Lucas 15

Tu̱ꞌun kúnkunuún jie̱ꞌe̱ꞌ lanchi ya̱ nsu̱kuíta ti̱ꞌ maátíꞌ

(Mateo 18:10-14)

1Saájee ntáká rá te̱e nákeꞌen xu̱ꞌún náneeꞌ vetíñú Roma jín rá ñɨvɨ ya̱ sáꞌá kua̱chi nákuyatin ráa nu̱u̱nꞌ Jesús sáva teso̱ꞌo ráa rá tu̱ꞌun káchíꞌ re̱ꞌ. 2Jee rá te̱e yɨ́ꞌɨ́ ñujiínꞌ fariseo jín rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ jee táyuꞌú ráa, jee nkachiꞌ ráa:

―Te̱e yaꞌá íyó maniꞌ re̱ꞌ tɨ́ɨn re̱ꞌ rá ñɨvɨ íyó kua̱chi, jee yájíꞌ re̱ꞌ jín ráa ―nkachiꞌ ráa.

3Saájee nna̱kani re̱ꞌ tu̱ꞌun kúnkunuún yaꞌá nu̱u̱nꞌ ráa:

4―Retú néni ɨɨn ránoꞌó kúmí‑i ɨɨn sientúꞌ (100) lanchi jee sukuíta‑a ɨɨn rátíꞌ, jee, ¿á ntu su xínóo‑o rá ni kúmíxiko xa̱ꞌu̱nꞌ ku̱mi̱ꞌ (99) ka̱ꞌ rátíꞌ vá nu̱u̱nꞌ kuꞌúꞌ, jee kɨ̱nanukú‑u lanchi ya̱ nsu̱kuíta ti̱ꞌ maátíꞌ nekuaꞌ naniꞌinꞌ‑i ti̱ꞌ rúja? 5Jee sáá naniꞌinꞌ‑i ti̱ꞌ, jee ne̱ kusɨ̱ɨ̱ꞌ iniꞌ‑i chisó‑o ti̱ꞌ si̱kɨ̱ꞌ chiyóꞌ‑o kinoꞌonꞌ‑o jín ti̱ꞌ. 6Jee sáá nenta‑a veꞌi‑i, jee kana‑a rá ñɨvɨ ma̱ni̱ꞌ jín‑i jín rá ñɨvɨ nééꞌ yatin jín‑i, jee kachiꞌ‑i nu̱u̱nꞌ ráa: “Kusɨ̱ɨ̱ꞌ iniꞌ rán jín nuꞌuꞌ, chi nna̱niꞌinꞌ ni̱ꞌ lanchi ni̱ꞌ ya̱ nsu̱kuíta ti̱ꞌ maátíꞌ”, kachiꞌ‑i. 7Chi máá naáꞌ vá káchíꞌ ni̱ꞌ nu̱u̱nꞌ rán ya̱ suni sukuán saꞌ víꞌí káꞌ íyó tu̱ꞌun kúsɨ́ɨꞌ iniꞌ ne̱ antivɨ́ nu̱u̱nꞌ íyó Ndiosíꞌ, jie̱ꞌe̱ꞌ ɨɨn ñɨvɨ íyó kua̱chi retú nna̱kani iniꞌ‑i jie̱ꞌe̱ꞌ kua̱chi sáꞌá‑a jee kunikɨnꞌ‑ɨ Ndiosíꞌ, nsú káꞌ ya̱ kúmíxiko xa̱ꞌu̱nꞌ ku̱mi̱ꞌ (99) rá ñɨvɨ na̱a̱ꞌ ya̱ ntu jíniñúꞌún nakani iniꞌ‑i.

Tu̱ꞌun kúnkunuún jie̱ꞌe̱ꞌ ñaꞌan nsu̱kuíta xu̱ꞌún ka̱a

8’Jee, ¿né ɨɨn ñaꞌan kúmí va̱ꞌa ña u̱ji̱ꞌ xu̱ꞌún ka̱a plata jee retú sukuíta ña ɨɨn, jee á ntu su natee ña ñuꞌunꞌ jee nastá ña veꞌi ña jee nanukú ñunkúún kávii ña nekuaꞌ naniꞌinꞌ ña maa rúja? 9Jee sáá naniꞌinꞌ ña maa, jee kana ña rá ñaꞌan ma̱ni̱ꞌ jín ña jín rá ñɨvɨ nééꞌ yatin jín ña, jee kachiꞌ ña nu̱u̱nꞌ ráa: “Kusɨ̱ɨ̱ꞌ iniꞌ rán jín nuꞌuꞌ, chi nna̱niꞌinꞌ ni̱ꞌ xu̱ꞌún ni̱ꞌ ya̱ nsu̱kuíta ni̱ꞌ”, kachiꞌ ña. 10Jee saáva nuꞌuꞌ káchíꞌ ni̱ꞌ nu̱u̱nꞌ rán ya̱ suni íyó tu̱ꞌun kúsɨ́ɨꞌ iniꞌ rá najiáꞌáꞌ ííꞌ Ndiosíꞌ jie̱ꞌe̱ꞌ ɨɨn ñɨvɨ kua̱chi retú nákani iniꞌ‑i jie̱ꞌe̱ꞌ kua̱chi sáꞌá‑a jee kunikɨnꞌ‑ɨ Ndiosíꞌ ―nkachiꞌ Jesús.

Tu̱ꞌun kúnkunuún jie̱ꞌe̱ꞌ ɨɨn se̱ꞌya jíkanuun sɨ̱ɨ̱ꞌ

11Jee suni nkachiꞌ tuku Jesús:

―Ɨɨn te̱e ni̱yo u̱vi̱ꞌ se̱ꞌya yɨ́ɨ́ re̱ꞌ. 12Jee te̱súchí ka̱ꞌ nkachiꞌ‑i nu̱u̱nꞌ tátáꞌ‑a: “Tááꞌ, taji ta̱ꞌvi̱ꞌ ni̱ꞌ ya̱ xinóo nú nu̱u̱nꞌ ni̱ꞌ kuvi ni̱ꞌ”, nkachiꞌ‑i. Saájee nta̱sáva tátáꞌ ráa rá ta̱ꞌvi̱ꞌ kino̱o nu̱u̱nꞌ ta ɨɨn ɨɨn ni núvíꞌ ráa.

13’Jee nsú ki̱vɨ̱ꞌ kuéꞌéꞌ, jee se̱ꞌya yɨ́ɨ́ súchí re̱ꞌ vá nstútú‑u nɨꞌɨ ya̱ kúmí‑i jee nkene‑e kua̱ꞌa̱nꞌ íká‑a nu̱u̱nꞌ inka ka̱ꞌ ñuunꞌ íká. Jee yukuán ña̱xi̱nꞌ síkɨ́ sɨ̱ɨ̱ꞌ‑ɨ xu̱ꞌún‑u njia̱ꞌa nsa̱ꞌá‑a nu̱u̱nꞌ ya̱ sɨ́ɨ́ꞌ iniꞌ‑i. 14Jee sáá nɨꞌɨ xu̱ꞌún‑u ña̱xi̱nꞌ‑i jee nkenta nku̱támá víꞌí nu̱u̱nꞌ nɨꞌɨ ñuunꞌ vá, jee nka̱jiéꞌé kúmániꞌ nu̱u̱nꞌ te̱súchí vá. 15Saájee kua̱nukú tiñu‑u nu̱u̱nꞌ ɨɨn rá te̱e ñuunꞌ vá, jee nta̱jí re̱ꞌ maa kua̱ꞌa̱nꞌ‑a nu̱u̱nꞌ káá ñuꞌun re̱ꞌ kua̱kumí‑i rá kúchíꞌ re̱ꞌ sáva ku̱ꞌva‑a kajiꞌ rátíꞌ. 16Jee jíso̱ko nasɨ́kuitɨꞌ‑ɨ ya̱ ne̱ nkuini‑i kajiꞌ‑i rá yájíꞌ rá kúchíꞌ vá sáva chitú iniꞌ‑i, soo ni ɨɨn ñɨvɨ ni ntu̱náꞌ jiáꞌa ráa nu̱u̱nꞌ‑u.

17’Saájee nna̱ku̱ꞌun kájí iniꞌ‑i ñani iniꞌ‑i nne̱ꞌyá‑a maáa: “Tantúꞌ kue̱ꞌe̱ꞌ musúꞌ sátíñú veꞌi tátáꞌ ni̱ꞌ jee íyó kue̱ꞌe̱ꞌ ya̱ yájíꞌ ráa ne̱ kínóo ka̱ꞌ nu̱u̱nꞌ ráa, soo nuꞌuꞌ nééꞌ ni̱ꞌ yaꞌá jíꞌíꞌ ni̱ꞌ so̱ko. 18Nikó ni̱ꞌ kɨ̱noꞌonꞌ ni̱ꞌ nu̱u̱nꞌ tátáꞌ ni̱ꞌ, jee kachiꞌ ni̱ꞌ nu̱u̱nꞌ re̱ꞌ: Tááꞌ, nsa̱ꞌá ni̱ꞌ kua̱chi nu̱u̱nꞌ Ndiosíꞌ ya̱ nééꞌ antivɨ́ jín suni nu̱u̱nꞌ maánú ranika̱ꞌ. 19Ya ntu ka̱ꞌ íyó ni̱ꞌi̱nꞌ ni̱ꞌ ya̱ kuna̱ní ni̱ꞌ se̱ꞌya nú, jee saꞌá nú nuꞌuꞌ kuéntáꞌ ɨɨn musúꞌ nú, kachiꞌ ni̱ꞌ”, nkachiꞌ‑i. 20Saájee nnakui̱ñɨ̱ꞌ‑ɨ kua̱noꞌonꞌ‑o nu̱u̱nꞌ tátáꞌ‑a.

’Jee sáá jíka ka̱ꞌ kua̱ꞌa̱nꞌ‑a, jee niniꞌ tátáꞌ‑a maa, jee nku̱náꞌví iniꞌ re̱ꞌ nne̱ꞌyá re̱ꞌ maa. Jee ninu re̱ꞌ ña̱taꞌanꞌ re̱ꞌ maa, jee ña̱kɨnumi re̱ꞌ maa, nte̱yuꞌú re̱ꞌ nu̱u̱nꞌ‑u.

21’Saájee nkachiꞌ‑i nu̱u̱nꞌ tátáꞌ‑a: “Tááꞌ, nsa̱ꞌá ni̱ꞌ kua̱chi nu̱u̱nꞌ Ndiosíꞌ nééꞌ antivɨ́ jín suni nu̱u̱nꞌ maánú ranika̱ꞌ, jee ntu ka̱ꞌ íyó ni̱ꞌi̱nꞌ ni̱ꞌ ya̱ kuna̱ní ni̱ꞌ se̱ꞌya nú”, nkachiꞌ‑i.

22’Soo nkachiꞌ tátáꞌ‑a nu̱u̱nꞌ rá musúꞌ re̱ꞌ: “Ñamaꞌ kuátava ɨɨn saꞌma máá váꞌa ka̱ꞌ jee nachuꞌun maa re̱ꞌ jee suni nachuꞌun ɨɨn xeꞌi naꞌá re̱ꞌ, jee nachiꞌi ni̱jia̱nꞌ jie̱ꞌe̱ꞌ‑e. 23Jee kɨ̱keꞌen rán ɨɨn chelu máá nnañu jee kaꞌniꞌ rán maa kajiꞌ‑ó, chi saꞌá‑ó viko nusɨ̱ɨ̱ꞌ iniꞌ‑ó. 24Chi se̱ꞌya yɨ́ɨ́ ni̱ꞌ yaꞌá jee kuéntáꞌ ya̱ ni̱ꞌi̱ꞌ‑i, jee nna̱tekuꞌ‑u, chi kuéntáꞌ nsu̱kuíta ni̱ꞌ maa jee vitan nna̱niꞌinꞌ ni̱ꞌ maa”, nkachiꞌ re̱ꞌ. Jee nka̱jiéꞌé ráa kúsɨ́ɨꞌ iniꞌ ráa viko sáꞌá ráa.

25’Jee se̱ꞌya yɨ́ɨ́ ñáꞌnú re̱ꞌ, íyó‑o nu̱u̱nꞌ tiñu sáꞌá‑a nu̱u̱nꞌ kuꞌúꞌ, jee sáá va̱niji‑i nnu̱yatin‑i veꞌi‑i, nteso̱ꞌo‑o ya̱ kuvi yaaꞌ jín ya̱ kátiéꞌé rá ñɨvɨ. 26Jee nkana‑a ɨɨn rá musúꞌ, jee ni̱ka̱tu̱ꞌún‑u na̱kuá kúvi rá yukuán. 27Jee nkachiꞌ musúꞌ vá nu̱u̱nꞌ‑u: “Ñaniꞌ nú nnenta jee nta̱jí tátáꞌ nú ya̱ ñaꞌniꞌ ɨɨn chelu máá nnañu chi íyó váꞌa ñaniꞌ nú nenta‑a nu̱u̱nꞌ re̱ꞌ”, nkachiꞌ musúꞌ vá.

28’Saájee nki̱tɨ̱ꞌ iniꞌ‑i, jee ni ntu nkuíni‑i ni̱vɨ‑ɨ iniꞌ veꞌi‑i. Soo tátáꞌ‑a nkene re̱ꞌ ni̱ka̱nꞌ táꞌvíꞌ re̱ꞌ nu̱u̱nꞌ‑u ya̱ ni̱vɨ‑ɨ. 29Jee nna̱xiníkó‑o nkachiꞌ‑i nu̱u̱nꞌ tátáꞌ‑a: “Kune̱ꞌyá, tantúꞌ kui̱ya̱ꞌ sátíñú ni̱ꞌ nu̱u̱nꞌ nú, jee ni nsáꞌ kújiááꞌ kuitɨꞌ iniꞌ ni̱ꞌ nu̱u̱nꞌ ya̱ nta̱túníꞌ nú, jee ni nsáꞌ nta̱jí nú ni sú ɨɨn lítú lúlí nu̱u̱nꞌ ni̱ꞌ sáva saꞌá ni̱ꞌ viko nusɨ̱ɨ̱ꞌ iniꞌ ni̱ꞌ jín rá ñɨvɨ ma̱ni̱ꞌ jín ni̱ꞌ. 30Soo sáá nnenta se̱ꞌya yɨ́ɨ́ nú yaꞌá, ya̱ nxi̱nɨ́ꞌɨ re̱ꞌ ña̱xi̱nꞌ síkɨ́ sɨ̱ɨ̱ꞌ re̱ꞌ xu̱ꞌún nú jín rá ñaꞌan sɨ̱ɨ̱ꞌ iniꞌ ya̱ xíkó maáa, jee nta̱jí nú ya̱ ñaꞌniꞌ ráa ɨɨn chelu nnañu jie̱ꞌe̱ꞌ re̱ꞌ”, nkachiꞌ‑i.

31’Jee nkachiꞌ tátáꞌ‑a nu̱u̱nꞌ‑u: “Se̱ꞌya yɨ́ɨ́ ni̱ꞌ, noꞌó jee sukuáni íyó nú jín nuꞌuꞌ, jee nɨꞌɨ ya̱ kúmí ni̱ꞌ suni nantíñú nú kúvi‑i. 32Soo jíniñúꞌún ya̱ saꞌá viko yaꞌá vitan jee nusɨ̱ɨ̱ꞌ iniꞌ‑ó, chi ñaniꞌ nú yaꞌá kuéntáꞌ níꞌiꞌ‑i, jee nna̱tekuꞌ‑u, chi nsu̱kuíta ni̱ꞌ maa, jee vitan nna̱niꞌinꞌ ni̱ꞌ maa”, nkachiꞌ tátáꞌ‑a ―nkachiꞌ Jesús.

Currently Selected:

Lucas 15: meh

Highlight

Copy