ลก 2
2
ลอง เฌา เยซู แฮะ ฆึอด
1ดอ อัน ตี คูนดีคัม อาแกซา ออกูทู ดัว อามีง ดี ดูอี ดอน อี แคง มืง ปี อึบ อัน, แตห เฆ ฮับ จืร เฆ แคง ฌาราง. 2ปี โลว โบง เฆ ฌึร ตี มูห ดอ โฆว ดัง อัน ดอ มูห อาคูเรเน ดา ตาง อี อึบ มืง ซูรี. 3เฆ ดูอี บอกาเฆลียด มืร ฮาว ฮับ ฌาราง เฆ แคง มืง บรีม เฆ.
4ดอ อัน ตี บอ อาโยวแซบ เลห แคง มืง นาซาเรต อี กอย แคง อืง ฆาลีเล วี ฮาว มืง เบดแลม อี กอย แคง อืง ยูดา. มืง เบดแลม ตึอน มูห มืง บรีม คูนดีคัม อาดาวีด. อาโยวแซบ โลว ฮาว ดี มืง เบดแลม โกบ มูห อัน ครึร คูนดีคัม อาดาวีด. 5อัน มืร ดึห ฮาว บอ นาง มารี อี แฮะ ลาย แบน ปาว ดี อัน. นาง มารี ยี แฮะ ฮอต แด บาดีก ซันเท. 6ดอ กอย อัน ดี มืง เบดแลม ตี, แฮะ ฌัม อาคาน ดี ฆึอด ฆอน อัน. 7อัน บอ มึห ฆอน อีมาย, อี มูห ฆอน ฆีณ อัน. อัน บอ กาบัน ฆอน อัน แคง โดณ อึณจัม, วี เบลห แคง กาและ โฮม มัก, โกบ ตู มึห โดง ดี ปึอน ตัม แคง เฌโรบ โดง กอย เฆ ตึอน.
ลอง ดา อี เฮียง มาบู บอ ลอง อามู อามาด เฌาพรา
8นา เรต มืง เบดแลม ตึอน, อึณ ยี มึห เฆ ดา อี เฮียง มาบู อี กอย แคง มาน. เฆ บอ กอย บัร มาบู เฆ แคง หมึร. 9ดอ อัน ตี เฆ บอ ยึร อามู อามาด เฌาพรา อู กาดัง ตัห กาปลูห ดี เฆ. อาโรง บลาง เฌาพรา มืร แฮะ ตัห โรบ เฆ. โคว, เฆ มืร โยว กาเซา. 10อามู อามาด เฌาพรา ตึอน ต็อห, “แกวะ โยว, โอว แฮะ ตัห กาลาง นา หมึอม ดี เบ. อึณ ดี แตห เบ บอกาเฆลียด มึห น็อห ดาคึย. 11แคง หมึร นี, อี ดี ฆ็อห แวน หมาบ ปี โบง เบ ดอน อี แฮะ ฮอต ฆึอด แคง มืง อาดาวีด. อัน มูห อัน เฌา ปี ร็อห ปี ตึย เฌาพรา แตห อัน คยอด ดูอี. อัน บอ มูห อัน เฌา อี อึบ โตต. 12เบ ดี ยึร ฆอน อางัะ, อี แฮะ กาบัน โดณ อึณจัม ดี อัน, อีด แคง กาและ โฮม มัก. อาตี แฮะ มูห ลักซานา แตห เบ นับ, แฮะ หมาน ปี ต็อห โอว ดี เบ.”
13อามู อามาด เฌาพรา ตึอน แฮะ ฮอต ต็อห ปาย ตี, อู เฌณ อึณ มึห อามู อามาด เฌาพรา บอ พึง วี ตัห กาปลูห ดี อาต เฆ. อามู อามาด เฌาพรา ตี บอ ปาก โหมว ดาคึย บอ อืบ เฌาพรา. เฆ บอ ต็อห,
14“เฌาพรา อี กอย ฆางหราว มึห อาพูง ดัง โคว อี ตาง หลึอม โตต. บอ เฆ ดูอี แดง กาดาย, แตห เฆ บอกาเฆลียด มึห น็อห เฆียด. เฌาพรา แฮะ โหลห กาเว เฆ.”
15แฮะ ฮอต ปัน ตี เฆ อามู อามาด เฌาพรา วี โฮะ แคง มืง ฆางหราว. เฆ ดูอี เฮียง มาบู ยี ลาย ซังคยาง. เฆ ต็อห, “แตห เอ ฮาว มืง เบดแลม ตึอน, แตห เอ ฮาว ยอด ปี กาลาง เฌาพรา ดี เอ ตี ดอน โมยว.”
16เฆ แฮะ ฮอต ต็อห ปาย ตี, เฆ บอ ฮาว อู เฌณ, ฮา ฌัม โดง กอย นาง มารี ฆาย อาโยวแซบ. เฆ ยึร บอ ฆอน อางัะ. อัน อีด แคง กาและ โฮม มัก. 17เฆ ดูอี เฮียง มาบู, เฆ แฮะ ฮอต ยึร โตต, เฆ วี กาลาง โตต แปะ แฮะ ยึร เฆ ดี อี เฮา, แตห บอ อี เฮา นับ ลอง อัน ตี. 18เฆ อี เฮา แฮะ ฮอต โทม โฆรห ปี กาลาง เฆ ดูอี อี เฮียง มาบู, เฆ บอ อาม กาเซา. 19นาง มารี ยี วี โนว อูน โตต แคง น็อห อัน, วี เฌณฌา ลอง อัน ตี ดอน โมยว. 20เฆ ดูอี เฮียง มาบู ตึอน บอ เวณ. เฆ อืบ เฌาพรา บอ ดาง ฆูง เฆฌู ดี เฌาพรา ลอง ดอน โมยว แปะ แฮะ ยึร แปะ แฮะ โทม เฆ. อึณ แฮะ แบน โตต ปี ปี ดึอม กาลาง อามู อามาด เฌาพรา ดี เฆ.
ลอง ฆูณ มา เฌา เยซู ตึย เฌา เยซู แคง โฮว เฌาพรา
21ฆอน อางัะ ตึอน, ดอ โนะ อาซาก อัน ดา ซีแง, แฮะ ฌัม อาคราว ดี โลว ซัวะ แวน ฮูน ลัะคานา อัน. ดอ อัน ตี เฆ ดาง จืร อัน, ต็อห อาเยซู. อึณ มูห จืร ปี ดึอม ต็อห อามู อามาด เฌาพรา ดี มา อัน อาต แด อัน บาดีก ซันเท.
22วาย อัน ตี แฮะ ฌัม อาคราว อัน, อาโยวแซบ ฆาย นาง มารี วี โดบ ฮีด เฆ, โบง แตห นาง มารี วี ซีงา, แตห อึณ โดบ ดารา ปี ดัม อูน อาโมวแซ ดี เฆ. ฆาย บอ ดึห ฮาว ฆอน อางัะ ตี ดี มืง เยรูซาแลม, หลู ดี เฌาพรา. 23ดารา เฌาพรา ต็อห, “ฆอน อีมาย อี มูห ฆอน ฆีณ ดอน อี โลว หลู ดี เฌาพรา.” 24ฆาย บอ โบง ปี จัร ดารา เฌาพรา. อึณ บอ ต็อห, “โลว หลู มาโบลย แปร อู ฆู. เซ อาว มึห, โลว หลู มาโบลย ดีแตด อา โดว.”
25อึณ ยี มึห ดูอี อู วี อี กอย แคง มืง เยรูซาแลม. อัน จืร อาซีเมโอน. อัน มูห ดูอี หมึอม, อี โรวเซ เฌาพรา. อัน มืร หน็อะ อึณด็อะ, บัร ดี ยอด ปัน เหมา เฌาพรา ดี ตัห จอย เฆ ดูอี อีซาเรลัะ. น็อห พึอม เฌาพรา มืร กอย รึม โดบ อัน. 26น็อห พึอม เฌาพรา ตึอน แฮะ แตห อัน นับ, อาต ยัม อัน, อัน ดี ปึอน ดี ยึร อัน เฌา ปี ร็อห ปี ตึย เฌาพรา แตห อัน คยอด ดูอี. 27น็อห พึอม เฌาพรา แฮะ กาลาง ดี อาซีเมโอน แตห อัน ฮาว ลึบ แคง โฮว เฌาพรา. ดอ อัน ตี บอ นาง มารี ฆาย อาโยวแซบ แฮะ เงียะ บอ ฆอน ฆาย ตัห ลึบ แคง โฮว เฌาพรา, แตห ฆาย โบง ปี ดัม ดารา เฌาพรา เฆ โบง. 28อาซีเมโอน ตึอน ดึห เงียะ ฆอน อางัะ ตึอน, ดาง ฆูง เฆฌู ดี เฌาพรา. อัน ต็อห,
29“ดอ ตี นี, แม เฌาพรา แฮะ โบง ปี ดัว แม กาดีก ซัดฌา ดี โอว, แตห โอว ฮาว ดาคึย โดง กอย แม, แตห อี มูห แดเจณ แม โบยว ดี ยัม.
30โคว, โอว แฮะ ฮอต ปึอน ยึร ดี งาย โอว ดูอี ปี ตึย แม, แตห อัน คยอด ดูอี.
31อาตี แม แฮะ โบง แตห อึณ แบน อาฆยึร อาดา ดูอี ดอน โมยว แดง กาดาย.
32ปี โบง แม ตี, อึณ ปี บลาง ดี แตห เฆ ดูอี อาโมยว เฮา ยึร อึณเตณ ปี อึณปราย แม. อึณ บอ แตห อาพูง ดังโคว ดี เฆ ดูอี อีซาเรลัะ อี มูห ดูอี ปี ร็อห แม.”
33ดอ ต็อห อาซีเมโอน ปาย ตี, ฆูณ มา ฆอน อางัะ มืร อาม โฆรห ปี กาลาง อาซีเมโอน ตี. 34อาซีเมโอน แฮะ ฮอต ม็องการา แตห ดี เฆ, อัน บอ กาลาง ดี นาง มารี, อี มูห มา ฆอน ตี. อัน ต็อห, “ฆอน อางัะ นี, อัน มูห ดูอี ปี ร็อห เฌาพรา. อัน ดี แตห เฆ ดูอี อีซาเรลัะ ชึม อาซาก เฆ แบน วี แบน วี. อัน ปี ดี วี คยอด เฆ แบน วี แบน วี. เฆ อี เฮา ดี วี กาแคณ ดี อัน. 35ปี ดี โบง เฆ ตี, อึณ ดี แตห อี เฮา นับ ลอง น็อห ดูอี. แม ยี ดี โลว คัม แตห อึณ ปี ดูอี ดี ซัด มา ปัวะ ลาง ลัม แคง น็อห แม.”
36อาซีเมโอน แฮะ ฮอต กาลาง ปาย ตี, อึณ บอ มึห อีบึณ อู วี อี บยาน โฆรห เฌาพรา. อัน จืร นาง ฮานา. อัน มูห ฆอน อาพานูเอน, อี มูห ครึร อาเซน. อัน แฮะ ฮอต กัด. 37อัน แฮะ กอย รึม โดบ อีมาย อัน อาดา บู ซีนัม วาย คัด อัน. แฮะ ฮอต, อัน วี แบน ยา ซีปรัห แตห อาซาก อัน กอ โนะ ดา ฆึร ดี พวน ซีนัม. อัน มืร ตู เลห แคง โฮว เฌาพรา ดอ เหมา. อัน บอ ยืน ปี ดี โฮม บอ ซาคึร เฌาพรา ดอง วัน ดอง คืน. 38ดอ อัน ตี นาง ฮานา ตึอน, อัน บอ ตัห ฌัม โดง กอย อาซีเมโอน ตึอน. อัน มืร กาลาง ฆูง เฆฌู ดี เฌาพรา. อัน บอ กาลาง ลอง ฆอน อางัะ ตี ดี เฆ ดูอี อี หน็อะ อึณด็อะ อัน เฌา อี ดี ตัห คยอด เฆ แคง มืง เยรูซาแลม.
39อาโยวแซบ ฆาย นาง มารี แฮะ ฮอต โบง ดอน โมยว ปี ดัม ดารา เฌาพรา, บอ ฆาย บอ อาเยซู วี เวณ ดี กาง เฆ แคง มืง นาซาเรต แคง อืง ฆาลีเล. 40ฆอน ตึอน แกร ดี ตาง, แกร ดี มึห โปลม. อัน มืร แบน ดูอี อี มึห อางยาน หมึอม, อางยาน บอด. เฌาพรา บอ เฆฌู อัน.
ลอง เฌา เยซู กอย แคง โฮว เฌาพรา
41ดอน ซีนัม, ดอ มึห บลอย โหลห เฆ เฌาพรา ดอ กาโลห อัน กาง เฆ, ฆูณ มา เฌา เยซู บอ โฮะ ดี มืง เยรูซาแลม. 42ดอ โนะ อาซาก เฌา เยซู ฆึร ดี อา ซีนัม, ฆูณ มา อัน วี ฮาว ลึบ บลอย โดบ ฮีด เฆ. ดอ อัน ตี เฌา เยซู มืร ฮาว รึม โดบ ฆาย. 43บลอย ตี แฮะ ฮอต, ฆูณ มา อัน วี วีว โดบ อึณเตณ บรีม, เวณ มืง เฆ. เฌา เยซู ยี ตู วีว โดบ ฆาย. อัน กอย ดี ปัน แคง มืง เยรูซาแลม. 44ฆูณ มา อัน ยี ตู นับ ลอง อัน ตี. ฆาย ทาง อัน แฮะ วีว รึม โดบ ฆึก อัน. ฆาย แฮะ ฮอต ฮาว โดบ อึณเตณ อาดา อู ซีแง, ฆาย วี เหรต อัน แคง พึง วอแว เฆ บอ ฆึก เฆ. 45ฆาย ยี ตู ยึร อัน. โคว, ฆาย วี ฮาว เหรต อัน แคง มืง เยรูซาแลม ปอ อู เฌณ. 46ฆาย แฮะ เหรต อัน อาดา โอย ซีแง, ฆาย วี ยึร อัน กอย แคง โฮว เฌาพรา. อัน กอย รึม กาลาง โฆรห โดบ เฆ ดา ซารา อี มาโนว ดารา เฌาพรา. อัน บอ ดีหมอด เฆ แบน โมยว แบน โมยว บอ โทม ปี ต็อห เฆ. 47เฆ อี โทม ลอง อัน ตี, เฆ อาม กาเซา ฆอน ตี, ปี ปาย อัน ดี วี เวียะ โฆรห เฆ ดา ตาง, บอ แคะ บอด อางยาน อัน. 48ฆูณ มา อัน แฮะ วี ยึร อัน, ฆาย บอ อาม อัน. มา อัน ต็อห ดี อัน, “อึย ฆอน โอว, เหมา อึณ ปาย ปี โบง แม ปาย ตี ดี ยาย? น็อห ยาย แฮะ แหม กาเซา. ยาย ฆูณ แม แฮะ วีน ดี เหรต แม ดอน นา ดอน โปละ.”
49อัน แฮะ ฮอต ต็อห ปาย ตี, เฌา เยซู วี ต็อห ดี มา อัน, “เหมา อึณ ปาย ปี เหรต แม ดี โอว? แม ตู นับ, โอว โลว กอย แคง กาง ฆูณ โอว?” 50ฆูณ มา อัน ยี ตู นับ ซีเพา โฆรห ปี กาลาง อัน ตี.
51วาย อัน ตี เฌา เยซู วี เวณ โดบ ฆาย, ฮาว ฌัม มืง นาซาเรต. อัน บอ โทม โดบ ปี ต็อห ฆูณ มา อัน ดอน โมยว. มา อัน ยี โหลห โตต ลอง อัน ตี บอ โนว อูน โตต แคง น็อห อัน. 52เฌา เยซู ยี แกร ดี ตาง, แกร ดี มึห อางยาน บอด, แตห อึณ ล็อะ บอ น็อห เฌาพรา บอ น็อห เฆ ดูอี.
Currently Selected:
ลก 2: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
ลก 2
2
ลอง เฌา เยซู แฮะ ฆึอด
1ดอ อัน ตี คูนดีคัม อาแกซา ออกูทู ดัว อามีง ดี ดูอี ดอน อี แคง มืง ปี อึบ อัน, แตห เฆ ฮับ จืร เฆ แคง ฌาราง. 2ปี โลว โบง เฆ ฌึร ตี มูห ดอ โฆว ดัง อัน ดอ มูห อาคูเรเน ดา ตาง อี อึบ มืง ซูรี. 3เฆ ดูอี บอกาเฆลียด มืร ฮาว ฮับ ฌาราง เฆ แคง มืง บรีม เฆ.
4ดอ อัน ตี บอ อาโยวแซบ เลห แคง มืง นาซาเรต อี กอย แคง อืง ฆาลีเล วี ฮาว มืง เบดแลม อี กอย แคง อืง ยูดา. มืง เบดแลม ตึอน มูห มืง บรีม คูนดีคัม อาดาวีด. อาโยวแซบ โลว ฮาว ดี มืง เบดแลม โกบ มูห อัน ครึร คูนดีคัม อาดาวีด. 5อัน มืร ดึห ฮาว บอ นาง มารี อี แฮะ ลาย แบน ปาว ดี อัน. นาง มารี ยี แฮะ ฮอต แด บาดีก ซันเท. 6ดอ กอย อัน ดี มืง เบดแลม ตี, แฮะ ฌัม อาคาน ดี ฆึอด ฆอน อัน. 7อัน บอ มึห ฆอน อีมาย, อี มูห ฆอน ฆีณ อัน. อัน บอ กาบัน ฆอน อัน แคง โดณ อึณจัม, วี เบลห แคง กาและ โฮม มัก, โกบ ตู มึห โดง ดี ปึอน ตัม แคง เฌโรบ โดง กอย เฆ ตึอน.
ลอง ดา อี เฮียง มาบู บอ ลอง อามู อามาด เฌาพรา
8นา เรต มืง เบดแลม ตึอน, อึณ ยี มึห เฆ ดา อี เฮียง มาบู อี กอย แคง มาน. เฆ บอ กอย บัร มาบู เฆ แคง หมึร. 9ดอ อัน ตี เฆ บอ ยึร อามู อามาด เฌาพรา อู กาดัง ตัห กาปลูห ดี เฆ. อาโรง บลาง เฌาพรา มืร แฮะ ตัห โรบ เฆ. โคว, เฆ มืร โยว กาเซา. 10อามู อามาด เฌาพรา ตึอน ต็อห, “แกวะ โยว, โอว แฮะ ตัห กาลาง นา หมึอม ดี เบ. อึณ ดี แตห เบ บอกาเฆลียด มึห น็อห ดาคึย. 11แคง หมึร นี, อี ดี ฆ็อห แวน หมาบ ปี โบง เบ ดอน อี แฮะ ฮอต ฆึอด แคง มืง อาดาวีด. อัน มูห อัน เฌา ปี ร็อห ปี ตึย เฌาพรา แตห อัน คยอด ดูอี. อัน บอ มูห อัน เฌา อี อึบ โตต. 12เบ ดี ยึร ฆอน อางัะ, อี แฮะ กาบัน โดณ อึณจัม ดี อัน, อีด แคง กาและ โฮม มัก. อาตี แฮะ มูห ลักซานา แตห เบ นับ, แฮะ หมาน ปี ต็อห โอว ดี เบ.”
13อามู อามาด เฌาพรา ตึอน แฮะ ฮอต ต็อห ปาย ตี, อู เฌณ อึณ มึห อามู อามาด เฌาพรา บอ พึง วี ตัห กาปลูห ดี อาต เฆ. อามู อามาด เฌาพรา ตี บอ ปาก โหมว ดาคึย บอ อืบ เฌาพรา. เฆ บอ ต็อห,
14“เฌาพรา อี กอย ฆางหราว มึห อาพูง ดัง โคว อี ตาง หลึอม โตต. บอ เฆ ดูอี แดง กาดาย, แตห เฆ บอกาเฆลียด มึห น็อห เฆียด. เฌาพรา แฮะ โหลห กาเว เฆ.”
15แฮะ ฮอต ปัน ตี เฆ อามู อามาด เฌาพรา วี โฮะ แคง มืง ฆางหราว. เฆ ดูอี เฮียง มาบู ยี ลาย ซังคยาง. เฆ ต็อห, “แตห เอ ฮาว มืง เบดแลม ตึอน, แตห เอ ฮาว ยอด ปี กาลาง เฌาพรา ดี เอ ตี ดอน โมยว.”
16เฆ แฮะ ฮอต ต็อห ปาย ตี, เฆ บอ ฮาว อู เฌณ, ฮา ฌัม โดง กอย นาง มารี ฆาย อาโยวแซบ. เฆ ยึร บอ ฆอน อางัะ. อัน อีด แคง กาและ โฮม มัก. 17เฆ ดูอี เฮียง มาบู, เฆ แฮะ ฮอต ยึร โตต, เฆ วี กาลาง โตต แปะ แฮะ ยึร เฆ ดี อี เฮา, แตห บอ อี เฮา นับ ลอง อัน ตี. 18เฆ อี เฮา แฮะ ฮอต โทม โฆรห ปี กาลาง เฆ ดูอี อี เฮียง มาบู, เฆ บอ อาม กาเซา. 19นาง มารี ยี วี โนว อูน โตต แคง น็อห อัน, วี เฌณฌา ลอง อัน ตี ดอน โมยว. 20เฆ ดูอี เฮียง มาบู ตึอน บอ เวณ. เฆ อืบ เฌาพรา บอ ดาง ฆูง เฆฌู ดี เฌาพรา ลอง ดอน โมยว แปะ แฮะ ยึร แปะ แฮะ โทม เฆ. อึณ แฮะ แบน โตต ปี ปี ดึอม กาลาง อามู อามาด เฌาพรา ดี เฆ.
ลอง ฆูณ มา เฌา เยซู ตึย เฌา เยซู แคง โฮว เฌาพรา
21ฆอน อางัะ ตึอน, ดอ โนะ อาซาก อัน ดา ซีแง, แฮะ ฌัม อาคราว ดี โลว ซัวะ แวน ฮูน ลัะคานา อัน. ดอ อัน ตี เฆ ดาง จืร อัน, ต็อห อาเยซู. อึณ มูห จืร ปี ดึอม ต็อห อามู อามาด เฌาพรา ดี มา อัน อาต แด อัน บาดีก ซันเท.
22วาย อัน ตี แฮะ ฌัม อาคราว อัน, อาโยวแซบ ฆาย นาง มารี วี โดบ ฮีด เฆ, โบง แตห นาง มารี วี ซีงา, แตห อึณ โดบ ดารา ปี ดัม อูน อาโมวแซ ดี เฆ. ฆาย บอ ดึห ฮาว ฆอน อางัะ ตี ดี มืง เยรูซาแลม, หลู ดี เฌาพรา. 23ดารา เฌาพรา ต็อห, “ฆอน อีมาย อี มูห ฆอน ฆีณ ดอน อี โลว หลู ดี เฌาพรา.” 24ฆาย บอ โบง ปี จัร ดารา เฌาพรา. อึณ บอ ต็อห, “โลว หลู มาโบลย แปร อู ฆู. เซ อาว มึห, โลว หลู มาโบลย ดีแตด อา โดว.”
25อึณ ยี มึห ดูอี อู วี อี กอย แคง มืง เยรูซาแลม. อัน จืร อาซีเมโอน. อัน มูห ดูอี หมึอม, อี โรวเซ เฌาพรา. อัน มืร หน็อะ อึณด็อะ, บัร ดี ยอด ปัน เหมา เฌาพรา ดี ตัห จอย เฆ ดูอี อีซาเรลัะ. น็อห พึอม เฌาพรา มืร กอย รึม โดบ อัน. 26น็อห พึอม เฌาพรา ตึอน แฮะ แตห อัน นับ, อาต ยัม อัน, อัน ดี ปึอน ดี ยึร อัน เฌา ปี ร็อห ปี ตึย เฌาพรา แตห อัน คยอด ดูอี. 27น็อห พึอม เฌาพรา แฮะ กาลาง ดี อาซีเมโอน แตห อัน ฮาว ลึบ แคง โฮว เฌาพรา. ดอ อัน ตี บอ นาง มารี ฆาย อาโยวแซบ แฮะ เงียะ บอ ฆอน ฆาย ตัห ลึบ แคง โฮว เฌาพรา, แตห ฆาย โบง ปี ดัม ดารา เฌาพรา เฆ โบง. 28อาซีเมโอน ตึอน ดึห เงียะ ฆอน อางัะ ตึอน, ดาง ฆูง เฆฌู ดี เฌาพรา. อัน ต็อห,
29“ดอ ตี นี, แม เฌาพรา แฮะ โบง ปี ดัว แม กาดีก ซัดฌา ดี โอว, แตห โอว ฮาว ดาคึย โดง กอย แม, แตห อี มูห แดเจณ แม โบยว ดี ยัม.
30โคว, โอว แฮะ ฮอต ปึอน ยึร ดี งาย โอว ดูอี ปี ตึย แม, แตห อัน คยอด ดูอี.
31อาตี แม แฮะ โบง แตห อึณ แบน อาฆยึร อาดา ดูอี ดอน โมยว แดง กาดาย.
32ปี โบง แม ตี, อึณ ปี บลาง ดี แตห เฆ ดูอี อาโมยว เฮา ยึร อึณเตณ ปี อึณปราย แม. อึณ บอ แตห อาพูง ดังโคว ดี เฆ ดูอี อีซาเรลัะ อี มูห ดูอี ปี ร็อห แม.”
33ดอ ต็อห อาซีเมโอน ปาย ตี, ฆูณ มา ฆอน อางัะ มืร อาม โฆรห ปี กาลาง อาซีเมโอน ตี. 34อาซีเมโอน แฮะ ฮอต ม็องการา แตห ดี เฆ, อัน บอ กาลาง ดี นาง มารี, อี มูห มา ฆอน ตี. อัน ต็อห, “ฆอน อางัะ นี, อัน มูห ดูอี ปี ร็อห เฌาพรา. อัน ดี แตห เฆ ดูอี อีซาเรลัะ ชึม อาซาก เฆ แบน วี แบน วี. อัน ปี ดี วี คยอด เฆ แบน วี แบน วี. เฆ อี เฮา ดี วี กาแคณ ดี อัน. 35ปี ดี โบง เฆ ตี, อึณ ดี แตห อี เฮา นับ ลอง น็อห ดูอี. แม ยี ดี โลว คัม แตห อึณ ปี ดูอี ดี ซัด มา ปัวะ ลาง ลัม แคง น็อห แม.”
36อาซีเมโอน แฮะ ฮอต กาลาง ปาย ตี, อึณ บอ มึห อีบึณ อู วี อี บยาน โฆรห เฌาพรา. อัน จืร นาง ฮานา. อัน มูห ฆอน อาพานูเอน, อี มูห ครึร อาเซน. อัน แฮะ ฮอต กัด. 37อัน แฮะ กอย รึม โดบ อีมาย อัน อาดา บู ซีนัม วาย คัด อัน. แฮะ ฮอต, อัน วี แบน ยา ซีปรัห แตห อาซาก อัน กอ โนะ ดา ฆึร ดี พวน ซีนัม. อัน มืร ตู เลห แคง โฮว เฌาพรา ดอ เหมา. อัน บอ ยืน ปี ดี โฮม บอ ซาคึร เฌาพรา ดอง วัน ดอง คืน. 38ดอ อัน ตี นาง ฮานา ตึอน, อัน บอ ตัห ฌัม โดง กอย อาซีเมโอน ตึอน. อัน มืร กาลาง ฆูง เฆฌู ดี เฌาพรา. อัน บอ กาลาง ลอง ฆอน อางัะ ตี ดี เฆ ดูอี อี หน็อะ อึณด็อะ อัน เฌา อี ดี ตัห คยอด เฆ แคง มืง เยรูซาแลม.
39อาโยวแซบ ฆาย นาง มารี แฮะ ฮอต โบง ดอน โมยว ปี ดัม ดารา เฌาพรา, บอ ฆาย บอ อาเยซู วี เวณ ดี กาง เฆ แคง มืง นาซาเรต แคง อืง ฆาลีเล. 40ฆอน ตึอน แกร ดี ตาง, แกร ดี มึห โปลม. อัน มืร แบน ดูอี อี มึห อางยาน หมึอม, อางยาน บอด. เฌาพรา บอ เฆฌู อัน.
ลอง เฌา เยซู กอย แคง โฮว เฌาพรา
41ดอน ซีนัม, ดอ มึห บลอย โหลห เฆ เฌาพรา ดอ กาโลห อัน กาง เฆ, ฆูณ มา เฌา เยซู บอ โฮะ ดี มืง เยรูซาแลม. 42ดอ โนะ อาซาก เฌา เยซู ฆึร ดี อา ซีนัม, ฆูณ มา อัน วี ฮาว ลึบ บลอย โดบ ฮีด เฆ. ดอ อัน ตี เฌา เยซู มืร ฮาว รึม โดบ ฆาย. 43บลอย ตี แฮะ ฮอต, ฆูณ มา อัน วี วีว โดบ อึณเตณ บรีม, เวณ มืง เฆ. เฌา เยซู ยี ตู วีว โดบ ฆาย. อัน กอย ดี ปัน แคง มืง เยรูซาแลม. 44ฆูณ มา อัน ยี ตู นับ ลอง อัน ตี. ฆาย ทาง อัน แฮะ วีว รึม โดบ ฆึก อัน. ฆาย แฮะ ฮอต ฮาว โดบ อึณเตณ อาดา อู ซีแง, ฆาย วี เหรต อัน แคง พึง วอแว เฆ บอ ฆึก เฆ. 45ฆาย ยี ตู ยึร อัน. โคว, ฆาย วี ฮาว เหรต อัน แคง มืง เยรูซาแลม ปอ อู เฌณ. 46ฆาย แฮะ เหรต อัน อาดา โอย ซีแง, ฆาย วี ยึร อัน กอย แคง โฮว เฌาพรา. อัน กอย รึม กาลาง โฆรห โดบ เฆ ดา ซารา อี มาโนว ดารา เฌาพรา. อัน บอ ดีหมอด เฆ แบน โมยว แบน โมยว บอ โทม ปี ต็อห เฆ. 47เฆ อี โทม ลอง อัน ตี, เฆ อาม กาเซา ฆอน ตี, ปี ปาย อัน ดี วี เวียะ โฆรห เฆ ดา ตาง, บอ แคะ บอด อางยาน อัน. 48ฆูณ มา อัน แฮะ วี ยึร อัน, ฆาย บอ อาม อัน. มา อัน ต็อห ดี อัน, “อึย ฆอน โอว, เหมา อึณ ปาย ปี โบง แม ปาย ตี ดี ยาย? น็อห ยาย แฮะ แหม กาเซา. ยาย ฆูณ แม แฮะ วีน ดี เหรต แม ดอน นา ดอน โปละ.”
49อัน แฮะ ฮอต ต็อห ปาย ตี, เฌา เยซู วี ต็อห ดี มา อัน, “เหมา อึณ ปาย ปี เหรต แม ดี โอว? แม ตู นับ, โอว โลว กอย แคง กาง ฆูณ โอว?” 50ฆูณ มา อัน ยี ตู นับ ซีเพา โฆรห ปี กาลาง อัน ตี.
51วาย อัน ตี เฌา เยซู วี เวณ โดบ ฆาย, ฮาว ฌัม มืง นาซาเรต. อัน บอ โทม โดบ ปี ต็อห ฆูณ มา อัน ดอน โมยว. มา อัน ยี โหลห โตต ลอง อัน ตี บอ โนว อูน โตต แคง น็อห อัน. 52เฌา เยซู ยี แกร ดี ตาง, แกร ดี มึห อางยาน บอด, แตห อึณ ล็อะ บอ น็อห เฌาพรา บอ น็อห เฆ ดูอี.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.