Luka 15

Isisinio yɨ kɔndɔlɔ ngia a꞉yangaa

(Mat 18:12-14)

1Ɓisi mʉngana, ɓandɔmbɛ ɓɔɔ ɓulipise manzanza ngana ngana ɨzɔ nʉ ɓombi ɓʉ ɓʉɓɨɓɨ, ɓa꞉ka kʉkɔ moni ngika Yeso i꞉nye kʉyaka. 2Kija Ɓafalisayɔ nʉ ɓapananakɨa ɓʉ mapanʉ ɓa꞉faniso gʉa Yeso kusigo ɓɔ: « Ʉneni‑zʉ mombi ngia akuwuliso ɓombi ɓʉ ɓʉɓɨɓɨ nʉ dyakaka ɨzɔ naɓɔ akɛ. » 3Tiga aka ekoo ʉ moni ngikʉnanɨ, Yeso ambʉɓʉngakɨa isisinio ngia:

4« Mombi mʉngana inyeni‑zʉ nʉ ɓakɔndɔlɔ mɨa mʉngana, tiga mʉngana ayangaa, ajʉ ambʉkʉsɨa‑zʉ iɓa ɓɔmɔ makumi nʉɓɔkwɔngɔ nʉ nʉɓɔkwɔngɔ akʉ mʉa wɔɔ dyakakɛ, kʉsa kʉhata iya aɓio ɓɔ ʉyangaeni, kʉɓʉya tʉkʉ akʉ amuchwio‑ɔɔ ɓiɛ? 5Iya amuchwio nayɔ, a꞊kwa ɨgyagya, ambʉmʉnapɨa akʉ mapaka. 6Iya atʉa andei, asoko ɓadii ɓangɔ nʉ ɓombi ngiɓa ɓanabanakɨa naɓɔ kusigo ɓɔ: ‹ Kukweni ɨgyagya, jʉ muchwio kɔndɔlɔ ngia aakyɨa kina ʉyangaeni chwioo. › » 7Ngbanga kʉ ɓwanɨ, maninu kusigio ɓɔ: « Ɨgyagya yɛɛ ɨja yaɓio ekoo ʉ ɓisi aka ekoo ʉ mombi ʉ ɓʉɓɨɓɨ mʉngana ngia unicho 'ʉtʉma, kʉɓaa ɓombi ɓɔɔ ngbingbii makumi nʉɓɔkwɔngɔ nʉ nʉɓɔkwɔngɔ iɓa yambʉkɔmʉ ɓata kʉta ɓɔ ɓunicho 'ʉtʉma. »

Isisinio yɨ 'ukpekpe wʉ ʉfalanga ngua wa꞉yangaa

8« Kʉchɨkeni‑zʉ ɓɔ, moi mʉngana anʉ falanga kumi, 'ukpekpe wɔngɔ mungono wambʉyangaa andɔngɔ ambɛnɨ. Ajʉ ambʉkʉya wanga nʉ bɨaka ɨkáa kʉ tine tine, ambʉʉhata nʉ kɛkɛɛ, kʉɓʉya tʉkʉ aka a꞊uchwio‑ɔɔ ɓiɛ? 9Iya a꞊uchio, a꞊soko ɓadii ɓangɔ nʉ ɓombi ngiɓa ɓanabanakɨa naɓɔ kija a꞊ɓusigio ɓɔ: ‹ Kʉkweni ɨgyagya, jʉ 'ukpekpe wʉ ʉfalanga ngua wa꞉yangaa bɛ, muuchwio chwioo. › » 10Kija Yeso a꞉sigo tiga ɓɔ: « Maninu kusigio ɓɔ, ya ngbanga kʉ ɓwanɨ ɓɔ ɓamalaika ngiɓa ɓʉ Asʉɓɨɨ ɓa꞊kwa ɨgyagya yɛɛ ɨja ekoo ʉ ɓisi aka ekoo ʉ mombi ʉ ɓʉɓɨɓɨ mʉngana ngia unicho 'ʉtʉma. »

Isisinio yɨ mwana ngia a꞉yangaa

11Kija Yeso a꞉matɨa ɓata isisinio nga yɛmɔ kusigo ɓɔ: « Gue mʉngana i꞉nye nʉ ɓana ɓangɔ ɓɔɔ gue ɓapɨnɨ. 12Kija gwa ngia ɔɔ mwana a꞉sigio ɨsɛ ɓɔ: ‹ Tidoo‑ee, tɨpakɨa‑zʉ kumbo, wambunanzo iya asɛmɛ. › Kija ɨsɛ a꞉ɨpaka kumbo ngiangɔ ati ʉ ɓana ɓangɔ ɓapɨnɨ ngiɓʉnanɨ. 13Tʉkʉ ambise ʉ makwaa ɗɛkɛkɛ, gwa ngia ɔɔ mwana, ambʉgaba kumbo kʉ 'uɓomu tʉkʉ ɓʉ gba, ambʉsa nʉ falanga ngia a꞉nyɨa nayɔ akʉ ɨkʉmbʉ yɛɛ danga. Nani ambʉgabaka falanga tʉkʉ akʉ ɓʉdada ɨsʉkʉɓwanɨ. 14Iya a꞉pipo gabaka falanga kʉ 'uɓomu ɓʉ gba, taa yɛɛ ɨja yambʉkwa akʉ ɨkʉmbʉ ngiinanɨ, kija a꞉faniso kwa ɓanangyɨa. 15Ambʉsa kukumunio kuu ɔɔ mombi mʉngana wʉ ɨkʉmbʉ ngiinanɨ. Mombi ngiinanɨ ambʉmʉtʉma kʉsa kʉpɨmakɨa ɓanɛmbʉ akʉ mʉa wangɔ mungono ɓɔ. 16Tiga nani, taa yambʉmʉɓaa angu tii tʉkʉ ikanzi ngia ɓɔ i꞉nye tiga kʉtananɨa kuhuiso ɓʉa nʉ lɨpapɨ lʉ lipumo ngila ɓanɛmbʉ ɓi꞉nye kyɨa kʉdya engo. Ɨkyɛmɨngana, mombi gʉkʉ mʉngana ambikinye mutunguo nʉ ɨkyɛmɛ yɛɛ ɨdyɛ.

17Tiga mbise, ambufaniso tunguo ɓujangi ngiɓa i꞉nye amati ɔngɔ, ambusigo ɓɔ: ‹ Ɓombi ɓʉ kuu ɓʉpɨtanɨ‑zʉ iɓa ɓa ɔɔ tidoo, iɓa ɓanʉ idyo igue, ʉna tɔ ɛmɛ tiga iya makuwo taa akɛ! 18Ndʉ ya ɓwanɨ, ma꞊ʉngwa, mambʉtʉa tʉkʉ ɔɔ tidoo kija ma꞊musigio ɓɔ, Tidoo, ma꞉kyɨa ɓʉɓɨɓɨ apɛɛ ʉ Asʉɓɨɨ nʉ apɛɛ asɔɔ kʉtaa. 19Mambʉkɔmʉ tii ɓata 'ʉkwananakɛ wanasoko ɓɔ mwana asɔɔ. Nachɨka tii tʉkʉ ndʉ mʉngana wʉ ɓombi ɓʉ kuu ngiɓʉsɔɔ. › 20Kija a꞉ʉngwɨa kɨnda, kʉtʉa ɔɔ ɨsɛ.

Ɛyɔ‑zʉ tʉkʉ danga, ɨsɛ ambʉmʉna, kija a꞉mʉnɨa ikoko, ambʉsa bangʉ nayɔ kʉjananɨa, ambumunaputo ɓʉ putu. 21Mwana ambusigio ɨsɛ ɓɔ: ‹ Tidoo, ma꞉kyɨa ɓʉɓɨɓɨ apɛɛ ʉ Asʉɓɨɨ nʉ apɛɛ asɔɔ kʉtaa. Mambʉkɔmʉ tii ɓata 'ʉkwananakɛ wanasoko ɓɔ mwana asɔɔ. › 22Ɨkyɛmɨngana, ɨsɛ ambusigio tiga ɓombi ɓʉ kuu ngiɓangɔ ɓɔ: ‹ Ikeni nʉ ɨpʉkʉ ngia yɛɛ iɗo nadɨndɨ gagaa, nambʉmʉpɨnya. Nambʉmʉsʉmbana pɛtɛ akʉ kpɛngbɛ nʉ lɨkpakʉ akʉ mɨtɨndɨ. 23Nambʉka nʉ 'ʉndambʉ wʉ ngɔmbɛ wɔɔ ngbʉlʉ ngbʉlʉ ngua ka nawɔ aka, nambʉmʉwa. Kutiniseni‑zʉ ʉmbɔ wɔɔ 'ʉja. 24Jʉ mwana ngiasɛmɛ akɛ i꞉nye pongo uweni woni, ɨkyɛmɨngana a‑zʉ kʉkʉʉ, i꞉nye pongo ʉyangaeni yangaa, ɨkyɛmɨngana ʉnyɨa ɓata‑zʉ kʉtɔ! › Kija ʉmbɔ wa꞉faniso wɨa.

25Ati ngiinanɨ mwana angɔ pʉta ɔngɔ, i꞉nye akʉ kuu akʉ watɨnɨ. Iya i꞉nye kʉtʉa, kʉpa tiga kʉ tinene nʉ ndei, ambʉkɔ lɨta nʉ ɨgɔmɔ yɨ ʉmbɔ. 26Ambusoko mombi ʉ kuu mʉngana, ambumuɓukuo ɓɔ: ‹ Ya tanɨ ya andei? › 27Mombi ʉ kuu ngiinanɨ ambumutisio ɓɔ: ‹ Mwana ʉ anʉ ʉtʉa tʉaa, ndʉ ʉtʉa‑zʉ kʉ ɓʉmbʉmʉ, iiya atɔ ʉ꞉wa nayɔ 'ʉndambʉ wʉ ngɔmbɛ wɔɔ ngbʉlʉ ngbʉlʉ ngua waakyɨa aka. › 28'Ʉnganga wambuhuo mwana ngiinanɨ pʉta ɔngɔ tʉkʉ ɓʉ fɔ, ambʉyaa kʉɓwanɨa akʉ ɨdɔdɔ yɨ ʉmbɔ. Ɨsɛ ambʉka, ambumukikilikio ɓɔ uchoo akʉ ʉmbɔ. 29Ɨkyɛmɨngana, a꞉tisio ɨsɛ tʉkʉ ɓɔ: ‹ Mʉ꞉panakyananakɨa amati ʉ mugo maja ndʉ bayo. Mambʉnatatɨakɔmʉ sina gʉkʉ ɓisi mʉngana kʉkyɨa ɨkyɛmɛ ngia waanatitio. Ʉna tɔ, tiga ɛmɛ wambʉnanzokɔmʉ sina gʉkʉ mwanʉ mɛmɛ ɓɔ kʉdya nʉ kʉkwa nayɔ ɨgyagya nʉ ɓadii ɓʉsɛmɛ. 30Ɨkyɛmɨngana, ati ngia mwana ngiasɔɔ akɛ iya a꞉sa kutambiso kumbo ngiasɔɔ akʉ ɓoi langaka lɔngɔ ʉtʉa‑ɔɔ, wʉmʉwɨa tʉkʉ 'ʉndambʉ wʉ ngɔmbɛ wɔɔ ngbʉlʉ ngbʉlʉ! › 31Kija ɨsɛ a꞉musigio aka ɓɔ: ‹ Mwana asɛmɛ, kaakyɨa nɔwɛ tʉkʉ ɨzɔ makwaa kʉ muɓomu, nʉ kumbo ngiasɛmɛ kʉ 'uɓomu a tʉkʉ wasɔɔ. 32Kʉ ɓwanɨ, yɨkwanana piɛ‑zʉ kʉkweni tʉkʉ ɨgyagya kambutiniseni ʉmbɔ, jʉ mananʉ ngiakɛ i꞉nye pongo uweni woni, ɨkyɛmɨngana a‑zʉ kʉkʉʉ, i꞉nye pongo ʉyangaeni yangaa, ɨkyɛmɨngana ʉnyɨa ɓata‑zʉ kʉtɔ! › »

Currently Selected:

Luka 15: BudKoya

Highlight

Copy