ยฮ 13

ลอง เฌา เยซู บาย เปลา ดีแบ อัน

1อึณ ยี ฌัม อาคราว อาต โบง เฆ บลอย โหลห เฆ ดูอี อายูดา ดอ กาโลห เฌาพรา กาง เฆ. ดอ อัน ตี เฌา เยซู แฮะ นับ, อาคราว ดี โลว เลห อัน ตัะ แดง กาดาย นี แฮะ ตัห. อัน ดี วี โฮะ กอย รึม โดบ ฆูณ อัน. อัน มืร แฮะ ร็อก เซเซ ดูอี อี กอย แดง กาดาย, อี โดบ อัน. อัน มืร คัม ยัม ดี ร็อก เฆ.

2บอ เฌา เยซู บอ ดีแบ อัน, เฆ ยี กอย รึม โฮม โบม หมึร เฆ. บอ โบว กานัม อี จืร ซาตาน, อัน แฮะ ฮอต ฮับ นา ตู หมึอม แคง น็อห อายูดัด อี มูห ฆอน อาซีโมน ตึอน, อี จืร บอ อาซาคารีโอด. อัน แฮะ ฮับ แตห อายูดัด นับ, ปี ดี ปาย ดี อาบ เฌา เยซู ดี รันซู อัน. 3ดอ อัน ตี เฌา เยซู แฮะ นับ ซีคยา, อึณ มูห ฆูณ อัน แฮะ ดัว ปวน ดี อัน, แตห อัน ปึอน ดี อึบ โตต ดอน โมยว. เฌา เยซู บอ นับ, อัน แฮะ ดึอม เลห โดง กอย เฌาพรา. แฮะ ฮอต, ดอ ตี นี, อัน ดี วี เวณ โดง กอย อัน. 4โคว, อัน วี ยีต โดง กอย โฮม รึม เฆ, วี บูต ซีโตว อัน, วี ดึห กาแมะ วี ปัก ดี ณอย อัน. 5แฮะ ฮอต, อัน วี ดึห อึณปาน, โหลว อึม นา แคง, วี จูห ดี บาย เปลา ดีแบ อัน. อัน วี ดึห กาแมะ ตึอน, วี คูด เปลา เฆ.

6ดอ ฌัม อัน ดี อาเปตารู, อาเปตารู วี ต็อห ดี เฌา เยซู, “แม เฌา, แม ซี บาย เปลา โอว?”

7เฌา เยซู วี ต็อห, “ดอ ตี นี, แม หณัม นับ ลอง ดาง ปี โบง โอว นี. วาย นี, อึณ ยี ดี กาหลูห ดี น็อห แม.”

8อาเปตารู วี ต็อห, “อาว ปึอน. แม ตู ปึอน บาย เปลา โอว ดอ เหมา.”

เฌา เยซู วี ต็อห, “เซ โอว ตู ปึอน บาย เปลา แม, แม ตู ปึอน กอย รึม โดบ โอว.”

9อาเปตารู ปี วี ต็อห, “เซ อึณ ปาย ตี, แม เฌา, แกวะ แตห แม บาย มี เปลา โอว. แตห แม บาย บอ แด บอ ฆีณ โอว.”

10เฌา เยซู วี ต็อห, “เซ ดูอี อู วี แฮะ ฮอต ตา อึม, อัน โลว วี บาย มี เปลา อัน. โดว อัน แฮะ ฮอต ลูย. บอ เบ แฮะ ลูย. อึณ ยี ตู มูห เบ ดอน อี อี แฮะ ลูย ปาย ตี.” 11เฌา เยซู แฮะ ฮอต กาลาง ลอง ตู มูห ดอน อี อี แฮะ ลูย, โกบ นับ อัน อาเซ ดี อาบ อัน ดี รันซู อัน.

12เฌา เยซู แฮะ ฮอต บาย เปลา เฆ ดีแบ อัน, อัน วี ชึบ ซีโตว อัน, วี ฮาว โดง ดึอม กอย อัน. ปัน ตี อัน วี ดีหมอด เฆ, อัน ต็อห, “เบ นับ, เหมา อึณ ปาย ปี โบง โอว ฌึร ตี? 13เบ นับ ดี แดะ โอว ต็อห, ‘ซารา.’ อาตี แฮะ หมาน แฮะ มูห. โอว แฮะ มูห ดา ซารา เบ. 14ดอ ตี นี, เบ ยี แฮะ ยึร, โอว แฮะ มูห ดา กาณา เบ บอ ดา ซารา เบ, โอว ยี แฮะ บาย เปลา เบ. โคว, แตห บอ เบ ลาย บาย เปลา เบ. 15โอว แฮะ โบง บยัะ ดี เบ, แตห เบ วี โบง แปะ แฮะ โบง โอว ดี เบ. 16โอว ต็อห อาคัร ดี เบ. เซ อึณ มูห หมาย อี, อัน ตู ตาง หลึอม ดา กาณา อัน. เซ อึณ บอ มูห อามู อามาด อี กาลาง โฆรห ดา กาณา อี ตึย อัน, บอ อัน ตู ตาง หลึอม ดา อี จัร อัน. 17โคว, ดอ ตี นี, เบ แฮะ ฮอต นับ ลอง อัน ตี. เซ เบ บอ โบง แคะ ปี นับ เบ, เฌาพรา ดี ม็องการา แตห ดี เบ.”

ลอง ดูอี อี ดี อาบ เฌา เยซู ดี รันซู อัน

18วาย อัน ตี เฌา เยซู วี ต็อห, “ปี ดี กาลาง โอว ดอ ตี นี, อาว บาะ เบ ดอน อี. โอว นับ ดอน อี วี ปี ร็อห โอว. อึณ ยี โลว แบน ปี ปี ดึอม แดม อูน แคง บับ เฌาพรา. อึณ ต็อห, ‘ดูอี อู วี, อี โฮม รึม โดบ โอว, อัน แฮะ วี แบน รันซู โอว.’ โฆรห ตี โอว วี กาลาง ดี เบ ดอ ตี นี.

19โอว กาลาง ลอง อัน ตี ดี เบ อาต แบน อัน. เซ อึณ ฮี แบน ปี ต็อห โอว, เบ ดี บอ นับ บอ หณึม, อึณ มูห โอว, อี ดี คยอด ดูอี. 20โอว ต็อห อาคัร ดี เบ, อาเซ รวห ดูอี ปี ตึย โอว, อึณ ปี อัน รวห บอ โอว. อาเซ ยี รวห โอว, อัน รวห บอ อัน เฌา อี แฮะ ตึย โอว.”

21เฌา เยซู แฮะ ฮอต กาลาง โฆรห ตี, อึณ วี แบน ดูก ดี น็อห อัน. อัน วี ต็อห, “โอว ต็อห อาคัร ดี เบ. อึณ มึห ดูอี อู วี กาแต เบ, อัน ดี อาบ โอว ดี รันซู โอว.”

22ปัน ตี เฆ ดีแบ อัน วี ลาย ยอด. เฆ ตู นับ อาเซ อึณ มูห, วี ปี กาลาง อัน. 23อึณ ยี มูห ดีแบ เฌา เยซู อู วี, วี ปี ร็อก เฌา เยซู. อัน กอย เครียะ เฌา เยซู. 24อาซีโมน, อี จืร บอ อาเปตารู, อัน วี ซีกู วี กอย เครียะ เฌา เยซู วี ต็อห ดี อัน, “แตห แม ดีหมอด ดา ซารา, อัน ต็อห ลอง อาเซ ปาย ตี.”

25ดีแบ อี ตึอน วี เน ดี เฌา เยซู, วี ดีหมอด อัน ต็อห, “ซารา, อาเซ อัน มูห?”

26เฌา เยซู วี เวียะ โฆรห ตี ต็อห, “อึณ มูห วี ปี ดี ดัว โอว คามูน นี. โอว ฮี จึบ แคง ซีลัยะ, โอว ดี ดัว ดี อัน.” ปัน ตี อัน วี ดึห คามูน, วี จึบ แคง ซีลัยะ, วี ดัว ดี อายูดัด ตึอน, อี มูห ฆอน อาซีโมน, อี จืร บอ อาซาคารีโอด. 27อู ซีณ ดอ ดึห อายูดัด คามูน ตี, โบว กานัม วี ลึบ แคง โดว โบ็ง อัน อู เฌณ. โคว, เฌา เยซู วี ต็อห ดี อัน, “ปี ดี โบง แม, แตห แม โบง นังฆัน.” 28เฆ อี กอย รึม โฮม รึม, อาว มึห อาเซ นับ เหมา อึณ ปาย ปี ต็อห เฌา เยซู โฆรห ตี ดี อายูดัด. 29มัง อี ยี ทาง, เฌา เยซู แฮะ จัร อัน จึห ปี ดี โลว เฆ ดอ บลอย ตี โกบ มูห อัน ดา อี โฆ็ง รึอน เฆ. มัง อี บอ ทาง, เฌา เยซู จัร อัน ดัว ดี ดูอี ฆีน. 30อายูดัด แฮะ ฮอต ดึห คามูน ตี, อัน วี เลห โดง กอย เฆ. ดอ อัน ตี ยี อับ ว็อง.

ลอง เฌา เยซู กาลาง ดี อาต ปี ดี ปาย อาเปตารู

31อายูดัด แฮะ ฮอต เลห โดง กอย เฆ, เฌา เยซู วี ต็อห, “ดอ ตี นี, อาพูง ดังโคว โอว, อี แฮะ แบน ฆอน ดูอี, อึณ ดี ลึห ซีคยา, แตห อี ยึร. ปี ดี คัม โอว ดอ ตี นี ดี แตห บอ อาพูง ดังโคว เฌาพรา ลึห ซีคยา ดี ดูอี ดอน อี. 32โกบ โบง ฆอน เฌาพรา แตห อาพูง ดังโคว เฌาพรา ลึห ซีคยา, บอ เฌาพรา ดี วี โบง แตห บอ ฆอน อัน มึห อาพูง ดังโคว เฌาพรา. เฌาพรา ดี บอ โบง ปาย ตี อู เฌณ.

33เบ ดูอี ปี ร็อก โอว, โอว ดี กอย รึม โดบ เบ คอ อี แจก. เบ ดี บอ วี เหรต โอว. ปี ดึอม กาลาง โอว ดี เฆ ดูอี อายูดา, โอว ดี วี กาลาง ดี เบ ดอ ตี นี, เบ ตู ปึอน โดบ ฮาว โดง ดี ฮาว โอว ดอ ตี นี.

34โอว ยี ดัว ดารา กามาย ดี เบ. เบ โลว ลาย ร็อก. โอว แฮะ ร็อก เบ. ปาย ตี บอ เบ โลว ลาย ร็อก. 35เซ เบ ลาย ร็อก, อึณ ดี แตห อี เฮา ดอน อี นับ ลอง มูห เบ ดีแบ โอว.”

36ปัน ตี อาซีโมน, อี จืร บอ อาเปตารู, อัน วี ดีหมอด เฌา เยซู ต็อห, “แม เฌา, แม ดี ฮาว นา เหมา?”

เฌา เยซู วี ต็อห, “โดง ดี ฮาว โอว, แม ตู ปึอน โดบ ดอ ตี นี. วาย นี, แม ดี วี โดบ.”

37อาเปตารู วี ต็อห, “แม เฌา, เหมา อึณ ปาย ปี ตู ปึอน โอว โดบ แม ดอ ตี นี? โอว ดี คัม ดี ยัม กาดาง แม.”

38เฌา เยซู วี ต็อห, “แม ตู เฌณฌา ซีคยา ลอง ปี ต็อห แม, แม ดี คัม ดี ยัม กาดาง โอว. โอว ต็อห อาคัร ดี แม. อาต กาตวน เอียน, แม ดี กาลาง โอย เฌณ ต็อห, แม ตู นับ โอว.”

Currently Selected:

ยฮ 13: pce

Highlight

Copy