ya̱ máá Ndiosíꞌ kúvi Tátáꞌ maáréꞌ, ya̱ sáꞌá nuún re̱ꞌ maáréꞌ jín Ndiosíꞌ.

Tiñu níso Se̱ꞌya Ndiosíꞌ

19Saájee nkachiꞌ Jesús nu̱u̱nꞌ ráa:

―Máá nááꞌ vá káchíꞌ ni̱ꞌ nu̱u̱nꞌ rán: Nuꞌuꞌ, ya̱ kúvi ni̱ꞌ Se̱ꞌya Ndiosíꞌ, nkúvi saꞌá ni̱ꞌ ni ɨɨn tiñu ya̱ maáníꞌ, chi kua̱chi sáꞌá ni̱ꞌ sáni néꞌyá ni̱ꞌ ya̱ sáꞌá Tátáꞌ ni̱ꞌ. Chi néni ɨɨn tiñu ya̱ sáꞌá Tátáꞌ ni̱ꞌ Ndiosíꞌ, suni sukuán nuꞌuꞌ ya̱ kúvi ni̱ꞌ Se̱ꞌya Ndiosíꞌ nuún sáꞌá ni̱ꞌ maa. 20Chi Tátáꞌ ni̱ꞌ ñúnúunꞌ re̱ꞌ nuꞌuꞌ, ya̱ kúvi ni̱ꞌ Se̱ꞌya re̱ꞌ, jee xínéꞌénꞌ re̱ꞌ nuꞌuꞌ nta̱ká tiñu sáꞌá re̱ꞌ. Jee xinéꞌénꞌ re̱ꞌ nuꞌuꞌ rá máá tiñu kúñáꞌnú ka̱ꞌ nsú káꞌ tiñu yaꞌá, ya̱ ti̱vɨ́ xíniꞌ rán saꞌá‑a.

21’Chi kuéntáꞌ naxinákóo Tátáꞌ ni̱ꞌ rá níꞌiꞌ, jee saꞌá re̱ꞌ ya̱ natekuꞌ i̱i̱ꞌ tuku ráa, jee suni sukuán maáníꞌ, ya̱ kúvi ni̱ꞌ Se̱ꞌya re̱ꞌ, chi suni saꞌá ni̱ꞌ ya̱ natekuꞌ i̱i̱ꞌ néni ɨɨn ya̱ kuíni maáníꞌ. 22Chi Tátáꞌ ni̱ꞌ ntu násanáaꞌ re̱ꞌ jie̱ꞌe̱ꞌ kua̱chi ni ɨɨn ñɨvɨ, chisaꞌ ntaji re̱ꞌ tiñu nu̱u̱nꞌ ni̱ꞌ, ya̱ kúvi ni̱ꞌ Se̱ꞌya re̱ꞌ, ya̱ nasanáaꞌ ni̱ꞌ kua̱chi jie̱ꞌe̱ꞌ nta̱ká rá ñɨvɨ. 23Nsa̱ꞌá re̱ꞌ suꞌva, sáva nta̱ká ñɨvɨ chiñúꞌún ráa nuꞌuꞌ, ya̱ kúvi ni̱ꞌ Se̱ꞌya re̱ꞌ, kuéntáꞌ chíñúꞌún ráa Tátáꞌ ni̱ꞌ. Jee ñɨvɨ ya̱ ntu chíñúꞌún nuꞌuꞌ, ya̱ kúvi Se̱ꞌya re̱ꞌ, jee suni ntu chíñúꞌún ñɨvɨ vá Tátáꞌ ni̱ꞌ ya̱ nchu̱ichí nuꞌuꞌ va̱ji ni̱ꞌ.

24’Máá nááꞌ vá káchíꞌ ni̱ꞌ nu̱u̱nꞌ rán: Ñɨvɨ ya̱ chúꞌun iniꞌ‑i tu̱ꞌun káchíꞌ ni̱ꞌ, jee kuneí iniꞌ‑i Ndiosíꞌ ya̱ nchu̱ichí nuꞌuꞌ va̱ji ni̱ꞌ, jee ya̱ nni̱ꞌi̱nꞌ ñɨvɨ vá ya̱ kutekuꞌ‑u nɨ́ɨ́nkání jín re̱ꞌ. Nsáꞌ sijíta Ndiosíꞌ maa. Ya nxi̱nóo ñɨvɨ vá ya̱ kuéntáꞌ níꞌiꞌ‑i nu̱u̱nꞌ Ndiosíꞌ jee ya̱ nna̱jia̱ꞌa‑a nu̱u̱nꞌ tékúꞌ‑u nɨ́ɨ́nkání jín Ndiosíꞌ. 25Máá nááꞌ vá káchíꞌ ni̱ꞌ nu̱u̱nꞌ rán: Kiji hora, jee vitan jee ya̱ nkenta hora vá, ya̱ ñɨvɨ ya̱ kuéntáꞌ níꞌiꞌ‑i nu̱u̱nꞌ Ndiosíꞌ jee teso̱ꞌo ráa ta̱chi̱yuꞌú nuꞌuꞌ, ya̱ kúvi ni̱ꞌ Se̱ꞌya Ndiosíꞌ, jee ñɨvɨ ya̱ chuꞌun iniꞌ tu̱ꞌun ni̱ꞌ kutekuꞌ ráa nɨ́ɨ́nkání jín Ndiosíꞌ. 26Chi kuéntáꞌ sáꞌá máá Tátáꞌ ni̱ꞌ ya̱ kutekuꞌ ñɨvɨ jín re̱ꞌ, jee ntaji re̱ꞌ ya̱ maáníꞌ saꞌá ya̱ kutekuꞌ ñɨvɨ. 27Jee suni ntaji Tátáꞌ ni̱ꞌ kunisotíñú ni̱ꞌ ya̱ nasanáaꞌ ni̱ꞌ kua̱chi rá ñɨvɨ, chi ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ.

28’Jee koto tívɨ́ xíniꞌ rán jie̱ꞌe̱ꞌ yaꞌá, chi kiji hora ya̱ teso̱ꞌo nta̱ká kuitɨꞌ rá ni̱yɨ yɨ́ꞌɨ́ veꞌi ñáñá teso̱ꞌo ráa ta̱chi̱yuꞌú ni̱ꞌ. 29Jee kene ráa nu̱u̱nꞌ ñáñá ráa. Nta̱ká ráa nsa̱ꞌá ya̱ váꞌa nako̱o i̱i̱ꞌ tuku yɨkɨkúñu ráa jee saꞌá Ndiosíꞌ ya̱ kutekuꞌ ráa nɨ́ɨ́nkání jín re̱ꞌ. Jee rá nsa̱ꞌá ya̱ niváꞌa nako̱o i̱i̱ꞌ tuku yɨkɨkúñu ráa soo sijíta Ndiosíꞌ ráa.

Rá jiáꞌa ya̱ naáꞌ jie̱ꞌe̱ꞌ ya̱ Ndiosíꞌ njia̱ꞌa tiñu níso Jesús

30’Nuꞌuꞌ ntu kúvi saꞌá ni̱ꞌ ni ɨɨn tiñu ya̱ maáníꞌ, chi sáni tésóꞌo ni̱ꞌ ya̱ káchíꞌ Tátáꞌ ni̱ꞌ sukuán násanáaꞌ ni̱ꞌ. Na̱a̱ꞌ násanáaꞌ ni̱ꞌ, chi ntu núkú ni̱ꞌ saꞌá ni̱ꞌ sáni kuíni ni̱ꞌ chisaꞌ núkú ni̱ꞌ saꞌá ni̱ꞌ sáni kuíni maáréꞌ ya̱ nchu̱ichí re̱ꞌ nuꞌuꞌ. 31Retú maáníꞌ ku̱ꞌva ni̱ꞌ ya̱ naáꞌ jie̱ꞌe̱ꞌ maáníꞌ, jee ntu íyótiñu ya̱ káchíꞌ ni̱ꞌ. 32Soo íyó inka ka̱ꞌ ya̱ jiáꞌa ya̱ naáꞌ jie̱ꞌe̱ꞌ nuꞌuꞌ. Jee jíníꞌ ni̱ꞌ ya̱ íyó na̱a̱ꞌ nijia tu̱ꞌun ya̱ jiáꞌa re̱ꞌ jie̱ꞌe̱ꞌ ni̱ꞌ. 33Jee ránoꞌó chi nta̱jí rán rá te̱e ña̱ꞌa̱nꞌ katu̱ꞌún ráa Juan, te̱e ya̱ nsi̱kuánuté, jee ya̱ naáꞌ njia̱ꞌa re̱ꞌ jie̱ꞌe̱ꞌ nuꞌuꞌ ya̱ kúvi ya̱ naáꞌ. 34Soo nuꞌuꞌ chi ntu jíniñúꞌún ni̱ꞌ ya̱ ku̱ꞌva inka ñɨvɨ ya̱ naáꞌ jie̱ꞌe̱ꞌ ni̱ꞌ, soo rá tu̱ꞌun yaꞌá káchíꞌ ni̱ꞌ maa sáva retú i̱nu̱ꞌ iniꞌ rán ya̱ naáꞌ jee ni̱ꞌi̱nꞌ rán ya̱ natavaꞌ Ndiosíꞌ ránoꞌó nu̱u̱nꞌ kua̱chi rán jee nanitáꞌvíꞌ rán. 35Juan jee nkuvi re̱ꞌ kuéntáꞌ ɨɨn kantil ya̱ ntɨɨn ñuꞌunꞌ jee nstu̱únꞌ‑u, chi njia̱ꞌa re̱ꞌ ya̱ naáꞌ jie̱ꞌe̱ꞌ Tu̱ꞌun Ndiosíꞌ. Jee ránoꞌó chi nku̱sɨ̱ɨ̱ꞌ iniꞌ rán nsa̱ꞌá ñuꞌunꞌ vá yakuꞌ tiempúꞌ.

36’Soo íyó ɨɨn ya̱ jiáꞌa ya̱ naáꞌ máá ñáꞌnú yɨ́yáꞌvi ka̱ꞌ jie̱ꞌe̱ꞌ ni̱ꞌ nsú káꞌ ya̱ njia̱ꞌa Juan. Chi rá tiñu ya̱ ntaji Tátáꞌ ni̱ꞌ sáva sikúnkuvi ni̱ꞌ, jee rá tiñu vá ya̱ sáꞌá ni̱ꞌ jiáꞌa ya̱ naáꞌ jie̱ꞌe̱ꞌ ni̱ꞌ, chi rá tiñu vá stúvi ya̱ Tátáꞌ ni̱ꞌ nchu̱ichí re̱ꞌ nuꞌuꞌ. 37Jee suni máá Tátáꞌ ni̱ꞌ ya̱ nchu̱ichí re̱ꞌ nuꞌuꞌ va̱ji ni̱ꞌ, njia̱ꞌa re̱ꞌ ya̱ naáꞌ jie̱ꞌe̱ꞌ ni̱ꞌ. Ntiáné teso̱ꞌo rán ta̱chi̱yuꞌú re̱ꞌ ni ntiáné kuniꞌ jínúunꞌ rán na̱ja íyó re̱ꞌ. 38Jee ni ntu ñúꞌún tu̱ꞌun re̱ꞌ iniꞌ rán, chi nuꞌuꞌ ya̱ nchu̱ichí re̱ꞌ va̱ji ni̱ꞌ, jee ni ntu jínúꞌ iniꞌ rán nuꞌuꞌ. 39Jee ne̱ súkuáꞌa kávii kuitɨꞌ rán rá tu̱ꞌun nééꞌ nu̱u̱nꞌ Tutuꞌ níso Tu̱ꞌun Ndiosíꞌ, chi jiáni iniꞌ rán ya̱ nu̱u̱nꞌ Tutuꞌ vá ni̱ꞌi̱nꞌ rán ya̱ kutekuꞌ rán nɨ́ɨ́nkání jín Ndiosíꞌ. Soo rá tu̱ꞌun níso nu̱u̱nꞌ Tutuꞌ Ííꞌ vá ví ya̱ jiáꞌa ya̱ naáꞌ jie̱ꞌe̱ꞌ nuꞌuꞌ.

40’Jee ránoꞌó chi ntu kuíni rán natuꞌva rán nuꞌuꞌ sáva ni̱ꞌi̱nꞌ rán kutekuꞌ rán nɨ́ɨ́nkání jín Ndiosíꞌ. 41Ntu núkú ni̱ꞌ ya̱ nakuetúꞌún rá ñɨvɨ nuꞌuꞌ. 42Soo nuꞌuꞌ chi jíníꞌ ni̱ꞌ na̱sa iniꞌ rán ya̱ ntu ñúꞌún iniꞌ rán ya̱ kunu̱u̱nꞌ rán Ndiosíꞌ. 43Jee nuꞌuꞌ chi nu̱u̱nꞌ súví Tátáꞌ ni̱ꞌ va̱ji ni̱ꞌ, jee ntu nákuatáꞌví rán nuꞌuꞌ. Soo retú inka te̱e kiji re̱ꞌ nu̱u̱nꞌ súví maáréꞌ jee nakuatáꞌví rán maa. 44¿Na̱sa kúvi i̱nu̱ꞌ iniꞌ rán nuꞌuꞌ?, chi yɨ́netuꞌ rán ya̱ nakuetúꞌún ɨɨn inka rán táꞌán rán, jee ntu núkú rán ya̱ nakuetúꞌún Ndiosíꞌ ránoꞌó, ya̱ métúꞌún re̱ꞌ ví Ndiosíꞌ. 45Jee koto jiáni iniꞌ rán ya̱ nuꞌuꞌ xi̱kóñáꞌán ni̱ꞌ ránoꞌó ichinúúnꞌ Tátáꞌ ni̱ꞌ, chi íyó ɨɨn ya̱ xíkóñáꞌán‑a ránoꞌó, suvi ví Moisés, sú íyó tu̱ꞌun kúneí iniꞌ rán re̱ꞌ jie̱ꞌe̱ꞌ sikúnkuvi rán tu̱ꞌun ntee re̱ꞌ. 46Chi retánꞌ ínúꞌ iniꞌ rán ya̱ ntee Moisés, jee suni i̱nu̱ꞌ iniꞌ rán nuꞌuꞌ nékúvi, chi jie̱ꞌe̱ꞌ nuꞌuꞌ ntee re̱ꞌ. 47Soo retú ntu ínúꞌ iniꞌ rán rá tu̱ꞌun ntee re̱ꞌ, ¿na̱ja kuvi i̱nu̱ꞌ iniꞌ rán tu̱ꞌun káchíꞌ ni̱ꞌ rúsa? ―nkachiꞌ Jesús.

Currently Selected:

Juan 5: meh

Highlight

Copy