ลก 16

ลอง แดเจณ อี ลึมลา โกรวกราม ดูอี ครัม

1เฌา เยซู วี ต็อห ดี ดีแบ อัน, “อึณ แฮะ ดึอม มึห ดูอี ครัม อู วี. อัน มึห แดเจณ อู วี, อี อึบ โตต โกรวกราม อัน. ดูอี ครัม ตึอน บอ ยึร อี เฮา กาลาง ลอง แดเจณ อัน ตี. เฆ ต็อห, อัน ตู บัร ซีคยา รึอน ดา กาณา อัน. 2ดา กาณา บอ แดะ แดเจณ อัน, ดีหมอด อัน ต็อห, ‘โอว ยึร อี ตู หมึอม แบน โมยว แบน โมยว ลอง ปี โบง แม. แม อาว ฮู ปึอน โบง ฆาน โอว. แตห แม บยัะ บับ ฌาราง ปี แดม อูน แม ดอน โมยว, แตห โอว นับ.’

3อัน แฮะ ฮอต ต็อห ปาย ตี, แดเจณ ตึอน ต็อห แคง น็อห อัน, ‘ดา กาณา โอว แฮะ ต็อห ดี แวน โอว, แกวะ ฮู แตห โอว โบง ฆาน อัน. มาเซ ปี ดี โบง โอว? โละ มาน, โอว ตู คัม ดี โบง. โอว ตู มึห โปลม. หมาณ ดี โฮม ดี อี เฮา, โอว ซาย อี. อาว กาอาบ โอว โบง. 4อึร, โอว แฮะ นับ ปี ดี โบง โอว. โอว ดี โบง ปาย นี. เซ โอว อาว ฮู ปึอน โบง ฆาน โอว นี, อึณ ดี มึห ดูอี ดี บาง โอว แตห โอว กอย แคง กาง เฆ.’

5แฮะ ฮอต ปัน ตี ดูอี ตึอน บาง เฆ ดูอี ดอน วี อี การ็อห ดี ดา กาณา อัน. อัน ต็อห ดี อู วี, ‘แคะ เหมา แม มึห ดี การ็อห? แคะ เหมา แม ดี โลว วี ดัว ดี ดา กาณา โอว?’ อัน แฮะ ฮอต ต็อห ปาย ตี, 6ดูอี ตึอน วี ต็อห ดี อัน, ‘โอว การ็อห นามัน อู มาย็อห ปูง.’ แดเจณ ตึอน วี ต็อห, ‘นี, ดึห บับ ปี แดม อูน แคะ ปี การ็อห แม. แตห แม ตูต ดี นี, แตห แม วี แดม แฮ แฮ, บยอง แตห อึณ แบน พัน ฆึร ปูง.’

7แฮะ ฮอต, อัน วี ต็อห ดี ดูอี ปอ อู วี, ‘แม และ? แคะ เหมา แม แฮะ การ็อห ดี ดา กาณา โอว?’

ดูอี ตึอน วี ต็อห ดี อัน, ‘โอว การ็อห ดีฆาว อู มาย็อห แบล.’

แดเจณ ตึอน วี ต็อห, ‘นี, บับ ปี แดม อูน ปี การ็อห แม. แตห แม บยอง แบน ดา ฆึร แบล.’

8ปัน ตี ดา กาณา อัน วี อืบ แดเจณ อัน ตึอน. โคว, อัน ปี ซัะ โบง นา หมาน, อัน ยี แฮะ หล็อก กาเซา. เฆ ดูอี อี ตู โดบ เฌาพรา, ดอ โบง เฆ ฆาน เฆ, เฆ นับ ดี ลาย ปีหล็อก หลึอม เฆ ดูอี อี กอย บลาก มึห บลาง เฌาพรา. 9โคว อัน ตี โอว ยี ต็อห ดี เบ, แตห เบ กาซาง โกรวกราม เบ, แตห เบ ปึอน ฆึก กืน. เซ โกรวกราม เบ แดง กาดาย นี แฮะ โตต, เฌาพรา ยี ดี รวห เบ, แตห เบ กอย แคง กาง อัน, อี มัน ซีคยา เซเซ.

10อาเซ กาซืร ดี โบง ฆาน อี อาเร ตู ตาง, อัน ดี บอ กาซืร ดี โบง ฆาน อี อาเร ตาง. อาเซ ยี ตู กาซืร ดี โบง ฆาน อี อาเร ตู ตาง, อัน มืร ตู แป ดี โบง กาซืร ฆาน อี อาเร ตาง. 11บอ เบ, เซ เบ ตู นับ ดี ลึมลา ซีคยา โกรวกราม เบ, บอ เฌาพรา ตู อาบ โกรวกราม อัน ดี เบ อี ตู ปึอน ชึม, ตู ปึอน หราย. 12เซ เบ ตู กาซืร ดี ลึมลา โกรวกราม ดูอี เฮา, อึณ ตู มึห อาเซ อี ยัะ ดัว โกรวกราม อัน ดี เบ.

13อาว มึห ดูอี อี ปึอน แบน หมาย ดา กาณา อา วี. เซ อัน ร็อก อู วี, อัน ดี วี ฌ็อง ปอ อู วี. เซ อัน บอ โทม โฆรห อู วี, อัน ตู วี โรวเซ ปอ อู วี. ปาย ตี, บอ เบ, เบ ตู ปึอน โดบ ซีคยา เฌาพรา บอ โบง แบน โมยว แบน โมยว แตห เบ ปึอน กืน รึอน.” เฌา เยซู แฮะ มาโนว ปาย ตี.

14เฆ พึง พารีแซ, เฆ ยี มูห ดูอี อี ร็อก รึอน. ดอ โทม เฆ ดอน โมยว ปี มาโนว เฌา เยซู, เฆ กาณัห เฌา เยซู. 15เฌา เยซู วี ต็อห ดี เฆ, “เบ นับ ดี กาลาง แตห เฆ ดูอี เฮา ทาง เบ แฮะ หมึอม แฮะ บอด. เฌาพรา ยี นับ น็อห เบ. เซ ดอน อี แดง กาดาย ต็อห, โมยว นี โมยว นี แฮะ หมึอม, แฮะ บอด, เฌาพรา ยี ต็อห, อาว มูห, อาว หมึอม. อึณ หมึอม กาอีห ดี งาย อัน.

16อู ซีณ ดอ โฆว อัน กอ ฌัม โจว ดา ซารา อายอฮาน อี จึบ ดูอี แคง อึม, ดูอี แฮะ ปึอน ดี โทม ดารา ปี ดัว เฌาพรา บอ ดารา ปี แดม เฆ ดูอี อี บยาน โฆรห เฌาพรา. วี จูห ซีณ โจว อายอฮาน ตี, ดูอี วี กาลาง โฆรห เฌาพรา อี แตห น็อห ดูอี ดาคึย, บอ ลอง มืง ปี อึบ เฌาพรา. เฆ ดูอี อี โทม ลอง อัน ตี, เฆ กืน บอ ลาย กาพาะ, ลาย กาเซียะ ดี ลึบ แคง มืง ตี. 17เซ กาดาย บอ ฆางหราว ดี บอ หราย, ดารา เฌาพรา ตู หราย ดอ เหมา. ซีห ดีแตด อี ดึก ดี โดว ทัม อู โดว แคง บับ ดารา เฌาพรา มืร ตู หราย ดอ เหมา.

18เซ ดูอี แวน อีบึณ อัน, วี ดึห อีบึณ กามาย, ดูอี ตึอน มึห หมาบ ลูต อีบึณ. ดูอี อี ดึห อีบึณ อี แฮะ ฮอต คัด ดี อี เฮา, บอ อัน แฮะ โบง หมาบ ลูต อีบึณ อี.”

ลอง ดูอี ครัม ฆาย ดูอี ฆีน

19วาย อัน ตี เฌา เยซู วี ต็อห, “อึณ แฮะ ดึอม มึห ดูอี ครัม อู วี, อัน ชึบ เซเซ ครึง อี เรณ อี กาแหล ปี ชึบ คูนดีคัม. ดอน ซีแง อัน บอ โฮม แพ โฮม ซีแงห, กอย ดาคึย, ตู เอต มาเซ. 20อึณ บอ มึห ดูอี ฆีน อู วี. อัน จืร อาลาฌารูด. อัน มึห ดีม บอ โดว. เฆ ดูอี เฮา แฮะ ตัห เบลห อูน อัน, แตห อัน กอย กาตัด มาโลห กาง ดูอี ครัม ตึอน. 21ดูอี ฆีน ตี บัร ดี โฮม โบม อี กาโลย แคง กาง ดูอี ครัม. อึณ บอ มึห มาโซว ตัห เลียะ ดีม อัน.

22แฮะ ฮอต ปัน ตี ดูอี ฆีน ตึอน บอ ยัม. เฆ อามู อามาด เฌาพรา ตัห ดึห อัน, แตห อัน กอย รึม โดบ ดา อาบราฮัม ตึอน. วาย อัน ตี บอ ดูอี ครัม แฮะ วี ยัม. เฆ บอ ดีบ โดว อัน แคง บาเรว. 23ดอ กอย ดูอี ครัม แคง มืง มารานัะ, ดอ คัม อัน ดูก แบน โมยว แบน โมยว, อัน บอ ซากึห ยอด ดา อาบราฮัม นา กาโต็ง. บอ อาลาฌารูด กอย โคบ อาบราฮัม. 24อัน วี ดัด ตาง ต็อห, ‘อึย ดา อาบราฮัม, แตห แม กาเว โอว. โอว หมาณ, แตห แม แตห อาลาฌารูด ตัห โดง กอย โอว นี, แตห อัน จึบ กานู อัน แคง อึม, แตห อัน ฌูด ดี ซีดัะ โอว, แตห อึณ เฆียด ดี โอว อี แจก. โอว แฮะ ดูก กาเซา แคง เงา นี.’

25ดา อาบราฮัม วี ต็อห, ‘อึย หลาน, แม โลว โหลห, ดอ กอย แม แดง กาดาย, แม แฮะ ปึอน โตต นา หมึอม ดอน โมยว. อาลาฌารูด ยี แฮะ ปึอน อี ตู หมึอม ดอน โมยว ดอ กอย อัน แดง กาดาย. ดอ ตี นี, อาลาฌารูด แฮะ ปึอน กอย ดาคึย โดง กอย โอว นี. แม ยี โลว คัม ดูก. 26แดง ตี, อึณ มึห กาเดา ฮูเลา อี ลึก กาแต เอ นี. เซ ดูอี ซี กาโลห โดง นี, ฮาว ฌัม โดง กอย แม, อาว ปึอน. เซ อึณ บอ มึห ดูอี กอย บลาก เบ, เซ เฆ ซี ตัห ฌัม โดง นี, บอ เฆ ตู ปึอน ดี ตัห ฌัม.’

27อัน แฮะ ฮอต กาลาง ปาย ตี, ดูอี ครัม ตึอน วี ต็อห, ‘อึย ดา อาบราฮัม, ดา เย, เซ อึณ ปาย ตี, โอว หมาณ, แตห อาลาฌารูด เวณ ดี กาง ฆูณ โอว. 28โอว ซี มึห อูกัด อูวา โอว พัน วี. แตห อาลาฌารูด กาลาง ดี เฆ, แตห เฆ ซาดีก, แกวะ แตห บอ เฆ ตัห ฌัม โดง กอย โอว นี. ดี นี มึห มี เซา เฆ ดูก แบน โมยว แบน โมยว ปี โลว อี คัม.’

29ดา อาบราฮัม วี ต็อห, ‘เฆ อูกัด อูวา แม, เฆ แฮะ มึห บับ เฌาพรา ปี แดม อูน ดา อาโมวแซ ตึอน. เฆ แฮะ มึห บอ บับ เฌาพรา ปี แดม อูน เฆ ดูอี อี บยาน โฆรห เฌาพรา. แตห เฆ อูกัด อูวา แม ตี โทม ปี แดม อูน แคง บับ เฌาพรา.’

30ดูอี ครัม วี ต็อห, ‘อึย ดา อาบราฮัม, ดา โอว, อึณ ตู แบน ปาย ตี. เซ มึห ดูอี แฮะ วี ยีต วี อีม วาย แฮะ ฮอต ยัม, เซ อัน ดี ตัห ฌัม โดง กอย เฆ, เฆ ดี บอ นับ ดี แวน น็อห บรีม บอ ดึห น็อห กามาย.’

31ดา อาบราฮัม ยี ต็อห, ‘เซ เฆ ตู ซี โทม โฆรห ปี แดม อูน ดา อาโมวแซ บอ เฆ ดูอี อี บยาน โฆรห เฌาพรา, บอ อี วี ยีต วี อีม วาย แฮะ ฮอต ยัม, เฆ ดี แวน บอ อัน, ตู โทม โฆรห อัน.’” เฌา เยซู มาโนว เฆ ดูอี กืน ปาย ตี.

Currently Selected:

ลก 16: pce

Highlight

Copy