MOTHI 25
25
Bang Kep So-Arjang Athenghlan Alam
1“La-apor sati ame ensi, osopo yok ango kachingden ayok olesi kidam bang-kep osope mar pen ethakpe-alongri pachingbare. 2Anali sitem bang-phongo kamango kido, aro bang-phongo ke agun kido. 3Konam kamango abangke anali me-lur ki-en amun, anali jangthu agol chi-en-eh yongo; 4manta agun pemar ke anali me-lurpen abithang langpong pen jangthu ta chi-eno. 5Osopo kiwang abhemdo apot, ahuwit ami-ih wango aro amek jang phril lo. 6Manta nuwe jarlo apunsi, “Langot! osopo wang hlengo! Wangot anangyok chingden dam minang,” pusi chihang solo. 7Laparake labang ahuwit so-arjang hel ingthuro, aro anali melur hel pakaro. 8Ladi apor kamango pemar ke, agun abangyok pulo, “Nali jangthu para bekso hali pinot, piyok pu tene me-lurhel jut rang-rangdo. 9Manta agun pemar ke pulo, “Kalek, penebak ke nali phan aro hali phan ayok dorde ye; nali kijor arleng adung damot aro, naliphan chinam damot.” 10Aro konam anali kachinam dam amunsi, osopo wang hlengo, aro ingho trepsi kido abangke oso po pen jorme cho-junyok lutdamo; aro inghap hangar klakngo. 11Laphel prek so-arjang helta wangsi, pulo, “O Hemphu, O Hemphu, haliyok ingpu pinot. 12Manta anang pu phakngo, “Khanangsi ne nali thando, ne nali chinine.” 13Lasi inghong dingne do, piyok pu tene labang adin lale aporpo nali than un-eh.
Bang Kithom Murkiya Athenghlan Alam
(Luk. 19:11-27)
14“Piyok pu tene ethakpe-alongri ke ladi ihut arleng badi, te anang turuhel yok taramsi, anang bihini hel lahel arideng champisi, kaholo alongriyok damo. 15Anang ihutyok phoro phongo, ihutpo yok phoro hini, la ihutpo yok phoro isi, abangten yokta anang ki-un ateng langsi, nohok pisi anang dam hrolo. 16La-amun inghosi phoro-phongo kihlong, anang phot damsi, labang pen chijor-chihrepsi, aro phoro-phongo alapmo. 17Ladisi, ingho phoro-hini kihlong, anangta aro phoro-hini alapmo. 18Manta inghosi phoro isi hlongo, anang damsi lungle tuksi, anang ahemphu anohokso butisitsi bilo. 19Jokha arni ding hrim aphel, la turu hel ahemphupo wangsi, anali pen alekha pachingbaro. 20La-amun inghosi phoro phongo kihlong, anang aro phoro-phongo ongchot wansi pulo, “O Hemphu, nang neyok phoro-phongo nekipi; langot, ne aro phoro-phongo alapmo.” 21Anang ahemphupo anangyok pulo, akime tikilo, “Akime kikrol murkiyapo, nang beksodet yongta krolthipsi kido, nangyok ako-ong chot puru-hemphu pangninge;” nang hemphupo anengrong long lut dunnot! 22Aro inghosi phoro-hini kihlong, anangta wangsi pulo, “O Hemphu nang neyok phoro-hini nekipi; langot ne phoro-hini alapmo.” 23Anang ahemphupo anangyok pulo, “Akime tikilo, akime kikrolthip murkiyapo, nang bekso alamta kikrolthip. Nangyok ako-ong puru-hemphu pangninge;” nang Hemphu pen anengrong long lut dunnot. 24Laparake inghosi phoro isi kihlong, anang wangsi pulo, “O Hemphu, nang angthin kangtang arleng, bangpo ne than uno; nangke sok ki-eh eh alongsi parotman aro kiripre alongsi sok papangrum man; 25lasi ne chipheresi, ne damsi, nang nohok lungle arlo pepsitsi bilo. Holek nang potsi kipi nang chi-en not. 26Manta anang ahemphupo pulo, “Ei nang sotonga aro kaselet murkiyapo! Ne sok ki-eh-eh alongsi rot man, aro kiripre alongsi sok pangrumman pusi nang kithan un ma? 27Laparake nang ne nohokpo bank along bipon uno hoi, aro ne wangsi kichan anohokso pen ne nohok chihlong detno hoi. 28Lasi, anang para nohokpo endetsi, inghosi phoro-kep do, anangyok pinot. 29Piyok pu tene ingho dochongdo, anang yoksi pibo, la-amun anang ongchot bo; manta inghosi kangwe, anang potsi do, bangso ta anang para pondet bo. 30Kichakche murkiya poyok ke, mokol kangting aju anangyok warnot; lalong surujoye aro aso-chingkre ye.
Kijut Arni Abisar
31“Konam Arleng Aso anang jortang pen wange, aro ahuwit tharlonhel anang pen doye, la amun anang jortang anghol athak anang ininge. 32Ahuwit ason anang ango pangrume, aro anang khokhrepo bik pen bherabik kabhalek badi anang analiyok ihut para ihut yok bhaleknge, 33aro anang bherabik helyok ke ancho-ari aga biye aro bik helyok ke debera aga biye. 34Laparake rechopo ancho-ari aga kido abangyok puye, “Wangot, ne Apa abor-eh kihlonge aidot kido abangyok pirthepe kasanse ango para nali phan longri honjok wensi bilo; 35piyok pu tene ne kangchir aro nali an nepilo, ne lang-ik aro nali penebak nepajuno, ne ihut don badisi kido aro neyok nali nechingden pamelo, 36ne pe-rik kangwe aro nali pe nepa-ikngo, ne kisosi kido aro nali al eno, ne akrol longsi kido aro nali neyok wang lango. 37“Lapara ke kadhorom abang anangyok pu ye, “Hemphu, konam te hali nangyok kangchir kitheksi aro nang kapacho hlong kalang-ik aro lang nang kapajun hlong? 38Aro hali konam nangyok kachinine adon theksi kapado hlong? Lale pe-rik kangwe theksi, pe nang kapa-ik hlong? 39Aro hali konam nangyok kiso nang theksi, lale akrol kithal nang theksi, nang kilangdam hlong? 40Aro la-amun rechopo analiyok pu ye, “Khanangsi ne nali thando, nali ne kortehel asitem kibekso yokta pot katiki, bangpo ne phansi katiki. 41La-amun anang debera ari aga kido abang yok anang pu ye, “Ei hao kihlong hel, si-ik aro anang tharlon hel aphan kahonjok me-aten dang along nali ne para chiterekne damot; 42piyok pu tene kangchirsi kido manta nali an nepipe yongo, ne kalang-iksi kido aro nali lang nepajunje yongo. 43Ne don badi kido aro nali netaramre yongo, pe-rik kangwe detsi kido aro nali pe nepa-ik-eh yongo, ne kiso aro akrol longsi kido manta nali ne wang langle yongo. 44Laparake analita pu ye, “O Hemphu, konam te kangchir nang kithek hlong, lale kalang-ik, lale don badi, lale pe-rik kangwe, lale kiso, lale akrol long kido, nangthek si al nang-en hlonghle yongo?” 45Laparake anang analiyok pu ye, “Khanangsi ne nali thando, lamehel jipe ta akibek chotso yok kirap dun kachikengke poke neyoksi kachikeng ke. 46Aro analike ki-or-eh pen aduk kipi ayok tol krenge manta dhorom abangke ki-or-eh len ajiu ayok dame.”
Currently Selected:
MOTHI 25: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
MOTHI 25
25
Bang Kep So-Arjang Athenghlan Alam
1“La-apor sati ame ensi, osopo yok ango kachingden ayok olesi kidam bang-kep osope mar pen ethakpe-alongri pachingbare. 2Anali sitem bang-phongo kamango kido, aro bang-phongo ke agun kido. 3Konam kamango abangke anali me-lur ki-en amun, anali jangthu agol chi-en-eh yongo; 4manta agun pemar ke anali me-lurpen abithang langpong pen jangthu ta chi-eno. 5Osopo kiwang abhemdo apot, ahuwit ami-ih wango aro amek jang phril lo. 6Manta nuwe jarlo apunsi, “Langot! osopo wang hlengo! Wangot anangyok chingden dam minang,” pusi chihang solo. 7Laparake labang ahuwit so-arjang hel ingthuro, aro anali melur hel pakaro. 8Ladi apor kamango pemar ke, agun abangyok pulo, “Nali jangthu para bekso hali pinot, piyok pu tene me-lurhel jut rang-rangdo. 9Manta agun pemar ke pulo, “Kalek, penebak ke nali phan aro hali phan ayok dorde ye; nali kijor arleng adung damot aro, naliphan chinam damot.” 10Aro konam anali kachinam dam amunsi, osopo wang hlengo, aro ingho trepsi kido abangke oso po pen jorme cho-junyok lutdamo; aro inghap hangar klakngo. 11Laphel prek so-arjang helta wangsi, pulo, “O Hemphu, O Hemphu, haliyok ingpu pinot. 12Manta anang pu phakngo, “Khanangsi ne nali thando, ne nali chinine.” 13Lasi inghong dingne do, piyok pu tene labang adin lale aporpo nali than un-eh.
Bang Kithom Murkiya Athenghlan Alam
(Luk. 19:11-27)
14“Piyok pu tene ethakpe-alongri ke ladi ihut arleng badi, te anang turuhel yok taramsi, anang bihini hel lahel arideng champisi, kaholo alongriyok damo. 15Anang ihutyok phoro phongo, ihutpo yok phoro hini, la ihutpo yok phoro isi, abangten yokta anang ki-un ateng langsi, nohok pisi anang dam hrolo. 16La-amun inghosi phoro-phongo kihlong, anang phot damsi, labang pen chijor-chihrepsi, aro phoro-phongo alapmo. 17Ladisi, ingho phoro-hini kihlong, anangta aro phoro-hini alapmo. 18Manta inghosi phoro isi hlongo, anang damsi lungle tuksi, anang ahemphu anohokso butisitsi bilo. 19Jokha arni ding hrim aphel, la turu hel ahemphupo wangsi, anali pen alekha pachingbaro. 20La-amun inghosi phoro phongo kihlong, anang aro phoro-phongo ongchot wansi pulo, “O Hemphu, nang neyok phoro-phongo nekipi; langot, ne aro phoro-phongo alapmo.” 21Anang ahemphupo anangyok pulo, akime tikilo, “Akime kikrol murkiyapo, nang beksodet yongta krolthipsi kido, nangyok ako-ong chot puru-hemphu pangninge;” nang hemphupo anengrong long lut dunnot! 22Aro inghosi phoro-hini kihlong, anangta wangsi pulo, “O Hemphu nang neyok phoro-hini nekipi; langot ne phoro-hini alapmo.” 23Anang ahemphupo anangyok pulo, “Akime tikilo, akime kikrolthip murkiyapo, nang bekso alamta kikrolthip. Nangyok ako-ong puru-hemphu pangninge;” nang Hemphu pen anengrong long lut dunnot. 24Laparake inghosi phoro isi kihlong, anang wangsi pulo, “O Hemphu, nang angthin kangtang arleng, bangpo ne than uno; nangke sok ki-eh eh alongsi parotman aro kiripre alongsi sok papangrum man; 25lasi ne chipheresi, ne damsi, nang nohok lungle arlo pepsitsi bilo. Holek nang potsi kipi nang chi-en not. 26Manta anang ahemphupo pulo, “Ei nang sotonga aro kaselet murkiyapo! Ne sok ki-eh-eh alongsi rot man, aro kiripre alongsi sok pangrumman pusi nang kithan un ma? 27Laparake nang ne nohokpo bank along bipon uno hoi, aro ne wangsi kichan anohokso pen ne nohok chihlong detno hoi. 28Lasi, anang para nohokpo endetsi, inghosi phoro-kep do, anangyok pinot. 29Piyok pu tene ingho dochongdo, anang yoksi pibo, la-amun anang ongchot bo; manta inghosi kangwe, anang potsi do, bangso ta anang para pondet bo. 30Kichakche murkiya poyok ke, mokol kangting aju anangyok warnot; lalong surujoye aro aso-chingkre ye.
Kijut Arni Abisar
31“Konam Arleng Aso anang jortang pen wange, aro ahuwit tharlonhel anang pen doye, la amun anang jortang anghol athak anang ininge. 32Ahuwit ason anang ango pangrume, aro anang khokhrepo bik pen bherabik kabhalek badi anang analiyok ihut para ihut yok bhaleknge, 33aro anang bherabik helyok ke ancho-ari aga biye aro bik helyok ke debera aga biye. 34Laparake rechopo ancho-ari aga kido abangyok puye, “Wangot, ne Apa abor-eh kihlonge aidot kido abangyok pirthepe kasanse ango para nali phan longri honjok wensi bilo; 35piyok pu tene ne kangchir aro nali an nepilo, ne lang-ik aro nali penebak nepajuno, ne ihut don badisi kido aro neyok nali nechingden pamelo, 36ne pe-rik kangwe aro nali pe nepa-ikngo, ne kisosi kido aro nali al eno, ne akrol longsi kido aro nali neyok wang lango. 37“Lapara ke kadhorom abang anangyok pu ye, “Hemphu, konam te hali nangyok kangchir kitheksi aro nang kapacho hlong kalang-ik aro lang nang kapajun hlong? 38Aro hali konam nangyok kachinine adon theksi kapado hlong? Lale pe-rik kangwe theksi, pe nang kapa-ik hlong? 39Aro hali konam nangyok kiso nang theksi, lale akrol kithal nang theksi, nang kilangdam hlong? 40Aro la-amun rechopo analiyok pu ye, “Khanangsi ne nali thando, nali ne kortehel asitem kibekso yokta pot katiki, bangpo ne phansi katiki. 41La-amun anang debera ari aga kido abang yok anang pu ye, “Ei hao kihlong hel, si-ik aro anang tharlon hel aphan kahonjok me-aten dang along nali ne para chiterekne damot; 42piyok pu tene kangchirsi kido manta nali an nepipe yongo, ne kalang-iksi kido aro nali lang nepajunje yongo. 43Ne don badi kido aro nali netaramre yongo, pe-rik kangwe detsi kido aro nali pe nepa-ik-eh yongo, ne kiso aro akrol longsi kido manta nali ne wang langle yongo. 44Laparake analita pu ye, “O Hemphu, konam te kangchir nang kithek hlong, lale kalang-ik, lale don badi, lale pe-rik kangwe, lale kiso, lale akrol long kido, nangthek si al nang-en hlonghle yongo?” 45Laparake anang analiyok pu ye, “Khanangsi ne nali thando, lamehel jipe ta akibek chotso yok kirap dun kachikengke poke neyoksi kachikeng ke. 46Aro analike ki-or-eh pen aduk kipi ayok tol krenge manta dhorom abangke ki-or-eh len ajiu ayok dame.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.