Malɨkɔ 4
4
Isisinio yɨ mombi ʉ ɨhʉna
(Mat 1:1-9; Luk 8:4-8)
1Kija Yeso a꞉faniso ɓata kʉpanɨa kʉtɔ anambamba ʉ yapuu yɛɛ ɨja ngia yɨ gɨpa ʉ Galilaya. Ambuɗito akʉ ɨngbɔɔ, ambuwulo amati ɔngɔ, jʉ ungbutu wʉ ɓombi wi꞉nye wumukungueni tʉkʉ ɓʉ kuu. Ɨngbɔɔ yi꞉nye anizini, ungbutu wʉ ɓombi wi꞉nye tiga amʉba ɔngɔ. 2Ambufaniso naɓɔ panɨa moni maja 'upi akʉ lisisinio. Amati ʉ mapanʉ ngikangɔ i꞉nye naɓɔ kusigio ɓɔ: 3« Ukeni! Mombi ʉ ɨhʉna mʉngana a꞉sa kukinyiso masɔɔ. 4Ati ngia i꞉nye‑ɔɔ kukinyiso engo, masɔɔ kɔmɔ kambʉɓwanaka anɨngbaa. Ɓunoi ɓambʉka, ɓambʉkʉdya. 5Masɔɔ kɔmɔ kambʉɓwanaka akʉ ɨtaka yɨ mukopi akʉ ɨtaka yi꞉nye‑ɔɔ ɓʉ sɛlɛ sɛlɛ. Ɨkyɛmɨngana, ka꞉naa tʉkʉ gagaa jʉ ɨtaka yambikinye ɨja. 6Iya ɨpá yɛɛ ɓʉmʉ ya꞉ya nayɔ, yambʉkʉhʉka, kambʉmɔkɔkɔ jʉ mii yɛngɔ ya꞉indiokɔmʉ amati ʉ ɨtaka. 7Masɔɔ nga kɔmɔ ka꞉ɓwanaka amati ʉ akpakiki. Ati ngia ka꞉faniso‑ɔɔ yokoko, akpakiki ambʉkʉsangaka, nʉ kambikinye tii ikanzi ngia kakwanana‑ɔɔ kʉmɔ lipumo. 8Ɨkyɛmɨngana, masɔɔ nga kɔmɔ ka꞉ɓwanaka akʉ ɨtaka yɨ dɔɓɔ. Iya ka꞉naa nayɔ kambuyokoko, matɨ kɔngɔ kambʉmɔ lipumo ɓʉ kpɔjɔ kpɔjɔ. Masɔɔ nga kɔmɔ ka꞉mɔ lipumo makumi kaatʉ, kɔmɔ lipumo makumi ʉmalɨa, kɔmɔ lipumo mɨa mʉngana. » 9Kija Yeso a꞉ɓusigio ɓɔ: « Mombi ngia anʉ muchwei kɔɔ mʉkɛ, ʉkɔ moni ngikʉnanɨ! »
Jʉtanɨ Yeso i꞉nye yaka moni nʉ lisisinio
(Mat 13:10-17; Luk 8:9-10)
10Ati ngia Yeso a꞉ɓʉa‑ɔɔ ati ʉ ungbutu wʉ ɓombi, ɓambutukuo tii tʉkʉ nʉ ɓatitima ngiɓangɔ kumi nʉ ɓapɨnɨ, ɨzɔ nʉ ɓombi nga ɓɔmɔ iɓa ɓi꞉nye mʉkpata, ɓambufaniso nayɔ kuɓokoko inyi yɨ isisinio ngiinanɨ. 11Gʉ ɛyɔ naɓɔ ɓɔ: « Asʉɓɨɨ a꞉ninzo inu mbɨmbanaka kʉmbɨa moni kʉ ɓaɗi kʉ Ɓʉngama ngiɓangɔ. Ɨkyɛmɨngana, ɓombi ngiɓa ɓa aɓei ʉ ndiba ngiʉndɛnʉ, ɓaaɓʉngakɨa ɛɓɔ moni tʉkʉ nʉ lisisinio. 12Aka ekoo ngia ɓɔ,
abana tʉkʉ ɓakʉkanga,
ɓambʉkɔmʉ kʉna ɨkyɛmɛ,
abana tʉkʉ ɓakʉkɔ moni,
ɓambʉkɔmʉ nakɔ kupimiso kʉ ɓwanɨ,
ambʉ ɓɔɔnichokɔmʉ mɨtʉma ngiindaɓʉ,
nʉ ɓɔ Asʉɓɨɨ ɔɔɓʉpɨakɔmʉ ɓʉɓɨɓɨ ngiɓʉndaɓʉ kʉ ɓwanɨ. »#Popoko Ɨsa 6:9-10
Yeso akʉngakanakiso inyi yɨ isisinio ngiinanɨ
(Mat 13:18-23; Luk 8:11-15)
13Yeso ambuɓusigio ɓata ɓɔ: « Nupimisenikɔmʉ‑zʉ inyi yɨ isisinio ngiakɛ, na꞊pimiso tiga ila lɔmɔ tanɨ? 14Inyi yɛngɔ yakusigo ɓɔ: Masɔɔ ngika mombi ngiinanɨ a꞉hʉna ya mapanʉ kʉ Asʉɓɨɨ. 15Mikpekpe yɨ masɔɔ nga yɛmɔ ya꞉ɓwanaka anambamba ʉ ɨngbaa. Ambamba ʉ ɨngbaa ngiinanɨ ya isisinio yɨ ɓombi ngiɓa ɓaakɔ ʉpanʉ wʉ Asʉɓɨɨ kɔɔ, ɨkyɛmɨngana Sɨtanɨ ambʉka ambʉɓʉhɨnɨa ʉpanʉ ngua wa ʉhʉnanɨɛ amati ʉndaɓʉ. 16Masɔɔ nga kɔmɔ ka꞉ɓwanaka akʉ ɨtaka yɨ mukopi. Ɨtaka yɨ mukopi ngiinanɨ ya isisinio yɨ ɓombi ngiɓa ɓaakɔ ʉpanʉ wʉ Asʉɓɨɨ kɔɔ, ɓambʉʉbaya nʉ ɨgyagya tʉkʉ gagaa, 17ɨkyɛmɨngana chʉkɔmʉ ʉpanʉ wɔngɔ wambʉfana mii amati ʉndaɓʉ. Ɓaauɓoto tʉkʉ akʉ wati ɗɛkɛkɛ, ɨkyɛmɨngana iya ɓʉka‑ɓʉkaɨ ɓaaɓʉgbʉka, yɛmɔ ɓɔ ɓombi ɓʉɓʉkyananakeni, kʉ nɨma yɛngɔ baya ngiindaɓʉ yambʉkwa. 18Masɔɔ nga kɔmɔ ka꞉ɓwanaka akʉ ɨtaka yɨ akpakiki. Ɨtaka yɨ akpakiki ngiinanɨ ya isisinio yɨ ɓombi ngiɓa ɓaakɔ ʉpanʉ wʉ Asʉɓɨɨ kɔɔ. 19Ɨkyɛmɨngana, iya ɓatanga ɓʉ ɨtaka, taa yɨ kumbo ngia yaapitikio ɓombi, nʉ mɨgbʉ yɨ taa nga yɛmɔ kʉ iɓomu yaaɓuɓotoko, yambʉsangaka ʉpanʉ nguʉnanɨ chʉkɔmʉ wambʉmɔ tii ɓata lipumo. 20Masɔɔ nga kɔmɔ ka꞉ɓwanaka akʉ ɨtaka yɨ dɔɓɔ. Yakʉpananiso ɓombi ngiɓa ɓaakɔ ʉpanʉ wʉ Asʉɓɨɨ kɔɔ, ɓambuuɓoto kingono, ɓambʉmɔ lipumo. Ɓɔmɔ ɓaamɔ lipumo makumi kaatʉ, ɓɔmɔ lipumo makumi ʉmalɨa, ɓɔmɔ ɓambʉmɔ lipumo mɨa mʉngana. »
Isisinio yɨ tala
(Luk 8:16-18)
21Yeso ambuɓuɓukuo ɓata ɓɔ: « Ajʉ mombi aaya tala ɓɔ a'ʉnapɨa ɛsɨ ʉ ɨkɔchɔ gʉ ɓɔ ɛsɨ ʉ kanga ɓiɛ? Mɛɛ‑zʉ ɓaa'ʉnapɨa ekoo ʉ 'ʉbɨnga wɔngɔ. 22Jʉ moni kɔɔ mʉɓatanɨɛ kʉ muɓomu ka꞊ɓʉa sina akʉ ɓʉmba. Nʉ yambʉkɔmʉ nʉ moni kʉ ɓaɗi ngika kambʉkʉmbɨanɨa sina akʉ ɓʉmba. 23Mombi ngia anʉ muchwei kɔɔ mʉkɛ, ʉkɔ moni ngikakɛ! » 24Yeso ambuɓusigio ɓata ɓɔ: « Ukeni moni ngika tʉkʉ muɗo, jʉ Asʉɓɨɨ a꞊nɨnapɨa sina inu kʉ akʉ ipima ngia naanapɨa‑ɔɔ ɓangɛ. Ɨkyɛmɨngana, akʉ inu, a꞊nɨsɨnganisio ɓata ɛyɔ kʉ nʉpɛɛ. 25Jʉ mombi ngia aɓio sina nʉ ɨkyɛmɛ, ɓa꞊mʉmatɨa ɓata yɛmɔ kʉ aka ekoo ɔngɔ. Ɨkyɛmɨngana, mombi ngia aɓio sina lɨkɔndɔ kʉ uno, ɓa꞊mʉhɨnɨa sina mwana ʉ dudu ngia aɓio nayɔ kʉ hɨnɨaa. »
Isisinio yɨ masɔɔ ngika kaanaa kʉ ɨkɔ
26Yeso ambusigo ɓɔ: « Ɓʉngama ɓʉ Asʉɓɨɨ ɓa ngbanga ndʉ iya ɓaahʉna‑ɔɔ masɔɔ akʉ ɨtaka. 27Mombi ɔngɔ ambʉsa kʉkwaa tɔɔ nuɓutu, ambuɓio kʉjʉkana makwaa kʉ muɓomu ati ngiinanɨ masɔɔ ki꞉nye tʉkʉ kʉnaa nʉ yokoko. Ɨkyɛmɨngana, chʉkɔmʉ ɛyɔ ambuɓio kʉmbɨa ɓɔ kakʉnaa nʉ yokoko ɨkyɨkyɨɓʉmʉ tanɨ. 28Kʉ ɓwanɨ, tʉkʉ ɨtaka yaayukukiso masɔɔ. Ɓʉsɔɔ ɓaafaniso tʉkʉ yanza mbise ɔngɔ ɓambunzo tiga ɨkaja, mbise ɔngɔ mikpekpe yɨ nganʉ yambʉɓʉa tiga amati ʉ ɨkaja ngiinanɨ. 29Tiga ati ngia nganʉ awa‑ɔɔ, mombi ambʉchɨka aɗaaɗaa, jʉ wati wɔɔ tɨnɛ nganʉ waɓio wʉndaneni tiga ndanaa. »
Yeso unzo isisinio yɨ mwanʉ ipumo yɛɛ ɗɛkɛkɛ
(Mat 13:31-32,34; Luk 13:18-19)
30Yeso ambusigo ɓata ɓɔ: « Kasisinio‑zʉ Ɓʉngama ɓʉ Asʉɓɨɨ nʉ ɨmanɨ? Isisinio tɨmanɨ iya kaɓʉpana nayɔ? 31Ɓa ngbanga ndʉ ɓʉtɨ ngiɓa ɓaaɓusoko ɓɔ aladali. Mwana ʉ ipumo yɛngɔ yaakyɨa ndʉ ipumo yɨ ɨkangʉ, nʉ ati ngia ɓaaɨhʉna‑ɔɔ akʉ ɨtaka yaakyɨa ɗɛkɛkɛ nadɨndɨ kʉɓaa lipumo kʉ liɓomu ngila la ya akʉ ɨtaka. 32Ɨkyɛmɨngana, ati ngia ɓaaɨhʉna‑ɔɔ kija yaanaa, yambʉnɨtanaka tiga ɓʉtɨ ɓɔɔ ɓaja nadɨndɨ kʉɓaa matɨ kʉ muɓomu ngika ɓaakʉhʉna. Mɨtapɨ yɛngɔ yambuɓio kʉ ɨkpɔkpɔ aka ɓunoi ngiɓa ɓaabʉmbʉa akʉ maba kʉ ɓisi ɓaaka‑ɔɔ kʉtɨa lɨkáa akʉ igyiɓi yɛngɔ. »
33Kʉ ɓwanɨ, Yeso i꞉nye panɨa ɓombi mapanʉ kʉ Asʉɓɨɨ nʉ lisisinio lɨja 'ʉgbʉ nguʉnanɨ. I꞉nye kʉpanɨa tʉkʉ ikanzi ngia ɓɔ ɓombi ɓukupimiso tʉkʉ pimisoo. 34I꞉nye ngakɨa ɓombi moni tʉkʉ nʉ lisisinio. Ɨkyɛmɨngana, i꞉nye ɓɨa ɓakpataka ngiɓangɔ inyi yɛngɔ kʉ iɓomu ɓinyeni tii tʉkʉ ɛɓɔ.
Yeso ʉkataniso ɨbʉbʉ
(Mat 8:23-27; Luk 8:22-25)
35Kʉ isiinanɨ nɨpasɨ, Yeso ambusigio ɓakpataka ngiɓangɔ ɓɔ: « Kʉtapʉeni‑zʉ amondu ʉ yapuu. » 36Ɓakpataka ɓambʉsɨa ungbutu wʉ ɓombi, ɓambuɗito amati ʉ ɨngbɔɔ ngia Yeso i꞉nye amati ɔngɔ. Lɨngbɔɔ nga lɔmɔ li꞉nye kʉsa kʉ ɨzɔ nʉ iya ɛyɔ i꞉nye amati ɔngɔ. 37Tiga wati mungono ɓɔmʉ mahuo wɔɔ ɓʉmʉ wambufaniso pɨka, mepo kambufaniso tʉkanɨa amati ʉ ɨngbɔɔ, tinene kuhuo. 38Ɨkyɛmɨngana, Yeso i꞉nye yangɔ tʉkʉ amati ʉ tɔɔ akʉ ipipi yɨ ɨngbɔɔ, 'ʉtʉ ekoo ʉ isodi. Ɓakpataka ɓambʉmʉjʉkaniso, ɓinyeni kʉtʉɓɨa ɓɔ: « Mʉpananakɨa, kakuwo, ajʉ wambʉkɔmʉ kʉna ɓiɛ? » 39Yeso ambʉjʉkana, ambʉngbaa nʉ mahuo, ambusigio ɗei ɓɔ: « Ɔwɛ, katana! Kija mahuo wa꞉sɨa pɨka, gʉ mʉa tʉkʉ ɓʉ nyɛ! » 40Yeso ambuɓusigio ɓɔ: « Jʉtanɨ ʉɓa wunihuo ɓwanɨ? Baya ngiindɛnʉ ya gbanɨ? » 41Ɓambʉkwa ʉɓa nadɨndɨ, ɓambufaniso ɓokono ati ʉndaɓʉ ɓɔ: « Ikanzi yɨ mombi tɨmanɨ iyakɛ ɓɔ abana tʉkʉ mahuo nʉ yapuu yamʉkɔ tʉkʉ kɔnɨ? »
Currently Selected:
Malɨkɔ 4: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
