Luk 15
15
Ngana ye mutu we kundzile ndo mvene yedzi ye nyongo
1Betolingi be bedolo, ne batu bidzi ne mesumu, besi baya kwele ye Zezu ne uyuka mamvu medzi iwowe. 2Batu be Falizi ne belakisi be bitsila beyene vavu, ye bangu bepanda Zezu ati: «Mutu yu adze bane batu bidzi ne mesumu, adza ne bila kone bangu.» 3Ye Zezu ete bangu ngana ati: 4«Ti mutu motu tima ye beyi, adzi ne bindomvene meku metanyi ne menayi ne bindonvene iku, yotu ti ya nyongo, wangu nde tuka dzika bindonvene meku metanyi ne menayi ne bindonvene bitanyi ne binayi se mekuba ne utse fumba yotu ye me nyongo ndzii nedzi ikudzile yangu? 5Yedzi eyene ndonvene atsisa. Yedzi etumbidze yangu asatse kule idzuku.» 6Yedzi etse ndaku, abanga bembatsi ne bidzi kone dzi ati: «Yakayi bebe betsisa, ma yene ndomvene yami ye nyongo.» 7Me tanda beyi: «Yedzi ni vavu, ndili ye mutu widzi ne mesumu, imekidze Nzambi, Nzambi adzi se itsisa dzineni, itsisa dzedzi dzatakwe dze batu meku metanyi ne menayi, ne batu betanyi ne benayi bidzi telee, bamana mekidze Nzambi. Ne bangu baya nde dzamvu ne umvele mekidze Nzambi.»
Nwatu akobise dolo wedzi we nyongo
8«Niti, nwatu motu adzi ne bedolo bedzi iku, dolo motu ti anyongo, wangu nde takise ibamvu, akombo ndaku ne ufumba, ndzii nedzi ikudzile dolo we me nyongo?» 9Yedzi ikudzile dolo, wangu ne bembatsi ne bidzi kone dzi ati: «Yakayi betsisa ma yene dolo wami we me nyongo.» 10Me tanda beyi: «Yedzi ni vavu, ye mutu motu widzi ne mesumu imekidze Nzambi, yedzi ne itsisa tima ye betuma be Nzambi.»
Nwana we nyongo bakudzile
11Zezu avele tanda ati: «Mutu motu edze ne bana beme mebaka bole.» 12Nwandzi atanda ne tata ati: «Kaba me dzami ikavu dze unkobo.» Ye tata ekabene unkobo tima ye bana bole. 13Tata amana kabaka unkobo, va masi masuta, ye nwana we ibaka we unte esumbise nwedzi unkobo nwesi, aboko bedolo atse ne bangu se ilongo dzoko dze ulayi amene, awawu, wangu amana bedolo besi ne utsala. 14Ndili yedzi emana tsala bedolo besi, pinga yi neni ya kwa se ilongo dzadzu, wangu edze aya se unyingu. 15Yedzi etse dzandza kwele ye mutu motu we ilongo mene, mutu mene aluma wangu se mekuba ne utse bata bingu. 16Wangu afumba dza bila bye bingu, ni banyima wangu byangu. 17Yedzi etsimene se unlima nwedzi ati: «Tata wami, bedzandzi bedzi, bedzi ne bila biyitsi, bedza nda bangu bitondo, ni me wuya, me waa ne menzala! 18Uve ma vutse kwele ye tata wami, ti makalwe wawu, me tanda wangu miti, tata, ma pika mesumu busu ve Nzambi ne vowe. 19Medzi kaka telee ne umvele dze nwana wowe. Bata me nda bedzandzi bowe.» 20Yedzi etsimene vavu, yedzi etelime ne uvutse kwele ye tata. Tata ayene wangu asa ne ulayi ne ndaku, ye tata eyene wangu tsesi. Tata atse ne mbangu, asanzile nwana yoloo. 21Nwana nedzi ati: «Tata wami, ma pika mesumu busu ve Nzambi ne busu vowe, medzi kaka telee ne umvele dze nwana wowe.» 22Ni tata ne bedzandzi bedzi ati: «Yakayi wangu ne linga yotu yive mesadzi, mesadzi, swisayi nwana wami. Somayi wangu lingasi se unlenvu, ne bekotoko se mekulu. 23Yakayi ne ngombo wa nwongo, buumayi ngombo wayu. Bebe bepika itsinda, bedza ya bebe betsisa. 24Utsina ne nwana wami yu edze awaa, anyuse, edze anyongo, bayene.» Ye bangu bebanda itsinda. 25Ndili mene yayu nwana wedzi we wika we ibaka edze ni mekuba. Yedzi eyinga mekuba, atsindene kone ndaku, ayuka batu bebina itsinda. 26Wangu abanga undzandzi motu, asunwule wangu ati: «Misuta kwele ye ndaku ni me nza?» 27Undzandzi nedzi ati: «Nwandzi wowe aya vutse, tata wowe abuuma ngombo wiwongo, ne nwana wedzi meye vutse yemini. 28Ye nwana we wika ekanve, alewe nyindzile se ndaku. Tata apula ne ubondo wangu ati, yaka nyindzile se ndaku.» 29Ni nwana we wika ne tata ati: «Me wedzi nowe wa bisiwu, ne bisiwu me pika dzandza dzowe, ma sa nde lewe dzowe iluma me pika. Ni we sa nde ne kaba me nwana taba, witi me tsisa besu ne bembatsi bami. 30Ni ye nwana wowe yu meya, we me tsala we bedolo besi ne baatu be bifwati, wa buuma wangu ngombo wiwongo.» 31Ye tata ekalule nedzi ati: «Nwana wami, we dzika benu wa masi mesi, byami byesi ka byowe. 32Unve bebe bapika itsinda, batsisa utsina ne nwandzi wowe yu edze awaa, wangu anyuse. Wangu edze anyongo, bakudzile.»
Currently Selected:
Luk 15: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
