Génesis 16
16
Abramnën aín ñu mëëmikë xanu Agarmi bëchia
1Sarai an ka aín bënë Abram tuaxunkëma pain ꞌiakëxa, usa ꞌaínbi ka achúshi xanu Agar kakë egipcia an ñu ꞌaxúnti bëkë ꞌiakëxa. 2Usa ꞌain ka aín xanu Sarainën Abram kakëxa:
—Ka kuat, Nukën ꞌIbun ka ꞌëx tuáñu ꞌiti kuëënima, usa ꞌain kamina an nu ñu ꞌaxunkë xanu Agar abë ꞌiti ꞌain, usa ꞌain sapi ka an tuakëx aín tuákama ax ꞌën tuása ꞌiti ꞌikën. Ësokian kakëxun ka Abramnën aín xanu Sarai asábi ka kixun kakëxa.
3Usakin katankëxun ka Sarainën an ñu ꞌaxunkë egipcia xanu Agar a bëtankëxun Abram aín xanu ꞌinun ꞌinánkëxa, usakin ka mapai rabë́ bari Canaán menu tsókë ꞌixun ꞌakëxa. 4Usa ꞌain ka Abram an ñu ꞌaxunkë xanu Agar abë ꞌiakëxa, usai ꞌiax ka tuuakëxa; ꞌaínbi ka tukin tankin Sarai an ñu mëmikë a istisamatani ami nishakëxa. 5Usai ami nishia ꞌunánkin ka Sarainën aín bënë Abram kakëxa:
—¡Min ꞌucha kupí ka Agarnën ꞌë ꞌatima okin isia! ꞌËnbi kana min xanua ꞌinun mi ꞌinan, usa ꞌaínbi ka bërí achúshi tuáñu ꞌikuani ꞌësamaira ꞌisatania. Usa ꞌain ka Nukën ꞌIbux kiti ꞌikën uix kara ꞌuchaxa kixun nu kati ꞌikën. 6Kia ka Abramnën kakëxa:
—Ka kuat, an mi ñu ꞌaxunkë xanu ax ka min mëkënu ꞌikën; usa ꞌain kamina uisakin karamina ꞌaisatani usokin min ꞌati ꞌain.
Usakian kakëxun ka Sarainën amixuamati nishkin an ñu ꞌaxunkë xanu Agar ꞌitsaira ꞌatimokëxa, ꞌatimokëx ka Agar abákëxa. 7Abákë ka Nukën ꞌIbun ángel achúshinën anu uni ꞌikëma menuxun mërakëxa, ax ka aín rëbumi kakin anëkë me anu kuanti bai rapasu ꞌumpax upíira ꞌikë anu ꞌiakëxa, 8anua mërakin ka ñukákëxa:
—Agar, mix kamina Sarainën ñu mëëmikë aín, ¿uinuax kaina aín, ꞌimainun kaina uinu kuanin?
—ꞌËx kana an ꞌë ñumëmikë xanu Sarai anuax abatin —kixun ka an kakëxa. 9Usokian kakëxun ka Nukën ꞌIbun ángelnën ësokin kakëxa:
—Kamina amiribishi kuantëkëti ꞌain ami ñu mëëxunkë xanu anubi kuanxun, kamina an mi kakësabiokin kamabi ñu mëëxunti ꞌain.
10Katankëxun ka Nukën ꞌIbun ángelnën ësokinribi kakëxa:
Min rëbúnkinëx ka ꞌaisamaira ꞌinun ꞌuakamë ꞌëoti ꞌikën,
usa ꞌikë ka uínbi tupuntima ꞌikën.
11A mi tuukë ënëx ka achúshi bëbu tuá ꞌikën,
usa ꞌain kamina bakëntankëxun Ismael kakin anëti ꞌain,
Nukën ꞌIbun ka mix tëmërai uin kara ꞌë ꞌakinti ꞌikë kiax nuibakati nitsia isaxa.
12Min tuakëx ka bana kuakëma ꞌaish achúshi burro raëkëmasa ꞌinuxun ꞌaia;
usa ꞌaish ka kamabi unimi nishti ꞌikën, ꞌimainun ka kamabi uníxribi ami nishti ꞌikën;
usa ꞌaínbi ka aín aintsikaman ꞌura xuisa tankëxi atubëbi ꞌiti ꞌikën.
13Usa ꞌain ka Agar Nukën ꞌIbubë banatankëx abi kiakëxa, kikin anëkin ka Diosan ka ꞌë isia kikin anëakëxa, usa ꞌain kana bëríbi Diosan ꞌë iskëxbi ñukëma pain tsoti ꞌain.
14Usa ꞌain ka anua ꞌumpax upíira ꞌikë kini ax ësokin anëkë ꞌikën: ꞌUmpax upíira ñutima oi tsókë an ꞌë iskë ainan ka a ꞌumpax ꞌikën. Ax ka Cadés ꞌimainun Béred kakë ëma an nëbëtsi okin bëarakë ꞌiakëxa.
15Usakian ángelnën kakëx ka Agar amiribishi an ñu mëëmikë xanu Sarai anu kuantëankëxa, kuantankëx ka anuax Agar aín rëkuë́n tuá bakë́ankëxa, bakënkë ka Abramnën aín bëchikë Ismael kakin anëakëxa. 16Abram ochenta ꞌimainun seis baritiañu ꞌain ka aín bëchikë Ismael bakë́ankëxa.
Currently Selected:
Génesis 16: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.
