Luke 19

Zezi anyunuŋa nca njo Zase

1Zezi mi to kangundu ka Zeriko ŋa nde yiga anyura kangundu kia. 2Kaŋaa kiigi ŋa balaga lemon nkuumu Zase, nde kiigi mfumu angaa lempo ŋaa nde kiigi ŋa kabaga. 3Balaga lia kiigi asaga kaya lemigi leka Zezi, ŋaa nde kiigi akabuna ŋi. Kabila baari kiigi avuli kuna, ŋaa nde otele kali. 4Ŋaa nde biri nciini levuzu ma njila ye ya Zezi, amana nde kumi oti wo ba acwolo ma osikomore, ma kamono ntini ye yira Zezi kaŋaa. 5Zezi kato biri yia, nde kasata miizi ka yulu bu, nde moni Zase, ŋaa Zezi ŋa nde ndi: «Sanaŋa suruga! Ma cugu le lubu li, mi eto njo we.» 6Ŋaa Zase surigi ŋa asisari, nde yambi Zezi ka njo nde bila kase keenini. 7Aso baakiigi mono maami maa aso, yiga ba alyele nde ndi: «Le ma mono Zezi kaka mi je njo mbuuru wo asa maami maabi.» 8Ŋaa Zase ki ma otele kavuzu o Mfumu, nde ŋa Mfumu ndi: «Mfumu, mono mi empa afuga kabari ka kabaga ka mi. Ŋaa aka mi ma anjaga ampara a mbuuru ma akukuna, mi vuta nde mon nja na.» 9Ŋaa Zezi ŋa nde ndi: «Lubu Njyami mi vuzuga baari a njo we. Ee! Zase se mbuuru a njo Abarayame, 10Okorogo mi wo Mwana Mbwuru, mi ya ncaga bila kavuzuga baari baa ama atamaŋa.»

Ngana ye ajanji ba atari

11Ŋaa ntini e kiigi yuzuga lembuuru mbari a Zezi, nde vuri ti bo ngana kima. Kabila Zezi kiigi yiga tuga ŋa Zerizaleme, ŋaa baari kiigi amono ndi omfumu o Njyami kiigi bo ya parabu. 12Ŋaa Zezi ŋa bo ndi: «Kiigi ŋa balaga lemon eli kiigi mwana mfumu a kasi. Balaga lia kiigi yiga tuga ma kaje ngula kasi kakima kalala, kabila kiigi baampa nde mbara onkani ba kasi ka nde-ankulu. Ŋaa amana, nde aya vuruga.» 13Ŋaa nde kato ma ntini eje, nde si katuma kacwolo ayiga a nde akwumu. Nde mpi mbuuru ŋa mbuuru ampara ma kuna. Ŋaa nde ŋa bo ndi: «Lesa maami, ŋaa be lebaga ampara ma kuna ŋa eyi vuruga e mi.» 14Ŋaa baari ba kasi ka nde kia kiigi njala nde kali. Nde kaje waa, bo atumi antuma kabiza nde ma kalyele nde ndi: Bizi njala ni mbuuru wu kaka mfumu a bizi kali. 15Se kawobi bo bwa ampi nde omfumu ba kasi ka nde. Ŋaa nde yi vuruga, Nde tumi kacwolo ayiga a nde ba kanyini ampara ma kasa amaami, nde asanaŋa yaa lemigi lesi mbuuru ŋa mbuuru ampara ma anyini nde. 16Ojanji oncomi yi ŋa nde ndi: Mfumu, mi bagi nja kwumu ye ampara ma nyini we mi. 17Ŋaa mfumu ŋa nde ndi: Mbuuru bwa nda, we yemiŋi si, we oyiga woove. We kiigi tele, ma ampara ma nyini mi we nceti. Ŋaa mi empa we omfumu ma kaka okunji wo engundu kwumu. 18Wo oyuele yi, ŋaa nde ndi: Ee mfumu! Kayila ampara ma nyini we mi, mi vuri bagi ampara bwa anja ataani. 19Ŋaa mfumu ŋa nde ndi: Mi se empa we engundu etaani. 20Okima oyi, nde ndi: Ee mfumu, mono ampara ma nyini we mi, mi ma kura mon nca kabari ka mfa, ŋaa mi ma yiziga. 21Mi kiigi ŋa bwogo o we, kabila we balaga le ekemi. We ayaga biibi eli ka we swuzi ŋi, ŋaa we atolo biibi eli jo ka we nkuni ŋi. 22Mfumu a kasi kaali ŋa nde ndi: We oyiga woobi, mi epama we ma ambila ma acwugi ma onyua we ankulu. We ti yayi ni mi mbuuru wo ekemi, ŋaa mi e yaga biibi eli ka mi swuzi ŋi, ŋaa mi etolo biibi eli ka mi nkuni ŋi. 23Ŋaa we jaa lebizi suuza ampara a mi maa, nca njo ye baakiele ampara, ma buni ŋa eyivuruga e mi, mon amisa kuna ma kama? 24Ŋaa amana mfumu a kasi dugi ŋa anjanji baakiigi kaŋaa ndi: «Lepiina nde ampara a mi ma mpi nde, ŋaa lempa mon ŋa mbuuru wo bagi nja kwumu.» 25Ŋaa bo ŋa nde ndi: «Mfumu, nde ti yiga ŋa ampara nja kwumu! 26Ŋaa mfumu a kasi kaali ndi: Mi elyele be ni, mbuuru wo acuami ŋa biibi, ba selege lusa nde jo, ŋaa mbuuru eli cwami kalogo kali, ba aselege cieze nde jo, se jo eka nceti. 27Ŋaa ma baari baali anyon a mi, bo ba alyele ndi bo njala mi ka mfumu a bo kali, leya bila bo kunu, be lebuma bo ka miizi a mi.»

Zezi nyuniŋi nca Zerizaleme

28Zezi kamana lyele bwa, nde vi ka levuzu le baari baakiigi lwono nde, ŋaa nde kumi kangundu ka Zerizaleme. 29Zezi kato mpaana ampugu amwele ma acwoli ma Betefaye bila Betani, maali tuga ŋa kakuru keenini ka baacwolo ma elivye, nde tumi alwoni bwele. 30Ŋaa nde ŋa bo ndi: «Leje nca mpugu yeeli kavuzu o be, ntini ye nyunuŋa be, be lemono nyama wo baacwolo ma ane#19.30 Nyama wo ba acwolo mpila aZife ma ane, wo abuna ka bira biibi bila baari. , ama kura ma oti, eli mbuuru kini sa akuma yila nde ŋi, ŋaa lenaana nde, be leya bila nde kunu. 31Ŋaa mbuuru wo apiza be kabila kanaana be nyama wua, ŋaa be le lyeli ni: Mfumu ŋa kaama.»

32Ŋaa alwoni abwele se ayeni, bo amoni maami mva lemigi le lyeli Zezi bo. 33Bo ba anaana nyama wua, ŋaa amfumu a nde ŋa bo ndi: Be jaa la lenaana nyama wu lema? 34Ŋaa alwoni akaali ndi: «Mfumu ŋa kaama ma nde.» 35Ŋaa bo ayi bila ŋa nyama wua mpila Zezi, ŋaa bo amana lege angoyi maala kayila nyama wua, bo anyini Zezi kumi kayila nde. 36Ŋaa ntini ye kiigi ciina Zezi ka levuzu, baari ba kalege amfa kayila njila ka ovuzu o nde ma kakusa nde. 37Ntini ye kiigi suruga Zezi kakuru ka elivye, tuga ŋa Zerizaleme alwoni a nde awaayi, ŋaa bo kiigi nca kase keenini. Bo yiga ba ampa Njyami leve, ma ampiri ma lwari ma si Zezi. 38Ŋaa bo ndi: «Njyami kampa Mfumu wo aya ma nkuumu a nde puga. Kadusu kaka ka yulu, ŋaa lekuma leka ŋa Njyami nkara yulu.»

39Ŋaa afarizi ake kiigi aka nca lembuuru, bo ŋa Zezi ndi: «Mfumu! Duga alwoni a we aka pi.» 40Zezi ŋa bo ndi: «Mi elyele be jaajaa, se bo aka pi, akele ma ata nya.»

Zezi ŋa nya ma baari a Zerizaleme

41Zezi yiga aciina tuga ŋa Zerizaleme ŋa nde taali kangundu. Ŋaa nde yiga abaraga ma baari ba kangundu kia. 42Ŋaa nde yiga alyele ndi: «Ee baari a Zerizaleme ba! Aka lubu be se kiigi leyayi mbuuru we ampa be kadusu? Ŋaa mono be yiga kibuna kayaa ni.» 43Ntini a be emi to eli anyon a be ba acua kabaga ma kajeneŋe be, ma kajwana bila be, ŋaa bo apya be ma ancwo aso. 44Bo ba ajaraga be, bo ba akanyina se kele lemon yila buga ŋi. Kabila be le kiyaa ntini ye yi Njyami mpila be ma kasa be leve ŋi.

Zezi acura antege biibi nca Njo Njyami

45Zezi kato Zerizaleme, nde nyunuŋi nca Njo Njyami. Kaŋaa kiigi ŋa baari ba kiigi tege biibi, Ŋaa Zezi yiga acura bo. 46Nde ŋa bo ndi: «Nca abuku a Njyami amaateende ndi: Njo mi ye ka njo ye ba abwono, ŋaa be, be le mi kaala yo ma njo ye asara.»

47Ŋaa ecugu eso Zezi kayiziga nca Njo Njyami. Ŋaa amfumu a baari baba ampa ambwoŋi, ŋa ayizigi angiri bila amfumu ba kasi ba kasaga oyeri ma kabuma nde. 48Ŋaa bo akibaga oyeri ba kasa ŋi, okorogo lembuuru le kayuzuga maami ma kiigi lyele Zezi yemiŋi yemiŋi.

Currently Selected:

Luke 19: teg

Highlight

Copy