Malɨkɔ 6

Ɓombi ɓʉ Najalɛtɛ ɓʉyaa Yeso

(Mat 13:53-58; Luk 4:16-30)

1Yeso ambʉʉgwa na akʉ i꞉nye‑ɔɔ, ambʉtʉa anʉ Najalɛtɛ akʉ a꞉yokoko‑ɛɛ, ɓakpataka ngiɓangɔ ɓambʉmʉkpata kʉ nani. 2Tiga akʉ ɓisi ɓʉ humuo ngiɓa ɓʉ Ɓayuda, ambufaniso panɨa amati ʉ ɨkáa yɨ nɨta ngia yɨ Ɓayuda. Mapanʉ ngikʉnanɨ ka꞉mbangɨa ɓombi ɓaja ngiɓa ɓa꞉kʉkɔ tʉkʉ nadɨndɨ. Ɓi꞉nye kuɓokono ɓɔ: « A꞉nyɨa nʉ mbɨmbanaka yɛɛ ɨja ngia gbanɨ? Anɨ iya a꞉munzo 'ʉtʉma wɔɔ pimise moni nguakɛ? Anɨ kʉ a꞉munzo angu ɔɔ kyɨɛ moni kɔɔ mʉmbangɛ maja ɓɔmʉ? 3Ajʉ chʉkɔmʉ‑zʉ ɛyɔ iya aakyɨa kuu yɨ maɓaʉ ɓiɛ? » Ambʉkɔmʉ‑zʉ mwana ʉ Malɨa ɓiɛ? Manye ʉ Yakɔbɔ nʉ Yɔsɛ, nʉ Yuda nʉ Simoni ɓiɛ? Ajʉ ɓamanye ɓɔɔ ɓoi ɓambʉkɔmʉ‑zʉ tʉkʉ ati ʉndɛsʉ aka ɓɔmʉ ɓiɛ? Moni ngikʉnanɨ ɨkɔ ika ka꞉ɓunangyo ɓɔ ɓɔɔmʉbayakɔmʉ. 4Kʉ ɓwanɨ, Yeso ambuɓusigio ɓɔ: « Ɨgbɛ yɨ Asʉɓɨɨ yaakyɨa nʉ ɨbɨba mʉa kʉ 'uɓomu. Ɨkyɛmɨngana, andaɓʉ amati ʉ anza ngiangɔ, nʉ akʉ 'ufini nguangɔ ɓʉ kpɛ ɓaamʉna tʉkʉ ɨsʉkʉɓwanɨ. » 5Yeso a꞉kwananakɔmʉ tii ɓata kʉkyɨa moni kɔɔ mʉmbangɛ gʉkʉ mʉngana akʉ ɨkʉmbʉ ngiinanɨ. Ɨkyɛmɨngana, a꞉napɨa tii tʉkʉ lɨkɔndɔ ekoo ɓombi ɓʉ ɓakwisikiso ngana ngana, ambuɓuhiiso. 6Nɨya baya ngiindaɓʉ ya꞉mʉmbangɨa tʉkʉ nadɨndɨ.

Yeso ʉtʉma ɓatitima kumi nʉ ɓapɨnɨ

(Mat 10:5-15; Luk 9:1-6)

Yeso ambʉɓaɓaka amati ʉ lɨkʉmbʉ ngila lɔɔ tine tine nanɨ, ɛyɔ tʉkʉ kʉpanɨa ɓombi. 7Iya a꞉soko ɓatitima ngiɓangɔ kumi nʉ ɓapɨnɨ, ambufaniso naɓɔ kʉtʉma ɓapɨ ɓapɨɨ. Ati ngia i꞉nye‑ɔɔ naɓɔ kʉtʉma, ambuɓunzo angu ɔɔ ise ɓombi mɨtʉma yɨ ɓabɨa. 8Ambuɓunzo ʉpanʉ ɓɔ: « Nɔɔchɨka ɨkyɛmɛ gʉkʉ mɨngana akʉ kɨnda ngiinanɨ, ɓotoneni tʉkʉ nʉ 'utupe. Nɔɔɓotonokɔmʉ nʉ idyo, gʉkʉ mbakaya, gʉkʉ falanga akʉ mifuku ngiindɛnʉ. » 9Ambʉmatɨa ɓata kusigo ɓɔ: « Lɨkpakʉ pɛpɛ, lɨpɨnyeni pɨnyanɨ, nɔɔpɨnyakɔmʉ tʉkʉ lɨpʉkʉ lʉ vɛvʉ dyepini. » 10Gʉ ɛyɔ ɓata naɓɔ ɓɔ: « Ndʉ naɓʉya akʉ mʉa mungono ɓɔ, akʉ ɨkáa ngia ɓa꞊nɨjananɨa‑ɛɛ iɗo amati ɔngɔ, ɓieni tʉkʉ ananɨ kʉɓʉya tʉkʉ aka na꞊ʉngwa‑ɔɔ akʉ mʉa nguʉnanɨ. 11Akʉ izi ngia ɓambʉkʉnɨjananɨɛ iɗo, nʉ akʉ ɓambʉkʉnɨkɔ‑ɛɛ, pɛɛ ngia na꞊ɓʉa‑ɔɔ akʉ izi ngiinanɨ, ɓɨndakeni aɓungu ʉ mɨtɨndɨ ngiindɛnʉ,#Popoko Kya 13:51 kʉpananiso ɓɔ nugiso ɓombi ngiɓʉnanɨ gisoo. »

12Ɓakpataka ɓambʉsa kʉɓɨakɨa Ɨsaʉ yɨ Asʉɓɨɨ ɓɔ ɓombi ɓunicho mɨtʉma! 13Ɓi꞉nye kiso ɓombi mɨtʉma yɨ ɓabɨa ɨja, ɓambʉɗɨa ɓombi ɓʉ ɓakwisikiso umbundo naɓɔ kuhiiso.

Ingyo yɨ Yʉanɨ ngia i꞉nye ɓatiso ɓombi

(Mat 14:1-12; Luk 9:7-9)

14Uduɓa wʉ Yeso wambʉsanaka tii tʉkʉ nʉpɛɛ, ɨsaʉ yɛngɔ yambʉɓʉya kʉ akʉ muchwei kʉ ngama Ɛlɔdɛ. Ɓombi ɓɔmɔ ɓi꞉nye sigo ɓɔ Yʉanɨ ngia aaɓatiso ɓombi iinanɨ a꞉jʉkana bɛ akʉ ingyo. Iikwa a‑ɔɔ nʉ angu kʉkyɨa ɓamoni ɓɔɔ ɓʉmbangɛ. 15Ɓombi nga ɓɔmɔ ɓi꞉nye sigo gʉ a ɨgbɛ Ɛlɨa, ɓɔmɔ gʉ a ɨgbɛ kʉndʉ lɨgbɛ nga lɔmɔ. 16Ɨkyɛmɨngana, iya Ɛlɔdɛ a꞉kɔ nayɔ moni ngikʉnanɨ, ambusigo ɓɔ: « Tʉkʉ Yʉanɨ ngia ɛmɛ ma꞉titio pongo ɓɔ ɓʉmʉtɨna 'ʉtʉ iinanɨ a꞉jʉkana bɛ akʉ ingyo. »

17Tɔgɔ, Ɛlɔdɛ ngiinanɨ iya i꞉nye u꞉titieni ɓɔ ɓʉfa Yʉanɨ, ɓambumugiso akʉ boloko. Moni ngikʉnanɨ ka꞉kwa aka ekoo moi ngia i꞉nye ino ɓɔ Elodia moi ʉ Filipo. Ʉna tɔ, ɔɔ Filipo ɓa꞉ɓʉa kʉ nʉ Ɛlɔdɛ. Ɛlɔdɛ a꞉sa kʉchɨka tiga ɓata kʉ moi ʉ manye ngiinanɨ. 18Jʉ Yʉanɨ a꞉ɓɨa Ɛlɔdɛ akʉ ɓʉmba ɓɔ: « Yɨkwananakɔmʉ piɛ ɓɔ ɔwɛ wachɨka moi ʉ mwana ʉ anʉ! » 19Kʉ ɓwanɨ, Elodia ambuhuo nʉ 'ʉnganga tʉkʉ ɓʉ fɔ nʉ Yʉanɨ. Ambuɓio kʉhata ɓɔ amuwisiso nɨngbaa tɨmanɨ. Ɨkyɛmɨngana, chʉkɔmʉ ambʉnyɨa nɨngbaa yɛngɔ kʉ ɓwanɨ. 20Ʉna tɔ, Ɛlɔdɛ i꞉nye kumo Yʉanɨ ɓʉkaɨ jʉ i꞉nye mbɨa ɓɔ a mombi ɔɔ ngbingbii nʉ ɔɔ tu, nʉ i꞉nye kyɨa nayɔ tʉkʉ kʉpɨmakɨa. Iya i꞉nye kɔ Yʉanɨ kʉyaka, ambʉkwa ʉɓa. Ʉna tɔ, ati ngia Yʉanɨ i꞉nye kyɨa‑ɔɔ kʉyaka, yambuɓio ɓata nayɔ kʉ kʉkataa.

21Tiga ɓisi mʉngana, Ɛlɔdɛ a꞉tiniso ʉmbɔ kutunguo nʉtanɨa ngiangɔ. Ambusoko ɓaandɔngɔ, nʉ ɓangama ɓʉ ɓasʉda, ɨzɔ nʉ ɓangama ɓʉ ɨkʉmbʉ ɓʉ Galilaya. 22Mwana ʉ Elodia ɔɔ moi ambʉɓwanɨa akʉ ɨmbaa. Ambuɓuno ʉmbɔ kingono, yambʉkataa ngama Ɛlɔdɛ nʉ mubika kʉtaa. Ambusigio mwana ʉ ɓasaɓakyɛ ngiinanɨ ɓɔ: « Wakʉkʉnda ɓɔ mʉnakwa nʉ ɨmanɨ mwana asɛmɛ? Ɨkyɛmɛ kʉ iɓomu ngia wa꞊nata, ma꞊nanzo ɛyɔ tʉkʉ nzoni. » 23Ɛlɔdɛ ambʉtɨna silika apɛɛ ʉ mwana angɔ ngiinanɨ ɔɔ moi ɓɔ: « Musimio tʉkʉ ɓatidoo, ma꞊nanzo ɨkyɛmɛ kʉ iɓomu ngia wa꞊nata, abana tʉkʉ kʉnahʉa ɓʉngama ngiɓʉsɛmɛ akati. » 24Mwana ʉ ɓasaɓakyɛ ngiinanɨ ambʉɓʉa, ambʉsa kʉgbʉka inye, ambumuɓukuo ɓɔ: « Inoo, ɨmanɨ iya mʉkwanana kʉta engo? » Inye ambumutisio ɓɔ: « Ta tʉkʉ 'ʉtʉ wʉ Yʉanɨ ngia aaɓatiso ɓombi. » 25Kʉ ɓwanɨ, mwana ʉ ɓasaɓakyɛ ambʉtʉa kʉ nɨma ngiinanɨ ɔɔ ngama Ɛlɔdɛ, ambumusigio ɓɔ: « Tʉkʉ ɨtakɨ‑takɨ ngiakɛ, nanzo 'ʉtʉ wʉ Yʉanɨ ngia aaɓatiso ɓombi, amati ʉ zanɨ wʉ ɨpapɨ. » 26Moni ngikʉnanɨ kambudyiso ngama ikoko nadɨndɨ akʉ 'ʉtʉma. Ndʉ i꞉nye ʉtɨneni silika apɛɛ ʉ mubika kʉ ʉmbɔ tɨnanɨ, yambikinye tii ɓata aka atata‑ɔɔ. 27Kʉ nɨma ngiinanɨ, ngama ambutitio sʉda mʉngana ɓɔ ʉka nʉ 'ʉtʉ wʉ Yʉanɨ. Kija sʉda a꞉sa akʉ ɨkáa yɨ boloko ambʉtɨna Yʉanɨ 'ʉtʉ ɓʉ gbo. 28Ambʉka nawɔ amati ʉ zanɨ wʉ ɨpapɨ, ambunzo mwana ʉ ɓasaɓakyɛ ngiinanɨ, kija a꞉unzo inye. 29Iya ɓakpataka ngiɓa ɓʉ Yʉanɨ ɓa꞉kɔ nayɔ ɨsaʉ ngiinanɨ, ɓambʉsa kʉchɨka ndʉtʉ yangɔ, kʉsa kʉhʉna engo.

Yeso ʉdyakakiso ɓombi ɛlɛfʉ ɓɔkɔ

(Mat 14:13-21; Luk 9:10-17; Yʉa 6:1-14)

30Iya ɓatitima ɓa꞉tʉa nayɔ akʉ Yeso a꞉ɓʉtʉma‑ɛɛ, ɓambukungunio anambamba angɔ ɓʉ kuu, ɓambʉmʉngakɨa masaʉ kʉ moni kʉ muɓomu ngika ɓa꞉kyɨa, nʉ moni kʉ muɓomu ngika ɓa꞉kʉpanɨa. 31Ɓombi ɓaja ɓi꞉nye tiga kʉka ɔɔ Yeso nʉ tʉa. Chʉkɔmʉ ɔɔ Yeso nʉ ɓatitima ɓambuɓio kʉnyɨa nʉ wati ikanzi ngia ɓakwanana‑ɔɔ kʉdyakaka. Yeso ambusigio ɓatitima ɓɔ: « Kuseni‑zʉ tʉkʉ isu akʉ mʉa ngua ɓombi ɓambʉkɔmʉ‑ɛɛ, kambʉkanyeni tiga‑zʉ humuo ɗɛkɛkɛ. » 32Kʉ ɓwanɨ, ɓambuɗito akʉ ɨngbɔɔ yɛɛ ɨja kʉsa akʉ mʉa ngua ɓombi ɓambikinye‑ɛɛ. 33Iya ɓi꞉nye nayɔ kʉʉngwɨa kɨnda, ɓombi ɓaja ɓambʉɓʉna, ɓambʉmbɨa. Kʉ ɓwanɨ, ɓombi ɓambufaniso bangʉ nʉ mɨtɨndɨ, kʉʉngwa akʉ ɓagʉlʉ kʉ ɓuɓomu, ɓambʉɓʉtɨnganɨa nʉ ɓʉya pɛɛ ʉndaɓʉ, ɔɔ Yeso nʉ ɓatitima ɓambʉɓʉyenikɔmʉ.

34Ati ngia i꞉nye tiga‑ɔɔ kʉɓʉa akʉ ɨngbɔɔ, ambʉna ɓata ungbutu wʉ ɓombi nguʉnanɨ uhue tʉkʉ ɓʉ ngu. Kija a꞉ɓʉdyɨa ikoko kʉnɨna ɓɔ ɓombi ngiɓʉnanɨ ɓi꞉nye ngbanga ndʉ iya ɓakɔndɔlɔ ɓaakyɨa‑ɔɔ chʉkɔmʉ nʉ mʉpɨmakɨa. Ambufaniso naɓɔ kunzo mapanʉ maja. 35Ndʉ wati wi꞉nye tiga wʉɓaeni kʉ ɓaanɨ, ɓakpataka ngiɓangɔ ɓambʉka nayɔ kusigio ɓɔ: « Wati wʉ꞉ɓaa ɓaanɨ, nʉ mʉa nguakɛ wa anambamba. 36Nanzaniso ɓombi ngiɓa, ɓʉ꞊sa kʉkʉa ɨkyɛmɛ yɛɛ ɨdyɛ aɓandei nʉ akʉ lɨkʉmbʉ ngila la tine tine aka. » 37Ɨkyɛmɨngana, Yeso ambuɓutisio ɓɔ: « Inu ɓakʉɓɔngɔ ɓunzeni ɨkyɛmɛ yɛɛ ɨdyɛ! » Ɛɓɔ ɓambuɓukuo Yeso ɓɔ: « Ajʉ kʉ́sa naɓɔ kʉkʉya mikati nʉ falanga mɨa ɓepini#6:37 Falanga mɨa ɓepini ya ʉkʉa wʉ kuu yɨ muyi ʉmalɨanɨka. iya kaɓʉdyakakiso nayɔ ɓiɛ? » 38Ambuɓutisio ɓɔ: « Na‑zʉ nʉ mikati ɨpɨtanɨ? Seni, kʉkangeni‑zʉ. » Iya ɓa꞉ɓukuono ati ʉndaɓʉ, ɓambumutisio ɓɔ: « Mikati ya ɓɔkɔ, nʉ sipe tʉkʉ ɓepini. »

39Kʉ ɓwanɨ, Yeso ambuɓutitio ɓɔ ɓuwulukiso ɓombi kʉ ɓuɓomu nanɨ akʉ lanza, akʉ limbi kʉ di di di. 40Kʉ ɓwanɨ, ɓambukungunikio akʉ limbi, ɓombi ɓɔmɔ mɨa mʉngana, ɓɔmɔ makumi ɓɔkɔ. 41Yeso ambʉchɨka mikati ɓɔkɔ nʉ sipe ɓepini ngiinanɨ, ambʉkanga mesu ekoo ʉ ɓisi, ambutuisio Asʉɓɨɨ ɨbɨba. Mbise ɔngɔ, ambuɓokoko mikati ngiinanɨ, ambunzikio ɓakpataka ngiɓangɔ, ɓambʉɨpakɨa ɓombi kʉ ɓuɓomu. Ambʉkyɨa akʉ sipe ɓepini ngiinanɨ kʉ ɓwanɨ. 42Kija ɓombi kʉ ɓuɓomu ɓa꞉dyakaka, ɓambumotoko. 43Ɓambʉmʉma tiga ligbiti lʉ mikati nʉ lʉ sipe ngila la꞉tukoko, lambʉkwa ɓajaɨ kumi nʉ ɓapɨnɨ ɓuhuoke ɓʉ kyɛɛ kyɛɛ. 44Ʉna tɔ, zʉ tʉkʉ ɓugue kʉ ɓuɓomu ngiɓa ɓa꞉dya idyo ngiinanɨ, ɓi꞉nye ɛlɛfʉ ɓɔkɔ.

Yeso ʉkɨndaka ekoo ʉ mepo

(Mat 14:22-33; Yʉa 6:15-21)

45Tʉkʉ nɨma ngiinanɨ, Yeso ambunzo ɓakpataka ngiɓangɔ ʉpanʉ ɓɔ ɓuɗito akʉ ɨngbɔɔ nʉ tapʉa amondu ʉ yapuu, mesu akʉ gʉlʉ ʉ Betesaida, ati ngia ɛyɔ a꞉tukuo‑ɔɔ kunzo ungbutu wʉ ɓombi kɨnda. 46Iya a꞉ɓunzo nayɔ kɨnda, ambʉsa tiga kʉta ekoo ʉ ɨkpangba. 47Ɨpasɨ ya꞉gbʉka ɓɔ ɓakpataka ɓi꞉nyeni nʉ ɨngbɔɔ tii tʉkʉ ati ʉ yapuu yɛɛ ɨja ngiinanɨ. Yeso i꞉nye utukueni tii tʉkʉ kʉ nangana amʉba. 48Tiga nanɨ, Yeso ambʉna ɓɔ mahuo wi꞉nye kʉtʉa numbise, ambʉmbɨa ɓɔ ɨngbɔɔ yambukuɓio nʉ ɓakpataka zia zia kupuo engo. Ambufaniso naɓɔ kpata. Kʉka tiga tine tine aka ɓakɔɓɔ ɓaanatɨa‑ɔɔ, ɛyɔ i꞉nye tii kʉkɨndaka tʉkʉ ekoo ʉ mepo ɓʉ paa paa. Ambʉɓʉfa, ambʉhata naɓɔ kʉɓaa. 49Iya ɓa꞉mʉna nayɔ kʉkɨndaka ekoo mepo ɓwanɨ, ɓi꞉nye kuyo ɓɔ ɓʉ꞉na mabɨa, ɓambufaniso huɓoko! 50Ndʉ ɛɓɔ kʉ ɓuɓomu ɓa꞉mʉna tʉkʉ nanɨ, ɓambʉkwa ʉɓa nadɨndɨ. Tʉkʉ nɨma ngiinanɨ, ambuɓusigio ɓɔ: « Nɔɔkwakɔmʉ ʉɓa, chɨkeni tʉkʉ igue‑gue. Tʉkʉ ɛmɛ iinanɨ! »

51Mbise ɔngɔ, ambuɗito kʉ akʉ ɨngbɔɔ ɨzɔ naɓɔ, ɨbʉbʉ yambʉkatana. Moni ngikʉnanɨ kambʉɓʉmbangɨa nadɨndɨ. 52Jʉ ɛɓɔ ɓi꞉nye ɓambupimisenikɔmʉ moni kɔɔ mʉmbangɛ ngika Yeso a꞉kyɨa ekoo ʉ mikati, iikwa mɨtʉma ngiindaɓʉ yi꞉nye tʉkʉ ɓʉmʉ kupimiso ɨngbaa yɨ moni.

Yeso uhiiso ɓombi anʉ Gɛnɛjalɛtɨ

(Mat 14:34-36)

53Iya ɔɔ Yeso nʉ ɓakpataka ngiɓangɔ ɓa꞉tapʉa nayɔ amondu, ɓambʉfʉma ɨngbɔɔ, ɓambʉɓʉya akʉ gɨpa ʉ Gɛnɛjalɛtɨ. 54Iya ɓi꞉nye kijo akʉ ɨngbɔɔ, ɓombi ɓambʉmbɨa Yeso tʉkʉ nɨma ngiinanɨ. 55Kʉ ɓwanɨ, ɓombi ɓambʉnanzana akʉ ɓatungbu ɓʉ gɨpa tʉkʉ kʉ ɓuɓomu. Kija ɓa꞉faniso kʉka nʉ ɓombi ɓʉ ɓakwisikiso ekoo ʉ mukwei, akʉ ɓi꞉nye kɔ‑ɔɔ ɓɔ Yeso a eki. 56Akʉ mʉa kʉ 'uɓomu ngua Yeso i꞉nye ɓaa‑ɛɛ, yiɓio amati ʉ lɨkʉmbʉ, kʉndʉ akʉ ɓagʉlʉ, aɓandei, ɓi꞉nye kwaiso ɓombi ɓʉ ɓakwisikiso akʉ ɓamʉa ngiɓa ɓombi ɓi꞉nye kyɨa‑ɔɔ ɓaja. Ɓombi ɓi꞉nye kyɨa kʉndɨanɨa Yeso ɓɔ ɓumuɓoto ɓaka gɔ tʉkʉ 'ʉtʉ wʉ ɨpʉkʉ nguangɔ. Ɓombi kʉ ɓuɓomu ngiɓa ɓi꞉nye muɓoto, ɓi꞉nye hɨa tʉkʉ hɨaa.

Currently Selected:

Malɨkɔ 6: BudKoya

Highlight

Copy