ลก 3

ลอง ดา ซารา อายอฮาน โฮว ดารา เฌาพรา

1วาย อัน ตี อึณ มูห อาแกซา ทีเบรี, อัน แฮะ แบน คูนดีคัม อาดา ฆึร ดี พัน ซีนัม. ดอ อัน ตี อึณ บอ มูห อาโพนที พีลาด. อัน มูห ดา ตาง อี อึบ อืง ยูดา. อาเฮโรด บอ มูห ดา กาณา อี อึบ อืง ฆาลีเล. อาพีลีบ, อี มูห วา อาเฮโรด ตึอน, อัน ยี มูห ดา กาณา อี อึบ อืง อีทูรียา ฆาย อืง ตราโควนีที. ดา อาลูซานียา บอ มูห ดา ตาง อี อึบ อืง อีบาเลน. 2อาคราว อัน ตี, อึณ บอ มูห ดา อานาด ฆาย อากายพา, ฆาย มูห ดา ตาง อี อึบ โตต ดูอี อี หลู ดี เฌาพรา. ดอ อัน ตี เฌาพรา ตัห กาลาง โฆรห ดี อายอฮาน อี มูห ฆอน อาซาคารา ดอ กอย อัน แคง แปร. 3อายอฮาน บอ ฮาว ดอน โปละ อี กอย กาตัด แบลง ยอดาน. อัน มืร กาลาง ดี ดูอี ต็อห, “เบ โลว แวน น็อห บรีม, วี ดึห น็อห กามาย. เบ โลว คัม ดี จึบ แคง อึม, แตห เบ โหลห หมาบ เบ, แตห เฌาพรา ปึอน ดี ฆ็อห แวน หมาบ เบ.” ปี ต็อห อัน ตี, 4อึณ ปี ปี แดม อาอีซายัะ, อี มูห ดูอี อี บยาน โฆรห เฌาพรา. อัน แฮะ แดม อูน ลอง อัน ตี ต็อห,

“อึณ ดี มึห ดา อู วี กาลาง โฆรห แคง แปร. อัน ต็อห,

‘แตห เบ อึณปราย อึณเตณ ปี โลว ว็อะ เฌาพรา. โบง, แตห อึณ กอ ซืร.

5เซ อึณ มูห ดีโฆละ, แตห อึณ วี แพณ. โดง กูก กาดาย, แตห เบ โละ แวน, แตห อึณ วี ฆลัง. เซ อึณเตณ บอ โฆะ แฆะ, แตห เบ โบง แตห อึณ ซืร. โดง ดีโฆละ ดีเฆลียม, แตห เบ ปูน แวน, แตห อึณ ฮาว ดาคึย โตต ดอน โปละ.

6เฆ ดูอี บอกาเฆลียด ดี บอ ปึอน ยึร ลอง เฌาพรา คยอด เฆ ดูอี.’” แคะ ตี อายอฮาน กาลาง ปี แดม แคง บับ เฌาพรา.

7อึณ ยี มึห เฆ ดูอี กืน ตัห โดง กอย อายอฮาน. เฆ ซี แตห อัน จึบ เฆ แคง อึม. อายอฮาน บอ ต็อห ดี เฆ, “อึย, เบ อี ปี ฮัณ เงียน. อาเซ แฮะ ต็อห ดี เบ, เบ ดี ปึอน เตา เซ เฌาพรา ฮี รู ดี เบ นา อาต นี? 8บอ ปี โบง เบ, บอ โฆรห ปี กาลาง เบ, เบ โลว แตห อึณ การัม. แตห เบ แวน น็อห บรีม เบ, ดึห น็อห กามาย. แกวะ แตห น็อห เบ ปีคึก โกบ มูห เบ หลูกหลาน ดา อาบราฮัม ตึอน. โอว ต็อห ดี เบ, เซ เบ ตู โดบ ซีคยา เฌาพรา ปี เฆ หลูกหลาน อาบราฮัม อาคาคัร, เฌาพรา ดี โบง แตห มาว เฆ นี แบน หลูกหลาน อาบราฮัม. 9ดอ ตี นี อึณ ปี มึย แฮะ ฮอต กอย ดี ดัง เฮ. เฮ ดอน กาดัง อี ตู มึห เบล หมึอม, เฆ ดี ฆัร แวน วี โดะ กาซึม แคง เงา.”

10อายอฮาน แฮะ ฮอต ต็อห ปาย ตี, เฆ ดูอี ตึอน วี ดีหมอด อัน. เฆ ต็อห, “เซ อึณ ปาย ตี, มาเซ ปี ดี โลว โบง เย?”

11อายอฮาน วี ต็อห, “อาเซ มึห ซีโตว อา พืน, อู พืน แตห อัน วี ดัว ดี ดูอี อี ตู มึห มาเซ. อาเซ แฮะ มึห ปี ดี โฮม ปี ดี ตา, แตห อัน วี กาซาง ดัว ดี ดูอี อี ตู มึห มาเซ.”

12อึณ บอ มึห เฆ ดา อี แฆบ รึอน จึง มัง อี, เฆ บอ ตัห ต็อห ดี คัม ดี จึบ แคง อึม. บอ เฆ แฮะ ตัห ดีหมอด อายอฮาน. เฆ ต็อห, “แม ดา ซารา, มาเซ ปี โลว โบง เย?”

13อายอฮาน วี ต็อห ดี เฆ, “แกวะ แฆบ รึอน จึง หลึอม ปี ดัม ดารา.”

14บอ เฆ ดา ซึก ตัห ดีหมอด อัน. เฆ ต็อห, “มาเซ ปี ดี ต็อห แม ดี เย? มาเซ ปี โลว โบง เย?”

อายอฮาน วี ต็อห ดี เฆ, “แกวะ กาชัวะ ดูอี, หมาณ รึอน ดี เฆ. แกวะ กาย็อง ดูอี. แตห เบ จู แคะ ปึอน เบ รึอน มาเฆียน. แกวะ แตห เบ มึห น็อห ซี ปึอน หลึอม ตี.”

15อึณ ยี มึห เฆ ดูอี อี หน็อะ อึณด็อะ อาคราว ดี ตัห อัน เฌา ปี ร็อห ปี ตึย เฌาพรา แตห อัน คยอด ดูอี. เฆ โทม โฆรห ปี กาลาง อายอฮาน ตี, เฆ วี เฌณฌา ลอง อัน ตี, โยว อึณ แปะ แฮะ มูห อัน อี มูห อัน เฌา ปี ร็อห ปี ตึย เฌาพรา แตห อัน คยอด ดูอี, วี ปี หน็อะ อึณด็อะ เฆ. โยว มืร แฮะ มูห อัน อี มูห อัน เฌา อี ดี ตัห อาว เหลณ. เฆ ยี ตู นับ ซีคยา ลอง อัน ตี. 16โคว, อายอฮาน วี ต็อห ดี ดูอี บอกาเฆลียด, “โอว แฮะ จึบ เบ แคง อึม. ดา อี ดี ตัห ดี ปัน โอว, ปวน อัน ยี ตาง หลึอม ปวน โอว. อัน ดี ตัห ดี เบ. อี มูห โอว, โอว มืร หณัม กาอาบ ฆึบ ดี อาต อัน, ฆ็อห วัน คูดีณ อัน. อัน ดี บอ แตห น็อห พึอม เฌาพรา อึบ เบ. ปี ดี โบง อัน ดี เบ ปอ อู โมยว, อึณ บอ ปี ดูอี ฮับ ครีว แคง เงา, ทารอง แตห อึณ บอด. 17อึณ บอ ปี, อัน โฆ็ง อึณโซก อัน, แตห อัน โซก ยึอม โหงว แคง กางน็อห, แตห อึณ ฆีด มี โบ็ง โหงว ดีโลย. แฮะ ฮอต, อัน ดี กาฌูะ โหงว ตี แคง บูะ อัน. เดียบ โหงว อัน ยี ตู โลว. อัน ดี โดะ แวน แคง เงา อี ตู นับ ดี ยัด.” 18บอ โฆรห ตี บอ ปี มาโนว โมยว เฮา แบน โมยว แบน โมยว, อายอฮาน วี มาโนว เฆ ดอน อี ลอง โฆรห เฌาพรา อี แตห ดูอี แบน น็อห ดาคึย.

19อายอฮาน มืร แฮะ กาลาง ดี คูนดีคัม อาเฮโรด ลอง ดึห อัน นาง เฮโรวดี, แตห อัน แบน อีบึณ อัน. คา อาต นาง เฮโรวดี มูห อีบึณ วา อาเฮโรด. อายอฮาน แฮะ ต็อห ดี อัน ลอง ปี โบง อัน ตี อาว หมึอม. อายอฮาน มืร แฮะ กาลาง ดี อัน ลอง ปี โบง อัน อี ตู หมึอม ดอน โมยว. 20แฮะ ฮอต อัน ตู อึง, อัน แฮะ วี คร็อง ดา ซารา อายอฮาน แคง กาปึม.

ลอง เฌา เยซู คัม ดี จึบ แคง อึม

21วาย อัน ตี ดอ คัม ดูอี ดี จึบ แคง อึม, เฌา เยซู ตัห โดง กอย เฆ. อัน แตห อายอฮาน จึบ บอ อัน แคง อึม. ดอ ซาคึร อัน, ฆางหราว บอ อึณวึห. 22น็อห พึอม เฌาพรา บอ เลห โลง กอย แดง โดว โบ็ง อัน. น็อห พึอม เฌาพรา ตึอน แฮะ ปี มาโบลย อี ตัห โลง ดี อัน. ดอ อัน ตี อึณ บอ มึห โฆรห อี เลห แคง ฆางหราว. อึณ ต็อห, “แม มูห ฆอน ปี ร็อก โอว. ปี โบง แม แฮะ ล็อะ น็อห โอว.”

ลอง ฌาราง เฆ ฆูณ ดัง เฌา เยซู อี ลาย ดาม

23ดอ จูห เฌา เยซู โบง ฆาน อัน, อาซาก อัน มูห กาบัก โอย ฆึร ซีนัม. เฆ ดูอี บอกาเฆลียด ทาง อัน มูห ฆอน อาโยวแซบ.

อาโยวแซบ ยี มูห ฆอน อาเอลี.

24อาเอลี มูห ฆอน อามาทัด. อามาทัด มูห ฆอน อาเลวี. อาเลวี มูห ฆอน อาเมลาคี. อาเมลาคี มูห ฆอน อายานาย. อายานาย มูห ฆอน อาโยวแซบ ปอ วี.

25อาโยวแซบ ตี วี มูห ฆอน อามาทาทียา. อามาทาทียา มูห ฆอน อาโมด. อาโมด มูห ฆอน อานาโฮม. อานาโฮม มูห ฆอน อาเฮซาลี. อาเฮซาลี มูห ฆอน อานาฆาย.

26อานาฆาย มูห ฆอน อามาอาด. อามาอาด มูห ฆอน อามาทาทียา ปอ วี. อามาทาทียา ตี มูห ฆอน อาเซเมอีน. อาเซเมอีน มูห ฆอน อาโยวเซก. อาโยวเซก มูห ฆอน อาโยวดา.

27อาโยวดา มูห ฆอน อาโยวนาน. อาโยวนาน มูห ฆอน อาเรซา. อาเรซา มูห ฆอน อาเฌรูบาเบน. อาเฌรูบาเบน มูห ฆอน อาเซทีเอน. อาเซทีเอน มูห ฆอน อาเนรี.

28อาเนรี มูห ฆอน อาเมลาคี. อาเมลาคี มูห ฆอน อาทีอาด. อาทีอาด มูห ฆอน อาโควซัม. อาโควซัม มูห ฆอน อาเอมาดัม. อาเอมาดัม มูห ฆอน อาเอรา.

29อาเอรา มูห ฆอน อายอซู. อายอซู มูห ฆอน อาลีเอเฌน.

อาลีเอเฌน มูห ฆอน อาโยวรีม. อาโยวรีม มูห ฆอน อามาทัด. อามาทัด มูห ฆอน อาเลวี.

30อาเลวี มูห ฆอน อาซีเมโอน. อาซีเมโอน มูห ฆอน อายูดา. อายูดา มูห ฆอน อาโยวแซบ. อาโยวแซบ มูห ฆอน อาโยวนาม. อาโยวนาม มูห ฆอน อาเอยาคีม.

31อาเอยาคีม มูห ฆอน อาเมเลอา. อาเมเลอา มูห ฆอน อาเมนา. อาเมนา มูห ฆอน อามัดทาทา. อามัดทาทา มูห ฆอน อานาทาน. อานาทาน มูห ฆอน อาดาวีด.

32อาดาวีด มูห ฆอน อาเยเซ. อาเยเซ มูห ฆอน อาโอวเบด. อาโอวเบด มูห ฆอน อาโบวอาบ. อาโบวอาบ มูห ฆอน อาซาลาโมน. อาซาลาโมน มูห ฆอน อานาโซน.

33อานาโซน มูห ฆอน อามีนาดาบ. อามีนาดาบ มูห ฆอน อาดามีน. อาดามีน มูห ฆอน อาราม. อาราม มูห ฆอน อาเฮฌาโรน. อาเฮฌาโรน มูห ฆอน อาเพเรด. อาเพเรด มูห ฆอน อายูดา.

34อายูดา มูห ฆอน อาโกบ. อาโกบ มูห ฆอน อาแซก. อาแซก มูห ฆอน อาบราฮัม. อาบราฮัม มูห ฆอน อาเทนรา. อาเทนรา มูห ฆอน อานาโฮว.

35อานาโฮว มูห ฆอน อาเซรูก. อาเซรูก มูห ฆอน อาเรฆู. อาเรฆู มูห ฆอน อาเพเล. อาเพเล มูห ฆอน อาเอบา. อาเอบา มูห ฆอน อาเซลา.

36อาเซลา มูห ฆอน อาเคนัน. อาเคนัน มูห ฆอน อาพาซาด. อาพาซาด มูห ฆอน อาเซม. อาเซม มูห ฆอน อาโนว. อาโนว มูห ฆอน อาลาม.

37อาลาม มูห ฆอน อาเมทูซาลา. อาเมทูซาลา มูห ฆอน อาเฮน. อาเฮน มูห ฆอน อายาเรด. อายาเรด มูห ฆอน อามาฮาลาเลน. อามาฮาลาเลน มูห ฆอน อาเคนัน.

38อาเคนัน มูห ฆอน อาเอน. อาเอน มูห ฆอน อาเซด. อาเซด มูห ฆอน อาดาม. อาดาม ตึอน ยี มูห ฆอน เฌาพรา.

Currently Selected:

ลก 3: pce

Highlight

Copy