Esima 8
8
1Ŋaa Soole yaligi ndi abuma Etyene.
Soole ampa Okuga ampasi maanini
Cugu loankulu lia ampasi maanini abaani kanca Okuga wo Zerizaleme. Ayaligi aso acalagi ayeni nca bungu le Zide bila le Samari, kangula antuma ba asiili. 2Baari a tele ma Njyami alegi Etyene nca mwuma ŋaa bo alili kuna ma leku le nde. 3Ŋaa ma Soole, nde kasa mpana ma kabiiza Okuga. Nde kayira njo ŋa njo, ma kacieze ayaligi, ŋa akaazi ŋa abalaga, ŋa nde kalege bo ma ongeneŋe.
Filipe ampa Ncya Yeemve ka Samari
4Ba acazigi ayeni ma kampa Ncya Yeemve nca ebiri ŋa ebiri. 5Filipe surugi nca kangundu kamon ka bungu le Samari, ka kua nde wobi ma Kirisite. 6Baari aso ba kaselege yuzuga kalyele Filipe, bo ayugi bila bo amoni ampiri ma kiigi sa nde. 7Kabila bege le epundu beebi ba kacwuga kanca anjuru a baari ma kata anya maanini, ŋa bege leebuka bila angaa eleme awuumi. 8Ŋaa Kangundu kaso yiga nca kase keenini.
9Nca kangundu koankulu kia, kiigi ŋaa balaga lemon nkuumu Simon, nde kiigi ma apaza ampiini. Ŋaa nde legi baari ba Samari oliliŋi ma maami ma osizi ma kiigi sa nde. Nde kiigi lyele ndi nde mbuuru woonini. 10Aso ka abaani ma onkere wo obuzu ti ngaa mbuuru, amono ba ayuzuga nde pi. Ŋaa ba kalyele ndi: «Li balaga ŋa mpari a Njyami, yo ni ye ba acwolo “ma mpari yeenini”.» 11Bo aswuzi etuma ba kayuzuga nde, kabila nde kiigi maabiga ka kasa bo ampiini ma osizi. 12Ŋaa bo ama yalaga ncia yeemve ye mpi Filipe bo, ma omfumu o Njyami bila nkuumu a Zezi Kirisite, abalaga bila akaazi ayagi ateemi. 13Simon deankulu yaligi ŋa yagi ateemi. Nde ki ma nyina Filipe ŋi, ŋaa ekoli nde ma ampiri bila ekubu emaami ba osizi ba emoni nde.
14Antuma baali ka Zerizaleme ama yuga ndi asi Samari amiyalaga mbari a Njyami bo atumi bo Pyere bila Zan. 15Ŋaa bo ato Samari, bo abwoni ma ayaligi ba anyarigi ma buni bo abaga Oduduma Santi. 16Okorogo, Oduduma Santi kiigi kiniya se yila mbuuru omon nca bo ŋi. Bo kiigi amayaga ateemi atu ma nkuumu ye Mfumu Zezi. 17Pyere bila Zan alegi njiala yila bo ŋa bo abagi Oduduma Santi. 18Ntini ye Simon ka kamoni ndi antuma alegi njiala yila baari Oduduma Santi oyi yila bo, nde yi mpa Pyere bila Zan ampara. 19Nde apiza ŋa bo ndi: «Lempa mi se mpari yi, ma buni baari ba elege mi njiala abagi Oduduma Santi.» 20Pyere kaali ŋa nde ndi: «Adoro a we kaje ma anjila ma oca bila weankulu, kabila we amono ni baabuna swuma kalogo ka ampa Njyami bila ampara! 21We se jaa mon ye alyele nca ŋaa kali, kabila otuma we ka tele ka miizi a Njyami ŋi. 22Ŋaa jaa le esi we lebi, yalaga lo ŋa we bwono Mfumu ma buni le ke nde abologo ecimiŋi ba otuma we. 23Mi emono otuma we ma alwula ma njala kabaga ŋa ma ongeneŋe ba maami maabi.» 24Ŋaa Simon alyele ŋa Pyere bila Zan ndi: «Beankulu lebwono Mfumu ma mi, ma buni ncanke maami ayi ma mi.» 25Bo amana lyele amaami maave a Zezi ŋa elyeli e mbari a Mfumu, antuma abwele avurugi Zerizaleme. Bo ato ma njila, bo ba kampa Ncya Yeemve nca kuna le engundu e Samari.
Filipe bila balaga le Ecopi
26Ntuma Mfumu ŋa Filipe ndi: «Temeŋe we je ma kacu ka katali kwogo ka okari, ma njila ye ye eje suruga Zerizaleme ma kaje Ngaza. Njila yia ema avwuma.» 27Filipe yeni ŋa asisari, ŋa ma njila, balaga le Ecopi lemon leya kiigi ojanji woonini. Nde kiigi mbuuru wo baakiele kabaga ka Kandase, mfumu kasi ka Ecopi wo okaazi. Nde kiigi maaya Zerizaleme ma kabwono Njyami, 28ŋa nde kavuruga mpila nde. Manci kayila lutu le nde, nde kalira buku le ntuma Njyami, Ezayi. 29Oduduma Santi ŋa Filipe ndi: «Je bazaga lutu wua.» 30Filipe biri nciini ma kaje ciina tuga ŋa nde, ŋa nde yugi kaalira mbuuru wo Ecopi wua buku le Ezayi. Nde pizi nde ndi: «We ŋaa ayuga maami maalira we maa?» 31Balaga lia kaali ŋa nde ndi: «Mi kama yuga lo bunu eli mbuuru ki selege lyele mi ŋi?» Ŋa nde dugi Filipe ma kaka mancina mpaana nde. 32Olwo wo abaalira nde kiigi nde wu:
«Nde kiigi mva kandombo ka ba abira biri ye baabuma,
mva mwana kandombo kakali onyua pori ka miizi ma mbuuru wo acieze nde ekwa.
Nde ki lyele se jaa lemon ŋi.
33Nde moni okuru, ŋa nde kibaga mpieme ŋi.
Wo abuna lyele ma ampabigi a nde na?
Kabila ama sa nde mfuna kayila ncie.»
34Mbwuru woonini wua ŋa Filipe ndi: «Kolokolo we, ntuma Njyami ciicii ma na kalyele bua? Ma nde-ankulu sikali ma mbuuru okima?» 35Ŋaa Filipe yagi mbari ŋa, nde baani ma oluo mbari yia, nde mpi nde ncia yeemve ye Zezi. 36Bo alwoni njila bo, ŋa bo ato biri mon ye eli kiigi ŋa anja. Ŋaa mfumu wua ndi: «Mono anja ema ŋaa kiigi ka kakaami eli mi kibuna yaga ateemi ŋi kama?» [ 37Filipe ŋa nde ndi: «We ayalaga bila otuma we oso, we abuna yaga ateemi.» Ŋaa balaga lia ŋa nde ndi: «Mi ma ayalaga ni Zezi Kristi Mwana Njyami.»]#8.37 Olwo wo e ŋa ncaami (37) ba kamono nca kuna le maami ma ateendi kala ŋi. 38Ŋaa nde sugi kabiri mon nca lutu a nde. Filipe surugi bila nde nca anja nde mpi nde ateemi. 39Bo acwugi nca anja Oduduma Mfumu cyezi Filipe, mbuuru woonini wua yiga kimono Filipe ŋi, okorogo nde yeni je le nde nca kase. 40Filipe kiigi cwugi ka Azote ŋaa nde kayira engundu ŋa engundu ma kaje ma kampa ncia yeemve tii ntini ye eto nde Sezare.
Currently Selected:
Esima 8: teg
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
