Yʉanɨ 18

Ɓʉfa Yeso

(Mat 26:47-56; Mak 14:43-50; Luk 22:47-53)

1Iya Yeso a꞉pipo nayɔ kusigo moni ngikʉnanɨ ɓʉ gba, ɛyɔ ɨzɔ nʉ bakpataka ngiɓangɔ ɓambʉʉngwɨa kɨnda, ɓambʉtapʉa amondu wʉ 'ʉchɛchɛɛ wʉ Kɛdɔlɔnɨ. Mwanʉ watɨnɨ mungono wi꞉nye nani uwa ɔɔ Yeso nʉ ɓakpataka ngiɓangɔ ɓa꞉kumunio‑ɛɛ. 2Yuda ngia i꞉nye kʉsa kʉgaba Yeso i꞉nye mbɨa mʉa nguʉnanɨ uɗo, jʉ ɔɔ Yeso nʉ ɓakpataka ngiɓangɔ ɓi꞉nye junikio‑ɛɛ kʉ gomu. 3Kija Yuda a꞉mʉma ɨkamba yɨ ɓasʉda ɨzɔ nʉ ɓapɨmakɨa ɓʉ ɨkáa yɨ Asʉɓɨɨ, iɓa ɓangama ɓʉ ɓakumu‑kumu nʉ Ɓafalisayɔ ɓi꞉nye ɓʉɓʉtʉmeni. Ɓambuhuo amati ʉ watɨnɨ nguʉnanɨ tʉkʉ ɓʉ ngu. Ɓi꞉nye tiga nʉ manga kʉ dyaa akʉ lɨkɔndɔ, nʉ ɓatala, nʉ kumbo ʉ ɗite. 4Ndʉ Yeso i꞉nye ʉmbɨeni moni ku muɓomu ngika ki꞉nye nayɔ kʉka kʉgbʉka mbɨaa, ambʉsɨngana apɛɛ ʉndaɓʉ, ambuɓuɓukuo ɓɔ: « Nakʉhata anɨ? » 5Ɓambumutisio ɓɔ: « Kakʉhata Yeso ngia wʉ Najalɛtɛ! » Yeso ambuɓusigio ɓɔ: « Ɛmɛ iya akɛ. » Yuda ngia i꞉nye kʉgaba Yeso, i꞉nye 'ʉmaɨ kʉ ananɨ ɨzɔ naɓɔ. 6Iya Yeso a꞉ɓusigio nayɔ ɓɔ: « Ɛmɛ iya akɛ », ɓambʉɗʉana nʉ mbise, ɓambukwikwio akɛsɨ ɓu ngbi ngbi ngbi.

7Yeso ambuɓuɓukuo ɓata ɓɔ: « Na‑zʉ kʉhata anɨ ɓʉ kpɛ? » Ɓambumutisio ɓɔ: « Kakʉhata Yeso ngia wʉ Najalɛtɛ. » 8Yeso ambʉɓʉɓɨa ɓɔ: « Ɛmɛ mʉ꞉nɨɓɨa ɓɨanɨ ɓɔ ɛmɛ iya akɛ. » Kʉ ɓwanɨ, ndʉ naɓio nɛmɛ kʉhata ɛmɛ, sɨeni ɓombi nga ɓɔmɔ ɓʉ꞊sa yɨndaɓʉ sanɨ. 9Yeso a꞉sigo ɓwanɨ aka ekoo ngia ɓɔ moni ngika ka꞉yakanɨa jɛnɛ ekoo angɔ kʉkyananakɨa ngbanga kʉndʉ ananɨ ɓɔ: « Ɓombi ngiɓa wa꞉nanzo ɛɓɔ ma꞉yangisokɔmʉ gʉkʉ mʉngana ati ʉ ʉndaɓʉ. » 10Simoni Pɛtɛlɔ i꞉nye nʉ bakanza. Ambubuso nayɔ mombi ʉ kuu wʉ kumu‑kumu ngia ɔɔ 'ʉja, ambʉmʉtɨna 'uchwei wʉ guɔngɔ ɓʉ cha. Mombi ʉ kuu ngiinanɨ i꞉nye ino ɓɔ Malɨkɔ. 11Ɨkyɛmɨngana, Yeso ambusigio Pɛtɛlɔ ɓɔ: « Tuiso bakanza ngiasɔɔ kʉ amati ʉ ɨkáa yɛngɔ! Yɨkwanana ɓɔ mʉmwa ʉpata wʉ ɓʉka‑ɓʉkaɨ ngua Tidoo ngiasɛmɛ a꞉nʉnapɨa tʉkʉ mwaa. »

Yeso apɛɛ ʉ Anasɨ

12Kija ɨkamba yɨ ɓasʉda, nʉ ngama ʉndaɓʉ, nʉ ɓapɨmakɨa ɓʉ Ɓayuda ɓa꞉fa Yeso, ɓambʉmʉsanga tʉkʉ ɓʉ mvɨ. 13Ɓambʉsa‑zʉ nayɔ apɛɛ ʉ Anasɨ. Anasɨ i꞉nye ɨsʉngʉɛ yɨ Kayafa iya i꞉nye Ngama ʉ ɓakumu‑kumu akʉ igo ngiinanɨ. 14Ɛyɔ Kayafa iya a꞉sigio jɛnɛ Ɓayuda ɓɔ yɨkwanana ɓɔ mombi mʉngana uwio ɓombi kʉ ɓuɓomu.

Pɛtɛlɔ ʉ꞉tata Yeso

(Mat 26:69-70; Mak 14:66-68; Luk 22:55-57)

15Ɔɔ Simoni Pɛtɛlɔ nʉ 'ʉkpataka nga wɔmɔ ɓambʉkpata Yeso. 'Ʉkpataka wɔmɔ nguʉnanɨ, ɓi꞉nye mbɨana nʉ Ngama ʉ ɓakumu‑kumu iɗo. Kʉ ɓwanɨ, ɓambukumunio ɨzɔ nʉ Yeso akʉ ɨmbaa yɨ ɨkáa yɨ Ngama ʉ ɓakumu‑kumu. 16Ɨkyɛmɨngana, Pɛtɛlɔ i꞉nye yangɔ 'ʉmaɨ tʉkʉ aɓei anambamba ʉ umongu. Kija 'ʉkpataka wɔmɔ nguʉnanɨ iya ɓi꞉nye mbɨana nʉ Ngama ʉ ɓakumu‑kumu wa꞉ɓʉa aɓei, ɓambʉyakanaka nʉ moi ngia i꞉nye pɨmakɨa umongu, kija a꞉sɨa Pɛtɛlɔ kukumunio. 17Kija moi ngiinanɨ a꞉ɓukuo Pɛtɛlɔ ɓɔ: « Ajʉ wambʉkɔmʉ‑zʉ kʉ mʉngana ʉ ɓakpataka ɓʉ gue ngiakɛ ɓiɛ? » Pɛtɛlɔ ambutisio ɓɔ: « Chʉkɔɔ! Mambʉkɔmʉ ɛmɛ 'ʉkpataka wangɔ kpa. »

18Ndʉ vɛvʉ yi꞉nye ɨja, ɓombi ɓʉ kuu nʉ ɓapɨmakɨa ɓʉ umongu ɓambʉgbʉnda dyaa, ɓambʉmaa nanɨ kʉtɨa engo. Pɛtɛlɔ i꞉nye tiga ɓʉmaɨ kʉ ananɨ kʉtɨa dyaa ɨzɔ naɓɔ.

Ngama ʉ ɓakumu‑kumu uɓokoko Yeso moni

(Mat 26:59-66; Mak 14:55-64; Luk 22:66-71)

19Kija Ngama ʉ ɓakumu‑kumu a꞉ɓokoko Yeso moni ekoo ʉ ɓakpataka ngiɓangɔ nʉ ekoo mapanʉ ngikangɔ i꞉nye kʉpanɨa engo. 20Yeso ambutisio ɓɔ: « Ɛmɛ mi꞉nye kyɨa kʉɓɨakɨa ɓombi kʉ ɓuɓomu ɨsaʉ akʉ ɓʉmba, mi꞉nye panɨa makwaa kʉ muɓomu akʉ lɨkáa lʉ nɨta ngila lʉ Ɓayuda, nʉ amati ʉ ɨkáa yɨ Asʉɓɨɨ, akʉ Ɓayuda kʉ ɓuɓomu ɓi꞉nye junikie‑ɛɛ. Mambikinye yaka ɨngbaa yɨ moni gʉkʉ mɨngana akʉ ɓaɗi. 21Wa ɓata‑zʉ nɛmɛ kuɓokoko moni jʉtanɨ? Ɓukuo tʉkʉ ɓombi ngiɓa ɓa꞉kɔ moni ngika mi꞉nye kyɨa kʉpanɨa engo, jʉ ɛɓɔ ɓakʉmbɨa moni tɨmanɨ ika mi꞉nye kyɨa kʉyaka engo. » 22Ati ngia Yeso a꞉sigo‑ɔɔ ɓwanɨ, mombi ʉ kuu mʉngana iya i꞉nye pɨmakɨa umongu i꞉nye 'ʉmaɨ kʉ ananɨ, ambʉɓɨnda Yeso ɨkɔfɨ, ambʉmʉngbaya ɓɔ: « Ɓaatisio‑zʉ Ngama ʉ ɓakumu‑kumu moni ɓwanɨ ɓiɛ? » 23Yeso ambutisio ɓɔ: « Ndʉ maɓio mʉyakeni ɓɨɓɨ, wa꞊napana tiga ɓʉɓɨɓɨ ɓɔngɔ kʉ panaa. Ndʉ maɓio mʉyakeni moni kɔɔ ngbingbii wʉ꞉naɓɛndɨa tiga ɨmanɨ? » 24Tiga nanɨ Anasɨ ambuɓaiso Yeso ɔɔ Kayafa ngia i꞉nye Ngama ʉ ɓakumu‑kumu. Yeso i꞉nye tii tʉkʉ 'ʉsangɛ ɓʉ mvɨ.

Pɛtɛlɔ ʉtata ɓata Yeso

(Mat 26:71-75; Mak 14:69-72; Luk 22:58-62)

25Ati ngiinanɨ, Simoni Pɛtɛlɔ i꞉nye kʉtɨa dyaa tʉkʉ ananɨ. Kija ɓa꞉muɓukuo ɓɔ: « Ajʉ wambʉkɔmʉ‑zʉ kʉ mʉngana ʉ ɓakpataka ɓʉ gue ngiakɛ ɓiɛ? » Ambʉtata ɓata tʉkɔ ɓɔ: « Chʉkɔɔ! Mambʉkɔmʉ ɛmɛ 'ʉkpataka wangɔ kpa. » 26Mʉngana ʉ ɓombi ɓʉ kuu ɓʉ Ngama ʉ ɓakumu‑kumu iya i꞉nye akʉ anza wʉ gue ngia Pɛtɛlɔ a꞉mʉtɨna 'uchwei, ambumusigio ɓɔ: « Chʉkɔmʉ‑zʉ tʉkʉ ɔwɛ iya mʉ꞉nɨna ɨzɔ nʉ gue ngiakɛ akʉ mwanʉ watɨnɨ ɓiɛ? » 27Pɛtɛlɔ ambʉmʉtata ɓata tʉkʉ ɓʉ ngbɔmʉ, kʉ nɨma ngiinanɨ gue ʉ kɔɓɔ ambʉnatɨa.

Yeso apɛɛ ʉ Pilato

(Mat 27:1-2; 2:11-14; Mak 15:1-5; Luk 23:1-5)

28Kʉɓa ɓʉ kpi, ɓambʉchɨka Yeso kʉʉngwa ɔɔ Kayafa, ɓambʉsa nayɔ amati ʉ basa ngia wʉ ngama ʉ gɨpa ngia wʉ Ɓalɔma. Ɨkyɛmɨngana, ɛɓɔ Ɓayuda ɓa꞉kumuniokɔmʉ nani jʉ ɓambikinye kʉkʉnda kukpulunio. Jʉ ɓʉkyɨeni jɛnɛ ɓwanɨ, ambʉ ɓa꞉dyakɔmʉ ʉmbɔ wʉ Pasɨka. 29Kija Pilato a꞉ɓʉa naɓɔ kʉgbʉka aɓei, ambuɓuɓukuo ɓɔ: « Jʉtanɨ nakʉnapɨa mombi ngiakɛ nʉ 'ʉkɔmbɔ? » 30Ɓambumutisio ɓɔ: « Mombi ngiakɛ ambikinye piɛ mombi ɔɔ ɓɨɓɨ ambʉ́ kʉ꞉kakɔmʉ nayɔ ya apɛɛ asɔɔ. »

31Pilato ambuɓusigio ɓɔ: « Inu ɓakʉɓɔngɔ mʉchɨkeni nambʉtɨna 'ʉkɔmbɔ nguangɔ kʉkpatanakɨa nʉ mapanʉ ngikʉndɛnʉ. » Ɓambumutisio ɓɔ: « Isu kambʉkɔmʉ nʉ ʉpanʉ kʉwa mombi. »

32Moni ngikʉnanɨ ka꞉kyɨanɨa ɓwanɨ ambʉ moni ngika Yeso a꞉sigo jɛnɛ kʉkyananakɨa, kʉpana ikanzi yɨ ingyo tɨmanɨ iya a꞊wo sina. 33Kija Pilato a꞉tʉa amati ʉ basa, ambusoko Yeso, ambumuɓukuo ɓɔ: « Naɓɨa‑zʉ, ajʉ wa ngama ʉ Ɓayuda ɓiɛ? » 34Yeso ambutisio ɓɔ: « Ajʉ moni ngika wu꞉sigo akɛ kʉɓʉa tʉkʉ nʉ itungwio yɨsɔɔ makʉɔngɔ, gʉ ɓɔ ɓombi ɓɔmɔ ɓʉnaɓɨa moni ekoo asɛmɛ ɓɨɛ? » 35Pilato ambutisio ɓɔ: « Ɛmɛ mambʉkɔmʉ 'Uyuda. Tʉkʉ ɓombi ɓʉ ɨbaba ngiisɔɔ nʉ ɓangama ɓʉ ɓakumu‑kumu ɓu꞉nanzo akʉ lɨkɔndɔ lʉsɛmɛ. Wʉ꞉kyɨa ti‑zʉ ɨmanɨ ɓʉ kpɛ? »

36Yeso ambutisio ɓɔ: « Ɓʉngama ngiɓʉsɛmɛ ɓambʉkɔmʉ ɓʉ ɨtaka ngiakɛ. Ɓʉngama ngiɓʉsɛmɛ ɓi꞉nyeni piɛ ɓʉ ɨtaka ngiakɛ, ambʉ́ ɓombi ɓʉ kuu ngiɓʉsɛmɛ ɓʉ꞉naɓɛndanɨa ɓɛndanɨa ɓɔ ɓɔɔnanzokɔmʉ akʉ lɨkɔndɔ lʉ Ɓayuda. Ɨkyɛmɨngana, ɨtakɨ‑takɨ ngiakɛ ɓʉngama ngiɓʉsɛmɛ ɓambʉkɔmʉ ɓʉ ɨtaka ngia. » 37Kʉ ɓwanɨ, Pilato ambumuɓukuo ɓɔ: « Ambʉ wa tʉkʉ ngama ɓiɛ? » Yeso ambumutisio ɓɔ: « Kʉ ɔwɛ wu꞉sigo ɓɔ ma ngama. Ɛmɛ ma꞉nʉtanɨa, nʉ ma꞉ka ya akʉ ɨtaka aka ekoo ngia ɓɔ mʉɓɨakɨa ingono. Ɓombi kʉ ɓuɓomu ngiɓa ɓanʉ ingono ɓaakɔ moni ngika maasigo. » 38Pilato ambuɓukuo ɓɔ: « Ingono ya ɨmanɨ? »

Ɓʉtɨna 'ʉkɔmbɔ ɓɔ Yeso uwo tʉkʉ woni

(Mat 27:15-31; Mak 15:6-20; Luk 23:13-25)

Mbise ʉ yaka moni ngikʉnanɨ, Pilato ambʉɓʉa ɓata aɓei kʉgbʉka Ɓayuda, ambʉɓʉɓɨa ɓɔ: « Ɛmɛ mʉ꞉nakɔmʉ ɨngbaa yɨ moni gʉkʉ mɨngana iya yɨkwanana‑ɔɔ kʉnapɨa mombi ngiakɛ nʉ 'ʉkɔmbɔ. 39Ɨkyɛmɨngana, kʉkpatanakɨa nʉ ɨkɔɔ ngiindɛnʉ, maaniɓunio kʉ gomu mombi ʉ boloko mʉngana akʉ ʉmbɔ wʉ Pasɨka. Ajʉ nʉkʉnda muniɓunio ngama ʉ Ɓayuda ɓiɛ? » 40Kija ɓa꞉gbʉngana kʉ ɓuɓomu kʉtʉɓɨa ɓɔ: « Kambʉkɔmʉ nʉ taa yɨ mombi ngiinanɨ! Tiɓunio tʉkʉ Balaba! » Balaba ngiinanɨ i꞉nye tɔ agandiɓo.

Currently Selected:

Yʉanɨ 18: BudKoya

Highlight

Copy