Luke 23

Zezi li ka miizi a Pilate wo okunji a bungu le Zide

1Amana bo aso asarigi ma kaje bila Zezi mpila Pilate. 2Ka yia biri, bo aso yiga baakata Zezi maami ma oca ndi: «Bizi le ma amono balaga li, letuma baari a bizi a be mabu ndi, bo abiza amaami a bizi a be. Nde aliga bo ma kawura lempo le mfumu kasi ka Arome wo baacwolo ma Sezare. Ŋaa ndi nde Kristi ntuma Njyami, nde mfumu.» 3Ŋaa Pilate pizi ŋa Zezi ndi: «We ŋaa mfumu aZife?» Zezi kaali ŋa nde ndi: «Weankulu mbuuru wo alyele bwa.» 4Pilate ŋa amfumu a baari ba baampa ambwoŋi, ŋa lembuuru le lekiigi ŋaa ndi: «Mi kunu eka mono jaa leebi lesa balaga li, le esaga be ni abuma nde ŋi.» 5Ŋaa baari bakaselege lege ocicyezi ndi: «Nde mbuuru wo acogo baari abizi a be, mabu ndi, bo abiza maami abizi a be. Nde ŋaa ka bungu le Ngalile kasa baana. Amana nde yeni nca le Zide lwori, ŋaa le kami kiriga kunu.»

Zezi ka miizi ma Erode Atipase

6Pilate kayuga bwa, pizi ŋa baari baakiigi bila nde ndi: «Bizi a be mbuuru wu njiagi osi Ngalile?» 7Ŋaa bo akaali ŋa nde ndi, Zezi ni osi Ngalile. Ŋaa ma ntini yia mfumu a bungu kiigi Erode Atipase, nde kiigi li ka Zerizaleme. Ŋaa Pilate amatuma Zezi mpila Erode.

8Erode kiigi nca kase keenini ma kamono Zezi. Kabila nde kiigi ma yuga ba alyele ma nde. Ŋaa nde kiigi ma abiga kaka kaana ma kamono Zezi. Erode ŋa tari ndi Zezi lubu ŋaa asa nde mpiri ye lwari. 9Nde alege nde ejugu ba ekukuna, okorogo Zezi ki kaala ŋi. 10Ŋa amfumu a baari ba baampa ambwoŋi, ŋa ayizigi angiri se ayi mpila Erode, bo yiga se ba ayina Zezi maami ma ococa. 11Erode bila aworo a nde yiga ba atuga Zezi, ŋaa avurigi ŋa nde kasebe, yia biri ye legi bo nde mfa ye yiele. Amana Erode vuru vuti Zezi mpila Pilate. 12Ŋi kabaasa bwa, kancomi Erode bila Pilate kiigi ŋa kamaŋi keenini. Okorogo ma cugu lia bo kiigi yiga ondigi.

Ave Zezi kpi

13Pilate kuzigi amfumu a baari ba baampa ambwoŋi ŋa amfumu bila baari aso. 14Nde ŋa bo ndi: «Be leya bila mi mbuuru wu, be ni nde mbuuru wo acogo baari a be! Ŋaa mi kalegi nde ejugu ŋaa, kamiizi a be, mi emono ni, be lekata nde, kabila mi kimono jaa lesa nde leebi ŋa ŋi. Eli mi tuma ni abuma nde ŋi. 15Erode Atipase se kabiza jaa ma nde kamono, yia biri ye vuta nde Zezi mpila bizi a be. Balaga li jaa ye kasa eli abuma nde kali. 16Yia biri ye ciina mi ni abere nde, kabere katu, amana mi tuma apisa nde.» [17Antini aso kabaasa kiza le Paake, ŋaa ave apisi bo ongeneŋe omon.] 18Baari aso yiga baata nya ndi: «Lebuma mbuuru wu! Ŋaa be le pisa bizi Barabase!» 19Barabase kaje ongeneŋe kabila nde buma mbuuru ma ntini ye juani bo eta bila baari a Arome kanca kangundu. 20Pilate avura lyele bila lembuuru lia kabila nde asanaŋa pisa Zezi. 21Okorogo lembuuru lia yiga leta nya ndi: «Komo nde yila lemaanji! Komo nde yila lemaanji!» 22Ma lenja le otari, Pilate vuri dugi ŋa bo ndi: «Jaa lembuuru wu le kasa leebi lema? Mi eka mono jaa le baabuma nde ŋa ŋi. Yia biri ye tuma mi ni abere nde, kabere katu, amana mi pisa nde.» 23Ŋaa baari bu ba aselege kata nya ndi: «Komo nde ma lemaanji!» Ŋaa bo aselegi sati ajui abo nkeri nkeri. Pilate suki ŋaa nde yiga yaligi. 24Ŋaa Pilate osi ma lemigi le elyeli lembuuru lia. 25Nde pisi bo Barabase wo laayi bo. Ŋi alegi Barabase ma ongeneŋe, ma nde wo bumi mbuuru ma ntini ye si bo eta bila baari a Arome. Ŋaa Pilate ampa Zezi ŋa lembuuru, nde alyele ŋa lembuuru lia ndi bo asa mva lemigi lejii bo.

Ba abira Zezi ma kabuma nde

26Ŋaa ntini ye kiigi je aworo bila Zezi, bo amoni balaga lemon le lekiigi wa anguunu, nkuumu Simon. Nde kiigi mbuuru wo kangundu ka Sirene. Ŋaa aworo ba ka ba akwara Simon ma kabira lemaanji, ma kalwono Zezi bila lo. 27Bege le baari le kalwono Zezi. Ŋaa kanca bo kiigi ŋa bege le akaazi, baakiigi lila ma nya Zezi. 28Zezi kakalaga ma kacu kali akaazi baa, nde ŋa bo ndi: «Ye akaazi a Zerizaleme ba, lebiza kalila ma mi, ŋaa lelila ma be-ankulu bila baana a be.» 29Kabila ntini ye je kaya eli ba alyele ndi: «Kase ŋa akaazi ba enkuma, bila baabizi sa ovaligi.» 30Ŋaa baari yiga alyele ŋa ekuru ndi: «Leyiniŋa bizi! Ŋaa angaala ndi: Lefuga bizi! 31Okorogo aka baasa bwa, ma oti wo obizi, bunu baasa oti wo okayakaya?» 32Aworo ayi bila epira ekima jyele ma kabuma jo bila Zezi.

Aworo akomi Zezi bila ancere yila lemaanji

33Bo ato biri ye baacwolo ma: «Kabwa ka ocu.» Bo akomi Zezi kayila lemaanji ŋa epira ejwele bya. Omon ma lemaanji ka kwogo ka kalumu ka Zezi, ŋaa buga lemon ma kwogo ka kabogo ka Zezi. 34Ŋaa Zezi bwoni ndi: «Taara bologo bo kabila, bo akiya maami ma maasa bo ŋi.» Aworo baa ayagi nde amfa yiga ba anjwuna, amana bo akabi mon kampaniŋi a bo. 35Baari aki ma otele bakakese maami makiigi yira maa. Ŋaa amfumu ba aZife bakasebe Zezi, ndi: «Nde ni vuzugi baari, ŋaa aka nde Kirisite wo ntuma Njyami, ŋi nde kavuzuga nde-ankulu se.» 36Ŋaa aworo se asebi nde, bo ayi ciina mpaana nde, bo amvyeri nde anganga aŋayi ma ba cwolo ma vinengere. 37Ŋaa bo ndi: «Ŋaa aka wo mfumu aZife, vuzuga njuru a weankulu!» 38Kayila ocu a nde amaateende ampiri kayila kakari ndi: «Wu bu mfumu aZife.» 39Opira omon nca bo wo alegi ma lemaanji katuga Zezi ndi: «We ni Kristi ntuma Njyami ŋa ni vuzuga njuru a weankulu bila e bizi.» 40Ŋaa buga le opira le ngulu yiga ayuuma nde ndi: «Aa we se! We yiga akanyima Njyami ŋi, wo eli ama sisa ma lemigi loankulu mva nde. 41Embiza we esisi yemiŋi asisa kabila bizi a we le ewura maami maasi bizi a we. Ŋaa nde jaa leebi le kasi lema?» 42Amana nde ndi: «Ee Zezi ntini ye ya we nca omfumu o we, wo barigi mi.» 43Zezi kaali nde ndi: «Mi elyele jaajaa ni, lubu bizi a we lenyunuŋa nca kasi keeve ka Njyami.» 44Tari kiigi yiga yila ocu, vuzu oyili kanca kasi kaso, ŋaa lempiibi lia lebigi tii atari atari baakolo cugu. 45Kalembe keenini kama ataana ka yulu kanca Njo Njyami kabaagi ka amvunuŋu. 46Ŋaa Zezi ti nya ma jui leenini ndi: «Ee Taara, mi evuta oduduma mi kanca jiala e we.» Nde kamana lyele ambila maa, nde kpi. 47Mfumu aworo a Arome kamono jaa le levi lia, nde mpi Njyami leve ŋaa nde ndi: «Jaajaa mbuuru wu ŋa kiigi mbuuru woove!» 48Baari aso baayi ma nkundu baa bakakese ka nkuumu kya, bo amoni jaa le lemaaya. Ŋaa bo aso ka avuruga bo anjo, yiga kanca nya. 49Andigi a Zezi aso, tii se akaazi baasawa bila nde Ngalile, yiga kaka kalala, ma kakese maami mama sa.

Zizefu alege kabiima ka Zezi nca mwuma

50Kiigi ŋaa balaga lemon nkuumu a nde Zizefu, nde kiigi ŋa katomi nca amfumu aZife. Nde kiigi kave ka mbuuru, nde kiigi tele. 51Balaga lia kiigi osi kangundu ka aZife kacwoli ma Arimate. Nde kiigi maalege lila ma eyi ba omfumu o Njyami. Nde kiigi bizi maami ma kuri abuga baamon ba amfumu aZife maasi. 52Zizefu yeni mpila Pilate ma kalaa njila ma kayaga kabiima ka Zezi. 53Amana Zizefu ciezi kabiima kakali ma njuru a lemaanji, nde kuri kanca kalembe ka mvunu. Ŋaa nde legi nca mwuma wo amacuma nca kakubu ka kele. Ŋaa mwuma yia kiigi akini jiiga mbuuru ŋi. 54Kiigi ka ekinkolo ma ntini ye va tari ka abana cugu le ba awuuma. 55Akaazi baasi wa bila Zezi Ngalile baayi bila Zizefu, bo akesi mwuma ŋa lemigi le amalege kabiima ka Zezi nca kwa. 56Amana bo avurugi anjo a bo ŋa bo ayeni sa amwomi bila ananase#23.56 Ka Ezerayele aki sa amwomi bila ananase ma kakiele ebiima. Lekese nca Mareke 14.8. . Ŋaa bo ato cugu le kiza lia, bo awuumi#23.56 Lekese nca Nombere 20.10, Deteronome 5.14. .

Currently Selected:

Luke 23: teg

Highlight

Copy