Esima 10
10
Lworo le Koreneye
1Kiigi ŋa balaga lemon ka Sezare nkuumu Koreneye, kiigi mfumu aworo aRome ba baacwolo ma «njiimi le Itali.» 2Balaga lia kiigi tele ŋa, bila njo nde eso, nde kaje Njyami. Nde amono ayamaŋa afuga a baari ba Ezerayele, ŋa nde kabwono Njyami cuga ŋa cuga. 3Tari le kalaga, ma kacu ka tari le otari, nde moni lworo, nde moni ntuma-yulu taataa nyuniŋi nca njo nde ŋa nde ndi: «Koreneye!» 4Nde kesi ntuma-yulu nde aterege ŋa nde ŋa nde ndi: «Ee Mfumu jo ema?» Ntuma-yulu kaali nde ndi: «Njyami ma ayalaga ebwoni e we bila lemigi le ayamaŋa we afuga, ŋa nde akalimiŋa we ŋi. 5Ŋaa yiga tuma abalaga Zafa ma kaje yaga mbuuru omon wo ba acwolo ma Simon, nkuumu Pyere. 6Nde kaka ka njo ojanji wo asa ebaana ba anyama nkuumu Simon se, nde njo mpaana lemere.» 7Ntuma-yulu wo yi lyele nde kamana vuruga, Koreneye cwoli asali a nde abwele bila oworo nde wo tii tii wo ajanja bila nde, mbuuru woove wo tele. 8Nde naani maami aso maakiigi yira ŋa nde tumi bo Zafa.
Lworo le Pyere
9Anyuzuga, bo ali ma njila ŋa bo yiga ba aciina Zafa, Pyere kumi yila njo yiga ka leka le njo kayulu kua, tutuga ŋa tari ka leka yila ocu ma kabwono. 10Nde njala esi ŋa nde kiigi yiga ŋa njala kaja. Ma ntini yeeli yiga baasa nde biila, nde moni lworo. 11Nde moni yulu onaaŋi ŋa kalogo ka keewa kua. Kiila kia kawuani kalembe keenini, amaasuga ko ma esugu ba ena ka keeya suruga ma ncie. 12Ŋaa nca kari kiigi ŋa anyama aso baali ŋa elami ena bila anyama aso ba baanaara, ŋa akaga ma anyoyi aso. 13Jui lemon ŋa nde ndi: «Pyere saraga ma otele, buma ŋa ja!» 14Ŋaa Pyere kaali ndi: «Kali! Mfumu, kabila mi nkini kawuuza ngiri ye ampi mi ŋi se kalogo keebi ŋi.» 15Jui lya le vuri dugi ndi: «Ndaga kacwolo kalogo ka adugi Njyami ndi ko keeve ma kalogo keebi.» 16Ko ka yi nja tari, kancinci ŋa amana, kalembe kavurigi yulu.
17Pyere yiga apiza ndi lia sila lworo ŋaa ma kalyele ndi bunu. Ŋi ma ntini yia baari ba Koreneye ba katumi baa yiga ali ma kapiza biri yeeli njo Simon ŋa bo yiga ali ka levuzu le kadubugu. 18Bo acwoli ŋa bo apizi ndi: «Simon nde nkuumu ye ekiege Pyere kaŋaa ka anca?» 19Pyere kiigi kini acimiŋa lworo lemono nde ntini ye Oduduma ye kadugi nde ndi: «Yuga, abalaga atari eba ka kunu baasaga we. 20Saraga, suruga ŋa je bila bo we bizi se atira kasa, kabila mi mbuuru wo otumi bo.» 21Pyere surugi yi baga bo ŋa nde ŋa bo ndi: «Mi mbuuru yo be ye lesaga. Be meema leya?» 22Bo akaali ndi: «Koreneye mfumu aworo tuma bizi. Balaga le tele, nde anyima Njyami ŋa baari ba aZife aso ŋa njala nde. Ntuma-yulu omon ya lyele nde ndi, nde katuma kacwolo we mpila nde, ma kayuga jaa yeeli we lyele nde.» 23Pyere si bo kanyunuŋa nca njo, ŋa bo asi kalari kamon.
Pyere aje mpila Koreneye
Anyuzuga, Pyere vi ma njila bila bo. Ŋa adumu ake ba Zafa ayi yila nde. 24Cugu le elwoni, nde kirigi Sezare. Koreneye kiigi anjila nde, ŋa nde kiigi ma acwolo ankwono bila andigi a nde apaga. 25Ma ntini ye Pyere kiigi yiga anyunuŋa, Koreneye yeni ma ka bazaga le nde, ŋa vi ka abuu a nde ma kabiga bila otori oso. 26Ŋaa Pyere osati nde ndi: «Saraga, mi se mbuuru omuon mva we.» 27Ŋaa nde seligi wobi bila Koreneye, ma ntini ye nyuniŋi nde nca njo. Nde moni bege le baari le maakuga. 28Nde ŋa bo ndi: «Be leyayi ni amaaliga aZife ma kaje mono anjya, sikali ma kanyunuŋa nca njo nde. Ŋaa Njyami mi mvyere ndi mi bizi kalyele ni mbuuru se omon ŋa amaami maabi, eli mi duma nde. 29Ma bwa mi kimono obi ŋi ma mi wooyi mpila be, kacwolo be mi. Ŋaa yiga mi ebuna yaa jaa le be le cwolo mi.» 30Koreneye kaali ndi: «Ecugu yiga etari, tari loankulu li, ka tari le otari eli tari yiga le mi kalaga, mi kiigi ebwono ka njo mi. Kancinci ŋaa mi kese bu balaga lemon le amfa ngeri ngeri le cwugi kavuzu o mi, 31ŋa nde ŋa mi ndi: “Koreneye, Njyami mi yuga obwoni a we ŋa nde akalumuŋa lemigi le yamaŋa we afuga ni. 32Yiga tuma abalaga aje Zafa ma kaje yaga Simon, nkuumu Pyere. Nde kaka ka njo Simon, wo asa janja le ebaana ba anyama, nde njo mpaana lemere.” 33Mi sa waa, mi tumi baari ma kaya yaga we ŋa we se si ove ma kaya. Ŋaa yiga bizi a be aso e ba leli ka miizi a Njyami ma kayuga maami aso a Mfumu ma kampi we ma kalyele.»
Pyere ampa Ncya Yeemve mpila Koreneye
34Ŋaa Pyere yagi mbari ndi: «Jaa jaa mi yiga eyuga ni Njyami kayaga baari aso lemigi lemon. 35Nca esi eso ba eyayi onkani o nde bila ba eli tele, ŋa ove ma nde. 36Nde tumi mbari a nde ŋa baari a Ezerayele, ncia yeemve ye kadusu ma Zezi Kristi wooli Mfumu a baari aso baali muon. 37Be leyayi jaa le baani ya ka Ngalile, ŋa kanca Zude eso, kaamani mpa Zan mbari ŋa ateemi. 38Be leyayi lemigi le Njyami le kaswolo Zezi wo Nazarete ma janja le nde ŋa nde ma mpa nde mpari ye Oduduma Santi. Be leyaa lemigi le Zezi leka yiri nca kasi ma kasa leve ŋa ma kasalaga aso beeli jabiri ma akuara, kabila Njyami kiigi bila nde. 39Ŋa bizi a be kamaka atemi ma maami aso maasi nde nca kasi ka aZife ŋa ka Zerizaleme. Ma ka buma nde bo ama kuta nde ma oti wo lemaanji. 40Ŋaa Njyami nyusu nde ma cugu le otari, ŋa nde si nde kamvyere njuru, 41ka ma baari aso ni, ŋaa ma bizi beeli Njyami ma sa swolo mva atemi. Bizi a be le ma ja le ma nyua bila nde ntini e Njyami ye kamana nyusa nde nca baari ba akpakpa. 42Nde seligi tumi bizi ma kampa mbari ŋa baari bila ma kalyele ndi nde wo Njyami wo ka swoli ma kampama baari ba omuon bila ba akpakpa. 43Antuma Njyami aso awobi ma nde, ndi mpini mbuuru wo ayalaga nde abologi maami maabi a nde aso ma onkani o nkuumu a nde.»
Oduduma Santi mi suriga yila baari eli ka aZife ŋi
44Ntini eli Pyere kiigi kini alyele, Oduduma Santi surigi yila baari aso ba kiigi yuga ntigi a nde. 45Ekoli ayaligi baali aZife ba ayi bila Pyere ndi Oduduma Santi wo Njyami wo kampa mi nyunuŋa ma anjuru a baari eli ka aZife ŋi. 46Okorogo nde ka yuga ka alyele bo ma ajui akima ŋa kampa Njyami leve. Ŋaa Pyere ndi: 47«Ba buna liga baari baba yaga ateemi ma anja, eli bo yiga ŋa Oduduma Santi mva bizi a be?» 48Ŋa nde tumi bo ma kampa bo ateemi ma nkuumu Zezi Kirisite. Bo apizi nde ndi nde kasa aka ecugu bila bo.
Currently Selected:
Esima 10: teg
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
