Luke 20

Mpari a Zezi kunu ye wa?

1Cugu lemon, Zezi amono ampa ncia yeemve ŋa baari baakiigi nca Njo Njyami. Ŋaa mono amfumu a baari ba baampa ambwoŋi, ŋa ayizigi angiri bila amfumu ba kasi. 2Bo apizi nde ndi: «Ma lyele bizi, we ma mpari a na asa maami ma? Wo mpa we njila ma kasa maami ma na?» 3Zezi kaali ŋa bo ndi: «Mi se elege be ojugu. 4Wo ompi Zan mpari ma kampa baari ateemi kiigi Njyami sikali baari omuon?» 5Ŋaa bo yiga ba kalyele ka mpanaŋa bo ndi: «Bizi a be leyalaga ni Njyami mbuuru wo tuma nde ti, Zezi ka kaala bizi a be ndi, be mema lebizi yalaga mbari a Zan? 6Ŋaa bizi a be lekaala ni, baari omuon, baari baaso atobo bizi a be akele abuma bizi a be. Ma bwa bo aso amiyalaga ndi Zan ntuma Njyami.» 7Yia biri ye kaali bo ŋa Zezi ndi: «Bizi kiyaa mbuuru wo ompi nde mpari ma kampa ateemi ŋi.» 8Ŋaa Zezi vuti bo ndi: «Mi se eka lyele be mbuuru wo ompi mi mpari ma kasa maami maa ŋi.»

Ngana anjanji baabi

9Amana bwa Zezi yiga ata baari ngana yi ndi: «Kiigi ŋa balaga lemon le lekuni ngwunu ye eti, ba eli mva endiri ba baacwolo ma vinye. Ŋaa nde mpi ŋa ajanji ma kakiele yo, amana nde yeni ojia kangula ncie ma lebigi. 10Ntini ye ovu wo batolo mburu ye reze eto, ŋaa nde tumi oyiga a nde omontu, kampila ajanji ba ngwunu baa, ma buni bo atuma le ngaa ngwunu bugu le mburu ye reze. Ŋaa anjanji baa aberi we atumi wua, bo aki mpa se nde kalogo ŋi. 11Mfumu vuri tumi oyiga okima, baali ka ngwunu baa asi nde okuru, acuri nde, bo akimpa se nde kalogo ŋi. 12Mfumu vuri tumi ojanji wo otari, ŋaa ajanji baa ajuazi nde, acuri nde. 13Ŋaa Mfumu a ngwunu a vinye wua ndi: Ŋaa mi ŋa yiga bunu esa? Mi yiga ntuma bo mwana mi eli mi ŋa njala nde. 14Ŋaa ayiga baa amamono mwana mfumu wua, bo abaani kalyele kanca mpaniŋa bo ndi: Lemono, mbuuru eli aje kaka mfumu anguunu ma! Lecue lebuma nde, ma buni anguunu ma aka a bizi a be.» 15Ŋaa bo acuzigi nde kanca angwunu ma vinye maa, bo abumi nde. Zezi apiza ndi: «Ŋaa ngaa angwunu avinye maa yiga bunu kama sa? 16Nde aya buma ajanji baa, ŋaa nde ampa yo ŋa ajanji akima.» Baari baa ayuga bwa, bo ndi: «Kali kali, kibuna sa bwa ŋi.» 17Ŋaa Zezi kayuga bwa, nde kesi bo, ŋaa nde pizi ŋa bo ndi: «Mbari ye amaateende nca buku le Njyami ndi:

Kele leecuna ancua anjo,

ŋaa lo lemi kiriga kele leenini, le lesuga njo.

18Ŋaa aso ba baava kayila kele lia, njuru ye kezege. Ŋaa kele lia leva yila mbuuru lo lejaraga nde jarijari.»

Ba buna kawura lempo ŋa Sezare sikali?

19Ŋaa ayizigi angiri bila amfumu a baari ba baampa ambwoŋi a yugi ndi, Zezi baata ngana yia ma bo. Yia biri eli bo yiga baasaga ncuo ma kakwara Zezi parabu ŋaa. Ŋaa bo kiigi ŋa bwogo ba lembuuru. 20Ŋaa bo abaani ma kalege Zezi. Bo atumi baari ba baakura ndi, bo baanyima Njyami, ma buni bo atasa Zezi, ŋaa nde kapumuŋa nca mbari a nde-ankulu. Ma bwa bo akaba nde ŋa mfumu aZife, ŋaa wua kampa nde ŋa okunji a bungu wooli ka Arome. 21Ŋaa bo yiga baalege Zezi ejugu ndi: «Mfumu bizi leyayi ni we alyele, ŋaa we ayiziga maami ma tele. Ŋaa ntini ye ayiziga we, we akakese onini o baari ŋi, maami ma yiziga we ma jaa jaa, ma lemigi lesaga Njyami ndi, lesa. 22Ŋaa ma lyele bizi, ngiri a Moyize ciiri ye ma lyele bizi a be ma kawura lempo ŋa Sezare?» 23Ŋaa Zezi moni ndi, bo ma mbia nde ali, ŋaa nde ndi: 24«Ŋaa le ma mvyere mi doro lemon.» Bo ampa nde doro, nde pizi bo ndi: «Kadisi ki bila nkuumu yi ena?» Ŋaa bo akaali ndi: Ye mfumu a kasi Sezare! 25Kaŋaa, Zezi ŋa bo ndi: «Levuta elogo e Sezare ŋa nde-ankulu, ŋaa be leyaga e Njyami be se levuta ŋa Njyami nde-ankulu.» 26Ŋaa baari a bo ba atumi baa akimono biri ye pumuŋi Zezi nca mbari ŋi. Ekoli bo ma ekali e nde, ŋaa bo aki pi.

Baari baakpa kpa baanyuzuga?

27aSadiseye ake ayi ciina mpaani a Zezi. ASadiseye baari eli bo akini yalaga ndi baari ba ma akpaa ba kavura nyuzuga ŋi. Bo bakalege Zezi ejugu bi ndi: 28«Ee Mfumu, Moyize ti kiigi maateende ma bizi nca okanda wo angiri ndi: Aka mbuuru omon ŋa ndumu eli kiigi maasa baala, ŋaa nde ma kpaa, ŋaa nde kabiza kula. Balaga lia lekiizi le baali okaazi wo okwulu wua. Ma buni nde kuli oku wua kacia. 29Kabila kaalege bizi ojugu wua, ekiigi ŋa andumu ncaami. Wo ncomi obaali okaazi, ŋaa nde kpi mwana kali. 30Wo yuele se vuri baali okaazi wua, ŋaa nde kpi, nde ki kula ŋi. 31Amana wo otari oyagi okaazi nde-ankulu wua, tii bo aso ancaami abali okaazi wua, akpi, ŋaa se wookuli kali. 32Ŋaa amana okaazi wua se kpi. 33Ma bwa ntini ye nyusa Njyami baari aso baama kpaa, okaazi wua aka okari a na? Okorogo bo aso ancaami baakiigi alumu a nde?» 34Zezi akaala ŋa bo ndi: «Nca kasi ki abalaga baabala, akaazi se baabala. 35Ŋaa ba baaje kaka ma kasi kenyarigi ma ntini ye Njyami ye ka anyusa baari baakpa kpa, jaa ŋa abaala kali. 36Okorogo bo ba kama kpaa ŋi kabila bo yiga mva antuma Njyami a yulu. Bo yiga baaka baana a Njyami, kabila nde mi nyusa bo. 37Moyize ma selege mvyere ni, baari baakpa kpa baanyuzuga, biri yia eli nca kaata nde kasie ma ajazaga ma eti maakiigi yaga mbaa. Nde cwoli Mfumu ndi: Njyami Abarayame ŋa Njyami a Izake ŋa Njyami a Zakobe. 38Zezi alusa ndi: Njyami ka Njyami a baari baakpa kpa ŋi, ŋaa nde Njyami a baari amuon. Kabila baari baa aso aka muon ma nde.» 39Ŋaa ayizigi angiri ake ŋa Zezi ndi: «Mfumu we ŋaa yemiŋi lyele.» 40Okorogo bo akimalege nde ejugu ekima ŋi.

Ntuma mwana Davide

41Ŋaa Zezi ŋa bo ndi: «Baari ba adugi ndi Kristi ntuma Njyami mpabigi a Davide. Ŋaa bo mema ba alyele bwa? 42Okorogo, Mfumu wo ba acwolo ma Davide alyele nde-ankulu, nca buku le Pisomi ndi:

Mfumu alyele ŋa Mfumu a mi ndi:

Ka manci ka kwogo ka mi ka kalumu.

43Tii ke sa mi anyon a we aka ncina ntaami e we.

44Ŋaa Davide kacwolo nde ma Mfumu a mi, nde vuri ki mwana nde bunu?»

Be lebizi kasa mva ayizigi angiri

45Ŋaa ntini ye kiigi yuzuga lembuuru leso lia Zezi, nde ŋa alwoni a nde ndi: 46«Lesa oyeri, ma maami maasa ayizigi angiri. Bo njala bo alaazi amfa maave, ma buni baari aso amono bo. Bo njala ni abigi bo ma ebiri ba emakuga baari ka nca kangundu. Bo njala kaka ma ebiri ecomi kanca anjo ma ma abwono Njyami bila ebiri ecomi ba akiza. 47Bo aya ba apiina akuuli elogo njwori, ŋaa bo ba biga nca ebwoni e bo, ma kamvyere ndi bo baari baave. Ma bwa esisi ba asisa Njyami bo be evula ba abuga.»

Currently Selected:

Luke 20: teg

Highlight

Copy