Luka 13

Gʉ dʉka gʉ nicho 'ʉtʉma

1Kʉ ati ngiinanɨ, mikpekpe yɨ ɓombi ya꞉ka kʉngakɨa Yeso aka Pilato a꞉dʉka‑ɔɔ ɓombi ɓʉ Galilaya, ambujobo miniki kʉndaɓʉ nʉ ika kʉ ɓanama ngiɓa ɓi꞉nye yɨa Asʉɓɨɨ 'ʉtʉmbɨa wɔngɔ. 2Kija Yeso a꞉ɓutisio ɓɔ: « Ajʉ nakʉna ndʉ iinanɨ ɓa꞉dʉka‑ɔɔ ɓombi ɓʉ Galilaya ngiɓʉnanɨ ɓwanɨ, yi꞉nye jʉ ɓʉɓɨɓɨ nga ɓʉndaɓʉ ɓa꞉ɓaa iɓa ɓʉ ɓombi ɓʉ Galilaya nga ɓɔmɔ kʉ ɓuɓomu ɓiɛ? 3Maninu kʉɓɨa ɓɔ yambʉkɔmʉ ɓwanɨ gʉkʉ ɗɛkɛkɛ. Ɨkyɛmɨngana, ndʉ nambukunicho mɨtʉma ngiindɛnʉ, inu kʉ ɓuɓomu nadʉka ngbanga kʉndʉ ɛɓɔ. 4Nʉ ya ngbanga kʉndʉ ɓombi kumi nʉ ʉɓagɨna ngiɓa aga ɔɔ ikongo ngia wʉ Siloamu a꞉ɓʉkwɨa ambʉɓʉdʉka. Ajʉ nakʉna ndʉ ɛɓɔ ɓi꞉nye ɓombi ɓʉ ɓʉɓɨɓɨ kʉɓaa ɓombi kʉ ɓuɓomu ngiɓa ɓʉ Yelusalɛma ɓiɛ? 5Maninu kusigio ɓɔ yambʉkɔmʉ ɓwanɨ gʉkʉ ɗɛkɛkɛ. Ɨkyɛmɨngana, ndʉ nambukunicho mɨtʉma ngiindɛnʉ, inu kʉ ɓuɓomu na꞊dʉka ngbanga kʉndʉ ɛɓɔ. »

Isisinio yɨ ɓʉtɨ ngiɓa ɓambikinye nʉ lipumo

6Kija Yeso a꞉ɓʉngakɨa isisinio ngia: « Ɓʉtɨ mʉngana ngiɓa ɓi꞉nye ɓusoko ɓɔ mutini ɓi꞉nye amati ʉ watɨnɨ wʉ mijabibo. Iya mambɨnyɔngɔ a꞉sa kʉkanga lipumo ekoo ɔngɔ, chʉkɔmʉ ambʉna ipumo gʉkʉ mɨngana. 7Ambusigio mombi ngia i꞉nye pɨmakɨa watɨnɨ wʉ mijabibo ɓɔ: ‹ Ʉna‑zʉ, ya tiga mugo kaatʉ aka ma꞉faniso‑ɔɔ hata lipumo ekoo ʉ ɓʉtɨ ngiɓaɓɛ. Mambakana ɨkyɛmɛ ekoo ɔngɔ gʉkʉ ɗɛkɛkɛ. Ya iɗo ɓʉɓʉkwaka kwakaa! Ɓakʉchɨka ɨtaka ɨsʉkʉɓwanɨ akʉ moni kʉ ɨmanɨ? › 8Ɨkyɛmɨngana, mombi ʉ kuu ngiinanɨ ambumutisio ɓɔ: ‹ Makʉasɛmɛ, ɓʉsɨa ɓata‑zʉ nʉ igo ngia kʉ ananɨ, ma꞊mba‑zʉ ʉpɨa anambamba ɔngɔ, kija ma꞊mʉma ɨkaka akʉ itindi‑tindi yɛngɔ. 9Atiga ɓa꞊mɔ gɔ lipumo akʉ igo ngia ya꞊kʉka. Ndʉ ɓa꞊mbʉkʉmɔ tii lipumo, wambʉɓʉkwaka. › »

Yeso uhiiso moi ɔɔ 'ʉjʉnganakɛ

10Ɓisi ɓʉ humuo mʉngana ɓɔmʉ, Yeso i꞉nye kʉpanɨa amati ʉ ɨkáa yɨ nɨta ngia yɨ Ɓayuda. 11Nani, moi mʉngana i꞉nye nʉ 'ʉtʉma wʉ abɨa uwa wa꞉muguɓo 'ʉkɔngɔ tʉkʉ ɓʉ kɔfɨ amati ʉ mugo kumi nʉ ʉɓagɨna. Ambikinye ikanzi ngia ayumunio gʉkʉ ɗɛkɛkɛ. 12Iya Yeso a꞉mʉna nayɔ, ambumusoko, ambumusigio ɓɔ: « Inoo, wuɓununikio akʉ kweso ngiisɔɔ ɓununikioo. » 13Kija a꞉napɨa lɨkɔndɔ ekoo angɔ. Kʉ nɨma ngiinanɨ, ambuyumunio kʉ ngbii, ambufaniso tuisio Asʉɓɨɨ ɨbɨba.

14Ɨkyɛmɨngana, ngama ʉ ɨkáa yɨ nɨta ngiinanɨ ambupuno ɓʉkaɨ, jʉ Yeso i꞉nye uhiiseni mombi akʉ ɓisi ɓʉ humuo. Kija ngama ngiinanɨ a꞉nɨtana mesu akʉ ungbutu wʉ ɓombi wi꞉nye‑ɛɛ, ambuɓusigio ɓɔ: « Makwaa ngika nʉkwanana‑ɔɔ kyɨa kuu ka ʉmalɨa, ɓʉkeni‑sa amati ʉ makwaa ngikʉnanɨ ɓɔ ɓunihiiso, chʉkɔmʉ akʉ ɓisi ɓʉ humuo! »

15Kija Makʉʉɓɨɨ a꞉mutisio ɓɔ: « Inu ɓafili ngiɓa! Akʉ ɓisi ɓʉ humuo, mombi kʉ nangana nangana ati ʉndɛnʉ aaɓono ngɔmbɛ giangɔ, yɛmɔ punda ngiangɔ akʉ mʉa ngua ɓaadyakaka‑ɔɔ, ambʉsa nayɔ kumwiso mepo. 16Ʉna‑tɔ, moi ngiakɛ a mwana ʉ ɓanɔnɔ ʉ Abalama, iya Sɨtanɨ a꞉mʉnga amati ʉ mugo kumi nʉ ʉɓagɨna. Ajʉ yambikinye piɛ iɗo ɓɔ ɓumuɓonoko akʉ ɓʉka‑ɓʉkaɨ ngiɓʉnanɨ akʉ ɓisi ɓʉ humuo ɓiɛ? » 17Moni ngikʉnanɨ Yeso a꞉tisio ka꞉nziso ɓakwa ngiɓangɔ kʉ ɓuɓomu tʉkʉ soni. Ɨkyɛmɨngana, ungbutu wʉ ɓombi kʉ uɓomu wi꞉nye tiga nʉ ɨgyagya ekoo ʉ moni kɔɔ mʉmbangɛ kʉ muɓomu ngika Yeso i꞉nye kʉkyɨa engo.

Isisinio yɨ Ɓʉngama ɓʉ Asʉɓɨɨ

(Mat 13:31-33; Mak 4:30-32)

18Kija Yeso a꞉sigo ɓɔ: « Ɓʉngama ɓʉ Asʉɓɨɨ ɓa ti‑zʉ ngbanga nʉ ɨmanɨ? Ma꞊ɓusisinio ti‑zʉ nʉ ɨmanɨ? 19Ɓa ngbanga ndʉ mwana ʉ ipumo yɨ ɓʉtɨ ngiɓa ɓaaɓusoko ɓɔ aladali, iya mombi mʉngana a꞉ɨchɨka, ambʉɨhʉna akʉ ɨtaka amati ʉ watɨnɨ nguangɔ. Iya ya꞉naa yambʉka tiga ɓʉtɨ ɓɔɔ ɓaja, ɓunoi ngiɓa ɓaabʉmbʉa akʉ maba kʉ ɓisi ɓambʉtɨa lɨkáa ekoo ʉ mɨtapɨ yɛngɔ. »

Isisinio yɨ ɓʉtɨ ɓɔɔ ɓufukise mikati

(Mat 13:33)

20Yeso ambʉmatɨa ɓata isisinio nga yɛmɔ ɓɔ: « Ma꞊sisinio ti‑zʉ Ɓʉngama ɓʉ Asʉɓɨɨ nʉ ɨmanɨ? 21Ɓa ngbanga ndʉ ɓʉtɨ ɓɔɔ ɓufukise mikati. Moi aaɓʉchɨka, ambuɓupuo nʉ akuku ʉ falini 'ʉjanana ambuukpolo kʉɓʉya tʉkʉ akʉ ikandi‑kandi yɛngɔ ya꞊tʉfʉa‑ɔɔ kʉ iɓomu. »

Umongu wɔɔ kpɔkɔlɨ

(Mat 7:13-14,21-23)

22Mbise ʉ moni ngikʉnanɨ, ati ngia Yeso i꞉nye‑ɔɔ kʉsa anʉ Yelusalɛma, i꞉nye kʉpanɨa akʉ ɓagʉlʉ, nʉ akʉ lɨkʉmbʉ lɔɔ ɗɛ ɗɛ ɗɛ ngila i꞉nye‑ɔɔ kʉɓaɓaka. 23Kija mombi mʉngana a꞉muɓukuo ɓɔ: « Makʉʉɓɨɨ, ajʉ ɓombi ngiɓa ɓa꞊nyɨa sina nʉ ɓʉhɨa ɓambukuɓio ti‑zʉ tʉkʉ ɗɛkɛkɛ ɓiɛ? » Yeso ambutisio ɓɔ: 24« Kyɨeni angu kukumunio akʉ umongu ngua wɔɔ kpɔkɔlɨ. Jʉ maninu kʉɓɨa ɓɔ, ɓombi ɓaja ɓa꞊kanyo ɓisi ongo kukumunio, ɨkyɛmɨngana ɓambʉkʉkwanana kumunio gʉkʉ ɗɛkɛkɛ.

25Ati ngia mambɨnyɨ ʉ ɨkáa a꞊ʉngwa sina‑ɔɔ ɨkʉʉ ambʉdɨkpa umongu, inu na꞊tukuo tʉkʉ aɓei. Kija na꞊faniso ɓɛnda umongu ninyeni kusigo ɓɔ: ‹ Makʉʉndɛsʉ, tɨganɨa ɓaka umongu. › Kija ɛyɔ a꞊nitisio tiga ɓɔ: ‹ Mambʉkɔmʉ kʉmbɨa ɓɔ naka neni! › 26Tiga nanɨ, na꞊faniso sigo ɓɔ: ‹ Ki꞉nye dyakaka nʉ mwakanaka tʉkʉ ɨzɔ ninu, wi꞉nye kyɨa kʉpanɨa akʉ mɨngyɛndʉ yɨ gʉlʉ ngiʉndɛsʉ. › 27Kija a꞊tisio ɓata ɓɔ: ‹ Mambʉkɔmʉ ninu kʉmbɨa ɓɔ naka neni. Ʉngweni akʉ mesu kʉsɛmɛ, inu kʉ ɓuɓomu ngiɓa naakyɨa ɓʉɓɨɓɨ. › 28Kija ɓa꞊nigiso aɓei, tiga nani, nambufaniso ndɨa nʉ dyana menu. Kija na꞊na ɔɔ Abalama, Ɨsaka, Yakɔbɔ, nʉ lɨgbɛ lʉ Asʉɓɨɨ kʉ liɓomu amati ʉ Ɓʉngama ɓʉ Asʉɓɨɨ. 29Ɓombi ɓa꞊ʉngwa sina akʉ ɨpá yaaɓʉa‑ɛɛ nʉ akʉ yaakwa‑ɛɛ, nʉ wagba ngua wʉ ekoo, nʉ wagba ngua wʉ 'ʉndʉʉ, kʉka kʉdyakaka akʉ ʉmbɔ amati ʉ Ɓʉngama ɓʉ Asʉɓɨɨ. 30Kʉ ɓwanɨ, ɓombi ngiɓa ɓa ambise ɨtakɨ‑takɨ ngiakɛ, ɓaɓio tiga apɛɛ. Nʉ ɓiga ngiɓa ɓa apɛɛ ɨtakɨ‑takɨ ngiakɛ, ɓaɓio tiga ambise. »

Yeso ʉnɨa ɓombi ɓʉ Yelusalɛma ikoko

(Mat 23:37-39)

31Iya Yeso a꞉pipo ngaka moni ngikʉnanɨ, Ɓafalisayɔ ngana ngana ɓambʉsɨngana tinene nayɔ, kija ɓa꞉musigio ɓɔ: « Ʉngwa aka ʉngwaa, sa akʉ mʉa wɔmɔ, jʉ Ɛlɔdɛ akʉhata ɓɔ anawa waa. »

32Kija Yeso a꞉ɓutisio ɓɔ: « Seni kʉɓɨa sɔdɔ ngiinanɨ ɓɔ musigo ɓɔ: ‹ Ɓʉɓʉnɨ nʉ ɓisi makiso mɨtʉma yɨ ɓabɨa nʉ kuhiiso ɓombi ɓʉ ɓakwisikiso. Ɓisi ɓʉ kaatʉ mambupipo kuu ngiisɛmɛ. › 33Ɨkyɛmɨngana, ɓʉɓʉnɨ, ɓisi, nʉ ɓisi ngiɓʉnanɨ ɓɔmɔ, yɨkwanana ɓɔ mʉsɨnganaka tʉkʉ nʉ kɨnda ngiisɛmɛ. Jʉ yambʉkɔmʉ iɗo ɓʉwa ɨgbɛ akʉ mʉa wɔmɔ, ɓʉmʉwa tʉkʉ anʉ Yelusalɛma.

34Huu! Inu ɓombi ɓʉ Yelusalɛma, inu ɓombi ɓʉ Yelusalɛma! Inu ngiɓa naamaa lɨgbɛ lʉ Asʉɓɨɨ. Ndʉ ɓaanɨtʉmɨa ɓatitima, naaɓʉdʉka tʉkʉ dʉka naɓɔ kʉɓɛnda nʉ mukopi! Ʉna tɔ, nɨsɨ mʉpɨtanɨ mʉpaahata ninu kʉmʉma anambamba asɛmɛ, ngbanga ndʉ iya kɔɓɔ aamʉma‑ɔɔ ɓana ɓangɔ ɛsɨ ʉ mapapandʉa. Ɨkyɛmɨngana, chʉkɔmʉ nambuɓio kʉkʉnda! 35Ɨkʉmbʉ ngiindɛnʉ ya꞊tukuo tii tʉkʉ matʉnga. Maninu kusigio kingono ɓɔ, nambʉkʉnana tii ɓata kʉɓʉya tʉkʉ ati ngia na꞊sigo sinani‑ɔɔ ɓɔ: ‹ Asʉɓɨɨ umbuiso mombi ngia akʉka akʉ ino yɨ Makʉʉɓɨɨ! › »#Popoko Mʉm 118:26

Currently Selected:

Luka 13: BudKoya

Highlight

Copy