Mataayo 22
22
Ɨshifwani ɨsha bhaanwa abhɨ weeji
(Luuka 14:15-24)
1ɄYeesu ahabhamanyizya nantele aBhafalisaayo na bhalongozi bha bhasayi bha Ngʉlʉbhɨ hu vifwani ɨvyamwabho ahaga, 2“Ʉwumwɨnɨ ʉwa hu mwanya wulɨngaana nanshi ʉmwɨnɨ ʉmo ʉyo ahalɨngɨɨnye ʉweeji ʉwa mwana waakwe. 3Ʉmwɨnɨ ʉla ahabhasonteelezya abhabhomvi bhaakwe hubhakwizye ɨbho ahabhaanile huje bhɨnze hu weeji, leelo abheene bhahakhaana ahwɨnze.”
4Ɨpo ahabhasonteelezya nantele abhabhomvi abhanjɨ, ahabhabhʉʉzya ahaga, “Bhalaji mubhabhʉʉzye ɨbho nahabhaanile huje, ‘Ɨndɨngɨɨnye ɨvintu vyonti ɨvyɨ weeji. Ɨmboolile ɨhambakʉ zyanɨ zya zinonile peeka nɨ visuga ɨvyɨnjɨ vya vinonile. Ɨnzaji hu weeji!’ ” 5Leelo abheene saga bhahasaaga. Bhahabhalile hu mbombo zyabho, ʉmo ahabhalile hu nʼgʉnda gwakwe, ʉwamwabho abhombe ʉchuluuzi. 6Abhamwabho bhahabhakhata abhabhomvi bha mwɨnɨ bhaala, bhahabhakhoma tee na hubhagoje. 7Ʉmwɨnɨ lwa wʉmvwa ɨgo ga gabhombɨɨshe hwa bhabhomvi bhaakwe, ahaviitwa tee. Ahabhasonteelezya abhalwi bhaakwe huje bhabhale hubhagoje abhagoji bhaala na‑apembe ibooma lyabho. 8Ɨpo ʉmwɨnɨ ʉla ahabhabhʉʉzya abhabhomvi bhaakwe ahaga, “Ɨvintu ɨvyɨ weeji ɨndɨngɨɨnye, leelo bhaala bha nahabhaanile saga bhakhondɨɨye nantele ahwɨnze. 9Ɨshi leelo bhalaji mu madala amalehano, mubhabhʉʉzye bhonti ɨbho munza‑akhomaane nabho huje bhɨnze hu weeji.” 10Abhabhomvi bhaala bhahabhalile mu madala amalehano. Bhahɨnza na bhantu bhonti ɨbho bhahali bhakhomaana nabho, abhabhiibhi na bhinza. Ɨpo abhajenu bhahamemile mu nyumba ɨyɨ weeji.
11Leelo ʉmwɨnɨ ʉla lwa watʉʉha mu nyumba ɨla huje abhalole abhajenu, ahanʼnolile ʉmuntu ʉmo muula, ʉyo saga ahakwɨte ʉmwenda ʉgwɨ weeji. 12Ahamʼmʉzɨɨlɨzya ahaga, “Wee mʼmanyani, aawe ʉtʉʉshɨle wɨlɨ ʉmu lwa saga ʉkwɨte ʉmwenda ʉgwɨ weeji?” Leelo ʉmuntu ʉla ahapootwa ɨlya‑ayanje. 13Ɨpo ʉmwɨnɨ ʉla ahabhabhʉʉzya abhabhomvi bhaakwe ahaga, “Mʼpinye ʉmuntu ʉnʉ amanama nɨ nyoobhe na hunʼtaaje hwʉnzɨ ʉhwo huli ɨhiisi. Ʉhwo ahayililaga na‑azyeguzye amiino hu nongwa yɨ mavune amakhali.”
14Ɨpo ʉYeesu ahabhabhʉʉzya ahaga, “Ɨbho bhakwiziiwe nʉ Ngʉlʉbhɨ atʉʉshe mu wumwɨnɨ waakwe bhinji, leelo bha bhasaluliilwe bhali bhashe.”
Asombe ɨsonko hwa mwɨnɨ ʉnʼgoosi ʉKayisali
(Maalʉko 12:13-17; Luuka 20:20-26)
15Ɨpo aBhafalisaayo bhahasogola paala, bhahabhala ajeehane ɨsho bhanza hunʼjele ʉYeesu hu mazwi gaakwe. 16Ɨpo bhahabhasonteelezya hwa Yeesu abhasundwe bhaabho peeka na bhaavwi bha mwɨnɨ ʉHeloode, bhahabhala, bhahamʼmʉzɨɨlɨzya bhahaga, “Wee Mʼmanyizyi, timɨɨnye huje aawe ʉli wɨ lyoli, ʉmanyizya idala ɨlya Ngʉlʉbhɨ ɨlyɨ lyoli. Nantele, aawe saga ʉsaaga ʉgoosi wɨ mbombo ya muntu. 17Ɨshi tibhʉʉzye shʉ‑ʉlola. Wɨlɨ, ɨndajizyo zya Moose zihutɨtɨshɨla asombe ɨsonko hwa mwɨnɨ ʉnʼgoosi ʉKayisali#22:17 ʉKayisali Bhaazya izwi Kayisali hu Ngalulanyo ɨyɨ Mazwi aMajenu hu malishilo wɨ shitaabu ɨshi. awe tigandi asombe?”#22:17 ABhafalisaayo bhahasɨɨbhaga huje, bhanʼtejile ʉYeesu. Nkashele wayangaga huje, shinza asombe ɨsonko hwa mwɨnɨ ʉnʼgoosi ʉKayisali, wabhanga akhaanana nɨ ndajizyo zya Bhayahuudi zya zikhaana abhantu asombe ɨsonko hwa bhalʉgʉ. Lyɨlyo lyɨnzaga hubhabhɨɨshe aBhayahuudi abhinji bhaleshe humʼmɨnjɨɨlɨzye. Nkashele wayangaga huje, shibhiibhi asombe ɨsonko, abhantu bha bhahwɨtɨɨhana nɨ ndajizyo zya Bhaluumi, bhɨnzaga humʼmʉʉzye ʉnʼgoosi wa Bhaluumi huje, anʼkʉnje ʉYeesu mu hoobhe. 18Leelo ʉYeesu ahamɨɨnye ɨnsɨɨbho zyabho ɨmbiibhi, ahabhabhʉʉzya ahaga, “Amwɨ muli bhagulugulu, yeenu muhwanza hunjele? 19Ndolesyi ɨmpɨɨya ɨyo musomba ɨsonko.” Bhope bhahɨnza hwa mwene nɨ dinaali#22:19 Ɨdinaali yahali mpɨɨya ya Bhaluumi. Nantele ɨmpɨɨya ɨnɨ nyeene yahabhombehaga asombe ɨsonko hwa bheene. Ɨdinaali yeeka yahalɨngaanaga nʉ mʼposheelo ʉgwa humʼposheezye ʉmuntu hwi‑isiku lyeka. Enya Maalʉko 12:16, ɨshifwani ɨshɨ mpɨɨya ɨyɨ dinaali. ɨmo. 20Ɨpo ʉYeesu ahabhabhʉzɨɨlɨzya ahaga, “Sha naanu ɨsheeni ɨshi nɨ nsimbo ɨzi, ɨvyo vili pa mpɨɨya ɨnɨ?” 21Abheene bhahamʼmwamula bhahaga, “Vya mwɨnɨ ʉnʼgoosi ʉKayisali.” ɄYeesu ahabhabhʉʉzya ahaga, “Ɨshi mʼpeelaje ʉKayisali vya vili vya Kayisali nantele mʼpeelaje ʉNgʉlʉbhɨ vya vili vya Ngʉlʉbhɨ.” 22Hu habhaazyo lwa bhʉmvwa, bhahaswiga tee shiila ʉYeesu sha‑ahabhamuuye. Ɨpo bhahanʼneha papaala, bhahasogola.
Azyʉshe hwa bhafwe
(Maalʉko 12:18-27; Luuka 20:27-40)
23Pi‑isiku liliila, aBhasadukaayo bhamo bhahabhalile hwa Yeesu. Abheene bhahagaga nahumo azyʉshe hwa bhafwe. Ɨpo bhahamʼmʉzɨɨlɨzya ʉYeesu bhahaga, 24“Wee Mʼmanyizyi! Ʉnʼkuwi ʉMoose ahatilajiziizye huje, ‘Ʉmuntu nkashele waafwa na hunʼneshe ʉnʼshɨ waakwe sinta apaape ʉmwana, ʉholo waakwe anʼgaalaje ʉmʼfwɨle ʉla huje, amʼpaapile abhaana ʉholo waakwe wa‑ahafwiye.’#Bhaazya ɨNyiizuho 25:5-6. 25Ɨshi hwahali na bhalume pʉnga (7) bha bhahali bhanakwabho. Ʉwa hwande aheega ʉnʼshɨ, ahafwa sinta apaape ʉmwana. Ɨshi ʉmwanakwabho ʉwa bhɨɨlɨ ahanʼgaala ʉnʼshɨ ʉmʼfwɨle ʉla. 26Leelo wope ahafwa sinta apaape ʉmwana nka weeka. Ɨpo zyahabha shɨnɨɨsho hu wa taatu na hu bhonti pʉnga (7). 27Ɨpo hu malishilo, ʉnʼshɨ ʉmʼfwɨle ʉla wope ahafwa. 28Ɨshi tibhʉʉzye, isiku liila ɨlyo abhantu bhonti bhahayizyʉha, ʉnʼshɨ ʉyo ahayibha nʼshɨ wa naanu? Tibhʉzɨɨlɨzya ɨsho, pɨpo ahegwilwe na bhalume bhonti pʉnga (7)!” 29ɄYeesu ahabhaamula ahaga, “Amwɨ muteejile, pɨpo saga muzimɨɨnye ɨNsimbo ɨMfinjile, ni‑ikhone lya Ngʉlʉbhɨ lyope saga mulimɨɨnye lwonti. 30Ɨnjanjile ɨsho, pɨpo hu habhaazyo abhafwe lwa bhahayizyʉha, saga bhahayeega awe ahwegwe lwonti, lyoli bhahayibha nanshi abhantumi abha hu mwanya. 31Leelo hu nongwa ya‑azyʉshe hwa bhafwe, wɨlɨ, saga mubhaziizye mu Nsimbo ɨMfinjile ɨsho ʉNgʉlʉbhɨ ahabhabhʉzɨɨzye? Ahayanjile ahajile, 32‘Anɨ ɨndi Ngʉlʉbhɨ wa Abulahaamu, ʉwa Isaaka nʉ wa Yaakobo.’ ”#Bhaazya Afume 3:6. Hwi‑idala ɨlyo ʉYeesu ahabhabhʉʉzya nantele huje ʉNgʉlʉbhɨ saga Ngʉlʉbhɨ wa bhafwe, lyoli Ngʉlʉbhɨ wa bhantu bha bhali bhʉʉmi! 33Ɨmpʉga ɨya bhantu lwa bhʉmvwa ɨzyo, bhahaswiga tee hu manyizyo zyakwe.
Ɨndajizyo ɨngoosi ashile zyonti
(Maalʉko 12:28-34; Luuka 10:25-28)
34ABhafalisaayo lwa bhʉmvwa huje ʉYeesu abhamenile aBhasadukaayo hu njango, bhahabhʉngɨɨne peeka na‑abhale hwa Yeesu. 35Ʉmʼmanyizyi ʉmo ʉwɨ ndajizyo zya Moose mu Bhafalisaayo bhaala, ahalɨnga hunʼjele ʉYeesu, ahamʼmʉʉzya ahaga, 36“Wee Mʼmanyizyi, ndajizyo wɨlɨ ya yɨ‑ɨli ngoosi ashile ɨndajizyo ɨzyɨnjɨ zyonti ɨzya Ngʉlʉbhɨ?” 37ɄYeesu ahamʼmwamula ahaga, “Ʉnʼganaje ʉMwɨnɨ ʉNgʉlʉbhɨ, ʉNgʉlʉbhɨ waaho hu mwoyo gwaho gwonti, hu wʉʉmi waaho wonti na hu njeele zyaho zyonti.#Bhaazya ɨNyiizuho 6:5. 38Ɨndajizyo ɨnɨ yɨ ngoosi ashile ɨzyɨnjɨ zyonti, nantele yɨ ya hwande. 39Ɨndajizyo ɨya bhɨɨlɨ ɨlɨngaana nɨ ya hwande, yope ɨyiga, ‘Ʉnʼganaje ʉmʼpalamani waaho nanshi shʉ‑ʉhwigana aawe.’#Bhaazya ɨMbombo ɨzya Bhalaawi 19:18. 40Ɨndajizyo zyonti ɨzya Moose nɨ manyizyo ɨzya bhakuwi zisʉʉbhɨla ɨndajizyo ɨzyo zibhɨɨlɨ.”
Ibhʉzɨɨlɨzyo hu nongwa ya Kilisiti
(Maalʉko 12:35-37; Luuka 20:41-44)
41ABhafalisaayo bhaala lwa bhali sha bhabhʉngɨɨne peeka, ʉYeesu ahabhabhʉzɨɨlɨzya ahaga, 42“Musɨɨbha wɨlɨ hu nongwa ya Kilisiti wa‑ali Mʼfyʉli? Wɨlɨ, mwana wa naanu?” Bhahamʼmwamula bhahaga, “Mwana wa mwɨnɨ ʉDaudi.” 43ɄYeesu ahabhabhʉzɨɨlɨzya ahaga, “Nkashele ɨgo gɨ lyoli, hu nongwa wɨlɨ ʉDaudi lwa‑alongozewa nʉ Mʼpepo ʉMʼfinjile, ahunʼkwizya ʉKilisiti, Mwɨnɨ? Ɨnjanjile ɨsho pɨpo ʉDaudi ahayanjile huje,
44ɄMwɨnɨ ʉNgʉlʉbhɨ ahamʼmʉzɨɨzye ʉMwɨnɨ waanɨ,#22:44 ʉMwɨnɨ waanɨ Ɨpa ɨbhonesya ʉYeesu ʉKilisiti. ahaga,
‘Khala peeka naanɨ,#22:44 Khala peeka naanɨ Mu njango ɨyɨ Shiyunaani ɨsimbwilwe huje, Khala hu nʼkhono gwanɨ ʉgwa hu lɨɨlo. Hwa Bhayahuudi akhale hu nʼkhono ʉgwa hu lɨɨlo hubhonesya ɨnshɨnshɨ ni‑ikhone ɨlyɨ longozi.
afishe ɨhwavwe hubhatole abhalʉgʉ bhaaho na hubhatabhaale.’#Bhaazya ɨNsalifyo 110:1. #22:44 afishe ɨhwavwe hubhatole abhalʉgʉ bhaaho na hubhatabhaale Mu njango ɨyɨ Shiyunaani ɨsimbwilwe huje, afishe ɨmbabhɨɨshe abhalʉgʉ bhaaho pa nsi yɨ manama gaaho.
45Nkashele ʉDaudi ahunʼtaha ʉKilisiti huje yʉ Mwɨnɨ waakwe, ɨshi ʉKilisiti agabha wɨlɨ mwana waakwe?” 46Nʉʉmo ʉmuntu wa‑ahalɨnjɨle ahumʼmwamule ʉYeesu izwi. Nantele, afume isiku ɨlyo nʉʉmo wa‑ahalɨnjɨle humʼmʉzɨɨlɨzye ibhʉzɨɨlɨzyo nantele.
Currently Selected:
Mataayo 22: SBK
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
Mataayo 22
22
Ɨshifwani ɨsha bhaanwa abhɨ weeji
(Luuka 14:15-24)
1ɄYeesu ahabhamanyizya nantele aBhafalisaayo na bhalongozi bha bhasayi bha Ngʉlʉbhɨ hu vifwani ɨvyamwabho ahaga, 2“Ʉwumwɨnɨ ʉwa hu mwanya wulɨngaana nanshi ʉmwɨnɨ ʉmo ʉyo ahalɨngɨɨnye ʉweeji ʉwa mwana waakwe. 3Ʉmwɨnɨ ʉla ahabhasonteelezya abhabhomvi bhaakwe hubhakwizye ɨbho ahabhaanile huje bhɨnze hu weeji, leelo abheene bhahakhaana ahwɨnze.”
4Ɨpo ahabhasonteelezya nantele abhabhomvi abhanjɨ, ahabhabhʉʉzya ahaga, “Bhalaji mubhabhʉʉzye ɨbho nahabhaanile huje, ‘Ɨndɨngɨɨnye ɨvintu vyonti ɨvyɨ weeji. Ɨmboolile ɨhambakʉ zyanɨ zya zinonile peeka nɨ visuga ɨvyɨnjɨ vya vinonile. Ɨnzaji hu weeji!’ ” 5Leelo abheene saga bhahasaaga. Bhahabhalile hu mbombo zyabho, ʉmo ahabhalile hu nʼgʉnda gwakwe, ʉwamwabho abhombe ʉchuluuzi. 6Abhamwabho bhahabhakhata abhabhomvi bha mwɨnɨ bhaala, bhahabhakhoma tee na hubhagoje. 7Ʉmwɨnɨ lwa wʉmvwa ɨgo ga gabhombɨɨshe hwa bhabhomvi bhaakwe, ahaviitwa tee. Ahabhasonteelezya abhalwi bhaakwe huje bhabhale hubhagoje abhagoji bhaala na‑apembe ibooma lyabho. 8Ɨpo ʉmwɨnɨ ʉla ahabhabhʉʉzya abhabhomvi bhaakwe ahaga, “Ɨvintu ɨvyɨ weeji ɨndɨngɨɨnye, leelo bhaala bha nahabhaanile saga bhakhondɨɨye nantele ahwɨnze. 9Ɨshi leelo bhalaji mu madala amalehano, mubhabhʉʉzye bhonti ɨbho munza‑akhomaane nabho huje bhɨnze hu weeji.” 10Abhabhomvi bhaala bhahabhalile mu madala amalehano. Bhahɨnza na bhantu bhonti ɨbho bhahali bhakhomaana nabho, abhabhiibhi na bhinza. Ɨpo abhajenu bhahamemile mu nyumba ɨyɨ weeji.
11Leelo ʉmwɨnɨ ʉla lwa watʉʉha mu nyumba ɨla huje abhalole abhajenu, ahanʼnolile ʉmuntu ʉmo muula, ʉyo saga ahakwɨte ʉmwenda ʉgwɨ weeji. 12Ahamʼmʉzɨɨlɨzya ahaga, “Wee mʼmanyani, aawe ʉtʉʉshɨle wɨlɨ ʉmu lwa saga ʉkwɨte ʉmwenda ʉgwɨ weeji?” Leelo ʉmuntu ʉla ahapootwa ɨlya‑ayanje. 13Ɨpo ʉmwɨnɨ ʉla ahabhabhʉʉzya abhabhomvi bhaakwe ahaga, “Mʼpinye ʉmuntu ʉnʉ amanama nɨ nyoobhe na hunʼtaaje hwʉnzɨ ʉhwo huli ɨhiisi. Ʉhwo ahayililaga na‑azyeguzye amiino hu nongwa yɨ mavune amakhali.”
14Ɨpo ʉYeesu ahabhabhʉʉzya ahaga, “Ɨbho bhakwiziiwe nʉ Ngʉlʉbhɨ atʉʉshe mu wumwɨnɨ waakwe bhinji, leelo bha bhasaluliilwe bhali bhashe.”
Asombe ɨsonko hwa mwɨnɨ ʉnʼgoosi ʉKayisali
(Maalʉko 12:13-17; Luuka 20:20-26)
15Ɨpo aBhafalisaayo bhahasogola paala, bhahabhala ajeehane ɨsho bhanza hunʼjele ʉYeesu hu mazwi gaakwe. 16Ɨpo bhahabhasonteelezya hwa Yeesu abhasundwe bhaabho peeka na bhaavwi bha mwɨnɨ ʉHeloode, bhahabhala, bhahamʼmʉzɨɨlɨzya bhahaga, “Wee Mʼmanyizyi, timɨɨnye huje aawe ʉli wɨ lyoli, ʉmanyizya idala ɨlya Ngʉlʉbhɨ ɨlyɨ lyoli. Nantele, aawe saga ʉsaaga ʉgoosi wɨ mbombo ya muntu. 17Ɨshi tibhʉʉzye shʉ‑ʉlola. Wɨlɨ, ɨndajizyo zya Moose zihutɨtɨshɨla asombe ɨsonko hwa mwɨnɨ ʉnʼgoosi ʉKayisali#22:17 ʉKayisali Bhaazya izwi Kayisali hu Ngalulanyo ɨyɨ Mazwi aMajenu hu malishilo wɨ shitaabu ɨshi. awe tigandi asombe?”#22:17 ABhafalisaayo bhahasɨɨbhaga huje, bhanʼtejile ʉYeesu. Nkashele wayangaga huje, shinza asombe ɨsonko hwa mwɨnɨ ʉnʼgoosi ʉKayisali, wabhanga akhaanana nɨ ndajizyo zya Bhayahuudi zya zikhaana abhantu asombe ɨsonko hwa bhalʉgʉ. Lyɨlyo lyɨnzaga hubhabhɨɨshe aBhayahuudi abhinji bhaleshe humʼmɨnjɨɨlɨzye. Nkashele wayangaga huje, shibhiibhi asombe ɨsonko, abhantu bha bhahwɨtɨɨhana nɨ ndajizyo zya Bhaluumi, bhɨnzaga humʼmʉʉzye ʉnʼgoosi wa Bhaluumi huje, anʼkʉnje ʉYeesu mu hoobhe. 18Leelo ʉYeesu ahamɨɨnye ɨnsɨɨbho zyabho ɨmbiibhi, ahabhabhʉʉzya ahaga, “Amwɨ muli bhagulugulu, yeenu muhwanza hunjele? 19Ndolesyi ɨmpɨɨya ɨyo musomba ɨsonko.” Bhope bhahɨnza hwa mwene nɨ dinaali#22:19 Ɨdinaali yahali mpɨɨya ya Bhaluumi. Nantele ɨmpɨɨya ɨnɨ nyeene yahabhombehaga asombe ɨsonko hwa bheene. Ɨdinaali yeeka yahalɨngaanaga nʉ mʼposheelo ʉgwa humʼposheezye ʉmuntu hwi‑isiku lyeka. Enya Maalʉko 12:16, ɨshifwani ɨshɨ mpɨɨya ɨyɨ dinaali. ɨmo. 20Ɨpo ʉYeesu ahabhabhʉzɨɨlɨzya ahaga, “Sha naanu ɨsheeni ɨshi nɨ nsimbo ɨzi, ɨvyo vili pa mpɨɨya ɨnɨ?” 21Abheene bhahamʼmwamula bhahaga, “Vya mwɨnɨ ʉnʼgoosi ʉKayisali.” ɄYeesu ahabhabhʉʉzya ahaga, “Ɨshi mʼpeelaje ʉKayisali vya vili vya Kayisali nantele mʼpeelaje ʉNgʉlʉbhɨ vya vili vya Ngʉlʉbhɨ.” 22Hu habhaazyo lwa bhʉmvwa, bhahaswiga tee shiila ʉYeesu sha‑ahabhamuuye. Ɨpo bhahanʼneha papaala, bhahasogola.
Azyʉshe hwa bhafwe
(Maalʉko 12:18-27; Luuka 20:27-40)
23Pi‑isiku liliila, aBhasadukaayo bhamo bhahabhalile hwa Yeesu. Abheene bhahagaga nahumo azyʉshe hwa bhafwe. Ɨpo bhahamʼmʉzɨɨlɨzya ʉYeesu bhahaga, 24“Wee Mʼmanyizyi! Ʉnʼkuwi ʉMoose ahatilajiziizye huje, ‘Ʉmuntu nkashele waafwa na hunʼneshe ʉnʼshɨ waakwe sinta apaape ʉmwana, ʉholo waakwe anʼgaalaje ʉmʼfwɨle ʉla huje, amʼpaapile abhaana ʉholo waakwe wa‑ahafwiye.’#Bhaazya ɨNyiizuho 25:5-6. 25Ɨshi hwahali na bhalume pʉnga (7) bha bhahali bhanakwabho. Ʉwa hwande aheega ʉnʼshɨ, ahafwa sinta apaape ʉmwana. Ɨshi ʉmwanakwabho ʉwa bhɨɨlɨ ahanʼgaala ʉnʼshɨ ʉmʼfwɨle ʉla. 26Leelo wope ahafwa sinta apaape ʉmwana nka weeka. Ɨpo zyahabha shɨnɨɨsho hu wa taatu na hu bhonti pʉnga (7). 27Ɨpo hu malishilo, ʉnʼshɨ ʉmʼfwɨle ʉla wope ahafwa. 28Ɨshi tibhʉʉzye, isiku liila ɨlyo abhantu bhonti bhahayizyʉha, ʉnʼshɨ ʉyo ahayibha nʼshɨ wa naanu? Tibhʉzɨɨlɨzya ɨsho, pɨpo ahegwilwe na bhalume bhonti pʉnga (7)!” 29ɄYeesu ahabhaamula ahaga, “Amwɨ muteejile, pɨpo saga muzimɨɨnye ɨNsimbo ɨMfinjile, ni‑ikhone lya Ngʉlʉbhɨ lyope saga mulimɨɨnye lwonti. 30Ɨnjanjile ɨsho, pɨpo hu habhaazyo abhafwe lwa bhahayizyʉha, saga bhahayeega awe ahwegwe lwonti, lyoli bhahayibha nanshi abhantumi abha hu mwanya. 31Leelo hu nongwa ya‑azyʉshe hwa bhafwe, wɨlɨ, saga mubhaziizye mu Nsimbo ɨMfinjile ɨsho ʉNgʉlʉbhɨ ahabhabhʉzɨɨzye? Ahayanjile ahajile, 32‘Anɨ ɨndi Ngʉlʉbhɨ wa Abulahaamu, ʉwa Isaaka nʉ wa Yaakobo.’ ”#Bhaazya Afume 3:6. Hwi‑idala ɨlyo ʉYeesu ahabhabhʉʉzya nantele huje ʉNgʉlʉbhɨ saga Ngʉlʉbhɨ wa bhafwe, lyoli Ngʉlʉbhɨ wa bhantu bha bhali bhʉʉmi! 33Ɨmpʉga ɨya bhantu lwa bhʉmvwa ɨzyo, bhahaswiga tee hu manyizyo zyakwe.
Ɨndajizyo ɨngoosi ashile zyonti
(Maalʉko 12:28-34; Luuka 10:25-28)
34ABhafalisaayo lwa bhʉmvwa huje ʉYeesu abhamenile aBhasadukaayo hu njango, bhahabhʉngɨɨne peeka na‑abhale hwa Yeesu. 35Ʉmʼmanyizyi ʉmo ʉwɨ ndajizyo zya Moose mu Bhafalisaayo bhaala, ahalɨnga hunʼjele ʉYeesu, ahamʼmʉʉzya ahaga, 36“Wee Mʼmanyizyi, ndajizyo wɨlɨ ya yɨ‑ɨli ngoosi ashile ɨndajizyo ɨzyɨnjɨ zyonti ɨzya Ngʉlʉbhɨ?” 37ɄYeesu ahamʼmwamula ahaga, “Ʉnʼganaje ʉMwɨnɨ ʉNgʉlʉbhɨ, ʉNgʉlʉbhɨ waaho hu mwoyo gwaho gwonti, hu wʉʉmi waaho wonti na hu njeele zyaho zyonti.#Bhaazya ɨNyiizuho 6:5. 38Ɨndajizyo ɨnɨ yɨ ngoosi ashile ɨzyɨnjɨ zyonti, nantele yɨ ya hwande. 39Ɨndajizyo ɨya bhɨɨlɨ ɨlɨngaana nɨ ya hwande, yope ɨyiga, ‘Ʉnʼganaje ʉmʼpalamani waaho nanshi shʉ‑ʉhwigana aawe.’#Bhaazya ɨMbombo ɨzya Bhalaawi 19:18. 40Ɨndajizyo zyonti ɨzya Moose nɨ manyizyo ɨzya bhakuwi zisʉʉbhɨla ɨndajizyo ɨzyo zibhɨɨlɨ.”
Ibhʉzɨɨlɨzyo hu nongwa ya Kilisiti
(Maalʉko 12:35-37; Luuka 20:41-44)
41ABhafalisaayo bhaala lwa bhali sha bhabhʉngɨɨne peeka, ʉYeesu ahabhabhʉzɨɨlɨzya ahaga, 42“Musɨɨbha wɨlɨ hu nongwa ya Kilisiti wa‑ali Mʼfyʉli? Wɨlɨ, mwana wa naanu?” Bhahamʼmwamula bhahaga, “Mwana wa mwɨnɨ ʉDaudi.” 43ɄYeesu ahabhabhʉzɨɨlɨzya ahaga, “Nkashele ɨgo gɨ lyoli, hu nongwa wɨlɨ ʉDaudi lwa‑alongozewa nʉ Mʼpepo ʉMʼfinjile, ahunʼkwizya ʉKilisiti, Mwɨnɨ? Ɨnjanjile ɨsho pɨpo ʉDaudi ahayanjile huje,
44ɄMwɨnɨ ʉNgʉlʉbhɨ ahamʼmʉzɨɨzye ʉMwɨnɨ waanɨ,#22:44 ʉMwɨnɨ waanɨ Ɨpa ɨbhonesya ʉYeesu ʉKilisiti. ahaga,
‘Khala peeka naanɨ,#22:44 Khala peeka naanɨ Mu njango ɨyɨ Shiyunaani ɨsimbwilwe huje, Khala hu nʼkhono gwanɨ ʉgwa hu lɨɨlo. Hwa Bhayahuudi akhale hu nʼkhono ʉgwa hu lɨɨlo hubhonesya ɨnshɨnshɨ ni‑ikhone ɨlyɨ longozi.
afishe ɨhwavwe hubhatole abhalʉgʉ bhaaho na hubhatabhaale.’#Bhaazya ɨNsalifyo 110:1. #22:44 afishe ɨhwavwe hubhatole abhalʉgʉ bhaaho na hubhatabhaale Mu njango ɨyɨ Shiyunaani ɨsimbwilwe huje, afishe ɨmbabhɨɨshe abhalʉgʉ bhaaho pa nsi yɨ manama gaaho.
45Nkashele ʉDaudi ahunʼtaha ʉKilisiti huje yʉ Mwɨnɨ waakwe, ɨshi ʉKilisiti agabha wɨlɨ mwana waakwe?” 46Nʉʉmo ʉmuntu wa‑ahalɨnjɨle ahumʼmwamule ʉYeesu izwi. Nantele, afume isiku ɨlyo nʉʉmo wa‑ahalɨnjɨle humʼmʉzɨɨlɨzye ibhʉzɨɨlɨzyo nantele.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.