Luk 13
13
Dzikayi biku bibi
1Ndili mene yayu, va batu baya tanda ne Zezu ati: « Pilati abuuma batu be Galile ye bangu beme dze ne ukaba bisemi bye Nzambi.» 2Zezu akalule ne bangu ati: «Beyi betsimene nati, batu be Galile be beme buuma babu, batakwe boko besi be Galile mesumu? 3Nyen, me tanda beyi, ni beyi ti nde dzika biku bibi, ne beyi betse waa si nda bangu. 4Ya batu iku ne nwambi, be ndaku yi layi ye silowe ye menawen kule ye bangu bawaa, beyi betsimene nati bangu batakwe boko be Zeluzalemi mamvu mebi? 5Nyen, me tanda beyi, ni beyi ti nde dzika mamvu mebi, ne beyi besi betse waa si nda bangu.»
Ngana ye nwili nwen nde buta
6Zezu ate bangu ngana ati: «Mutu motu edze ne nwili nwen kumvu figye nwedzi ekuna se kuba, vusa votu wangu aya fumba befigye be nwili nwanwu, ni eke bomo.» 7Wangu ne wibata kuba ati: «Lolo bisiwu bya bisatu, byami ye fumba befigye se nwili nwu, ni nwangu nde buta. Kumaka nwangu, nwen wanda buma ye ngolu, ye nwangu wi pika wa ni yi?» 8Mutu wi bata kuba nedzi ati: «Kunwu, dzika siwu yi make luma ibila, me somoko mbolise se kati. 9Toko nwen tse buta siwu yi ya, ni ti nwake buta, ma kumaka nda we me tanda.»
Zezu asaka nwatu wedze ne iklu vusa ve idzundu
10Vusa ve idzundu, Zezu edze ne ulakise se ndaku ye umbondu. 11Se ndaku ye umbondu yayu, yedze ne nwatu we umbiti nwen dzika dondoo ne iklu bisiwu iku ne nwambi nde sikwe. 12Ye Zezu eyene nwatu mene, yedzi ebanga wangu, nedzi ati: «Mama wami, Nzambi asaka we leme.» 13Zezu asatse wangu meboko, palikise ye nwatu mene esikwe telee, yedzi ekumise Nzambi. 14Ni kunwu we ndaku ye umbondu akanve ne Zezu esaka nwatu wayu vusa ve idzundu. Kunwu we ndaku ye umbondu awowe ne unkuka ati: «Yedzi ne masi untuba me bebe bidzandza, yakayi besaka beyi masi mamu, ni kaka vusa ve idzundu.» 15Zezu akalule nedzi ati: «Umpyeli nwen beyi nwanwu! Vusa ve idzundu, beyi we nde tuka nyangule bodzi yedzi ne ubapa ne utse nywan mangu ni nza? 16Nwatu yu, ni we imbisa dze Ablaami we Satan ekutaka se bisiwu iku ne nwambi, tadzi bake nyangule wangu medzisa vusa ve idzundu!» 17Ye Zezu ekalule vavu, besi bedze ne mbele nedzi bedze se sonyi. Ni batu besi bedze se itsisa ne mamvu meve me Zezu edze ne upika.
Ngana ye nwili nwen kumvu mutadi
18Zezu ati: «Ukani ve Nzambi ve tala ni yi? Yami ituka mikise vangu ne yangu ni yi? 19Vangu ve tala ni limbulu lite amene, le mutu ikuna se buka, ye limbulu lalu limene, ye langu liyikwe nwili wi neni, ye benyodzi bitunga mendaku kule bitatsi.»
20Zezu avele tanda ati: «Yami ituka mikise Ukani ve Nzambi ne yangu ni yi? 21Vangu ve tala ni yila yi uvudise pembe, nwatu ti avukise yila mene se pembe, ye pembe yi vude.»
Dzasa dze lititi
22Zezu atse Zeluzalemi. Asuta se bingundu ne membuka ne ulakise. 23Mutu motu nedzi ati: «Kunwu, batu be Nzambi itse lungise si va ba.» Zezu ne bangu ati: 24«Pikayi singa ne unyindzile se dzasa dze lititi, me tanda beyi beyitsi betse fumba nyindzile, ni nde tse tuka.»
25Ndili ye kunwu we ndaku itse telime, wangu atse dziba kutse ne bisapi, ye beyi bitse dze ituna, beyi betse banda ne udzumidze kutse. Ne utanda ati: «Kunwu, Kunwu, dzunvule besu kutse.» Ni wangu atse kalule ne beyi ati: «Me nde yiba beyi!» 26Ye beyi bitse tanda wangu ati: «Bebe bedza bila, ne unoto buma yotu, we dze ne ulakise se mepeyi me bingundu bye besu.» 27Wangu atse tanda ne beyi ati: «Me nde yiba beyi, lawayi nami, beyi bipika mamvu mebi.» 28«Ndili ye beyi bitse yene Ablaami, Izaaki, Zaakobi ne Batu be Nzambi besi se Ukani ve Nzambi, ye bitse yisa beyi ituna, ayayu ni ye beyi bitse lila ne ukweke mina.» 29«Batu besi betse yinga kwele ye musa nwibala, ne boko kwele ye itadzi dzikwa, ne ne boko ye sangwe, ne ne boko ye nwadzi, bangu besi betse pika itsinda dzineni buma yotu se Ukani ve Nzambi, 30yayu, ne boko be tima ye bangu bidzi limbisa, betse dze libusu, ne boko be tima ye bangu bidzi libusu, betse dze limbisa.»
Zezu awowe ne batu be Zeluzalame
31Ndili mene yayu, batu be Falizi boko batsindene kone Zezu, bangu nedzi ati: «Teme wa, tseke, utsina ne Elodi Atipasi ifumba buuma we.» 32Zezu akalule ne bangu ati: «Tseke tandayi ne mutu we utsengu nda ve mbakwe wayu, velolo ne yana me panza mimbiti, me saka mibedzu, mbisa yana me mana dzandza dzami. 33Ni unve lolo, yana ne mbisa yana matse umbukwe nwami, nde unve ti mutu we Nzambi awaa ulayi ne Zeluzalemi.»
34«Batu be Zeluzalemi! Batu be Zeluzalemi! Beyi bebuuma Batu be Nzambi, beyi bebuma be Nzambi eluma beyi ne memanya. Bidzuku kwe byami ifumba kukise beyi nda susu ikunzume kule bana bedzi, ni ka beyi nde tondo vavu. 35Ee, Nzambi atse lewe ngundu ye beyi. Me tanda beyi, beyi nde tse vele yene me, ndzii ne vusa ve beyi bitse tanda ati: ''Nzambi akaba meve ne mutu wiya ne kumvu yedzi.''»
Currently Selected:
Luk 13: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
