Lucas 22

Nátúꞌún ráa na̱ja tɨɨn ráa Jesús

(Mateo 26:1-5, 14-16; Marcos 14:1-2, 10-11; Juan 11:45-53)

1Saájee ya kua̱kuyatin ki̱vɨ̱ꞌ koo viko yájíꞌ rá ñɨvɨ i̱xta̱tíláꞌ ya̱ ntu yɨ́ꞌɨ́ levadura, viko ya̱ naní Pascua. 2Jee rá su̱tu̱ꞌ kúñáꞌnú jín rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ yanaꞌán, núkú ráa na̱ja kaꞌniꞌ ráa Jesús, chi yúꞌví ráa rá ñɨvɨ. 3Saájee nki̱vɨ kui̱ꞌna̱ꞌ kúñáꞌnú naní Satanás iniꞌ Judas ya̱ suni naní re̱ꞌ Iscariote, jee kúvi re̱ꞌ ɨɨn rá u̱xu̱ꞌ u̱vi̱ꞌ (12) rá kútáꞌán ráa jín Jesús. 4Jee ña̱ꞌa̱nꞌ re̱ꞌ nu̱u̱nꞌ rá su̱tu̱ꞌ kúñáꞌnú jín nu̱u̱nꞌ rá te̱e yósóꞌ nu̱u̱nꞌ rá mayóríꞌ nu̱u̱nꞌ veñu̱ꞌun, jee nna̱túꞌún re̱ꞌ jín ráa na̱ja naku̱ꞌva re̱ꞌ Jesús xi̱ntíín ráa. 5Jee ne̱ nku̱sɨ̱ɨ̱ꞌ iniꞌ ráa jee nna̱túꞌún ráa ya̱ ku̱ꞌva ráa xu̱ꞌún plata nu̱u̱nꞌ re̱ꞌ. 6Jee njia̱ꞌayuꞌú re̱ꞌ ya̱ káchíꞌ rá te̱e vá, jee nnu̱kú re̱ꞌ na̱ja ni̱ꞌi̱nꞌ re̱ꞌ naku̱ꞌva re̱ꞌ Jesús xi̱ntíín rá te̱e vá sáá ntu̱ví ka̱ꞌ rá ñɨvɨ kue̱ꞌe̱ꞌ jín Jesús.

Xíní I̱toꞌoꞌ‑ó

(Mateo 26:17-29; Marcos 14:12-25; Juan 13:21-30; 1 Corintios 11:23-26)

7Saájee nkenta ki̱vɨ̱ꞌ íyó viko yájíꞌ rá ñɨvɨ i̱xta̱tíláꞌ ya̱ ntu yɨ́ꞌɨ́ levadura ya̱ kúvi ki̱vɨ̱ꞌ íyó kaꞌniꞌ ráa ɨɨn lanchi lúlí ráa so̱ko̱ꞌ ráa maa nu̱u̱nꞌ Ndiosíꞌ. 8Jee nchu̱ichí Jesús Pedro jín Juan, jee nkachiꞌ re̱ꞌ nu̱u̱nꞌ ráa:

―Kuáꞌán rán kɨ̱saꞌá stákoo rán ya̱ kuxíní‑ó viko Pascua ―nkachiꞌ re̱ꞌ.

9Jee ni̱ka̱tu̱ꞌún ráa re̱ꞌ:

―¿Né núꞌ kuíni nú ya̱ kɨ̱saꞌá stákoo rán maa? ―nkachiꞌ ráa.

10Jee nkachiꞌ re̱ꞌ nu̱u̱nꞌ ráa:

―Kune̱ꞌyá, sáá kenta rán ki̱vɨ rán ñuunꞌ káꞌnú, jee yukuán naketáꞌán rán ɨɨn te̱e níso re̱ꞌ ki̱yɨ ñúꞌún nute. Kunikɨnꞌ rán maa jee ki̱vɨ rán iniꞌ veꞌi nu̱u̱nꞌ ni̱vɨ re̱ꞌ. 11Jee kachiꞌ rán nu̱u̱nꞌ te̱e xí veꞌi vá: “Káchíꞌ Mestrúꞌ nu̱u̱nꞌ nú: ¿Né núꞌ íyó ɨɨn iniꞌ veꞌi nu̱u̱nꞌ kuneeꞌ ni̱ꞌ nu̱u̱nꞌ kuvi kuxíní ni̱ꞌ viko Pascua jín rá te̱e kútáꞌán jín ni̱ꞌ súkuáꞌa ni̱ꞌ ráa?, kachiꞌ rán.” 12Jee suvire̱ꞌ xinéꞌénꞌ re̱ꞌ ránó ɨɨn iniꞌ veꞌi káꞌnú yósóꞌ táꞌán yósóꞌ súkún si̱kɨ̱ꞌ, ya̱ nɨꞌɨ ya̱ íyó stákoo. Yukuán saꞌá stákoo rán ya̱ kuxíní‑ó ―nkachiꞌ Jesús.

13Jee sáá nkene ráa kua̱ꞌa̱nꞌ ráa ñuunꞌ vá, jee nna̱niꞌinꞌ ráa nɨꞌɨ sánikua̱ꞌ nkachiꞌ re̱ꞌ nu̱u̱nꞌ ráa. Jee yukuán nsa̱ꞌá stákoo ráa ya̱ kuxíní viko Pascua.

14Jee sáá nkenta hora kuxíní, jee nkenta Jesús ña̱kuneeꞌ re̱ꞌ yumesáꞌ jín suni rá te̱e kúvi apóstol kútáꞌán jín re̱ꞌ súkuáꞌa re̱ꞌ ráa, ña̱kuneeꞌ ráa jín re̱ꞌ. 15Jee nkachiꞌ re̱ꞌ nu̱u̱nꞌ ráa:

―Na̱ ka̱ꞌ ñúkúvi nasɨ́kuitɨꞌ ka̱ꞌ iniꞌ ni̱ꞌ ya̱ kuxíní ni̱ꞌ jín rán vitan viko Pascua yaꞌá, ne̱ ntiáꞌan ka̱ꞌ kunoꞌo ni̱ꞌ. 16Chi káchíꞌ ni̱ꞌ nu̱u̱nꞌ rán ya̱ ni nsáꞌ kajiꞌ tuku ni̱ꞌ ka̱ꞌ xíní viko Pascua, ne̱kua̱ꞌ sikúnkuvi nɨꞌɨ ya̱ nkuna̱a̱ꞌ iniꞌ Ndiosíꞌ jie̱ꞌe̱ꞌ vá sáá kɨꞌɨ nɨꞌɨ xi̱ntíín Ndiosíꞌ jee tatúníꞌ Ndiosíꞌ nu̱u̱nꞌ nɨꞌɨ ñɨ̱vɨ́ ―nkachiꞌ Jesús.

17Jee kuíre ntɨɨn re̱ꞌ ɨɨn vasúꞌ nixiꞌ nu̱xi uva, jee njia̱ꞌa re̱ꞌ ya̱ kútaꞌviꞌ re̱ꞌ nu̱u̱nꞌ Ndiosíꞌ, jee nkachiꞌ re̱ꞌ:

―Yaꞌá rán vasúꞌ yaꞌá, jee tasáva rán maa nteñu maárán koꞌo ntáká maárán maa. 18Káchíꞌ ni̱ꞌ nu̱u̱nꞌ rán ya̱ ni nsáꞌ koꞌo ni̱ꞌ ka̱ꞌ nixiꞌ ya̱ vixíꞌ kúun yokúꞌúꞌ uva nekuaꞌ nakɨ̱ꞌɨ nɨꞌɨ xi̱ntíín Ndiosíꞌ jee tátúníꞌ re̱ꞌ nu̱u̱nꞌ nɨꞌɨ ―nkachiꞌ Jesús.

19Jee ntɨɨn re̱ꞌ ɨɨn i̱xta̱tíláꞌ jee njia̱ꞌa re̱ꞌ ya̱ kútaꞌviꞌ nu̱u̱nꞌ Ndiosíꞌ, jee ña̱ꞌnu̱ꞌ re̱ꞌ maa njia̱ꞌa re̱ꞌ maa nu̱u̱nꞌ ráa, jee nkachiꞌ re̱ꞌ nu̱u̱nꞌ ráa:

―Yaꞌá ví ñunéꞌyúꞌ ni̱ꞌ, ya̱ jiáꞌa ni̱ꞌ sáva kuviꞌ ni̱ꞌ jie̱ꞌe̱ꞌ ya̱ váꞌa kuvi ránoꞌó. Jee suꞌva kajiꞌ rán yaꞌá sáva naku̱ꞌun iniꞌ rán ya̱ níꞌiꞌ ni̱ꞌ jie̱ꞌe̱ꞌ rán ―nkachiꞌ re̱ꞌ.

20Jee suni sukuán nsa̱ꞌá re̱ꞌ jín vasúꞌ ñúꞌún nixiꞌ nu̱xi uva, sáá nkuvi nku̱xíní re̱ꞌ jín ráa, jee ntɨɨn re̱ꞌ vasúꞌ, jee nkachiꞌ re̱ꞌ:

―Vasúꞌ yaꞌá ví tratúꞌ jiáá ya̱ kakɨnꞌ Ndiosíꞌ jín ni̱ñɨ̱ꞌ ni̱ꞌ ya̱ katɨ‑ɨ sáá kuviꞌ ni̱ꞌ sáva chunáán nkáꞌnú ni̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi rán. 21Soo vitan, te̱e ya̱ naku̱ꞌva re̱ꞌ nuꞌuꞌ, nééꞌ re̱ꞌ yájíꞌ nkáꞌnú re̱ꞌ jín nuꞌuꞌ yósóꞌ naꞌá re̱ꞌ nu̱u̱nꞌ mesa yaꞌá. 22Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, máá naáꞌ nijia ya̱ kɨ̱ꞌɨ̱nꞌ ni̱ꞌ kuviꞌ ni̱ꞌ sánikua̱ꞌ ya̱ nkuna̱a̱ꞌ iniꞌ Ndiosíꞌ ya̱ sukuán koo. Soo na̱ ka̱ꞌ xe̱e̱nꞌ náꞌví ka̱ꞌ te̱e vá ya̱ naku̱ꞌva‑a nuꞌuꞌ ―nkachiꞌ Jesús.

23Saájee nka̱jiéꞌé ráa kúkuéntú ráa jíkátu̱ꞌún táꞌán ɨɨn inka ráa né ɨɨn ráa kúvi ya̱ sa̱néꞌ íyó sáꞌá‑a tiñu yaꞌá.

Kúkuéntú ráa jie̱ꞌe̱ꞌ né ɨɨn ráa kúñáꞌnú ka̱ꞌ

24Jee nka̱jiéꞌé ráa kántátúꞌun ráa nteñu maáráa jie̱ꞌe̱ꞌ né ɨɨn ráa vá ya̱ íyó níꞌinꞌ‑i kúñáꞌnú‑u ka̱ꞌ nu̱u̱nꞌ ráa. 25Saájee nkachiꞌ Jesús nu̱u̱nꞌ ráa:

―Rá te̱e nísotíñú ya̱ tátúníꞌ nu̱u̱nꞌ rá inka nación, jee ne̱ tátúníꞌ ni̱ꞌin ráa nɨꞌɨ nu̱u̱nꞌ rá ñɨvɨ ñuunꞌ yɨ́ꞌɨ́ xi̱ntíín ráa, jee rá te̱e nísotíñú nu̱u̱nꞌ rá ñɨvɨ vá, síkúnání ráa maáráa ya̱ íyó mániꞌ iniꞌ ráa néꞌyá ráa rá ñɨvɨ ya̱ sáꞌá va̱ꞌa ráa jín rává. 26Soo ránoꞌó chi ni nkúvi sukuán jín rán. Chisaꞌ ɨɨn ya̱ kúñáꞌnú ká nteñu rán, jee íyó naxinúun‑u maáa sáva kuvi‑i kuéntáꞌ ɨɨn maá súchí ka̱ꞌ, jee ɨɨn ñɨvɨ ya̱ yósóꞌ nu̱u̱nꞌ rán íyó koo kuéntáꞌ musúꞌ ya̱ yɨ́tíñú‑u nu̱u̱nꞌ inka ñɨvɨ. 27Chi, ¿né ɨɨn kúvi ya̱ kúñáꞌnú ka̱ꞌ, á ya̱ nééꞌ yuꞌú mesa yájíꞌ‑i, áxí ya̱ chísó ko̱ꞌo̱ꞌ nu̱u̱nꞌ mesa rúja? ¿Á ntu su kúñáꞌnú ka̱ꞌ kúvi ya̱ nééꞌ yuꞌú mesa rúja? Soo nuꞌuꞌ, jee nééꞌ ni̱ꞌ nteñu rán kuéntáꞌ kua̱ꞌ ɨɨn musúꞌ, ya̱ yɨ́tíñú ni̱ꞌ nu̱u̱nꞌ rán.

28’Soo ránoꞌó, jee nkino̱o rán kútáꞌán rán jín nuꞌuꞌ nu̱u̱nꞌ rá tu̱nóꞌó táꞌánꞌ ni̱ꞌ. 29Jee saáva ñani ni̱ꞌ ránoꞌó sáva kunisotíñú ránú tatúníꞌ rán, kuéntáꞌ kua̱ꞌ ñani Tátáꞌ ni̱ꞌ nuꞌuꞌ kunisotíñú ni̱ꞌ tatúníꞌ ni̱ꞌ, 30sáva kajiꞌ rán koꞌo rán jín nuꞌuꞌ kuneeꞌ rán yuꞌú mesa ni̱ꞌ nu̱u̱nꞌ tátúníꞌ ni̱ꞌ nu̱u̱nꞌ nɨꞌɨ. Jee suni yukuán kuneeꞌ rán rá teyuꞌ ñáꞌnú sáva sanáaꞌ rán tatúníꞌ rán nu̱u̱nꞌ rá ñɨvɨ ya̱ kúvi ráa rá ni uxúꞌ u̱vi̱ꞌ tataꞌ ichiyúkúnꞌ ya̱ nkene ráa nu̱u̱nꞌ rá ni uxúꞌ u̱vi̱ꞌ (12) rá se̱ꞌya yɨ́ɨ́ Israel.

Káchíꞌ Jesús ya̱ kachiꞌ Pedro ya̱ ntu jíníꞌ‑i re̱ꞌ

(Mateo 26:31-35; Marcos 14:27-31; Juan 13:36-38)

31’Simón, Simón chi, Satanás jíkánꞌ re̱ꞌ nu̱u̱nꞌ Ndiosíꞌ ya̱ saꞌá kini re̱ꞌ ránó kototúníꞌ re̱ꞌ ránó, kuéntáꞌ kua̱ꞌ kísɨ‑ó trigúꞌ sáá náskuíjin maa. 32Soo nuꞌuꞌ jíkánꞌ táꞌvíꞌ ni̱ꞌ jie̱ꞌe̱ꞌ nú nu̱u̱nꞌ Ndiosíꞌ sáva níta ya̱ kúneí iniꞌ nú nuꞌuꞌ. Jee sáá nakani iniꞌ nú ya̱ nsa̱ꞌá nú jee nikó nú nu̱u̱nꞌ nuꞌuꞌ saájee nasáneí nú iniꞌ ánímaꞌ rá ñanitáꞌán nú kuiñɨ ni̱ꞌin ráa ―nkachiꞌ Jesús. 33Soo nkachiꞌ Pedro nu̱u̱nꞌ Jesús:

―I̱toꞌoꞌ ni̱ꞌ, ɨɨn ni íyó iniꞌ ni̱ꞌ kɨ̱ꞌɨ̱nꞌ ni̱ꞌ jín nú ne̱ kɨ̱ꞌɨ̱nꞌ ni̱ꞌ veka̱a, jín suni asúnika̱ꞌ ne̱ kuviꞌ ni̱ꞌ ranika̱ꞌ.

34Soo nkachiꞌ Jesús:

―Pedro, káchíꞌ ni̱ꞌ nu̱u̱nꞌ nú ya̱ vitan ne̱ ntiáꞌan ka̱ꞌ kana stóꞌo, jee u̱ni̱ꞌ íchí kachiꞌ nú ya̱ ntu jíníꞌ nú nuꞌuꞌ ―nkachiꞌ Jesús.

Ya̱ nku̱yatin hora kunoꞌo Jesús tu̱nóꞌó

35Saájee nkachiꞌ Jesús nu̱u̱nꞌ ráa.

―Sáá nta̱jí ni̱ꞌ ránoꞌó ña̱kachitu̱ꞌún rán tu̱ꞌun váꞌa Ndiosíꞌ, jee ni̱ꞌ ntu̱náꞌ ñɨɨn ñúꞌún xu̱ꞌún rán ínaꞌá rán, ni ñunu ñúꞌún nantíñú nú, ni ni̱jia̱nꞌ, jee, ¿á níyo ná nkumaniꞌ nu̱u̱nꞌ rán ya̱ jíniñúꞌún rán rúja? ―nkachiꞌ re̱ꞌ.

Jee nkachiꞌ ráa:

―Ntu̱náꞌ nkúmániꞌ.

36Saájee nkachiꞌ re̱ꞌ nu̱u̱nꞌ ráa:

―Soo vitan jee, káchíꞌ ni̱ꞌ ya̱ ɨɨn rán ya̱ íyó ñɨɨn ñúꞌún xu̱ꞌún‑u jee keꞌen maa kunaꞌá nú. Jee suni sukuán kunaꞌá‑a ñunu‑u ñúꞌún nantíñú‑u. Jee ɨɨn ya̱ ntu kúmí‑i yuchiꞌ espada nama‑a maáa, jee xi̱kó‑o so̱kotóꞌ‑o jee keꞌen‑e ɨɨn espada. 37Chi káchíꞌ ni̱ꞌ nu̱u̱nꞌ rán ya̱ íyó sikúnkuvi tu̱nóꞌó yaꞌá jín nuꞌuꞌ sáni káchíꞌ rá tu̱ꞌun níso nu̱u̱nꞌ Tutuꞌ Ííꞌ: “Jee tɨɨn kuéntáꞌ rá ñɨvɨ ya̱ nuꞌuꞌ kúvi kuéntáꞌ kua̱ꞌ ɨɨn rá te̱e sáꞌá kua̱chi ni̱ꞌin”, káchíꞌ nu̱u̱nꞌ Tutuꞌ Ííꞌ sukuán, chi ntáká ya̱ káchíꞌ Tutuꞌ Ííꞌ jie̱ꞌe̱ꞌ nuꞌuꞌ sikúnkuvi maa ―nkachiꞌ Jesús.

38Saájee nkachiꞌ ráa:

―I̱toꞌoꞌ, kune̱ꞌyá, yaꞌá íyó u̱vi̱ꞌ yuchiꞌ espada ―nkachiꞌ ráa.

Jee nkachiꞌ re̱ꞌ nu̱u̱nꞌ ráa:

―Nkóo saá ya̱ nkuvi sukuáni.

Káꞌánꞌ Jesús jín Ndiosíꞌ ɨɨn nu̱u̱nꞌ naní Getsemaní

(Mateo 26:36-46; Marcos 14:32-42)

39Jee nkene Jesús kua̱ꞌa̱nꞌ re̱ꞌ yuku Olivos, sánikua̱ꞌ nka̱an re̱ꞌ sáꞌá re̱ꞌ, jee suni rá te̱e kútáꞌán jín re̱ꞌ súkuáꞌa re̱ꞌ ráa nchi̱nikɨnꞌ ráa re̱ꞌ. 40Jee sáá nkenta re̱ꞌ yukuán jee nkachiꞌ re̱ꞌ nu̱u̱nꞌ ráa:

―Ka̱ka̱nꞌ táꞌvíꞌ rán nu̱u̱nꞌ Ndiosíꞌ sáva koto síkúvi iniꞌ rán kininkava rán nu̱u̱nꞌ xinóo rán ya̱ kuiñɨ ni̱ꞌin rán jín nuꞌuꞌ ―nkachiꞌ re̱ꞌ.

41Saájee nku̱sɨ́ɨ́n re̱ꞌ ntíꞌ, ɨɨn kuꞌvaꞌ kua̱ꞌ síkéne‑ó ɨɨn yu̱u̱ꞌ, jee ña̱kui̱ñɨ̱ꞌ ítɨ́ re̱ꞌ, jee ni̱ka̱nꞌ táꞌvíꞌ re̱ꞌ 42jee nkachiꞌ re̱ꞌ:

―Tátáꞌ ni̱ꞌ, retú kuíni nú, jee siíyo nú copa yaꞌá ya̱ kúvi tu̱nóꞌó kiji kunoꞌo ni̱ꞌ. Soo koto sáꞌá nú ya̱ kuíni iniꞌ nuꞌuꞌ, chisaꞌ saꞌá nú sáni ya̱ kuíni maánú ―nkachiꞌ re̱ꞌ.

43Saájee nkitu̱vi ɨɨn najiáꞌáꞌ ííꞌ Ndiosíꞌ ya̱ váji ne̱ antivɨ́ súkún nu̱u̱nꞌ re̱ꞌ sáva nna̱sáneí‑i iniꞌ re̱ꞌ. 44Jee núkuíꞌyá nasɨ́kuitɨꞌ iniꞌ re̱ꞌ jee saꞌ víꞌí ka̱ꞌ kua̱neí re̱ꞌ nxi̱níꞌin re̱ꞌ jíkánꞌ táꞌvíꞌ re̱ꞌ ka̱ꞌ. Jee rá ta̱a̱nꞌ re̱ꞌ nkenta nkuvi ráa kuéntáꞌ rá yúyú ni̱ñɨ̱ꞌ náꞌnú ya̱ tóo ráa nu̱u̱nꞌ ñu̱ꞌún. 45Jee sáá nna̱kuiñɨꞌ re̱ꞌ sáá nnɨꞌɨ nkaꞌanꞌ re̱ꞌ jín Ndiosíꞌ, jee nenta re̱ꞌ nu̱u̱nꞌ rá te̱e súkuáꞌa re̱ꞌ ráa, jee kíxíꞌ ráa nna̱niꞌinꞌ re̱ꞌ ráa jie̱ꞌe̱ꞌ ya̱ íyó ráa jín tu̱nkuéká iniꞌ. 46Jee nkachiꞌ re̱ꞌ nu̱u̱nꞌ ráa:

―¿Na̱ kuvi chi kíxíꞌ rán? Nako̱o rán, jee ka̱ka̱nꞌ táꞌvíꞌ rán sáva koto síkúvi iniꞌ rán kininkava rán nu̱u̱nꞌ xinóo rán ya̱ kuiñɨ ni̱ꞌin rán jín nuꞌuꞌ ―nkachiꞌ re̱ꞌ.

Ntɨɨn ráa Jesús

(Mateo 26:47-56; Marcos 14:43-50; Juan 18:2-11)

47Jee ni káꞌánꞌ i̱i̱ꞌ Jesús, jee nkenta ñɨvɨ kue̱ꞌe̱ꞌ, jee te̱e ya̱ naní Judas, ya̱ kúvi ɨɨn rá u̱xu̱ꞌ u̱vi̱ꞌ (12) te̱e súkuáꞌa Jesús ráa, yósóꞌ‑o nu̱u̱nꞌ rá ñɨvɨ kue̱ꞌe̱ꞌ vá, jee ña̱kuyatin‑i ne̱ nu̱u̱nꞌ Jesús sáva teyuꞌú‑u re̱ꞌ. 48Saájee nkachiꞌ Jesús nu̱u̱nꞌ re̱ꞌ:

―Judas, ¿á jín ɨɨn ya̱ téyuꞌú nú nu̱u̱nꞌ nuꞌuꞌ kuvi ya̱ naku̱ꞌva nú nuꞌuꞌ?, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

49Jee sáá niniꞌ rá te̱e súkuáꞌa re̱ꞌ ya̱ íñɨ́ jín re̱ꞌ ya̱ kúvi suꞌva, jee nkachiꞌ ráa nu̱u̱nꞌ re̱ꞌ:

―I̱toꞌoꞌ, ¿á kuun rán yuchiꞌ ráa? ―nkachiꞌ ráa.

50Jee nkuun ɨɨn rá táꞌán ráa vá yuchiꞌ musúꞌ su̱tu̱ꞌ kúñáꞌnú ka̱ꞌ jee ñeꞌneꞌ re̱ꞌ so̱ꞌo ichi kuáꞌá musúꞌ vá. 51Saájee nna̱xiníkó Jesús jee nkachiꞌ re̱ꞌ:

―¡Sikɨ́kuɨ̱ñɨ̱ꞌ rán maárán! ¡Nkóo saá!

Jee ntee re̱ꞌ naꞌá re̱ꞌ so̱ꞌo musúꞌ vá jee nxi̱núvi re̱ꞌ maa. 52Jee nkachiꞌ Jesús nu̱u̱nꞌ rá su̱tu̱ꞌ kúñáꞌnú, jín rá te̱e yósóꞌ nu̱u̱nꞌ rá mayóríꞌ nu̱u̱nꞌ veñu̱ꞌun, jín rá tee ñáꞌnú nu̱u̱nꞌ ñuunꞌ vá ya̱ va̱ji ráa tɨɨn ráa re̱ꞌ:

―¿Á nkene rán va̱ji rán jín yuchiꞌ jín yutun si̱kɨ̱ꞌ nuꞌuꞌ sáva tɨɨn rán nuꞌuꞌ, kuéntáꞌ réáꞌ te̱e kuíꞌná ví ni̱ꞌ? 53Ni ki̱vɨ̱ꞌ nééꞌ ni̱ꞌ jín rán iniꞌ chíkéꞌi veñu̱ꞌun káꞌnú jee ntu ntɨ́ɨn rán nuꞌuꞌ. Soo yaꞌá ví hora rán ya̱ nkuna̱a̱ꞌ iniꞌ Ndiosíꞌ ya̱ saꞌá rán ya̱ niváꞌa jín tiñu tátúníꞌ kui̱ꞌna̱ꞌ kúñáꞌnú nu̱u̱nꞌ ñuunꞌ neenꞌ.

Káchíꞌ Pedro ya̱ ntu̱ví jíníꞌ‑i Jesús

(Mateo 26:57-58, 69-75; Marcos 14:53-54, 66-72; Juan 18:12-18, 25-27)

54Saájee ntɨɨn ráa Jesús, jee ña̱na̱ka ráa re̱ꞌ veꞌi su̱tu̱ꞌ kúñáꞌnú ka̱ꞌ, jee nnikɨnꞌ jíka Pedro ya̱ta̱ꞌ rá ñɨvɨ ya̱ kua̱ꞌa̱nꞌ jín Jesús. 55Jee nsta̱ꞌánꞌ rá ñɨvɨ ñuꞌunꞌ ma̱ꞌñú chíkéꞌi nééꞌ iniꞌ veꞌi jee ña̱kuneeꞌ ti̱yu̱ꞌ ráa yunúꞌúnꞌ yukuán. Jee ña̱kuneeꞌ Pedro nteñu ráa yukuán. 56Soo ɨɨn ñaꞌan ya̱ kúvi musúꞌ sátíñú yukuán, sáá niniꞌ ña Pedro ni nééꞌ re̱ꞌ yatin yunúꞌúnꞌ yukuán, jee nne̱ꞌyá váꞌa ña nu̱u̱nꞌ re̱ꞌ, jee nkachiꞌ ña:

―Suni nku̱táꞌán te̱e yaꞌá jín Jesús ―nkachiꞌ ña.

57Soo nkachiꞌ Pedro ya̱ ntu̱ví, jee nkachiꞌ re̱ꞌ:

―Ñaꞌan, ntu̱ví jíníꞌ ni̱ꞌ re̱ꞌ.

58Jee sáá nku̱núún ntíꞌ ka̱ꞌ, jee inka ka̱ꞌ ñɨvɨ niniꞌ‑i Pedro jee nkachiꞌ‑i:

―Noꞌó kúvi nú ɨɨn rá táꞌán kútáꞌán jín Jesús ―nkachiꞌ ñɨvɨ vá nu̱u̱nꞌ Pedro.

Jee nkachiꞌ Pedro:

―Te̱e, nsu̱ví kúvi ni̱ꞌ.

59Jee sáá njia̱ꞌa yatin ɨɨn hora, jee inka ka̱ꞌ rá ñɨvɨ íñɨ́ yukuán sáꞌá na̱a̱ꞌ‑a jee nkachiꞌ‑i:

―Máá nááꞌ nijia ya̱ suni te̱e yaꞌá kútáꞌán‑a jín Jesús, chi suni te̱e ñuunꞌ Galilea kúvi re̱ꞌ ―nkachiꞌ ñɨvɨ vá.

60Soo nkachiꞌ Pedro:

―¡Te̱e! Ntu jíníꞌ ni̱ꞌ na̱ jie̱ꞌe̱ꞌ káchíꞌ nú ―nkachiꞌ re̱ꞌ.

Jee kuíntañúꞌún ni káꞌánꞌ i̱i̱ꞌ re̱ꞌ, jee nkana stóꞌo. 61Jee nna̱koto I̱toꞌoꞌ‑ó nna̱kune̱ꞌyá yátá re̱ꞌ nu̱u̱nꞌ Pedro, jee nna̱ku̱ꞌun iniꞌ Pedro tu̱ꞌun I̱toꞌoꞌ‑ó sáá nkachiꞌ‑i nu̱u̱nꞌ re̱ꞌ: “Ne̱ ntiáꞌan ka̱ꞌ kana stóꞌo vitan, jee u̱ni̱ꞌ íchí kachiꞌ nú ya̱ ntu̱ví jíníꞌ nú nuꞌuꞌ.” 62Jee nkene re̱ꞌ chíkéꞌi, jee nnaꞌyuꞌ uúꞌ re̱ꞌ.

Káꞌánꞌ u̱ꞌvi̱ꞌ ráa Jesús

(Mateo 26:67-68; Marcos 14:65)

63Jee rá te̱e ya̱ kúmí ráa Jesús sáꞌá xe̱e̱nꞌ ráa re̱ꞌ jee jiáꞌa ráa re̱ꞌ. 64Jee ñasɨꞌ ráa saꞌma nu̱u̱nꞌ rá nchinúún re̱ꞌ, jee ni̱ka̱tu̱ꞌún ráa re̱ꞌ, jee nkachiꞌ ráa nu̱u̱nꞌ re̱ꞌ:

―Kachiꞌ tu̱ꞌun kéne yuꞌú Ndiosíꞌ: ¿né ɨɨn ví ya̱ njia̱ꞌa noꞌó? ―nkachiꞌ ráa.

65Jee kue̱ꞌe̱ꞌ ka̱ꞌ rá tu̱ꞌun níváꞌa ténúunꞌ ráa káꞌánꞌ ráa si̱kɨ̱ꞌ re̱ꞌ.

Íñɨ́ Jesús ichinúúnꞌ rá te̱e yɨ́ꞌɨ́ Justicia Ñáꞌnú ya̱ nééꞌ kuéntáꞌ ráa nu̱u̱nꞌ ñuunꞌ Israel

(Mateo 26:59-66; Marcos 14:55-64; Juan 18:19-24)

66Jee sáá ntu̱u̱nꞌ nka̱niiꞌ, nku̱tútú rá te̱e kúñáꞌnú nu̱u̱nꞌ rá ñɨvɨ ñuunꞌ vá, jín rá su̱tu̱ꞌ kúñáꞌnú jín rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ, jee kua̱ꞌa̱nꞌ ráa jín Jesús nu̱u̱nꞌ kútútú ráa ya̱ kúvi ráa Justicia Ñáꞌnú, jee ni̱ka̱tu̱ꞌún ráa re̱ꞌ jee nkachiꞌ ráa:

67―Retú noꞌó kúvi nú Cristo, kachiꞌ maa nu̱u̱nꞌ ránꞌ ―nkachiꞌ ráa.

Soo nkachiꞌ re̱ꞌ nu̱u̱nꞌ ráa:

―Retú kachiꞌ ni̱ꞌ maa nu̱u̱nꞌ rán, jee ni nsáꞌ ji̱nu̱ꞌ iniꞌ rán maa. 68Jee retánꞌ katu̱ꞌún ni̱ꞌ ránoꞌó ɨɨn tu̱ꞌun, jee ni nsáꞌ naxiníkó rán nu̱u̱nꞌ ni̱ꞌ, [jee ni nsáꞌ siaáꞌ rán nuꞌuꞌ]. 69Soo ne̱ vitan jee nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kuneeꞌ ni̱ꞌ xiín ichi kuáꞌá Ndiosíꞌ ya̱ níso fuersáꞌ ííꞌ nu̱u̱nꞌ nɨꞌɨ, nu̱u̱nꞌ kúñáꞌnú ni̱ꞌ jín re̱ꞌ ―nkachiꞌ Jesús. 70Saájee ni̱ka̱tu̱ꞌún nta̱ká ráa:

―Saájee, ¿á maánú kúvi Se̱ꞌya Ndiosíꞌ résa? ―nkachiꞌ ráa.

Jee nkachiꞌ Jesús nu̱u̱nꞌ ráa:

―Suvi kúvi nijia ni̱ꞌ sánikua̱ꞌ káchíꞌ maárán ya̱ kúvi ni̱ꞌ ―nkachiꞌ Jesús.

71Saájee nkachiꞌ ráa:

―¿Na̱ nu̱u̱nꞌ jíniñúꞌún i̱i̱ꞌ‑ó ka̱ꞌ ñɨvɨ sanáaꞌ ya̱ naáꞌ si̱kɨ̱ꞌ re̱ꞌ nu̱u̱nꞌ‑ó, rúsa? Chi ne̱ maáórán nteso̱ꞌo‑ó tu̱ꞌun yuꞌuꞌ maáréꞌ ya̱ íyó si̱kɨ̱ꞌ re̱ꞌ ―nkachiꞌ ráa.

Currently Selected:

Lucas 22: meh

Highlight

Copy