Esima 18
18
Poole ka Korete
1Amana bwa, Poole ciegi Atene, ŋa yeni kangundu ka Korete. 2Ka kwa nde bagi Zife omon nkuumu Akilase osi Pon. Nde bia kiigi kini efi e Itali bila okari a nde Prisile, kabila mfumu woonini Klode kiigi ma alyele ŋa aZife aso ma kacyege Arome. Ŋaa Poole yeni mono bo. 3Poole kiigi kaka mpila bo, bo kajanja biri mon ma bo baakiigi janja lemon. Bo baabwo emangi ma katege. 4Cugu ŋa cugu le kayinga Poole kaje njo aZife ye baabwono, ŋa nde kasaga ndi aZife bila anGereke ayalaga ambari ma. 5Ŋaa ntini ye Silase bila Timote ye afi kasi ka Masedoyine, Poole mpi otuma nde oso kanca mbari a Njyami, ma kamvyere yemiŋi ŋa aZife ndi, Zezi kamaka Masiya. 6Ŋaa aZife asarigi kayila nde ŋa atugi nde. Poole kubugi amfa a nde, ŋa nde ndi: «Togi le be-ankulu leva yila ecu e be! Eki wuana mi ŋi. Ŋaa yiga mi eje mpila baari baali ka aZife ŋi.» 7Ŋaa ecuugi e nde kaŋaa, nde yeni mpila balaga lemon nkuumu Titiyuse Zisetise, balaga le lenyima Njyami. Ŋaa njo nde kiigi mpaana njo ye baabwono. 8Ŋaa Kirisepise wo mfumu a njo ye baabwono, yaligi Mfumu Zezi bila njo nde eso. Ŋa kuna le baari a Korete ayugi mbari a Poole baa se ayaligi, ŋa ayagi ateemi. 9Mfumu dugi ŋa Poole ma lworo nca lempiibi ndi: «Ndaga kabaga obwogo! Ŋaa lyele, ŋa we bizi onyua ka binda. 10Kabila mi ndi bila we, ŋa se mbuuru we aciila we kali, kabila baari ami ali kuna nca kangundu kia.» 11Poole ki ka Korete kasibi kamon bila angondo asiami, ma kayiziga mbari a Njyami.
12Ma ntini ye ekiigi Ngaliyone nguverenere a bungu le Akayi, aZife akuru ojugu omon ma kakwara Poole, ŋa abiri nde yila mbara ye ba apama. 13Bo adugi ndi: «Balaga li lesaga ni baari ayalaga kabwono Njyami ma lemigi eli ngiri eki lyele ŋi.» 14Poole sagi kayaga mbari, ma ntini yoankulu yia Ngaliyone kaali ndi: «Aka be lekata mbuuru ma nde wo omisa jaa leebi le levuli sikali lekyege, mi eyuga be bila otuma mi, be aZife. 15Ŋaa eli be lesoso ejugu kayila jaa le ambila, yila maami ma ankuumu bila maami ma ngiri be-ankulu, ewuani be. Mi, mi embiza ma kampama yi sila maami.» 16Ŋa nde curi bo ma biri ye ba apama. 17Ŋaa lembuuru le lekiigi ŋaa akuari Sosetene mfumu a njo aZife ye baabwono, ŋa yiga aberi nde kavuzu le biri ye baapama. Ŋaa kiigi ka jaa le Ngaliyone ŋi.
Poole avuruga Antiyoce ma Syri
18Poole vuri ki ntini mon ka Korete. Ŋa nde nyini adumu, ŋa kumi nca vaari ma kaje Syri, nde bila Prisile ŋa Akilase. Ka eciege nde biri ye eka avaari ka Sankere, Poole wuuni ocu kabila nde kiigi ma laba okezi ma nkuumu a Njyami. 19Bo atoyi Efeze ka biri ye nyini Poole Prisile bila Akilase. Nde yeni njo aZife ye baabwono ma kasa ntigi bila bo. 20AZife ŋa nde ndi, nde kavura ka kaŋaa ma lebigi, ŋaa nde ki jya ŋi. 21Nde ciegi nca bo ma kalyele ndi: «Mi eyavuruga mpila be, ma lemigi le jii Njyami.» Ŋa ciegi Efeze ma vaari. 22Ntini ye nde kaka surigi ka Sezare, nde yeni Zerizaleme ma kaje biga Okuga, ŋa nde yeni Antiyoce. 23Nde ki ntini mon, ŋa nde kaselege taaŋa Ngalasi bila Feriji, ma kampa mpari ma lila yila alwoni aso.
Apolose ka Efeze ŋa ka Korete
24Zife omon nkuumu Apolose wo akuli ka Alesandri kiigi ma aya Efeze. Nde kiigi kalyele bila ncimi ŋa kiigi yayi eteendi e taataa. 25Nde kiigi ama amvyere Njila Mfumu, ŋa nde ayiziga ove ove bila otuma nde oso wo mawuana Zezi. Ŋaa nde kiigi ka yayi ateemi ma Zan. 26Nde yiga alyele bila tari nca njo aZife ye baabwono. Bo amana yuga nde Prisile bila Akilase abiri nde mpila bo ma kaselege mvyere nde taataa Njila Njyami. 27Amana Apolose sagi kaje bungu le Akayi. Adumu ba Efeze ampi nde kawasi, ŋa ateendi kasangumu ma alwoni ba Akayi ni bo ayaga nde yemiŋi. Ntini ye toyi nde, nde yamiŋi alwoni kuna kabila puga le Njyami kiigi yila nde. 28Okorogo, Apolose kiigi sa lebila leenini bila aZife ka miizi a baari aso. Ŋa mvyeri taataa ma eteendi ni Zezi kamaka Masiya.
Currently Selected:
Esima 18: teg
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
