Yʉanɨ 14
14
Yeso a ɨngbaa kʉsa ɔɔ Tidoo
1Yeso ambusigio ɓakpataka ngiɓangɔ ɓɔ: « Nɔɔdyakɔmʉ ikoko amati ʉ mɨtʉma ngiindɛnʉ, bayeni Asʉɓɨɨ, nambʉnabaya ɛmɛ kʉ bayanɨ. 2Amati ʉ ɨkáa ngia yɨ Tidoo ngiasɛmɛ lizi la lɨja. Yambikinye piɛ ɓwanɨ, ambʉ́ munisigiokɔmʉ ɓɔ makʉsa ninu kʉtambanakɨa izi. 3Mbise ʉ kɨnda ngia mabi‑ɔɔ ninu kʉtambanakɨa izi, ma꞊ka ɓata kʉtɔ ninu kʉchɨka, ambʉ izi ngia ɛmɛ maɓio‑ɔɔ, inu naɓio tiga kʉ ananɨ. 4Mʉa ngua ma‑ɛɛ kʉsa, inu nakʉmbɨa ɨngbaa yɛngɔ kʉtaa. » 5Tʉma ambumusigio ɓɔ: « Makʉʉɓɨɨ, kambʉkɔmʉ kʉmbɨa ɓɔ wakʉsa gbanɨ, ka꞊mbɨa tiga ɨngbaa ɨkyɨkyɨɓʉmʉ tanɨ? » 6Yeso ambutisio ɓɔ: « Ɛmɛ ma ɨngbaa, ingono nʉ ʉɓɨɨ. Mombi gʉkʉ mʉngana ambʉkʉkwanana kʉsa ɔɔ Tidoo ʉɓaenikɔmʉ 'upi ya andɛmɛ. 7Ambʉ́ ndʉ na꞉nambɨa ɛmɛ, ambʉ́ na꞉mbɨa tiga Tidoo ngiasɛmɛ kʉ mbɨaa. Nʉ kʉʉngwa ɨtakɨ‑takɨ ngiakɛ, nʉmʉmbɨa mbɨaa nʉ na tiga nayɔ kʉ kʉna. »
8Filipo ambumusigio ɓɔ: « Makʉʉɓɨɨ, tɨpana‑zʉ Tidoo, ambʉ taa yɨ moni ngia kanayɔ yisio sioo. »
9Yeso ambutisio Filipo aka ɓɔ: « Filipo, kʉpakyɨa ninu aka makwaa maja, ajʉ wambʉkɔmʉ nɛmɛ kʉmbɨa ɓiɛ? Mombi ngia ʉpa nana ɛmɛ, ʉna Tidoo kʉ nanɨ. Jʉtanɨ wa tʉkʉ kusigo ɓɔ: ‹ Tɨpana‑zʉ Tidoo? › 10Ajʉ ɔwɛ wambʉkɔmʉ kʉbaya ɓɔ Tidoo a amati asɛmɛ, nʉ ɓɔ ɛmɛ ma amati angɔ ɓiɛ? Moni ngika maninu kʉngakɨa akɛ, mambʉkɔmʉ nakɔ kʉngaka akʉ ʉpanʉ wʉsɛmɛ makʉɔngɔ, ɨkyɛmɨngana Tidoo ngia a amati asɛmɛ ɛyɔ kʉ akʉkyɨa kuu yangɔ. 11Nabayeni ɛmɛ ati ngia ma‑ɔɔ kusigo ɓɔ, ɛmɛ ma amati ʉ Tidoo nʉ ɓɔ Tidoo a amati asɛmɛ. Ndʉ nambʉkʉbaya moni ngikʉnanɨ, bayeni tɔ aka ekoo kuu ngia makʉkyɨa engo. 12Maninu kusigio tʉkʉ kingono ɓɔ, mombi ngia a꞊nabaya ɛmɛ a꞊kwanana kʉ kʉkyɨa moni ngika ɛmɛ makʉkyɨa engo. Nʉ a꞊kyɨa tiga ɓamoni ɓɔɔ ɓʉkpɔkpɔ kʉɓaa iɓaɓɛ, jʉ ɛmɛ makʉtʉa ɔɔ Tidoo. 13Moni kʉ muɓomu ngika na꞊ta akʉ ino ngiisɛmɛ, ma꞊ninzo ɛkɔ nzoni, ambʉ Tidoo ʉchɨka ɨbɨba 'upi akʉ Mwana. 14Ndʉ nata ɨkyɛmɛ akʉ ino yɨsɛmɛ, ma꞊ɨkyɨa kyɨaa. »
Yeso unzo agɔmɔ ɓɔ a꞊tʉmɨa ɓakpataka 'Ʉtʉma wɔɔ Tu
15« Nʉnakʉndeni kingono, na꞊kwanana kʉpɨmakɨa mapanʉ ngikʉsɛmɛ. 16Ɛmɛ ma꞊ta Tidoo ɓɔ u꞊ninzo mombi ɔmɔ iya aɓio ninu kʉsalɨa, nʉ aɓio ɨzɔ ninu akʉ mɨtʉ yɨ ɨpá nʉ mɨtʉ yɨ ɨpá, 17ya 'Ʉtʉma wɔɔ Tu ngua wʉ ingono. Ɨtaka yambʉkʉmʉbaya, jʉ yambʉmʉnakɔmʉ nʉ yambakamʉmbɨa kʉ ɓwanɨ. Ɨkyɛmɨngana, inu naamʉmbɨa mbɨanɨ jʉ aakyɨa kʉ ɨzɔ ninu, nʉ a kʉ amati ʉndɛnʉ. 18Mambʉkʉnɨsɨa ndʉ miwei, ma꞊tʉa sina ɓata ninu kʉgbʉka tʉkʉ tʉaa. 19Wati wutukuo ɗɛkɛkɛ aka ɨtaka yambʉkʉnana tii ɓata‑ɔɔ, ɨkyɛmɨngana inu na꞊nana naa, nʉ jʉ ɛmɛ manʉ ʉɓɨɨ, nʉ inu nakwanana kʉ kuɓio nʉ ʉɓɨɨ. 20Nʉ tiga ɓisi ngiɓʉnanɨ na꞊mbɨa ɓɔ ɛmɛ ma amati ʉ Tidoo, nʉ inu na amati asɛmɛ, nʉ ɛmɛ tiga kʉ amati ʉndɛnʉ. 21Mombi ngia aaɓoto mapanʉ ngikʉsɛmɛ nʉ nakɔ kʉkyananakɨa, aanakʉnda kingono. Tidoo ngiasɛmɛ a꞊kʉnda kʉ mombi ngia aanakʉnda ɛmɛ, nʉ ɛmɛ ma꞊mʉkʉnda kʉ kʉndaa, nʉ ma꞊kwanana kʉ kʉpananɨa andɔngɔ. »
22Yuda, (chʉkɔmʉ Yuda Ɨsɨkalɨɔta), ambumuɓukuo ɓɔ: « Makʉʉɓɨɨ, jʉtanɨ wakʉpananɨa ɔwɛ makʉɔngɔ tʉkʉ akʉ isu, chʉkɔmʉ akʉ ɓombi ɓʉ ɨtaka? » 23Yeso ambumutisio ɓɔ: « Mombi ngia a꞊nakʉnda ɛmɛ, a꞊kyananakɨa moni ngikʉsɛmɛ. Kija Tidoo ngiasɛmɛ a꞊mʉkʉnda kʉndaa, nʉ isu nʉ Tidoo ngiasɛmɛ ka꞊kumunio nʉ kuwulo amati angɔ. 24Mombi ngia ambʉkɔmʉ nɛmɛ kʉkʉnda, ambʉkɔmʉ kʉkyananakɨa moni ngikʉsɛmɛ. Nʉ moni ngika nanɛmɛ kʉkɔ kʉyaka engo kambʉkɔmʉ kʉʉngwanakɨa nɛmɛ, ɨkyɛmɨngana kakʉʉngwanakɨa nʉ Tidoo ngiasɛmɛ iya a꞉natʉma. 25Mu꞉nisigio moni ngikakɛ ati ngia ma‑zʉ‑ɔɔ ɨtakɨ‑takɨ ngiakɛ kʉ ɨzɔ ninu. 26Ɨkyɛmɨngana, mombi ngia aasalɨa, ya tʉkʉ 'Ʉtʉma wɔɔ Tu, iya Tidoo a꞊mʉtʉma ɓisi akʉ ino yɨsɛmɛ. Ɛyɔ a꞊nɨpanɨa moni kʉ muɓomu nʉ ninu kutungwiso moni kʉ muɓomu ngika ma꞉nɨngakɨa.
27Ɛmɛ mʉ꞉nɨsɨa nʉ majɨɔ, mu꞉ninzo majɨɔ ngikʉsɛmɛ. Mambʉkɔmʉ ninu kunzo majɨɔ ngikʉnanɨ ndʉ iya ɨtaka yaanzo‑ɔɔ. Nɔɔdyakɔmʉ ikoko nʉ nɔɔkumokɔmʉ. 28Na꞉kɔ kʉtaa aka ma꞉nɨɓɨa‑ɔɔ kusigo ɓɔ makʉsa kɨnda nʉ ɓɔ ma꞊tʉa ninu kʉgbʉka kʉtɔ. Ninyeni piɛ nɛmɛ kʉkʉnda, ambʉ́ nʉkwa ɨgyagya kʉkɔ ɓɔ makʉsa ɔɔ Tidoo, jʉ Tidoo a mombi ɔɔ 'ʉja nɛmɛ kʉɓaa ɛmɛ. 29Maninu kusigio moni ngikakɛ pɛɛ ngia kambʉkyananakɨakɔmʉ‑ɔɔ, ambʉ ati ngia ka꞊ɓwanɨa‑ɔɔ, kwananeni kʉbaya engo.
30Mambʉkɔmʉ ma꞊nisigio tii ɓata moni maja, jʉ ngama ʉ ɨtaka ngiakɛ akʉka. Ɛyɔ ambʉkɔmʉ nʉ ʉpanʉ ekoo asɛmɛ, 31ɨkyɛmɨngana yɨkwanana ɓɔ ɨtaka yɨmbɨa ɓɔ maakʉnda Tidoo kʉndaa, nʉ ɓɔ ɛmɛ maakyɨa moni ngbanga kʉndʉ aka ɛyɔ a꞉natitio‑ɔɔ kʉkyɨa engo.
Ungweni ɨkʉʉ, kʉʉngweni aka. »
Currently Selected:
Yʉanɨ 14: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
