लूका 24

यीशु गा जीटाऊ

1पेनो हप्ताह गा पेला #24:1 हप्ताह गा पेलाइतवार होय दिन खाट फेजेरका डी जापाएकु अदा एठा जापाएकु गा सेंग्गोन डी सुकींज चीजो गा बेल्लाके मिनी जो दिकुनी तैयारके डा, साटे कब्रा कोनेन हेन। 2दिकुनी डी खाट गोल आकार गा घोटाके कब्रा लिंजटे धिकली डोके। 3एठा गुफा गा मर्गोटो तलान ओलेडो प्रभु यीशु गा म्हाळा बान दोडुका, 4मेटे दिकु इनी बातो टे बिचार लज्जे डा मेना मेटे डोगे, बरी किंज जवानके पुलूम कपडे उरीटे दिकुगा मेरान हेन टेगेनजे मेना, 5मेटे दिकु हिगराएन मेना, एठा ओटे कोने म्वार दोडो लक्के डा, मेटे दिकिंजनी दिकुके मंडीके, आपे जीटा मिठाच के गोएन मिंकू तालान चोया घागाटा लक्के होय, 6देटेन येटेन बाने, पेनो जीटाएन होय, यादो डोए, कि डीचनी गलीलेन थंदळलठ्ठा आपेके मंडीके डा, 7जरुरी होय, “कि इंज जो कोरो गा कोण पापीकु गा टी टे घोनेच कासु टूलबे एठा क्रूस लिजेन पेळेचकेमी, एठा जुना सनाकु एठा मुख्यायाजक एठा मूसा गा नियम इथूमिठाच वोजीटे इंज्के मनेन बान मनातिंजटे घोच्केमी एठा देटेन आफाई दिन जीटाएन।” 8मेटे दियागा बातो दिकु यादो हेन, 9एठा कब्रा टे हिरायेन डो दिकुनी डी ग्यारह चेलाकूके एठा बाकी सेबाई कुरकू के, इनी बातो घाल्के मेना। 10दिकुनी कलामके मिंकू चेलाकू टे इनी बातो मंडीके, दिकु मरियम जो मगदेला गाँव टे डा एठा योअन्ना एठा याकूब गा आंटे मरियम एठा दियागा सेंग्गोन दूसरा जापाएकु भी डा। 11पेनो दिकुगा बातो चेलाकून कहानी रोंगो लगतिंजे एठा दिकुनी दिकु लिंजेन विश्वास बान दोडुका। 12मेटे पतरस बिटजे डो कब्रा कोनेन साळुपजे एठा झुकातिंजटे बस कपळे के अलग्गो टे सोटका डोके, एठा जो डायेन डा, देटे अचम्बो धोटे, हेजा उरान ओले।

इम्माऊस गा कोरा लिंजेन चेलाकून दर्शन

13डी दिन यीशु गा बरी चेलाकिंज इम्माऊस जीमू म्या गाँवेन चेल्के डा। जो यरूशलेम शहर टे ग्यरा किलोमिटर (अंदाजोटे ग्यारह सेद्दी मीटर लेंक्कीन) डा। 14डी सेबाई बितातिंज्के घटनानौर गा बारेन इकुका बातो-चितो टे चेल्के डा। 15मेटे दिकु इकुका बातो-चितो एठा चर्चा लक्के डा कोकाम्बरा लज्जे डा, मेटे यीशु हेज्का मेरान हेंडो दिकुगा सेंग्गोन सेंदरा लज्जे। 16पेनो परमेश्वर नी दिकुके डीचके चिचानाटे रोकातिंजकेकु। 17यीशु नी दिकुटे कोम्बराके, “इनी चोच बातो होय, जो आपे सेन्द्रा-सेन्द्रा आपेका मंडीवा?” दिकु रुकातिंजे एठा दिकुगा चेहरा ठायका नराजोएन। 18इनी आजुमटे दिकु तलाटे क्लियुपास जीमू गा म्या कोरोनी मंडीके, “शयद आम यरूशलेम शहर गेन एकला कोरो का होय, जो बान मलूम कि ओले दिनेन चोच डायेन होय।” 19यीशु नी दिकुटे कोम्बराके, “तुनी बातो?” दिकुनी डीचके मंडीके, “नासरत के थंदळ मिठाच यीशु गा बारेन जो परमेश्वर एठा सेबाई कुरकू गा नजर गेन एठा वचन गेन शक्ती एठा जो परमेश्वर गा कोनेटे मंडीमिठाच डा। 20एठा मुख्यायाजक कुनी एठा आलेगा मुख्याकुनी डीचके उठाकेनेच, कि दिया लिंजेन गुजू गा हुकूम जीके। एठा डीचके क्रूस लिंजेन पेळेचकेनेच। 21पेनो आले आसा डा, कि इनिज्का इस्राएली कुरकू के रोमी सम्राज्य कुरकू टे आराकुवा, एठा इनी सेबाई बातो गा विषय गेन इनी घाटना के डायेन गा तिसरा दिन होय। 22येनेगा अलावा आलेगा समूह तलाटे चोटोका जापाएकु नी आलेके बिचारेन बोचोकेमी होय, जो टैंज फेजेर नी कब्रन कोनेन ओले डा। 23जब यीशु गा गोएन कोम्बोर बान घाटाडुका, मेटे इनी मंडी लठ्ठाका हिराके, कि आलेनी स्वर्गदूत गा दर्शन घाटाएन, दिकुनी मंडीके, कि यीशु जीटाका होय। 24मेटे आलेगा सोप्तीकु गा तलाटे चोटोकु का कब्रा कोनेन ओले, एठा जैसा जापाएनी मंडीके डा, डेनोगोका घाटाएन। पेनो यीशु के बान दोडुका।” 25मेटे डीचनी बरी भी चेलाकिंज टे मंडीके, “हे बेदिमाग कुरकू, जो चोचकाभी परमेश्वर गा कोनेटे मंडीमिठाच नी पवित्र ग्रंथ गेन ओल्के होय आपे कुरकू डे लिंजेन विश्वास दडा गेन ठायका काठीन होय। 26येटेन जरुरी डा, कि मसीह इनी सेबाई कासु टूले एठा हेजा महिमा गेन मुएन।” 27यीशु नी दिकुके सेबाई पवित्र ग्रंथ गेन मूसा गा नियम टे सुरुटे सेबाई परमेश्वर गा कोनेटे मंडीमिंकू गा द्वारा हेजा विषय गेन जीके बातो सामझातिंजकेकु। 28एटोगेन डीच डी गाँव गा मेरान आदिरजे देटेन दिकु चेल्के डा, एठा दियागा बातो टे येनोगो मालूम्जे, कि दिकुन सम्मान सेने गा इच्छा होय। 29पेनो दिकुनी इनी मंडीटे डीचके रोकातिंजनेच, “आलेगा सेंग्गोन थंदळे चोयाकी सिंगुरूबु लक्के होय, एठा दिन नका ठायका सिंगुरूपजे होय।” मेटे देटेन दिकुगा सेंग्गोन थंदळ गा घल्जी तलान ओले। 30जब देटेन दिकुगा सेंग्गोन आटाजोम सुबानजे, मेटे डीचनी सोकळा साटे परमेश्वर गा धन्यवाद डाके, एठा डीके कुटका टे दिकुके जिऊ लज्जे। 31मेटे दिकुगा मेट खुल्लायेन एठा दिकुनी डीचके चिनाएनेच, एठा देटेन दिकुगा मेट गा सम्माटे गयाबजे। 32दिकुनी इकुका मंडीके, “जब देटेन कोरा गेन आले गेल्ला बातो डा, एठा पवित्र ग्रंथ गा अर्थ आलेके समझातींजकोम डा, मेटे आलेगा मन गेन आरी ओटजे डा।” 33डीच तुरुटो बिटजे एठा यरूशलेम शहर गेन हिरायेन, डी ग्यारह चेलाकू एठा सोप्तीकु म्याखठ्ठा घाटाएन। 34डीच दिकुटे मंडी लज्जे, “प्रभु सच्चोका जीटाएन होय, एठा शमौन पतरस गेन डोके होय।” 35मेटे दिकुनी कोरान डाएन मिनी बातो दिकुनी घाल्के, एठा इनी भी दिकुके घल्के, जब डीच सोकळा कुकटका लक्के डा दिकुनी डीचके चिनायेनेच।

यीशु गा हेजा चेलाकू लिंजेन ओटजू

36दिकु इनी बातो मंडीका लक्के डा, यीशु हेज्का दिकुगा तलान हेन एठा दिकुटे मंडीके, “आपेन शांती घाटायु।” 37पेनो दिकु घबरातिंजे एठा हिगरायेन, एठा सामझातिंजे, कि दिकु तुनिका भूतोके दोडो लक्के होय। 38यीशु नी दिकुटे मंडीके, “चोया घाबरातिंजूबा? आपे मन गेन चोया साक दोडोवा? 39इंजा टी नंगाके डोके, कि इंज डीका होय, इंज्के उठाटे डोके, चोयाकी भूतो गा हाडे जिलु बान थंदळ जैसा इंजेन दोडोवा।” 40इनी मंडीटे डीचनी दिकुके हेजा गा नंगा टी घाल्के। 41जब खुशी गा मरे दिकुन विश्वास बान डाऊ लक्के डा एठा अचम्बो मेन डा मेटे यीशु नी दिकुटे कोम्बराके, “चोच येटेन आपेगा मेरान आटा टाकु होय?” 42दिकुनी डीचके रिफिच काकू गा तुकळा जीके। 43डीचनी तुकळा साटे जोवे जब दिकु डीचके दोडो लक्के डा। 44डाबोलटे डीचनी दिकुटे मंडीके, “इनी इंजा डी बातो होय, जो इंज्नी आपेगा सेंग्गोन थंदळ लठ्ठाका आपेटे मंडीके डा, कि जरुरी होय। जोभी बातो मूसा गा नियम एठा परमेश्वर गा कोनेटे मंडीमिंकू एठा भाजन संहिता गा पुस्ताक गेन इंजा बारेन ओल्के होय, सेबाई साबित डायु।” 45मेटे डीचनी दिकुके पवित्र ग्रंथ गा बातो समझातिंजू गेन मदत डाके। 46एठा दिकुटे मंडीके, “पवित्र ग्रंथ इनी ओल्के होय, इनी जरुरी डा, कि मसीह कासु टूलेवा एठा तिसरा दिन गोएन मिठाजा टे जीटाऊवा। 47एठा यरूशलेम शहर टे साटे सेबाई जाटो गेन मन इखाट गा एठा पापो गा मापो गा खाबोर दियागा का जीमू टे डाके डा? 48आपे इनी सेबाई बातो गा गवाही होय, 49एठा आजुमे, इंज खुद आपेगा माठान पवित्र आत्मा के कुलेच्बा डेगा वादा इंजा बाटे डाके होय। लेकिन आपेके मेटे टाएन यरूशलेम शहर गेन तथाराव होना जब टाएन आपेन स्वर्ग टे शक्ती बान घाटाऊ।”

यीशु गा स्वर्ग गेन हिरा

50मेटे यीशु दिकुके बैतनिय्याह गाँव गा मेरान शहर टे बल्लान सालेकु एठा हेजा टी टूलटे दिकुके आशीर्वाद जीके। 51दिकुके आशीर्वाद जिऊ लठ्ठाका देटेन दिकुटे अलग्गोयेन एठा स्वर्ग लिंजेन टूलजेनेच। 52एठा दिकु दियागा आराधना डा टे ठायका खुशीटे यरूशलेम शहर के हिरायेन। 53डाबोलटे लगातर यरूशलेम गा मंदिर दरोमेन थंदळ टे परमेश्वर गा स्तुति दडा एठा धन्य मंडी डा। आमीन।

Currently Selected:

लूका 24: GOKNT

Highlight

Copy