मत्ती 28

मर्या बठेइ येशू जिउना भया

(मर्क १६:१-११; लूका २४:१-१२; यूह २०:१-१८)

1बिश्राम दिन पछा, हप्ताको पइलो दिन झिसमिसे उजालो हुन्ज्याँ मग्दला गाउँकी मरियम रे अर्खि मरियम चिहान हेद्दाइ आया। 2ठुलो भुइँचालो गयो, क्याकि परमप्रभुका एक स्वर्गदुत स्वर्ग बठेइ तल्तिर ओल्या, रे आइबर ढुङो हटाइबर तइमि बस्या। 3तिनरो अनार बिजुलि जसो रे लत्ता हिंउ जसा सेता थ्या। 4तिनरि डरले तिन पहरा दिन्या सिपाइन थरथर काम्या, रे मर्या जसा भया। 5तर स्वर्गदुतले तिन स्वानिनलाइ भण्यो, तमन जनडरा, क्याकि मलाइ था छ, तमन क्रुसमि टाङिया येशूलाइ खोज्जा छौ। 6उन याँ आथिन, क्याकि उनले भण्या अनसार उन जिउना होइबर उठिरइछन। आस, उनलाइ राखिया ठाउँ हेर। 7तब छिट्टाइ गइबर उनरा शिष्यालाइ खबर दिय, कि उन मर्या बठेइ जिउना होइबर उठिरइछन, रे उन तमन हइ अगाडी गालीलमि जान्नाछन। तमनले उनलाइ ताँ धेक्दे हउ। हेर, मइले तमनलाइ भणिदिराइछु। 8तइ पछा तिनन डर रे भौत आनन्दसित झट्ट चिहान बठेइ निकलिबर गया, रे उनरा शिष्यालाइ खबर दिनाइ दकुड्या।

स्वानी मान्सनले येशूको दर्सन अर्या

9अचानक येशूले तिननलाइ भेटीबर भण्यो, सान्ति। तिननले नजिकै आइबर उनरा खुट्टा समाइबर उनलाइ आराधना अर्यो। 10तब येशूले तिननलाइ भण्यो, “जनडरा, गइबर मेरा शिष्यालाइ गालील जिल्लामि जा भणिदिय, रे ताँ तिननले मलाइ धेक्द्या हुन।”

चौकिदारको खबर

(मर्क १६:१४-१८; लूका २४:३६-४९; यूह २०:१९-२३; प्रेरि १:६-८)

11जब तिन स्वानिन येशूका शिष्यालाइ यो खबर दिनाइलाइ जन्नाथिन, कोइ चिहानको पहरा दिन्या सिपाइले सहरमि गइबर यहुदि मुख्य पुजारिनलाइ ताँ भया घटनाका बारेमि खबर दियो। 12जब मुख्य पुजारिले, यहुदि मान्सनका अगुवासित भेट्यो, रे सल्लाह अर्यो। तिननले सिपाइलाइ भौत रुप्या घुस दिबर चिहान इसेरि खाली भयो भणि भण्न लायो, 13“तिननले सिपाइलाइ भण्यो, ‘तम मान्सनलाइ भण्या, हाम रात सिया बेला येशूका शिष्या आइबर तइलाइ चोरीबर लैय्या रइछन।’ 14यदि तमन चौकिदारिका समयमि सिया थ्या भणि कसइले हाकिमलाइ भण्यो भण्या हाम मिलाउला, तमनले केइ कुरणीको चिन्ता अद्दु पडइन।” 15तब तिननले त्यो रुप्या लैय्या, रे सिकाया अन्सार अर्यो, रे यहुदि मान्सनमि आजको दिन सम्मलगइ यइ कुरणी फैलिरैछ।

शिष्याको दर्सन रे अन्तिमआज्ञा

16तिन एघारै जाना शिष्या गालीलका तइ डाङामि गया, जाँ येशूले तिननलाइ जान्या आदेस दिराइथ्यो। 17तिननले उनलाइ धेकिबर आराधना अर्यो, तर कतिले संका अर्यो कि उन मर्या बठेइ जिउना भया छन। 18तब येशूले तिनरा वाँ आइबर भण्यो, “स्वर्ग रे धर्तिको सारा अधिकार मलाइ दिराइछ। 19तबइकिलाइ जा, रे सब देशका जातिलाइ शिष्या बना, यो चिन्हका रुपमि बप्तिस्मा दिय कि तिननले परमेश्वर, म, परमेश्वरको चेलो रे पबित्र आत्माको अनुसरण अद्दाहान। 20तिननलाइ मइले आज्ञा अर्या सब कुरणी पालन अद्द सिका। हेर, म युगको अन्त सम्म सदाइ तमन सित छु।”

Currently Selected:

मत्ती 28: DTYNT

Highlight

Copy