Luka 17

Kʉpɨa ɓʉɓɨɓɨ ɓʉ ɓombi nga ɓɔmɔ

(Mat 18:6-7,21-22; Mak 9:42)

1Yeso ambusigio ɓata ɓakpataka ngiɓangɔ ɓɔ: « Lɨngbaa ngila lɔɔ lɨkwisise lambʉkɔmʉ nʉ ɨzʉngwɨɛ, ɨkyɛmɨngana ya ikoko nʉ mombi ngia akwisiso mangɛ akʉ ɓʉɓɨɓɨ. 2Ya piɛ iɗo nadɨndɨ ɓɔ mombi ngiinanɨ ɓʉmʉnga ikopi yɛɛ kpʉgʉe idyo akʉ ɨmɨɔ, ɓambumugiso amati ʉ ɗei ɔɔ 'ʉja ɓʉ ɗu. Ambʉ ɔɔɓiokɔmʉ itiki‑tiki yɛɛ kwisise mʉngana ʉ ɓana ngiɓa akʉ ɓʉɓɨɓɨ. 3Pɨmɨeni pɨmɨaa!

Ndʉ mananʉ anakyɨa ɓʉɓɨɓɨ, mʉmɨnya mɨnyaa. Ndʉ ambɨana ɓʉɓɨɓɨ ngiɓangɔ, mʉpɨa pɨaa. 4Amati ʉ 'ukpekpe wʉ ɓisi mungono, ndʉ mananʉ anakyɨa ɓʉɓɨɓɨ nɨsɨ ʉmalɨanɨka, ambʉka kʉ nɨsɨ ʉmalɨanɨka nɔwɛ kusigio ɓɔ: ‹ Mʉ꞉kyɨa ɓɨɓɨ, napɨa pɨaa. › Mʉpɨa tʉkʉ pɨaa. »

Ɓaya yɛɛ ɓʉmʉ

5Kija ɓatitima ɓa꞉sigio Makʉʉɓɨɨ ɓɔ: « Tɨmatɨa baya ngiindɛsʉ. » 6Makʉʉɓɨɨ ambuɓutisio ɓɔ: « Ninyeni piɛ nʉ baya yɛɛ ɗɛkɛkɛ abana tʉkʉ ndʉ mwanʉ ipumo yɨ ɓʉtɨ ɓʉ aladali, na tʉkʉ ikanzi ngia nasigio ɓʉtɨ ngiɓa ɓɔ: ‹ Ɗuunio wambʉsa kʉhʉnanɨa amati ʉ ɗei ɔɔ 'ʉja! › Ɓanɨkɔ tʉkʉ kɔɔ.

Kuu ngia mombi ʉ kuu ʉkwanana kʉkyɨa engo

7Kʉchɨkeni‑zʉ ɓɔ mombi mʉngana ati ʉndɛnʉ anʉ mombi ʉ kuu ngia anayɔ kʉkyɨa kuu amati ʉ watɨnɨ, yɛmɔ ɓɔ anayɔ kʉpɨmakɨa ɓanama, ndʉ atʉa akʉ watɨnɨ ajʉ amusigio tʉkʉ ɓɔ: ‹ Ɨka gagaa kʉdyakaka! › ɓiɛ? 8Chʉkɔɔ! A꞊musigio tʉkʉ ɓɔ: ‹ Nazɨa ɨkyɛmɛ yɛɛ dyɛ, wambʉpɨnya ɨpʉkʉ yɨ kuu nɛmɛ kʉsalɨa ati ngia ma‑ɔɔ kʉdyakaka nʉ mwakanaka. Tiga mbise, ɔwɛ wambʉdyakaka nʉ mwakanaka. › 9Ajʉ a꞊tuisio mombi ngiinanɨ ɨbɨba jʉ aɓio ɓɔ ʉmʉkyɨeni moni kʉ muɓomu ngika aɓio umutitieni ɓiɛ? Gʉkʉ ɗɛkɛkɛ! 10Akʉ inu ya kʉ ɓwanɨ. Ndʉ naɓio ɓɔ nʉkyɨeni moni kʉ muɓomu ngika ɓaɓio ɓunititieni, sigeni ɓɔ: ‹ Ka tʉkʉ ɓombi ɓʉ kuu ɓɔɔ ɨsʉkʉɓwanɨ. Isu kʉkyɨa tʉkʉ ɨkyɛmɛ ngia yi꞉nye piɛ kʉtanɨa ɓɔ kʉkyɨa. › »

Yeso uhiiso ɓakeɓu‑keɓu kumi

11Ati ngia Yeso i꞉nye tiga‑ɔɔ kʉsa anʉ Yelusalɛma, a꞉kpata ɨngbaa ngia yaaɓaa ati ʉ mangɔnɔ wʉ gɨpa ʉ Samalɨa nʉ gɨpa ʉ Galilaya. 12Tiga ndʉ i꞉nye kukumunio akʉ ɨkʉmbʉ mɨngana ɓɔ, ɓakeɓu‑keɓu kumi ɓambʉka kujono nayɔ. Kija ɓa꞉sa kʉmaa tʉkʉ danga apɛɛ angɔ ɓʉ kɛlɛ. 13Ɓambufaniso tʉɓɨa kusigo ɓɔ: « Yeso, Mʉpananakɨa, tɨnɨa ɓaka tʉkʉ ikoko! » 14Iya Yeso a꞉ɓʉna, ambuɓusigio ɓɔ: « Seni kʉmaa apɛɛ ʉ ɓakumu‑kumu. » Ati ngia ɓi꞉nye‑ɔɔ kʉsa nani, ɓambʉjaɓanakɨa keɓu‑keɓu tʉkʉ ɓʉ ngwa.

15,16Iya mombi mʉngana ati ʉndaɓʉ, 'Ʉsamalɨa wɔngɔ, a꞉na ɓɔ ʉhɨa hɨanɨ, ambʉtʉa kʉ mbise akʉ Yeso i꞉nye‑ɛɛ kutuisio Asʉɓɨɨ ɨbɨba nʉ iyo yɛɛ ɓʉmʉ. Kija a꞉ka kʉkwa akʉ mɨtɨndɨ yɨ Yeso nayɔ kubibiso. 17Kija Yeso a꞉ɓukuo ɓɔ: « Ajʉ ɓombi ɓʉjaɓanakɨakɔmʉ‑zʉ kʉ ɓuɓomu kumi ɓiɛ? Ɓombi nga ɓɔmɔ nʉɓɔkwɔngɔ ɓa tiga gbanɨ? 18Ajʉ ati ʉndaɓʉ mombi gʉkʉ mʉngana u꞉tunguokɔmʉ kʉtʉa kutuisio Asʉɓɨɨ ɨbɨba, kisukuo tʉkʉ mɛɛka nguakɛ ɓiɛ? » 19Kija a꞉sigio mombi ngiinanɨ ɓɔ: « Ʉngwa ɨkʉʉ, wambʉsa. Baya ngiisɔɔ yɨ꞉nahiiso hiisoo. »

Nɨka ngia yɨ Ɓʉngama ɓʉ Asʉɓɨɨ

(Mat 24:37-39)

20Kija Ɓafalisayɔ ngana ngana ɓa꞉muɓukuo ɓɔ: « Ɓʉngama ɓʉ Asʉɓɨɨ ɓa꞊ka ati tɨmanɨ? »

Kija a꞉ɓutisio ɓɔ: « Ɓʉngama ɓʉ Asʉɓɨɨ ɓambʉkʉka ndʉ ɨkyɛmɛ yɛɛ nyɨɛ akʉ mesu. 21Ɓambʉkʉnɨɓɨa ɓisi ongo ɓɔ: ‹ Ɛɓɔ iɓa! › gʉ ɓɔ: ‹ Ɛɓɔ iɓa oki! › Jʉ Ɓʉngama ɓʉ Asʉɓɨɨ ɓa tiga ati ʉndɛnʉ. »

22Ambusigio ɓakpataka ngiɓangɔ ɓɔ: « Makwaa ka ɓisi ongo kʉka ika na꞊tananɨa‑ɔɔ nɛmɛ kʉna, ɛmɛ Mwana ngia ʉ Mombi abana tʉkʉ akʉ 'ukpekpe wʉ ɓisi mungono, ɨkyɛmɨngana na꞊mbʉkʉɓʉna ɓisi ɓɔngɔ. 23Ɓombi ɓa꞊nisigio ɓisi ongo ɓɔ: ‹ Kangeni a neni! › yɛmɔ ɓɔ: ‹ Kangeni a yeni! › Nɔɔsakɔmʉ nani, nɔɔɓʉkpatakɔmʉ kʉ ɓwanɨ. 24Ati ngia ɛmɛ Mwana ngia ʉ Mombi ma꞊tʉa sina‑ɔɔ, yaɓio sinani ngbanga ndʉ iya ʉgbaa waangɨnana‑ɔɔ, uwa waajiiso miɓo wʉ ekoo ʉ ɓisi kʉɓʉya akʉ uwa wɔmɔ. 25Ɨkyɛmɨngana, pɛɛ ʉ moni ngikʉnanɨ, yɨkwanana ɓɔ mʉɓaa amati ʉ ɓʉka‑ɓʉkaɨ nadɨndɨ, nʉ yɨkwanana ɓɔ ɓombi ɓʉ ɨjɨjɨ ngia ɓunagiso. 26Ngbanga kʉndʉ ɓombi ɓi꞉nye kʉkyɨa akʉ ɓɔndɔ ɓʉ Nʉa, yaɓio ɓisi ongo kʉ ɓwanɨ akʉ makwaa ngikʉsɛmɛ, Mwana ngia ʉ Mombi. 27Ɓombi ɓi꞉nye kʉdyakaka, kʉmwakanaka, ɓugue nʉ ɓoi tʉkʉ kʉchɨkana, kʉɓʉya tʉkʉ isiya Nʉa a꞉kumunio‑ɔɔ amati ʉ ɨngbɔɔ yɛɛ ɨja. Kija ʉgbaa wɔɔ 'ʉja wa꞉kwa ɨsɨ, mepo kambʉdʉka ɓombi kʉ ɓuɓomu tʉkʉ ɓʉ gba. 28Ɓata kʉndʉ yi꞉nye akʉ ɓɔndɔ ɓʉ Lɔtɨ, ɓombi ɓi꞉nye kʉdyakaka, kʉmwakanaka, kʉkʉa nʉ gabiso kumbo, nʉ kʉhʉnanaka nʉ tɨa lɨkáa. Yaɓio ɓisi ongo kʉ ɓwanɨ ati ngia ɛmɛ ma꞊tʉa‑ɔɔ. 29Ɨkyɛmɨngana, isiya Lɔtɨ a꞉ɓʉa‑ɔɔ anʉ Sɔdɔmɔ, dyaa yi꞉nye kunyio ndʉ ʉgbaa ɨzɔ nʉ mukopi kɔɔ mʉɗɨtɨɛ kʉʉngwa ekoo ʉ ɓisi, yambʉɓʉdʉka kʉ ɓuɓomu tʉkʉ ɓʉ gba. 30Ya꞊kyɨanɨa ɓisi ongo kʉ ɓwanɨ isiya ɛmɛ Mwana ngia ʉ Mombi ma꞊ɓwanɨa sinani‑ɔɔ apɛɛ ʉ ɓombi.

31Isiinanɨ, mombi ngia aɓio ekoo ʉ ʉpaʉ,#17:31 Ɓayuda ɓi꞉nye tɨa ɨkáa nʉ ɨkáa nga yɛmɔ ekoo ʉ ʉpaʉ. ndʉ aɓio nʉ kumbo ya ɛsɨ, ɔɔijo tii ɓata kʉchɨka engo. Abana gwa ngia aɓio akʉ matɨnɨ, ɔɔtʉa tii ɓata andei. 32Tungueni moni ngika ka꞉kyɨa moi ʉ Lɔtɨ!#17:32 Popoko 'Ʉkpanganɨa 19:26; A꞉tɨna ɓaja ambise kija a꞉nɨtanaka ititi yɨ 'ukwe. 33Ndʉ mombi a꞊hata kuhiiso ʉɓɨɨ nguangɔ, a꞊uyangiso yangisoo, ɨkyɛmɨngana mombi ngia a꞊yangiso ʉɓɨɨ nguangɔ, a꞊uhiiso hiisoo. 34Maninu kusigio ɓɔ sinani nuɓutu ngiinanɨ, ɓombi ɓapɨnɨ ɓaɓio sina ɓʉkwaɨ ekoo ʉ ɓʉkwaɨ mʉngana, ɓa꞊chɨka mʉngana, ɓambʉsɨa kʉ mʉngana. 35Ɓoi ɓapɨnɨ ɓaɓio sina kʉdʉa ʉpʉnga izi mɨngana, ɓa꞊chɨka mʉngana, ɓambʉsɨa iya wɔmɔ. [ 36Ɓombi ɓapɨnɨ ɓaɓio sina kʉkyɨa kuu akʉ watɨnɨ mungono, ɓa꞊chɨka mʉngana, ɓambʉsɨa kʉ mʉngana.] »

37Kija ɓakpataka ɓa꞉muɓukuo aka ɓɔ: « Makʉʉɓɨɨ, moni ngikʉnanɨ ka꞊kyɨanɨa ti‑zʉ gbanɨ? »

Kija a꞉ɓutisio ɓɔ: « Akʉ mʉnda waakyɨa‑ɛɛ, ɓunoi ngiɓa ɓaadya anzɨɓɔ ɓa꞊huo kʉ ɓuɓomu nani ɓʉ ngu. »

Currently Selected:

Luka 17: BudKoya

Highlight

Copy