Lucas 24

Nna̱tekuꞌ i̱i̱ꞌ Jesús

(Mateo 28:1-10; Marcos 16:1-8; Juan 20:1-10)

1Soo neꞌenꞌ víꞌí ki̱vɨ̱ꞌ xíꞌnañúꞌún ya̱ kájiéꞌé semana, ña̱ꞌa̱nꞌ ráña nu̱u̱nꞌ yaviꞌ veꞌi ni̱yɨ vá ínaꞌá ráña nute jiáꞌánꞌ vi̱xi̱ꞌ ya̱ nsa̱ꞌá stákoo ráña. Jee nku̱táꞌán sava ka̱ꞌ rá ñaꞌan jín ráña. 2Jee sáá nkenta ráña, jee niniꞌ ráña ya̱ ya nika xíín yu̱u̱ꞌ ñasɨꞌ yuꞌú yaviꞌ vá. 3Jee sáá nki̱vɨ ráña iniꞌ yaviꞌ vá, soo ntu nnániꞌinꞌ ráña ñunéꞌyúꞌ I̱toꞌoꞌ‑ó Jesús. 4Jee ni nku̱naan nku̱suꞌva ráña ya̱ nkuvi suꞌva, jee nkitu̱vi u̱vi̱ꞌ te̱e ña̱kui̱ñɨ̱ꞌ ráa xiín ráña, jee ñúꞌún ráa máá saꞌma jiánu̱te̱ꞌ nijia. 5Jee nyu̱ꞌví ráña, jee nna̱kunta nei nu̱u̱nꞌ ráña nu̱u̱nꞌ ñuꞌun, jee nkachiꞌ ráa nu̱u̱nꞌ ráña:

―¿Na̱ kuvi chi nánukú rán nteñu rá ni̱yɨ ɨɨn ya̱ tékúꞌ? 6Ntu̱ví re̱ꞌ yaꞌá. Chisaꞌ ya̱ nna̱tekuꞌ i̱i̱ꞌ re̱ꞌ, ya̱ nxi̱nákóo Ndiosíꞌ re̱ꞌ nkene re̱ꞌ nteñu rá ni̱yɨ. Jee naku̱ꞌun iniꞌ rán ya̱ nkachiꞌ re̱ꞌ nu̱u̱nꞌ rán, ne̱ sáá nééꞌ re̱ꞌ ka̱ꞌ jín rán ne̱ ñuunꞌ Galilea, 7sáá nkachiꞌ re̱ꞌ nu̱u̱nꞌ rán: “Nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee sáá íyó naku̱ꞌva ñɨvɨ nuꞌuꞌ xi̱ntíín rá te̱e kua̱chi, jee tekaa ráa nuꞌuꞌ nu̱u̱nꞌ kurúsiꞌ jee kuviꞌ ni, jee ki̱vɨ̱ꞌ uníꞌ jee natekuꞌ i̱i̱ꞌ ni̱ꞌ nako̱o ni̱ꞌ kene ni̱ꞌ nteñu rá ni̱yɨ”, nkachiꞌ Jesús ―nkachiꞌ ni u̱vi̱ꞌ rá te̱e vá.

8Saájee nna̱ku̱ꞌun iniꞌ ráña rá tu̱ꞌun nkachiꞌ Jesús. 9Jee sáá nkene ráña nu̱u̱nꞌ yaviꞌ veꞌi ni̱yɨ vá, jee kua̱noꞌonꞌ ráña, jee nna̱kani ráña nɨꞌɨ ya̱ nkuvi sukuán nu̱u̱nꞌ ni ujíꞌ ɨɨn rá te̱e kúvi apóstol, jín nu̱u̱nꞌ nta̱ká ka̱ꞌ rá ñɨvɨ kútáꞌán jín ráa. 10Jee rá ñaꞌan vá ví María, ñaꞌan ñuunꞌ Magdala, jín Juana, jín María, nánáꞌ Jacobo, jín rá inka ñaꞌan ya̱ kútáꞌán jín ráña. Jee nákani ráña rá tu̱ꞌun yaꞌá jie̱ꞌe̱ꞌ ya̱ nkuvi nu̱u̱nꞌ rá te̱e kúvi apóstol. 11Soo nkaꞌvi iniꞌ ráa ya̱ tu̱ꞌun nékáíyó káꞌánꞌ ráña, jee ntu̱ví nínúꞌ iniꞌ ráa rá tu̱ꞌun ya̱ nákani ráña. 12Soo Pedro chi nna̱kuiñɨꞌ re̱ꞌ ninu re̱ꞌ kua̱ne̱ꞌyá re̱ꞌ nu̱u̱nꞌ nééꞌ veꞌi ni̱yɨ vá. Jee sáá nkenta re̱ꞌ yuꞌú veꞌi ni̱yɨ vá, jee ña̱xin re̱ꞌ maáréꞌ yuꞌú yaviꞌ ni̱yɨ vá, jee niniꞌ re̱ꞌ kua̱chi rá saꞌma nyɨ́sukunꞌ ñunéꞌyúꞌ yósóꞌ yukuán. Jee nkene re̱ꞌ kua̱noꞌonꞌ re̱ꞌ veꞌi, jee nsa̱ꞌvi iniꞌ re̱ꞌ ya̱ nkuvi sukuán.

Nstúvi Jesús maáréꞌ nu̱u̱nꞌ u̱vi̱ꞌ te̱e nu̱u̱nꞌ kua̱ꞌa̱nꞌ ráa ichi ñuunꞌ Emaús

(Marcos 16:12-13)

13Jee u̱vi̱ꞌ rá te̱e ya̱ nnikɨnꞌ ráa Jesús jee máá ki̱vɨ̱ꞌ yukuán kua̱ꞌa̱nꞌ ráa ɨɨn ñuunꞌ naní Emaús, ya̱ káá‑a yatin u̱ji̱ꞌ ɨɨn (11) kilómetro ya̱ ne̱ Jerusalén. 14Jee kúkuéntú maáráa jie̱ꞌe̱ꞌ nta̱ká ya̱ nkuvi jín Jesús. 15Jee ni káꞌánꞌ ráa kúkuéntú maáráa ni kua̱ꞌa̱nꞌ ráa ichi, jee nkuvi suꞌva ya̱ máá Jesús ña̱kuyatin re̱ꞌ ya̱ta̱ꞌ ráa, jee jíka re̱ꞌ kua̱ꞌa̱nꞌ re̱ꞌ jín ráa. 16Soo sú néꞌyá ráa re̱ꞌ jín nchinúún ráa soo nsa̱ꞌá nika̱ꞌ jín ráa sáva ntu nna̱kuniꞌ ráa re̱ꞌ. 17Jee nkachiꞌ re̱ꞌ nu̱u̱nꞌ ráa:

―¿Na̱ jie̱ꞌe̱ꞌ kúvi rá tu̱ꞌun kúkuéntú maárán ni jíka rán? ―nkachiꞌ Jesús.

Jee ña̱kui̱ñɨ̱ꞌ ráa néꞌyá kuéká ráa. 18Jee nna̱xiníkó ɨɨn rá te̱e vá, ya̱ naní Cleofas, jee nkachiꞌ‑i:

―¿Á noꞌó ví métúꞌún ñɨvɨ va̱néꞌyá túꞌún nú Jerusalén ya̱ ntu jíníꞌ nú ya̱ nkuvi rá ki̱vɨ̱ꞌ yaꞌá? ―nkachiꞌ‑i.

19Saájee nkachiꞌ Jesús nu̱u̱nꞌ ráa:

―¿Na̱kuá nkuvi résa? ―nkachiꞌ re̱ꞌ.

Jee nkachiꞌ ráa nu̱u̱nꞌ re̱ꞌ:

―Jie̱ꞌe̱ꞌ ya̱ nkuvi jín Jesús, te̱e ñuunꞌ Nazaret, ya̱ nkuvi re̱ꞌ ɨɨn te̱e ya̱ nna̱kani tu̱ꞌun nkene yuꞌú Ndiosíꞌ jee nniso re̱ꞌ fuersáꞌ ííꞌ Ndiosíꞌ ya̱ nsa̱ꞌá re̱ꞌ rá máá tiñu a̱nasɨ́ nasɨ́kuitɨꞌ jín ya̱ nna̱kani re̱ꞌ máá Tu̱ꞌun Ndiosíꞌ, jee jíníꞌ Ndiosíꞌ jín nɨꞌɨ rá ñɨvɨ maa. 20Jee rá su̱tu̱ꞌ kúñáꞌnú jín rá te̱e kúñáꞌnú nísotíñú nu̱u̱nꞌ ránꞌ, nna̱ku̱ꞌva ráa re̱ꞌ xi̱ntíín rá te̱e Roma nísotíñú ráa nu̱u̱nꞌ‑ó, sáva saꞌá náaꞌ rá te̱e vá ya̱ tekaa ráa re̱ꞌ nu̱u̱nꞌ kurúsiꞌ kuviꞌ re̱ꞌ. 21Soo ni̱yo tu̱neí iniꞌ ránꞌ ya̱ suvire̱ꞌ vá nakani núne re̱ꞌ rá ñɨvɨ ñuunꞌ Israel nu̱u̱nꞌ xi̱ntíín Roma, nékúvi. Soo vitan jee jie̱ꞌe̱ꞌ nɨꞌɨ rá tiñu yaꞌá, jee ya̱ íyó u̱ni̱ꞌ ki̱vɨ̱ꞌ ya̱ nkuvi yaꞌá. 22Soo suni sava rá ñaꞌan ya̱ kútáꞌán nteñu ráníꞌ, xtívɨ́ ráña xi̱ni̱ꞌ ránꞌ sáá ña̱ꞌa̱nꞌ ráña neꞌenꞌ ki̱vɨ̱ꞌ vitan nu̱u̱nꞌ veꞌi ni̱yɨ nu̱u̱nꞌ nse̱ꞌí ñunéꞌyúꞌ Jesús. 23Jee sáá ntu nna̱niꞌinꞌ ráña ñunéꞌyúꞌ re̱ꞌ, jee nkikachiꞌ ráña ya̱ kájíkuitɨꞌ niniꞌ ráña rá najiáꞌáꞌ ííꞌ Ndiosíꞌ ya̱ nkachiꞌ ráa ya̱ tékúꞌ re̱ꞌ. 24Jee kuíre ña̱ne̱ꞌyá sava rá ñanitáꞌán ránꞌ nu̱u̱nꞌ nééꞌ veꞌi ni̱yɨ vá, jee nna̱niꞌinꞌ ráa ya̱ na̱a̱ꞌ nkuvi nijia sáni nna̱kani rá ñaꞌan, soo ntu niniꞌ ráa Jesús ―nkachiꞌ ni núvíꞌ rá te̱e kua̱ꞌa̱nꞌ ichi vá.

25Saájee nkachiꞌ Jesús nu̱u̱nꞌ ráa:

―¡Na̱ ka̱ꞌ te̱e naanꞌ!, ya̱ kuéé ínúꞌ iniꞌ ánímaꞌ rán ntáká rá tu̱ꞌun ya̱ nkachiꞌ rá te̱e ya̱ nna̱kani tu̱ꞌun kene yuꞌú Ndiosíꞌ. 26¿Á nsú saá íyó kunoꞌo Cristo ntáká rá tu̱nóꞌó yaꞌá, jee kuíre ki̱vɨ re̱ꞌ tiñu re̱ꞌ ya̱ viiꞌ nasɨ́kuitɨꞌ kúñáꞌnú re̱ꞌ nu̱u̱nꞌ nɨꞌɨ? ―nkachiꞌ Jesús.

27Saájee nka̱jiéꞌé Jesús ne̱ nu̱u̱nꞌ rá tu̱ꞌun ntee Moisés jín rá tu̱ꞌun ntee nɨꞌɨ rá te̱e ya̱ nna̱kani tu̱ꞌun nkene yuꞌú Ndiosíꞌ ne̱ yanaꞌán jee nna̱kachiꞌ va̱ꞌa re̱ꞌ rá tu̱ꞌun jie̱ꞌe̱ꞌ maáréꞌ ya̱ níso nu̱u̱nꞌ nɨꞌɨ Tutuꞌ Ííꞌ. 28Jee sáá kua̱kuyatin ráa nu̱u̱nꞌ ñuunꞌ nu̱u̱nꞌ kua̱ꞌa̱nꞌ ráa, jee nsa̱ꞌá Jesús nika̱ꞌ ya̱ kuéntáꞌ retánꞌ nku̱íká re̱ꞌ ka̱ꞌ kua̱ꞌa̱nꞌ re̱ꞌ. 29Jee nte̱tuvi ráa re̱ꞌ ya̱ kino̱o re̱ꞌ jín ráa, jee nkachiꞌ ráa nu̱u̱nꞌ re̱ꞌ:

―Kino̱o nú jín ránuꞌuꞌ yaꞌá, chi yánini, ya̱ kúnéñuꞌun ―nkachiꞌ ráa.

Saájee nki̱vɨ Jesús yukuán sáva nkino̱o re̱ꞌ jín ráa. 30Jee sáá ña̱kuneeꞌ re̱ꞌ yuꞌú mesa kuxíní re̱ꞌ jín ráa, jee nkeꞌen re̱ꞌ i̱xta̱tíláꞌ, jee njia̱ꞌa re̱ꞌ ya̱ kútaꞌviꞌ nu̱u̱nꞌ Ndiosíꞌ, jee ña̱ꞌnu̱ꞌ re̱ꞌ maa, jee sáá njia̱ꞌa re̱ꞌ maa nu̱u̱nꞌ ráa, 31jee nine nchinúún ráa jee nna̱kuniꞌ ráa re̱ꞌ, jee nno̱ñúꞌún re̱ꞌ nu̱u̱nꞌ ráa. 32Jee nkachiꞌ ɨɨn inka ráa:

―¿Á nsú ne̱ ánímaꞌ‑ó nkeꞌen‑e sáá káꞌánꞌ re̱ꞌ jín‑ó ni va̱ji‑ó ichi jín re̱ꞌ, sáá nákachiꞌ va̱ꞌa re̱ꞌ Tu̱ꞌun Ndiosíꞌ nu̱u̱nꞌ‑ó ya̱ níso nu̱u̱nꞌ Tutuꞌ Ííꞌ? ―nkachiꞌ ɨɨn inka ráa nu̱u̱nꞌ maáráa.

33Saájee ntañúꞌún kuitɨꞌ nna̱kuiñɨꞌ ráa máá hora yukuán, jee nni̱kó ráa nu̱u̱nꞌ ñuunꞌ Jerusalén. Jee nna̱niꞌinꞌ ráa ni ujíꞌ ɨɨn rá te̱e ya̱ nsu̱kuáꞌa Jesús ráa ya̱ íyó tútú ráa jín ka̱ꞌ rá táꞌán ráa ya̱ kútáꞌán jín ráa. 34Jee nkachiꞌ ráa ya̱:

―Máá nááꞌ nijia nxi̱nákóo Ndiosíꞌ I̱toꞌoꞌ‑ó nxi̱nátekuꞌ i̱i̱ꞌ nijia‑a maáréꞌ, jee ntu̱vi kájíkuitɨꞌ re̱ꞌ nu̱u̱nꞌ Simón ―nkachiꞌ ráa.

35Saájee nna̱kani rá ni uvíꞌ te̱e ná nkuvi sáá jíka ráa ichi jín na̱sa nna̱kuniꞌ ráa re̱ꞌ sáá ña̱ꞌnu̱ꞌ re̱ꞌ i̱xta̱tíláꞌ.

Nstúvi Jesús maáréꞌ nu̱u̱nꞌ rá te̱e nsu̱kuáꞌa re̱ꞌ ráa

(Mateo 28:16-20; Marcos 16:14-18; Juan 20:19-23)

36Jee ni káchíꞌ i̱i̱ꞌ ráa rá tu̱ꞌun yaꞌá, jee nkitu̱vi Jesús nna̱kui̱ñɨ̱ꞌ re̱ꞌ ma̱ꞌñú ráa, jee nkachiꞌ re̱ꞌ nu̱u̱nꞌ ráa:

―Va̱ne̱ꞌ va̱ꞌa kino̱o iniꞌ ánímaꞌ rán ―nkachiꞌ re̱ꞌ.

37Saájee, nsa̱ꞌvi iniꞌ ráa nyu̱ꞌví ráa, chi nkaꞌvi iniꞌ ráa ya̱ nne̱ꞌyá ráa ɨɨn íꞌná. 38Soo maáréꞌ nkachiꞌ nu̱u̱nꞌ ráa:

―¿Na̱ kuvi chi kúníní iniꞌ rán, jín ya̱ kénta nu̱u̱nꞌ ánímaꞌ rán ya̱ íyó tu̱ꞌun jiáni iniꞌ rán ntu ínúꞌ iniꞌ rán sukuán? 39Kune̱ꞌyá rán rá naꞌá ni̱ꞌ jín rá jie̱ꞌe̱ꞌ ni̱ꞌ, jee kuniꞌ rán ya̱ maáníꞌ kúvi nijia ni̱ꞌ. Sikáchiꞌi rán nuꞌuꞌ jee kuniꞌ rán, chi ɨɨn íꞌná jee ntu̱ví íyó yɨkɨkúñu‑u, kuéntáꞌ néꞌyá rán ya̱ íyó yɨkɨkúñu nuꞌuꞌ ―nkachiꞌ re̱ꞌ.

40Jee sáá nkachiꞌ re̱ꞌ rá tu̱ꞌun yaꞌá, jee nxi̱néꞌénꞌ re̱ꞌ rá naꞌá re̱ꞌ jín rá jie̱ꞌe̱ꞌ re̱ꞌ nu̱u̱nꞌ ráa. 41Soo ntiáꞌan i̱nu̱ꞌ iniꞌ ráa ya̱ néꞌyá ráa re̱ꞌ, jie̱ꞌe̱ꞌ ya̱ máá kúsɨ́ɨꞌ nasɨ́kuitɨꞌ iniꞌ ánímaꞌ ráa jín jie̱ꞌe̱ꞌ ya̱ máá tívɨ́ xá xíniꞌ ráa néꞌyá ráa re̱ꞌ, jee nkachiꞌ re̱ꞌ nu̱u̱nꞌ ráa:

―¿Á kúmí rán ná kúvi ya̱ íyó kajiꞌ‑ó yaꞌá? ―nkachiꞌ re̱ꞌ nu̱u̱nꞌ ráa.

42Saájee njia̱ꞌa ráa nu̱u̱nꞌ re̱ꞌ ɨɨn pedasúꞌ tia̱ká nkasun nu̱u̱nꞌ ñúꞌúnꞌ jín ɨɨn ñɨɨn yo̱ko̱ꞌ nu̱xi. 43Jee ntɨɨn re̱ꞌ maa jee nyajiꞌ re̱ꞌ maa ichinúúnꞌ ráa. 44Jee nkachiꞌ re̱ꞌ nu̱u̱nꞌ ráa:

―Rá tu̱ꞌun ni̱ꞌ yaꞌá ya̱ nkachiꞌ ni̱ꞌ nu̱u̱nꞌ rán ne̱ sáá nneeꞌ ni̱ꞌ jín rán ya̱ íyó sikúnkuvi ni̱ꞌ nta̱ká tu̱ꞌun ya̱ níso‑o nu̱u̱nꞌ Tutuꞌ Ndiosíꞌ ya̱ káꞌánꞌ jie̱ꞌe̱ꞌ nuꞌuꞌ ya̱ ntee Moisés jín ya̱ ntee rá te̱e ya̱ nnákani tu̱ꞌun nkene yuꞌú Ndiosíꞌ yanaꞌán jín rá tu̱ꞌun salmo ―nkachiꞌ re̱ꞌ nu̱u̱nꞌ ráa.

45Jee nsine re̱ꞌ antúníꞌ ráa sáva ki̱ku̱ꞌun iniꞌ ráa rá Tu̱ꞌun Ndiosíꞌ nééꞌ nu̱u̱nꞌ Tutuꞌ Ííꞌ. 46Jee nkachiꞌ re̱ꞌ nu̱u̱nꞌ ráa:

―Sukuán níso nu̱u̱nꞌ Tutuꞌ Ííꞌ ya̱ saá íyó kunoꞌo ni̱ꞌ ya̱ kúvi ni̱ꞌ Cristo, jee ki̱vɨ̱ꞌ uníꞌ ya̱ níꞌiꞌ ni̱ꞌ jee natekuꞌ i̱i̱ꞌ ni̱ꞌ nako̱o ni̱ꞌ kene ni̱ꞌ nteñu rá ni̱yɨ. 47Jee te̱ku̱tu̱ꞌún tu̱ꞌun ni̱ꞌ ya̱ nu̱u̱nꞌ nuꞌuꞌ váji ya̱ nakani iniꞌ ñɨvɨ jie̱ꞌe̱ꞌ kua̱chi ráa sáva kunekáꞌnú iniꞌ Ndiosíꞌ ráa jie̱ꞌe̱ꞌ kua̱chi ráa. Te̱ku̱tu̱ꞌún tu̱ꞌun ni̱ꞌ nu̱u̱nꞌ rá ñɨvɨ ntáká rá ñuunꞌ kua̱íyó ñɨ̱vɨ́ jee kajiéꞌé‑e ne̱ ñuunꞌ Jerusalén. 48Jee ránoꞌó kúvi ya̱ nááꞌ ya̱ nakani rá tu̱ꞌun jie̱ꞌe̱ꞌ nta̱ká ya̱ niniꞌ rán ya̱ nkuvi yaꞌá. 49Jee kune̱ꞌyá rán, chi nuꞌuꞌ chúichí ni̱ꞌ Ta̱chi̱ꞌ Ííꞌ kiji‑i nu̱u̱nꞌ rán sánikua̱ꞌ ya̱ nchi̱sóyuꞌú Tátáꞌ ni̱ꞌ. Soo kino̱o rán kunetu rán nu̱u̱nꞌ ñuunꞌ Jerusalén, nekuaꞌ ni̱ꞌi̱nꞌ rán fuersáꞌ ííꞌ Ndiosíꞌ ya̱ kiji ne̱ antivɨ́ súkún ―nkachiꞌ Jesús nu̱u̱nꞌ ráa.

Nnaa Jesús súkún

(Marcos 16:19-20; Hechos 1:9)

50Jee nkeꞌen Jesús ráa nkene re̱ꞌ jín ráa nu̱u̱nꞌ ñuunꞌ Jerusalén kua̱ꞌa̱nꞌ ráa ne̱ ñuunꞌ Betania. Jee sáá nkenta ráa yukuán, jee nkaneꞌen súkún Jesús rá naꞌá re̱ꞌ, jee ni̱ka̱nꞌ táꞌvíꞌ re̱ꞌ jie̱ꞌe̱ꞌ ráa nu̱u̱nꞌ Ndiosíꞌ sáva saꞌá‑a ya̱ váꞌa jín ráa. 51Jee suꞌva nkuvi ya̱ ni jíkánꞌ táꞌvíꞌ i̱i̱ꞌ ka̱ꞌ Jesús jie̱ꞌe̱ꞌ ráa, jee nxi̱nóo re̱ꞌ ráa jee nxi̱náa Ndiosíꞌ re̱ꞌ súkún. 52Jee maáráa chi, sáá nkuvi nneñu̱ꞌun ráa re̱ꞌ, jee nni̱kó ráa kua̱noꞌonꞌ ráa nu̱u̱nꞌ ñuunꞌ Jerusalén, jee kúsɨ́ɨꞌ nasɨ́kuitɨꞌ iniꞌ ánímaꞌ ráa. 53Jee sukuáni yɨ́táꞌán ni̱yo ráa iniꞌ veꞌi chíkéꞌi veñu̱ꞌun káꞌnú Jerusalén, jee nákuetúꞌún ráa Ndiosíꞌ ya̱ viiꞌ kúñáꞌnú nasɨ́kuitɨꞌ re̱ꞌ. Amén. Suꞌva koo.

Currently Selected:

Lucas 24: meh

Highlight

Copy