Luk 14
14
Zɛzi ayonjɛ moto wa nyo yahusasa na embanganya
1O buya bwa Saba, Zɛzi akweya o Elongwɛ ya nɛni mwa bafalizɛ, ijaka maja. Bato bajasa okate, bajakasa obosɔzɛcɛ ango. 2Okate, yajasa na moto o boho bweji, wa nyo yahusasa na embanganya. 3Usɛ, Zɛzi ahimwa na melɔnji mwa nceko mwa Zambe, na Bafalizɛ te: «O buya bwa iyɔkɔ ja ba-Zufi, yabe eciya, kate take eciya ihakaka moto we?» 4Nde, bango teka kasa neji. Ya, Zɛzi akalwana bya mbɛlu mwaji, ya ango yonjɛ ango, na isɔhɔ neji te: «Lwaka bya itona jɔbɛ.» 5O nyate mɛnɛ, Zɛzi asɔhɔ na melɔnji mwa ceko mwa Zambe, na bafalizɛ te: «O buya bwa Saba, wɛnɛ moto, o panga bihi, aje na mwana, ice na nyate, atuwa o itɛkɔ ja bodɔngɔ, mwaji pojɛ ango osatɛ?» 6Bajasa teka na ekana ya bango behujɛcɛ ango na iyɔkɔ jɛ.
Ibɔnɔkɔ masi o belɛsi
7Zɛzi ayembya te bacɛyi, bangubɔnɔkɔ masi maboho. Yango awɛ bango lembya mwa te: 8«Usya babanga ɔbɛ o elɛsi ya boba, teka cihula o masi maboho. Na bosina te, ya tokoja na iwate moto ayeka ɔbɛ wa bamubanga. 9Ete moto amubanga bihi baba, aya isɔhɔkɔ na nɔbɛ te: “Wɛcɛ ango isi ɔbɛ.” Okate, yebekaka ɔbɛ hɔyi, ilwaka ihulaka bya mbiya. 10Usya babanga ɔbɛ o elɛsi ya boba, kwaka bohoboho masi ma mbiya. Na bosina te usya moto amubanga ɔbɛ eyaka, esɔhɔkɔ na nɔbɛ te: “Mwanyangwɛ amɛ eya akwace isi ya bya boho.” Yebekaka ɔbɛ kuma o boho bwa ba bina bango baji menhisi. 11Yebaka te, usya obeta, behulɛcɛ ɔbɛ, usya ohula bebesɛcɛ ɔbɛ.»
Zɛzi awɛ iheya ja ibangaka mentende
12O nyate mɛnɛ, Zɛzi asɔhɔ na abangasa ango te: «Usya obekaka maja ma elɛsi na ekombe, ice na ikɔ, tekaci banga bohoboho bananyangwɛ, ba bina ango bayenga mwɛnyi, buka bwɔbɛ, na mekumani mya bina bango baji. Na bosina te, ya ango ekusi na bango bebangaka ɔbɛ, ihujɛcɛ ɔbɛ emba yomubeka bango. 13Nde, usya beka elɛsi ya inɛnɛ, bangaka mentende, bekata, baji na makɔhɔ, na baji na njimi. 14Usɛ, ojaka o mana, na bosina te, bango teka sinihujɛ ɔbɛ. Nde Zambe ehujɛcɛ ɔbɛ, buya bwa ango eyomwɛcɛ bato ba hongololo o malonga.»
Lembya mwa mencɛyi o elɛsi ya inɛnɛ
15Usya bango bayokasa iyɔkɔ jɛ, iwate ajasa obojaka maja bango ango asɔhɔ neji te: «Ejaka o mana moto ejakasa maja o Etomba ya Zambe!» 16Zɛzi ahungwɛ na bango na lembya te: «Moto abekasa elɛsi ya inɛnɛ, abanga bato buce amɛnɛ. 17Elɔmɔ ya ijaka yakoka, aloma njazi ilwaka ibangaka bacɛyi te: “Yakayi, maja majetɛ su osatɛ!” 18Nde, mencɛyi myahimwa bango etɛ mɛnɛ ɛkɔ. Ya wa boho asɔhɔkɔ na njazi mwɛ te: “Mehomba kuba, malwe te itaka yango, yɛnɛcɛ imɛ cɛyi.” 19Ya iwate ahimwa ango te: “Mehomba banyate jonwu malwe te inyekaka bango, yɛnɛcɛ imɛ cɛyi.” 20Ya iwate ahuwana bosɔhɔkɔ na neji te: “Mamubeka boba osatɛ, bosina mɛnɛ bwamejaka teka ya.” 21Ya njazi mwahuwana bya Ku eji aji, na itandaka ango mayɔkɔ mɛ, mahajɛ. Ya Ku wa Elongwɛ anganya, na isɔhɔkɔ na njazi mweji te: “Lwaka kwakwa o mehɛnjɛ myahajɛ na o menjɔnwu myeposi, yaka mɛ na mentende, na bekata, na baji na njimi, na baji na makɔhɔ.” 22Mwa elɔmɔ te ayeka, ya njazi mwaya itandaka ango te: “Ku Bɛhɛ bebeka emba yomuloma, nde Elongwɛ yaneci na masi.” 23Ku eji ahunwana bosɔhɔkɔ na njazi mwɛ te: “Lwaka o menjɔnwu na o makuba, byetakanaka na bango, kangamaka na bango te bakweyace o Elongwɛ amɛ, usɛ, Elongwɛ amɛ yejaka humɔn. 24Okate, matanda ɔbɛ emba ɛkɔ, opanga mencɛyi mya bohoboho, teka moto emekaka maja mamɛ.”»
Maheya ma ihinjɛcɛ Zɛzi
25Ibwate buya, bato buce bajasa bojongaka o lɔnjɛ bango na Zɛzi. Ya ango akalwana bya bango baji na isɔhɔkɔ te: 26«Moto ahinjɛ imɛ, ango anɔnɔ imɛ buce, ayeka enɔne ya ango anɔnɔ, hangwɛ, nyangwɛ, mwaji, bana beji, ndomi, bakaji, na ndonga eji amɛnɛ. Wa teka beka nɛ, mwaji ja yokwɛ amɛ. 27Moto wa teka bɛpɛ kuluwa eji, ihinjɛcɛ imɛ, mwa kusija yokwɛ amɛ. 28Opanga bihi, wɛnɛ moto ahaka ilongaka Elongwɛ, mwahule bohoboho hinsi, itemangaka, na ilangaka nyoko balɔlɔ mwangwe nyenisojɛ ihijɛcɛ Elongwɛ? 29Bosina te, usya ya ango ekomaka ipundaka mabenga ma Elongwɛ, bato bamuyɛnɛ ango, nda ango amukoma ihumaka Elongwɛ batokojokwɛ ango, bosina bwa ango amuja teka hijɛ Elongwɛ. 30Na isɔhɔkɔ te: “Moto tɛ, ekoma ihumaka Elongwɛ obwɛji, nde teka hijɛ!” 31Yaje nda, usya nkani mwahaka ilwaka ikumɛcɛ imwate nkani ubaji, akoma bohoboho ihulaka hinsi, itemangaka te: “Maje tɛ na bahɔlɛ basini memboto memba. Usɛ, imɛ nyenilwa itakanaka na moto aya ikumɛcɛ imɛ ubaji, na bahɔlɛ memboto menanyin?” 32Wɛnɛ ango, teka nyenikoka, elomaka batɔtu bya munɛ nkani mwaji, usya ya ango aneci bopama, na ihimwaka onɛ te, bango neji bejaka na itabu.» 33Ya Zɛzi alukwa te: «Nde, opanga bihi, wɛnɛ moto teka jika bemba bya ango aji na byango byahajɛ, moto wɛ, mwajija yokwɛ amɛ.»
Macemba aje emba ya mbɛ
34«Hi, macemba aje emba ya mbɛ. Nde, usya ilɔyi jamanya, minehujɛcɛ jango na? 35Usya, macemba mehemana, majija minɛ bɔnhu na hehe, na ibeka, befaka mango o hɛnjɛ. Aji na malɔ ma iyokaka, ayokace!»
Currently Selected:
Luk 14: KOQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
