ดอ โฆว 23
23
ลอง นาง ซารา แฮะ ยัม
1นาง ซารา แฮะ โนะ อู มาย็อห ดี อา ฆึร ดี บู ซีนัม, อัน บอ ยัม. 2ดอ ยัม อัน, อัน กอย โดง จืร กีรียาดอาบา. มืง ตี บอ จืร มืง เฮโบรว. อึณ กอย ดี กาดาย มืง อี จืร มืง กานัณ. อัน แฮะ ฮอต ยัม, อาบราฮัม บอ มึห น็อห กลึร. อัน ฮาว ลึบ โดง กอย อีบึณ อัน บอ ยาม.
3แฮะ ฮอต, อัน วี ยีต เลห โดง กอย อัน, ฮาว กาลาง โฆรห ดี ดูอี อาโมยว เฮทีด อี กอย ดี ตี. 4อัน ต็อห, “โอว แฮะ มูห แคต แคง มืง เบ. ดอ ตี นี โอว ยี หมาณ, แตห เบ ดัว กาดาย ดี โบง บาเรว, แตห โอว ปึอน ดี ดีบ โดว อีบึณ โอว.” 5ปัน ตี เฆ ดูอี อาโมยว เฮทีด วี ต็อห ดี อัน. 6“แม ดา, แตห แม โทม โฆรห เย. แม มูห ดา กาณา ปี ตึย เฌาพรา อี กอย รึม โดบ เย. แตห แม ร็อห กาเดา มาว อี หมึอม หลึอม โตต, เบลห โดว อีบึณ แม นา แคง. กาแต เย, อึณ ตู มึห อาเซ อี ตู ควาง แม โบง ปาย ตี.”
7ปัน ตี อาบราฮัม ตึอน วี ยีต, มูด ฆีณ อัน ดี อาต เฆ ดูอี อาโมยว เฮทีด ตึอน. 8อัน ต็อห, “เซ เบ ซี แตห โอว ดีบ โดว อีบึณ โอว แคง บาเรว, แตห เบ โทม โฆรห โอว, แตห เบ ฮาว ดี อาเพโรน อี มูห ฆอน อาโฌวฮาน, 9แตห อัน ดัว กาเดา มาว อี จืร มาดเปนลา, อี กอย โคบ โดง นา อัน, แตห เบ หมาณ ดาง โอว, แตห อัน ดัว กาเดา มาว ตี ดี โอว. โอว ดี บอ จึห ดี อัน, ดัว แคะ ปี โลว อัน, แตห อึณ แบน บาเรว เย.”
10อาเพโรน ตึอน ยี กอย รึม โดบ เฆ ดูอี อาโมยว เฮทีด ตึอน. บอ อัน มูห ดูอี เฮทีด อี กอย โคบ มาโลห มืง. อัน ต็อห, แตห ดอน อี โทม. 11“อึย ดา, แตห แม โทม โฆรห โอว, แตห บอ ดอน อี โทม. บอ โดง นา ตึอน, บอ กาเดา มาว อี กอย ดี โคบ นา ตึอน, โอว ดี ดัว ดี แม ปีเยณ. เฆ ดอน อี อี โทม โฆรห โอว ดอ ตี นี แฮะ นับ, โอว ดัว ปีเยณ กาดาย ตี. แตห แม ฮาว เบลห โดว อีบึณ แม.”
12อาบราฮัม ปี วี มูด ฆีณ อัน ดี อาต ดอน อี, 13ปี วี กาลาง ดี อาเพโรน แตห ดอน อี ปึอน ดี โทม โฆรห อัน. อัน ต็อห, “แตห แม โทม ซีคยา โฆรห โอว. โอว ดี ดัว ง็อห อัน, โอว ดี จึห กาดาย ตี. โอว บอ หมาณ แตห แม ดึห ง็อห อัน ดี โอว, แตห โอว ปึอน ดี เบลห โดว อีบึณ โอว.”
14อาเพโรน ตึอน วี ต็อห, 15“อึย ดา, แตห แม วี โทม โฆรห โอว. กาดาย ตี, ง็อห อัน มูห รึอน พวน มาย็อห โบ็ง. อาว ลืก, แม มูห ฆึก โอว, โอว ดัว ดี แม, แตห แม ฮาว เบลห โดว อีบึณ แม.”
16อาบราฮัม บอ โบง ปี หมาณ อาเพโรน, ดึห ง็อห กาดาย, ดัว ดี อัน.
17ปาย ตี อาบราฮัม แฮะ แบน ดา กาณา กาดาย ตี. คา อาต ดา อาเพโรน แฮะ มูห ดา กาณา อัน. โดง ตี กอย เครียะ โดง จืร มัมเร. อึณ มึห กาเดา มาว บอ เฮ ดอน โมยว อี กอย ดี กาอูน โดง นา อัน. 18อาบราฮัม แฮะ จึห กาดาย ตี, แตห เฆ ดูอี เฮทีด ดอน อี ยึร. อึณ มูห เฆ อี แฮะ ตัห กาฌูะ ดี โคบ มาโลห มืง ดอ ลาย ซังคยาง เฆ ลอง อัน ตี. 19อัน แฮะ ฮอต จึห, อัน วี ฮาว เบลห อูน โดว อีบึณ อัน แคง กาเดา มาว อี จืร มาดเปนลา อี กอย เครียะ โดง จืร มัมเร ตึอน. มืง ตี บอ จืร เฮโบรว บอ กอย แคง กาดาย มืง กานัณ. 20เฆ ดูอี อาโมยว เฮทีด, เฆ แฮะ ดัว โดง ตี, แตห อึณ แบน บาเรว เฆ ดูอี อาโมยว อาบราฮัม ตึอน.
Currently Selected:
ดอ โฆว 23: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
