Juan 6

Nsi̱kájíꞌ Jesús u̱ꞌu̱nꞌ mil (5000) rá te̱e

(Mateo 14:13-21; Marcos 6:30-44; Lucas 9:10-17)

1Jee sáá njia̱ꞌa rá yaꞌá, kua̱ꞌa̱nꞌ Jesús íyo ka̱ꞌ ichi yúnteñúꞌún Galilea, ya̱ suni naní Tiberias. 2Jee kue̱ꞌe̱ꞌ víꞌí rá ñɨvɨ níkɨ́nꞌ ráa re̱ꞌ, chi nne̱ꞌyá ráa rá seña a̱nasɨ́ va̱ꞌa sáꞌá re̱ꞌ ya̱ xínúvi re̱ꞌ rá ñɨvɨ kúꞌvíꞌ. 3Jee nkaa Jesús xi̱ni̱ꞌ yuku, jee ña̱kuneeꞌ re̱ꞌ yukuán jín rá te̱e súkuáꞌa re̱ꞌ ráa. 4Jee va̱kuyatin viko Pascua ya̱ sáꞌá rá ñɨvɨ Israel. 5Jee sáá nna̱neꞌen nu̱u̱nꞌ Jesús nna̱kune̱ꞌyá re̱ꞌ jee niniꞌ re̱ꞌ ya̱ kue̱ꞌe̱ꞌ víꞌí rá ñɨvɨ va̱ji nu̱u̱nꞌ nééꞌ re̱ꞌ, jee nkachiꞌ re̱ꞌ nu̱u̱nꞌ Felipe:

―¿Né núꞌ kɨ̱keꞌen‑ó i̱xta̱tíláꞌ kajiꞌ rá ñɨvɨ yaꞌá?

6Soo nkachiꞌ Jesús suꞌva nu̱u̱nꞌ Felipe sáva kototúníꞌ re̱ꞌ maa, chi jíníꞌ re̱ꞌ ná kúvi ya̱ saꞌá re̱ꞌ.

7Jee nna̱xiníkó Felipe nu̱u̱nꞌ Jesús:

―Ni ya̱ꞌvi ɨɨn te̱e sátíñú u̱vi̱ꞌ sientúꞌ (200) ki̱vɨ̱ꞌ nsáꞌ kenta keꞌen i̱xta̱tíláꞌ ya̱ ni̱ꞌi̱nꞌ ta ɨɨn ráa kajiꞌ ráa sú yakuꞌ.

8Jee ɨɨn rá te̱e súkuáꞌa re̱ꞌ vá, ya̱ naní Andrés, ya̱ kúvi ñaniꞌ Simón Pedro, nkachiꞌ‑i nu̱u̱nꞌ re̱ꞌ:

9―Yaꞌá íñɨ́ ɨɨn te̱e lúlí, ya̱ néen‑e u̱ꞌu̱nꞌ i̱xta̱tíláꞌ cebada jín u̱vi̱ꞌ tia̱ká. Soo ¿na̱ nu̱u̱nꞌ kenta yaꞌá nu̱u̱nꞌ kue̱ꞌe̱ꞌ víꞌí ñɨvɨ yaꞌá rúja? ―nkachiꞌ Andrés.

10Jee nkachiꞌ Jesús:

―Sikúneeꞌ rán rá ñɨvɨ ―nkachiꞌ Jesús.

Jee nééꞌ víꞌí yu̱ku̱ꞌ nu̱u̱nꞌ ñuꞌun yukuán. Jee ña̱kuneeꞌ yatin u̱ꞌu̱nꞌ mil (5000) máá rá te̱e. 11Jee ntɨɨn Jesús rá i̱xta̱tíláꞌ vá, jee njia̱ꞌa re̱ꞌ ya̱ kútaꞌviꞌ nu̱u̱nꞌ Ndiosíꞌ, jee kuíre njia̱ꞌa re̱ꞌ maa nu̱u̱nꞌ rá te̱e súkuáꞌa re̱ꞌ ráa, jee suviráa nta̱sáva maa nu̱u̱nꞌ rá ñɨvɨ nééꞌ yukuán. Jee suni sukuán nsa̱ꞌá re̱ꞌ jín rá tia̱ká, jee njia̱ꞌa ráa maa nu̱u̱nꞌ rá ñɨvɨ vá ne̱ ntántúníꞌ nyajiꞌ rává nɨꞌɨ ne̱kua̱ꞌ nkuvi iniꞌ rává. 12Jee sáá nkuvi iniꞌ ráa nyajiꞌ ráa, jee nkachiꞌ Jesús nu̱u̱nꞌ rá te̱e súkuáꞌa re̱ꞌ rává:

―Nastútú rán rá pedasúꞌ ya̱ nkino̱o nu̱u̱nꞌ ya̱ nyajiꞌ ráa, sáva nkɨ́naanꞌ ni ɨɨn pedasúꞌ ―nkachiꞌ re̱ꞌ.

13Jee nna̱stútú ráa maa, jee nchu̱chítú ráa u̱xu̱vi̱ꞌ (12) chikívɨ́ꞌ jín rá pedasúꞌ ya̱ nkino̱o nu̱u̱nꞌ ya̱ u̱ꞌu̱nꞌ i̱xta̱tíláꞌ cebada ya̱ nyajiꞌ rá ñɨvɨ.

14Saájee sáá niniꞌ rá ñɨvɨ vá seña a̱nasɨ́ ya̱ nsa̱ꞌá re̱ꞌ, jee nkachiꞌ ráa:

―Máá nááꞌ nijia ya̱ te̱e yaꞌá kúvi máá te̱e ya̱ íyó kiji iniꞌ ñɨ̱vɨ́ nakani‑i tu̱ꞌun kene yuꞌú Ndiosíꞌ ―nkachiꞌ ráa.

15Soo sáá niniꞌ Jesús ya̱ rá ñɨvɨ vá kikeꞌen ráa re̱ꞌ jee tetuvi ñáꞌnú ráa re̱ꞌ kuvi re̱ꞌ te̱e kunisotíñú tatúníꞌ re̱ꞌ nu̱u̱nꞌ ráa, soo nkene tuku re̱ꞌ kua̱ꞌa̱nꞌ re̱ꞌ yuku sáva kuneeꞌ métúꞌún re̱ꞌ.

Jíka jie̱ꞌe̱ꞌ Jesús nu̱u̱nꞌ nute

(Mateo 14:22-27; Marcos 6:45-52)

16Jee sáá nini kuíí, jee rá te̱e súkuáꞌa re̱ꞌ ráa nnu̱un ráa kua̱ꞌa̱nꞌ ráa yúnteñúꞌún. 17Jee nki̱vɨ ráa iniꞌ ɨɨn barkúꞌ, jee kua̱ꞌa̱nꞌ ráa íyo ka̱ꞌ ichi yúnteñúꞌún nu̱u̱nꞌ káá ñuunꞌ Capernaum. Jee ya nku̱neenꞌ, jee ntiáꞌan nenta Jesús nu̱u̱nꞌ ráa. 18Saájee nka̱jiéꞌé ña̱kɨ̱ꞌɨ ɨɨn ta̱chi̱ꞌ xéénꞌ ni̱ꞌin nu̱u̱nꞌ nteñúꞌún vá, jee nsa̱ꞌá‑a ya̱ jísóꞌ nute. 19Jee sáá nkuvi yatin u̱ꞌu̱nꞌ áxí i̱ñu̱ꞌ kilómetro ya̱ nku̱jíká ráa nu̱u̱nꞌ nute nsi̱káka ráa barkúꞌ jín remóꞌ, jee niniꞌ ráa ya̱ jíka jiéꞌé Jesús nu̱u̱nꞌ nteñúꞌún jee va̱ji kuyatin re̱ꞌ nu̱u̱nꞌ barkúꞌ. Jee nyu̱ꞌví ráa. 20Soo maáréꞌ nkachiꞌ nu̱u̱nꞌ ráa:

―¡Nuꞌuꞌ ví‑i, koto yúꞌví rán! ―nkachiꞌ Jesús nu̱u̱nꞌ ráa.

21Saájee ne̱ sɨ̱ɨ̱ꞌ nkuvi iniꞌ ráa nna̱keꞌen ráa re̱ꞌ nki̱vɨ re̱ꞌ iniꞌ barkúꞌ. Jee ñamani nkanta ráa nu̱u̱nꞌ ñu̱ꞌún kuáꞌánꞌ ráa.

Nna̱nukú rá ñɨvɨ Jesús

22Jee ki̱vɨ̱ꞌ steñu̱ꞌún, jee rá ñɨvɨ kue̱ꞌe̱ꞌ ya̱ íñɨ́ íyo ka̱ꞌ ichi yuꞌú nteñúꞌún vá, niniꞌ ráa ya̱ ni ɨɨn barkúꞌ ka̱ꞌ ntu̱náꞌ íñɨ́ yunúte vá chi kua̱chi métúꞌún ni barkúꞌ ví ya̱ ni̱ñɨ yukuán, jee ntu nkívɨ Jesús iniꞌ barkúꞌ vá jín rá te̱e súkuáꞌa re̱ꞌ ráa chi kua̱ꞌa̱nꞌ maáráa iniꞌ barkúꞌ vá. 23Jee rá inka ka̱ꞌ barkúꞌ va̱ji ichi ñuunꞌ Tiberias, jee nkenta rává yatin nu̱u̱nꞌ nneeꞌ ráa nyajiꞌ ráa i̱xta̱tíláꞌ sáá njia̱ꞌa Jesús ya̱ kútaꞌviꞌ nu̱u̱nꞌ Ndiosíꞌ jie̱ꞌe̱ꞌ‑e. 24Jee sáá niniꞌ rá ñɨvɨ vá ya̱ ntu ka̱ꞌ nééꞌ Jesús yukuán, ni rá te̱e súkuáꞌa re̱ꞌ vá, jee nki̱vɨ rá ñɨvɨ vá iniꞌ rá barkúꞌ vá jee kua̱ꞌa̱nꞌ ráa ne̱ ñuunꞌ Capernaum, kua̱nanukú ráa Jesús.

Jesús kúvi re̱ꞌ kuéntáꞌ i̱xta̱tíláꞌ chi sáꞌá re̱ꞌ ya̱ kutekuꞌ ñɨvɨ jín Ndiosíꞌ

25Jee sáá nkanta ráa íyo ka̱ꞌ ichi yuꞌú nteñúꞌún, jee yukuán nna̱ketáꞌán ráa re̱ꞌ. Jee ni̱ka̱tu̱ꞌún ráa re̱ꞌ:

―Mestrúꞌ, ¿na̱ma ntiaaꞌ nú yaꞌá? ―nkachiꞌ ráa.

26Jee nna̱xiníkó Jesús nu̱u̱nꞌ ráa jee nkachiꞌ re̱ꞌ:

―Máá nááꞌ vá káchíꞌ ni̱ꞌ nu̱u̱nꞌ rán ya̱ nánukú rán nuꞌuꞌ nsú jie̱ꞌe̱ꞌ ya̱ niniꞌ rán rá seña a̱nasɨ́ nsa̱ꞌá ni̱ꞌ, chisaꞌ jie̱ꞌe̱ꞌ ya̱ nyajiꞌ rán i̱xta̱tíláꞌ ne̱ nnaꞌaꞌ iniꞌ rán. 27Koto nániꞌvɨꞌ iniꞌ rán jie̱ꞌe̱ꞌ ya̱ yájíꞌ ya̱ tívɨ́. Chisaꞌ naniꞌvɨꞌ iniꞌ rán ni̱ꞌi̱nꞌ rán kuéntáꞌ ɨɨn ya̱ yájíꞌ ya̱ íyó nɨ́ɨ́nkání ya̱ sáꞌá‑a ya̱ kutekuꞌ rán nɨ́ɨ́nkání jín Ndiosíꞌ. Yaꞌá vá taji ni̱ꞌ nu̱u̱nꞌ ránoꞌó, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, chi Tátáꞌ ni̱ꞌ Ndiosíꞌ nstúvi re̱ꞌ nu̱u̱nꞌ ñɨvɨ ya̱ ñani re̱ꞌ nuꞌuꞌ kuniso ni̱ꞌ tiñu vá sáva nakuniꞌ ñɨvɨ níso ni̱ꞌ tiñu vá.

28Saájee ni̱ka̱tu̱ꞌún ráa re̱ꞌ:

―¿Ná kúvi ya̱ íyó saꞌá ránꞌ sáva kuvi saꞌá ránꞌ tiñu Ndiosíꞌ?

29Jee nna̱xiníkó Jesús nu̱u̱nꞌ ráa, jee nkachiꞌ re̱ꞌ:

―Tiñu Ndiosíꞌ ví ya̱ kuneí iniꞌ rán nuꞌuꞌ, ya̱ nchu̱ichí re̱ꞌ va̱ji ni̱ꞌ ―nkachiꞌ Jesús.

30Saáva nkachiꞌ ráa nu̱u̱nꞌ re̱ꞌ:

―¿Na̱ seña a̱nasɨ́ saꞌá nú sáva kuniꞌ ráníꞌ maa, sáva i̱nu̱ꞌ iniꞌ ránꞌ noꞌó? ¿Na̱ tiñu saꞌá nú? 31Chi rá tátáꞌ jííꞌ‑ó yanaꞌán jee nyajiꞌ ráa maná nu̱u̱nꞌ ñu̱ꞌún saɨn, sáni káchíꞌ nu̱u̱nꞌ Tutuꞌ níso Tu̱ꞌun Ndiosíꞌ: “Njia̱ꞌa re̱ꞌ i̱xta̱tíláꞌ ya̱ nkikuun ne̱ antivɨ́.”

32Jee nkachiꞌ Jesús nu̱u̱nꞌ ráa:

―Máá nááꞌ vá káchíꞌ ni̱ꞌ nu̱u̱nꞌ rán: Nsú Moisés ví ya̱ ntaji nu̱u̱nꞌ ránoꞌó máá i̱xta̱tíláꞌ ya̱ nkikuun antivɨ́, chisaꞌ máá Tátáꞌ ni̱ꞌ jiáꞌa máá maá i̱xta̱tíláꞌ nijia ya̱ nkikuun antivɨ́. 33Chi i̱xta̱tíláꞌ ya̱ jiáꞌa Ndiosíꞌ ví maáréꞌ ya̱ nkikuun ne̱ antivɨ́, jee saꞌá‑a ya̱ kutekuꞌ ñɨvɨ ñɨ̱vɨ́ nɨ́ɨ́nkání jín Ndiosíꞌ ―nkachiꞌ Jesús.

34Jee nkachiꞌ ráa nu̱u̱nꞌ Jesús:

―Tátáꞌ, sukuáni taji nú i̱xta̱tíláꞌ yaꞌá ―nkachiꞌ ráa.

35Jee nkachiꞌ Jesús nu̱u̱nꞌ ráa:

―Nuꞌuꞌ ví i̱xta̱tíláꞌ ya̱ saꞌá ni̱ꞌ ya̱ kutekuꞌ ñɨvɨ nɨ́ɨ́nkání jín Ndiosíꞌ. Jee ɨɨn ñɨvɨ ya̱ nátuꞌva nuꞌuꞌ, jee kuéntáꞌ ni nsáꞌ kujiso̱ko kuitɨꞌ ráa. Jee ɨɨn ñɨvɨ ya̱ kúneí iniꞌ‑i nuꞌuꞌ, jee kuéntáꞌ ni nsáꞌ kujichiꞌ ka̱ꞌ iniꞌ ráa. 36Soo sáni nkachiꞌ ni̱ꞌ nu̱u̱nꞌ rán, ya̱ ntu̱ví kúneí iniꞌ rán nuꞌuꞌ, súka̱ꞌ ya̱ niniꞌ rán nuꞌuꞌ. 37Chi nta̱ká ñɨvɨ ya̱ táji Tátáꞌ ni̱ꞌ nu̱u̱nꞌ ni̱ꞌ, jee natuꞌva ráa nuꞌuꞌ. Jee ɨɨn ñɨvɨ natuꞌva‑a nuꞌuꞌ ni nsáꞌ sukuíta ni̱ꞌ maa nu̱u̱nꞌ ni̱ꞌ. 38Chi nkikuun ni̱ꞌ ne̱ antivɨ́, nsú sáva saꞌá ni̱ꞌ ya̱ kuíni ni̱ꞌ, chisaꞌ sáva saꞌá ni̱ꞌ ya̱ kuíni maáréꞌ ya̱ nchu̱ichí nuꞌuꞌ va̱ji ni̱ꞌ. 39Jee yaꞌá kúvi ya̱ kuíni maáréꞌ ya̱ nchu̱ichí nuꞌuꞌ, ya̱ nta̱ká rá ñɨvɨ ya̱ ntaji re̱ꞌ nu̱u̱nꞌ ni̱ꞌ, jee nsáꞌ sukuíta ni̱ꞌ ni ɨɨn, chisaꞌ xinátekuꞌ i̱i̱ꞌ ni̱ꞌ ráa jee xinákóo ni̱ꞌ ráa kene ráa nteñu rá níꞌiꞌ ki̱vɨ̱ꞌ nu̱u̱nꞌ nɨ́ꞌɨ. 40Chi yaꞌá kúvi ya̱ kuíni Tátáꞌ ni̱ꞌ ya̱ nchu̱ichí nuꞌuꞌ: Nta̱ká ñɨvɨ ya̱ jínúꞌ iniꞌ ráa néꞌyá ráa Se̱ꞌya Ndiosíꞌ, jee kúneí iniꞌ ráa maa, jee kutekuꞌ ráa nɨ́ɨ́nkání jín re̱ꞌ, jee xinátekuꞌ i̱i̱ꞌ ni̱ꞌ ráa jee xinákóo ni̱ꞌ ráa kene ráa nteñu rá níꞌiꞌ ki̱vɨ̱ꞌ nu̱u̱nꞌ nɨ́ꞌɨ. Chi nuꞌuꞌ kuvi ni̱ꞌ Se̱ꞌya Ndiosíꞌ ―nkachiꞌ Jesús.

41Saájee táyuꞌú rá ñɨvɨ Israel si̱kɨ̱ꞌ re̱ꞌ chi nkachiꞌ re̱ꞌ: “Nuꞌuꞌ ví i̱xta̱tíláꞌ ya̱ nkikuun ni̱ꞌ ne̱ antivɨ́.” 42Saájee nkachiꞌ ráa:

―¿Á nsú te̱e yaꞌá ví Jesús ya̱ kúvi se̱ꞌya José? Jee jíníꞌ‑ó né ɨɨn ví tátáꞌ re̱ꞌ jín nánáꞌ re̱ꞌ. ¿Na̱sa kúvi káchíꞌ re̱ꞌ: “Ne̱ antivɨ́ nkikuun ni̱ꞌ, rúsa”? ―nkachiꞌ ráa.

43Saájee nna̱xiníkó Jesús nu̱u̱nꞌ ráa:

―Koto táyuꞌú rán nteñu rán si̱kɨ̱ꞌ ni̱ꞌ. 44Chi ni ɨɨn ñɨvɨ ni nkúvi natuꞌva‑a nu̱u̱nꞌ nuꞌuꞌ, retú nsáꞌ nástúꞌva Tátáꞌ ni̱ꞌ maa nu̱u̱nꞌ ni̱ꞌ. Tátáꞌ ni̱ꞌ ví ya̱ nchu̱ichí nuꞌuꞌ, jee nástúꞌva re̱ꞌ ñɨvɨ nu̱u̱nꞌ ni̱ꞌ, jee xinákóo ni̱ꞌ maa kene‑e nteñu rá níꞌiꞌ ki̱vɨ̱ꞌ nu̱u̱nꞌ nɨꞌɨ. 45Chi sukuán níso nu̱u̱nꞌ tutuꞌ ya̱ ntee rá te̱e nna̱kani ráa tu̱ꞌun nkene yuꞌú Ndiosíꞌ ne̱ yanaꞌán: “Nta̱ká ñɨvɨ xinéꞌénꞌ Ndiosíꞌ ráa.” Jee nta̱ká ñɨvɨ ya̱ chúꞌun iniꞌ ráa tu̱ꞌun káchíꞌ Tátáꞌ ni̱ꞌ, jee kútúꞌva ráa ya̱ xínéꞌénꞌ re̱ꞌ, jee nátuꞌva ráa nu̱u̱nꞌ nuꞌuꞌ.

46’Ni ɨɨn ñɨvɨ ntiáꞌan kuniꞌ jínúunꞌ ráa Tátáꞌ ni̱ꞌ, chi métúꞌún nuꞌuꞌ, ya̱ va̱ji ni̱ꞌ ne̱ nu̱u̱nꞌ Tátáꞌ ni̱ꞌ Ndiosíꞌ, ví ya̱ niniꞌ ni̱ꞌ Tátáꞌ ni̱ꞌ. 47Jee máá naáꞌ vá káchíꞌ ni̱ꞌ nu̱u̱nꞌ rán: Ñɨvɨ ya̱ kúneí iniꞌ nuꞌuꞌ jee ya̱ níꞌínꞌ‑i ya̱ tékúꞌ‑u nɨ́ɨ́nkání Ndiosíꞌ. 48Nuꞌuꞌ ví i̱xta̱tíláꞌ ya̱ saꞌá ni̱ꞌ ya̱ kutekuꞌ ñɨvɨ nɨ́ɨ́nkání jín Ndiosíꞌ. 49Rá tátáꞌ jííꞌ‑ó ne̱ yanaꞌán, jee sú nyajiꞌ ráa i̱xta̱tíláꞌ ya̱ naní maná sáá ni̱kónúun ráa nu̱u̱nꞌ ñu̱ꞌún saɨn, jee ni̱ꞌi̱ꞌ ráa. 50Soo i̱xta̱tíláꞌ yaꞌá ya̱ káchíꞌ ni̱ꞌ ya̱ va̱ji ne̱ antivɨ́, sáva na̱ni ñɨvɨ ya̱ kajiꞌ maa, jee nsáꞌ kuviꞌ‑i nu̱u̱nꞌ Ndiosíꞌ. 51Chi maáníꞌ kuvi i̱xta̱tíláꞌ tékúꞌ vá ya̱ nkikuun ni̱ꞌ ne̱ antivɨ́, sáva néni ɨɨn ñɨvɨ ya̱ kajiꞌ ráa maa, jee saꞌá‑a ya̱ kutekuꞌ ráa nɨ́ɨ́nkání jín Ndiosíꞌ. Jee i̱xta̱tíláꞌ ya̱ ku̱ꞌva ni̱ꞌ ví yɨkɨkúñu ni̱ꞌ. Ku̱ꞌva ni̱ꞌ maa sáva ni̱ꞌi̱nꞌ ñɨvɨ ñɨ̱vɨ́ kuvi kutekuꞌ ráa nɨ́ɨ́nkání jín Ndiosíꞌ ―nkachiꞌ Jesús.

52Saáva rá ñɨvɨ Israel nka̱ntátúꞌun ɨɨn inka ráa, jee nkachiꞌ ráa:

―¿Na̱sa kúvi taji te̱e yaꞌá yɨkɨkúñu re̱ꞌ kajiꞌ‑ó maa? ―nkachiꞌ ráa.

53Saáva nkachiꞌ Jesús nu̱u̱nꞌ ráa:

―Máá nááꞌ vá káchíꞌ ni̱ꞌ nu̱u̱nꞌ rán: Retú nsáꞌ kajiꞌ rán yɨkɨkúñu ni̱ꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee retú nsáꞌ koꞌo rán ni̱ñɨ̱ꞌ ni̱ꞌ, jee nsáꞌ ni̱ꞌi̱nꞌ rán ya̱ kutekuꞌ rán nɨ́ɨ́nkání jín Ndiosíꞌ. 54Chi ñɨvɨ ya̱ yájíꞌ‑i yɨkɨkúñu ni̱ꞌ, jín ya̱ koꞌo rán ni̱ñɨ̱ꞌ ni̱ꞌ, ya̱ níꞌínꞌ ráa ya̱ tékúꞌ ráa nɨ́ɨ́nkání jín Ndiosíꞌ jee nuꞌuꞌ jee xinátekuꞌ i̱i̱ꞌ ni̱ꞌ ráa jee xinákóo ni̱ꞌ ráa kene ráa nteñu rá níꞌiꞌ ki̱vɨ̱ꞌ nu̱u̱nꞌ nɨ́ꞌɨ. 55Chi yɨkɨkúñu ni̱ꞌ ví ya̱ yájíꞌ nijia jee ni̱ñɨ̱ꞌ ni̱ꞌ ví ya̱ jíꞌi nijia. 56Chi ɨɨn ñɨvɨ ya̱ yájíꞌ‑i yɨkɨkúñu ni̱ꞌ jee jíꞌi‑i ni̱ñɨ̱ꞌ ni̱ꞌ, jee kínóo‑o yɨ́ꞌɨ́‑ɨ nu̱u̱nꞌ ni̱ꞌ, jee kínóo ni̱ꞌ yɨ́ꞌɨ́ ni̱ꞌ nu̱u̱nꞌ maáa. 57Máá Tátáꞌ ni̱ꞌ ya̱ tékúꞌ, ya̱ nchu̱ichí re̱ꞌ nuꞌuꞌ va̱ji ni̱ꞌ, jee maáréꞌ nsa̱ꞌá ya̱ tékúꞌ ni̱ꞌ. Jee suni sukuán ɨɨn ñɨvɨ yájíꞌ‑i nuꞌuꞌ jee saꞌá ni̱ꞌ ya̱ kutekuꞌ ñɨvɨ nɨ́ɨ́nkání jín Ndiosíꞌ. 58Chi i̱xta̱tíláꞌ yaꞌá ya̱ káchíꞌ ni̱ꞌ ya̱ va̱ji ne̱ antivɨ́, nsú kuéntáꞌ maná ya̱ nyajiꞌ rá tátáꞌ jííꞌ‑ó jee ni̱ꞌi̱ꞌ ráa. Chi ñɨvɨ ya̱ yájíꞌ i̱xta̱tíláꞌ yaꞌá jee kutekuꞌ‑u nɨ́ɨ́nkání jín Ndiosíꞌ.

59Jee rá tu̱ꞌun yukuán nkachiꞌ Jesús sáá xínéꞌénꞌ re̱ꞌ rá ñɨvɨ iniꞌ veꞌi sinagoga nu̱u̱nꞌ kútútú rá ñɨvɨ Israel ñuunꞌ Capernaum.

Tu̱ꞌun ya̱ stékúꞌ‑u yó nɨ́ɨ́nkání jín Ndiosíꞌ

60Saáva sáá nteso̱ꞌo kue̱ꞌe̱ꞌ rá ñɨvɨ súkuáꞌa re̱ꞌ ráa rá tu̱ꞌun xínéꞌénꞌ re̱ꞌ, jee nkachiꞌ ráa:

―Víjí víꞌí jie̱ꞌe̱ꞌ tu̱ꞌun yaꞌá. ¿Né ɨɨn kúvi tɨɨn maa rúja?

61Jee ya jíníꞌ máá Jesús ya̱ rá ñɨvɨ ya̱ súkuáꞌa re̱ꞌ ráa táyuꞌú ráa sukuán, jee nkachiꞌ re̱ꞌ nu̱u̱nꞌ ráa:

―¿Á chúníní tu̱ꞌun ni̱ꞌ iniꞌ ránoꞌó? 62¿Ná kukaꞌvi iniꞌ rán retú kuniꞌ rán nuꞌuꞌ kɨ̱naa ni̱ꞌ ne̱ antivɨ́ nu̱u̱nꞌ nneeꞌ ni̱ꞌ ne̱ xíꞌnañúꞌún? Maáníꞌ kúvi maáréꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ. 63Chi Ta̱chi̱ꞌ Ííꞌ Ndiosíꞌ ví ya̱ sáꞌá ya̱ kutekuꞌ ñɨvɨ nɨ́ɨ́nkání jín Ndiosíꞌ. Soo máá yɨkɨkúñu ntu̱náꞌ íyótiñu‑u saꞌá‑a sukuán. Rá tu̱ꞌun nkachiꞌ ni̱ꞌ sáꞌá‑a kívɨ Ta̱chi̱ꞌ Ííꞌ Ndiosíꞌ iniꞌ ñɨvɨ jee jiáꞌa‑a ya̱ kutekuꞌ ñɨvɨ nɨ́ɨ́nkání jín Ndiosíꞌ. 64Soo íyó sava rán ntu kúneí iniꞌ rán nuꞌuꞌ.

Nkachiꞌ Jesús suꞌva chi ne̱ xíꞌnañúꞌún ya̱ jíníꞌ re̱ꞌ né ɨɨn ví rá ñɨvɨ ya̱ ntu ínúꞌ iniꞌ ráa re̱ꞌ, jín né ɨɨn ví ya̱ naku̱ꞌva‑a re̱ꞌ nu̱u̱nꞌ rá te̱e nísotíñú. 65Jee nkachiꞌ re̱ꞌ:

―Saáva nkachiꞌ ni̱ꞌ nu̱u̱nꞌ rán ya̱ ni ɨɨn ñɨvɨ nkúvi natuꞌva‑a nu̱u̱nꞌ nuꞌuꞌ, retú nsáꞌ jiáꞌa Tátáꞌ ni̱ꞌ nu̱u̱nꞌ ñɨvɨ vá ya̱ natuꞌva‑a nu̱u̱nꞌ ni̱ꞌ ―nkachiꞌ Jesús.

66Jee ne̱ ki̱vɨ̱ꞌ yukuán jee kue̱ꞌe̱ꞌ ñɨvɨ ya̱ nsu̱kuáꞌa Jesús ráa, nxi̱nóo ráa re̱ꞌ, jee ntu̱ví ka̱ꞌ nku̱táꞌán ráa jín re̱ꞌ. 67Saájee nkachiꞌ Jesús nu̱u̱nꞌ ni uxúꞌ u̱vi̱ꞌ (12) rá te̱e ya̱ súkuáꞌa re̱ꞌ ráa:

―¿Á ntu suni kuíni ránoꞌó kɨ̱ꞌɨ̱nꞌ rán? ―nkachiꞌ Jesús.

68Jee nna̱xiníkó Simón Pedro nu̱u̱nꞌ re̱ꞌ:

―I̱toꞌoꞌ, ¿né ɨɨn nu̱u̱nꞌ kúvi kɨ̱ꞌɨ̱nꞌ ránꞌ? Chi maánú íyó jín tu̱ꞌun ya̱ saꞌá ya̱ kutekuꞌ ránꞌ nɨ́ɨ́nkání jín Ndiosíꞌ. 69Jee ránuꞌuꞌ chi ya̱ ínúꞌ iniꞌ ránꞌ jee ya jíníꞌ ránꞌ ya̱ noꞌó vá ííꞌ ya̱ va̱ji ne̱ nu̱u̱nꞌ Ndiosíꞌ ―nkachiꞌ Pedro.

70Jee nna̱xiníkó Jesús nu̱u̱nꞌ ráa:

―¿Á nsú nuꞌuꞌ nka̱ji ni̱ꞌ u̱xu̱vi̱ꞌ (12) ránoꞌó rúja? Jee ɨɨn ránoꞌó kúvi kui̱ꞌna̱ꞌ.

71Nkaꞌanꞌ re̱ꞌ sukuán jie̱ꞌe̱ꞌ Judas Iscariote, ya̱ kúvi se̱ꞌya Simón, chi Judas yaꞌá naku̱ꞌva‑a re̱ꞌ xi̱ntíín rá te̱e nísotíñú, asúꞌ ɨɨn rá u̱xu̱vi̱ꞌ (12) ya̱ nkáji re̱ꞌ ví‑i.

Currently Selected:

Juan 6: meh

Highlight

Copy