Luk 17
17
Yɛnɛcɛ mwana wa nyɔngwɛ cɛyi
1Ya Zɛzi asɔhɔ na bayokwɛ te: «Mombo yejakasa na bemba bye bekaka te bato bapamace na Zambe. Nde emba ya bohihi na moto ehunaka yango! 2Ya nyɛ bakota ango imanya ja inɛnɛ buce o cingo, ete bafa ango o zowa ya macemba, bosina te atokohizɛ mwamusiki opanga bana batɛ ipamaka na Zambe. 3Dzaka na bocɛngu bihi mɛnɛ.
Wɛnɛ mwa nyangwɛ ɔbɛ, abeka sɛmbɛ, bekaka ango masicɛ, wɛnɛ ayɛbɛ emba ya ango amubeka, yɛnɛcɛ ango cɛyi. 4Nde, wɛnɛ abeka sɛmbɛ na nɔbɛ bekusi nanyin na hanto o buya bɔkɔ, aya isɔhɔkɔ na nɔbɛ te: “Meyɛbɛ emba ya bobe yama beka nɔbɛ”, oyɛnɛkɛsɛ ango cɛyi.»
Ibukwɛ
5Batɔtu basɔhɔ na Ku te: «Nɛnɛcɛ ibukwɛ jaho.» 6Ya Ku ahungwɛ te: «Wɛnɛ byaje na ibukwɛ ja inɛnɛ nda ombolo bwa mwele mwa ba banga te mutadi, bya nyeni sɔhɔ na mwele mwa hɔmbɛ te: “Huwanaka lwaka ohumamaka o lebelebe ya zowa ya macemba”, okate mwabi siswaka bihi.»
Ehaji ya njazi
7«Wɛnɛ o panga bihi, yaje na moto aji na njazi, mwa jaza ango makuba na ikɔlɔkɔ bebɔlu. Usya ango ayɛnɛ ango alumya na kuba, anyeni sɔhɔ neji te: “Yaka kwakwa hulaka hinsi mina jace!” 8Hamama, esɔhɔkɔ na neji te: “lwaka ojɛlɛ mekanda, ete o ya iwɛcɛ imɛ maja, usya mehijɛcɛ bojaka, na iwanka, ete na nɔbɛ okucɛ na ijaka.” 9Okate, anyeniwɛ njazi imweji mambomala, na bosina bwa ango amubeka emba ya bamuloma ango ibekaka? 10Yaje nda bihi, usya bye bekaka bemba byahajɛ bya Zambe elomaka bihi, sɔhɔkɔ te: “Bɛhɛ bajetɛ bembenɛ bya menjazi, bɛhɛ bamubeke tɛ iyaho ehaji.”»
Zɛzi ahaka bato jonwu ba bejima
11Usya Zɛzi alwakasa bya Zɛlizalami, ayekanakasa o panga elena ya Samali na Ngalile. 12Ya ango akweyasa o mboka, ya bato ba bejima ba ya itakaka na neji. Nde, batɛmɛkɛsɛ bopama na neji, 13ya bango bahula opatangaka te: «Zɛzi, Lɔnji, yɛnɛcɛ bɛhɛ cɛyi!» 14Ya Zɛzi ayɛnɛ bango, ya ango asɔhɔ na bango te: «Lwaka bawe ba bebuwa batace bihi.» Usya bango ba lwakasa, ya bejima bya kungwa bango o manyo. 15Iwate o panga ango, usya ango ayɛnɛsɛ te eyonga, ya ango ahuwana bya mbiya, alwa kumɛ Zambe na ekɔlu ya tuma. 16Ya ango huma mabɔngɔ, boho na hehe, na iwɛcɛ Zɛzi mambomala. Yajasa, moto wa Samali. 17Zɛzi te asɔhɔ na bango ango bajasa te: «Dzonwu jahajɛ ja ta kungwana na bango? Nde munɛ tanyin na nanyi mwabe biya? 18Nde, teka na moto amulumya iwɛcɛ Zambe kuma, ka cɛyi mutɛ okayi?» 19Onyate mɛnɛ, ya Zɛzi asɔhɔ na neji te: «Yemwaka lwaka, ibukwɛ jɔbɛ jehaka ɔbɛ.»
Elɔmɔ ya Zambe ekɔkɛcɛ bato ya ango ya
20Ya bafalizɛ bahimwa Zɛzi te: «Zambe eyaka ikɔkɛcɛ bato sondi ya?» Ya ango ahungwɛ na bango te: «Zambe mwajiya ikɔkɛcɛ bato nda eyaya ya bye yɛnɛcɛ. 21Baji tanda te: “Taka, angutɛ usatɛ,” ice “Angwɛ biyenɛ.” Nde, yebakayi te, Zambe ajetɛ, obokɔkɛcɛ o panga bihi.» 22Ya ango asɔhɔ na bayokwɛ beji te: «O minyan maya mɛ, byajipena ihingamaka iyɛnɛcɛ Mwana moto, jaka na buya bɔkɔ, nde byaji yɛnɛ ango.
23Usɛ, betandaka bihi te: “Taka ango, ice: ajetɛ usatɛ.” Nde, byako lwace bimɛnɛ, byako sukwace bimɛnɛ. 24Nda moji mwayɛlima o iko, ibujɛkɔ imanyaka butɛ boluma na ilwaka bunɛ boluma, yejaka nda buya bwa Mwana moto eyaka. 25Nde, yanyɛ ayɛnɛ boho mezuku buce, na ba mwanga mutɛ ibenaka ango.
26Bosina te, ya yekanasa o sondi ya Nowe, ye yekanakasa etɛ mɛnɛ ɛkɔ o minya ma Mwana moto elumyakasa. 27Bato bajakasa maja, na iwanka, na ibanaka, na iwɛcɛ o moba bana bango, ngu na buya bwa Nowe akweyasa o ebakabaka ya embongo yaji nda Elongwɛ, ya tonda yaya, na ilozɛcɛ bango bahajɛ, na bango iwaka. 28Ye jakasa nda sondi ya Lɔthi, bato bajakasa maja, na iwanka, na ibekaka mombongo na ihombakasa, na ikonakasa, na ilongakasa belongwɛ, 29Nde, o buya bwa Lɔthi amanyasa Sɔdɔmi, Zambe anɔjɛ mbuwa wa weya, na mamanya ma weya, ayenga biko na ibomaka bahajɛ. 30Ye yekanakasa etɛ mɛnɛ ɛkɔ, o buya bwa Mwana moto ehɛlɛkɛsɛ nyo.
31O buya bwɛ, ejakasa ukwa mwaza na bemba o katɔ ya Elongwɛ, mwaji makasa kweya ikwaka byango, na aji bya kuba, mwaji makasa hunwana bya Elongwɛ eji. 32Yebwakayi emba ya yekanasa na mwaji wa Lɔthi. 33Moto ahaka iyonjɛcɛ ndonga eji, abilapɛcɛ yango, nde, elapɛcɛ ndonga eji, abikɔlɔkɔ yango. 34Okate, matanda bihi te, o pundu mɛnɛ, bato baba bejaka o jako jɛkɔ, bekwaka mɔkɔ, bejikaka otɛ. 35Na bahito baba bejakasa obohiyaka mambolo, bekwaka mɔkɔ bejikaka otɛ. 36[Na bandomana baba, bejaka o kuba, bekwaka mɔkɔ, bejikaka otɛ.]» 37Ya bayokwɛ bahimwa ango te: «Ku, ye yekanaka bya?» Ya ango ahunwɛ na bango te: «Usya ecenje yejakasa, yango ya bambela besɔhɔnɔkɔsɔ.»
Currently Selected:
Luk 17: KOQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
