Luke 18

Ngana ye nkani woobi bila okaazi okwulu

1Amana Zezi vuri ti alwoni a nde kasie kamon ma ka mvyere bo ndi, ave antini aso be lebwoni, ŋaa be lebizi mbiza kavuruga. 2Nde ŋa bo ndi: «Nca kangundu kamon, kiigi ŋa nkani omon eli nde akanyima Njyami ŋi, ŋaa nde ŋa mbele baari. 3Nca kangundu koankulu kia, kiigi se ŋa okaazi omon wo okwulu, amono akama kaje mpila nkani wua, ma kalyele ŋa nde ndi: Mi ŋa mbuuru eli akamono jiizi le mi ŋi, yamaŋa mi ma kampama jaa li. 4Ŋaa antini aso nkani wua amono abiza ma kayamaŋa okaazi wua, ŋaa nde amono akama kabiza. Amana nde ndi: Mi eka nyima Njyami ŋi, mi ŋa mbele baari. 5Ŋaa eli okaazi wu aka ma kakolo mi, ave mi mpa nde mpieme. Ma buni nde kabiza mi kama weele antini aso.» 6Ŋaa Mfumu avura lusa ndi: «Be ŋaa leyugi yemiŋi yemiŋi lemigi lesi nkani woobi wua? 7Ee! Ŋaa Njyami akampa baana a nde, ba baacwolo nde mpiibi bila muyi mpieme ŋi? Njyami kasa abaana liziga ma kampa bo mpieme? 8Mi jaa jaa elyele be ni, nde kasa waa ayamaŋa bo. Ŋaa kaaya Mwana Mbwuru, nde avura tanaŋa baari baalege lila ma Njyami yila ncie?»

Ngana ofarizi bila ngaa lempo

9Zezi vuri ti ngana kima, ma baari baamon ba eli bo amono ndi bo tele ka miizi a Njyami, ŋaa bo kamono abuga baari ba oca. Nde ndi, 10«Cugu lemon balaga le ofarizi omon bila ngaa lempo omon ayeni ma kabwono nca Njo Njyami. 11Ofarizi ki ma otele kabwono nca otuma nde ndi: Ee Njyami a mi! Mi empa we leve kabila mi ka mva abuga baamon ŋi, bo asara, bo ka tele ŋi, bo baasa ncwuma, ŋaa mi empa we leve kabila mi ka mva ngaa lempo wu ŋi. 12Mi esa eyiila enjala jyele nca ecugu encaami, mi empa bugu le okuumu ma biibi eso ba ebaga mi. 13Ngaa lempo oki kabiza, nde kigii se njala ka tese miizi a nde ka yulu kali. Ŋaa nde amono aberege ntulu ma kampa kolokolo, ŋaa nde ndi: Njyami a mi, mono mi kerigi, mi mbuuru wo esa maami maabi.» 14Zezi alusa ndi: «Ee! Mi elyele ni ngaa lempo wua kaka yeni njo nde ŋaa, Njyami mi mana bologo maami a nde maabi, ŋaa ka ma ofarizi ŋi. Okorogo mbuuru wo asaga kavula abuga Njyami ampa nde biri ye mbiza. Ŋaa mbuuru wo asaga yaga biri ye mbiza, Njyami aswuza nde ka biri ye vuzu.»

Zezi ayamba baana ba buzu

15Baari ayi bila baana ba abuzu mpila Zezi, ma buni nde kalege njiala e nde, ma kabwono ma bo. Alwoni a Zezi amono bwa, bo yiga ba afala bila baari baayi ŋa baana baa. 16Ŋaa Zezi ŋa baari baa ndi bo aya ciina bila baana mpila nde. Ŋaa Zezi ndi: «Lenyina bo aya mpila mi, lebiza bo kaliga. Okorogo omfumu o Njyami oli ŋa baari baali mva baana ba abuzu. 17Ee, mi ŋa jaajaa elyele be! Aka mbuuru kabiza yalaga omfumu o Njyami mva mwana wo obuzu, se evuli, nde kibuna ka nyunuŋa nca omfumu baa ŋi.»

Ngana ngaa kabaga

18Mfumu aZife omon kayuga bwa, nde pizi ŋa Zezi ndi: «Mfumu woove wu, mi bunu esa ma kabaga omuon ba obu-obu?» 19Zezi akaala ŋa nde ndi: «We me ma acwolo mi ma mbuuru woove? Se mbuuru woove kali, kangula Njyami otu. 20We ni yayi angiri a Njyami, ŋaa mon ma alyele ndi: We bizi ncuuma kasa, we bizi mbuuru kabuma, we bizi osara kayuba, we bizi opami ocuba kasa ma abuga, nyima taara we bila nguugu a we.» 21Mbwuru wua kaali ndi: «Mi sa baana kanyima maami maa, mi kiigi kini obuzu.» 22Zezi kayuga bwa, nde kaali ndi: «Ŋaa emi siila we kalogo kamon ma kasa. Je tege kabaga ka we kaso, ŋaa we kaba afuga ampara ma, ma bwa Njyami kampa we wura leenini ka yulu. We amana sa bwa, ya, we lwono mi.» 23Ŋaa mbuuru wua kayuga bwa, nde si nya, kabila nde ŋa kabaga keenini. 24Zezi kamono ndi mbuuru wua mi sa nya, nde ŋa baari baali kaŋaa ndi: «Iiin! Ma baari baali ŋa kabaga, ŋa mpasi ma kanyunuŋa nca omfumu o Njyami nda. 25Okorogo mbuuru wooli ŋa kabaga leenini vuli vuli mpasi ma kanyunuŋa nca omfumu o Njyami, ŋi ka nyama woonini#18.25 Nyama woonini 'chameau' Wo aZife. ma kanyunuŋa nca njila ye sori ŋi.» 26Baa kiigi yuga Zezi alyele ba kalyele ndi: «Ŋaa yiga mbuuru wo abuna kavwuga na?» 27Zezi akaala ŋa bo ndi: «Maami maali ŋa mpasi ma baari omuon, ŋa Njyami mpasi kali.» 28Pyere ŋa Zezi ndi: «Ee Mfumu! Ŋaa ma bizi ba le ma nyina maami ma baasa bizi, ŋaa le ma alwono we?» 29Zezi akaala ndi: «Mi ŋa jaajaa elyele be, aka mbuuru mi nyina njo nde, okari, adumu, nguugu a nde bila taara nde, sikali baana ma omfumu o Njyami. 30Nde abaga wura leenini kanca omuon o nde yila ncie. Kayila ŋaa nde aje kabaga omuon ba obu-obu kanca omfumu o Njyami baba oya.»

Zezi alyele ma leku bila enyuzigi e nde

31Zezi yagi antuma a nde akwumu ŋa bwele, nde ŋa bo ndi: «Lemono bizi a be ŋa Zerizaleme lekuma. Maami aso ma dugi antuma Njyami ma mi wo Mwana Mbwuru, maaya. 32Okorogo ba akaba nde ka jiala e baari ba akini yalaga Njyami ŋi. Baa baasebe nde, bo ba atuga nde, bo ba acuta nde antayi. 33Bo ba akpala nde ekasi, bo baabuma nde. Ŋaa cugu le otari, nde anyuzuga.» 34Ŋaa alwoni akiyuga mbari yia ŋi, ma bo mbari yia kiigi ŋa mpasi ma kayuga. Bo akiyuga maami ma kiigi lyele Zezi bo ŋi.

Zezi asalaga mbuuru omon eli miizi kali

35Zezi aciina mpaana Zeriko. Kaŋaa kiigi ŋa mbuuru omon manci ma ofunuŋa njila, wo kiigi laa ampara. Ŋaa mbuuru wua kiigi miizi kali. 36Nde kayuga lembuuru leyira, nde pizi ŋa baari ndi: «Jo ema?» 37Baari baa akaali ŋa nde ndi: «Nde ni Zezi o Nazarete ayira.» 38Ŋaa nde ti nya ndi: «Ee Zezi wo mpabigi a Davide! Yamaŋa mi.» 39Baari baakiigi je ka levuzu le mbuuru eli miizi kali, ba kaywuma nde ndi: «Aa kapi ŋa!» Ŋaa mbuuru oli miizi kali wua, seligi tesi jui ndi: «Mpabigi a Davide, yamaŋa mi!» 40Ŋaa Zezi sugi, ŋaa nde ŋa baari ake baakiigi kanca lembuuru lia ndi: «Leya bila nde mpila mi. Ŋaa mbuuru wo kaami miizi wua kato mpaana Zezi.» Zezi pizi nde ndi: 41«We asaga ni mi sa we kama?» Mbwuru wua ŋa nde ndi: «Mfumu mi esaga ni mi mono.» 42Ŋaa Zezi ŋa nde ndi: «Mono, lila le we le mi vuzuga we.» 43Kancinci ŋa ngaa miizi kali wua, miizi a naaŋi mva ka abaaka nde kala. Nde lwono Zezi ŋa nde ndi: «Lekuma le Njyami!» Lembuuru lia lemono bwa, bo se ampi Njyami lekuma.

Currently Selected:

Luke 18: teg

Highlight

Copy