Génesis 22
22
Nukën ꞌIbu Diosan Abraham asérabi kara ami sinania kixun istisa tan ñuikë bana
1Usa ꞌain ka Nukën ꞌIbu Diosan ꞌitsa baritia ami panatankëxun, Abraham karaisa ënima ami manutima asérabi sinania kixun tankin. Aín anën kuëankëxa, usakin kuënkëxun ka Abrahamnën kakëxa:
—Ënu kana ꞌain ꞌën ꞌIbu. 2Ësokian kakëxun ka Nukën ꞌIbu Diosan kakëxa:
—Min bëchikë Isaac, ami asérabi nuibairakë, a buani kamina kuanti ꞌain matán me Moria kakë anu. Buánxun kamina anu bëbakin, min bëchikë ꞌatankëxun ꞌë rabikin ñuina ꞌakësaribi okin xaroti ꞌain, ꞌën mi uinu ꞌikë matánuxun kaina ꞌati ꞌai kixun ismimainun. 3Usakian koónkëxun, ka pëkarakëma ꞌaínshi, nirukin Abrahamnën aín asno kaxu mëníotankëxun; anu karu tëapaxun nëakë, puruakëxa anun ñuina xaroti usakin ꞌabiani ka Nukën ꞌIbu Diosan anu kuanun kakë anu, aín bëchikë Isaac ꞌimainun an ñu mëëmikë uni rabë́ buani kuankëxa.
4Usai kuankëbëa rabë́ ꞌimainun achúshi nëtë ꞌikëbëtan ka Abrahamnën ënën menxuma anua kuankë me a isakëxa. 5Usai kuankin ꞌuraxun iskin ka Abrahamnën an ñu mëëmikë uni rabë́ kakëxa:
—Ënuxun kamina asno bërúanti ꞌain ꞌëx kana ꞌën bëchikë buani anuxun a rabinun Nukën ꞌIbu Diosan kakë matá me anu kuanin anuxun rabibëtsini, kana utëkënti ꞌain. 6Usakin aín uni rabë́ katankëxun ka Abrahamnën aín bëchikënën karu tëapaxun nëakë a ꞌiabiankin buámainun; Abrahamnën tsi, këñun aín manë xëtokë upiokin kuënukë bibiani abëbi kuankëxa.
7Usai abë urikuankin ka Isaacnën aín papa Abraham ñukákëxa:
—¡Papan!
—¿Añu kara ꞌën bakë bëchikën? —kixun ka Abrahamnën aín bëchikë kakëxa.
Kakëxun ka Isaacnën ësokin kakëxa:
—Ënu ka karu ꞌimainun tsi ꞌikën ¿uinu kara anu ꞌaímai këñutanun xaroti carnero ꞌik? 8Ësokian aín bëchikënën ñukákëxun ka Abrahamnën kakëxa.
—Nukën ꞌIbu Diosan ka nu achúshi ñuina ꞌinánti ꞌikën, kixun ka aín bëchikë —Abrahamnën kakëxa. Usokin kabiani ka abëbi anuxuan ñuina xaroti anu kuankëxa.
9Anu kuanuan Nukën ꞌIbu Diosan kakë matá me anu bëbaxun, ka Abrahamnën anuxun ñuina xaroti maxax bukunruakëxa; usakin bukunrutankëxun ka karuribishi tíkati mabukuntankëxun aín bëchikë Isaac aribi nëakëxa, nëaxun ka anu ñuina xarotinu nankë karu kamanan; 10rakankëxa rakamainun ka aín manë xëtókë bikian aín bëchikëmi okin sananiabi ka 11nukën ꞌIbu ángelnën kuënkin naínuxun kakëxa:
—¡Abraham! ¡Abraham! ësokian kakëxun ka.
—Ënu kana ꞌain ꞌën ꞌIbu —kixun an kakëxa. 12Kakëxun ka Nukën ꞌIbu Diosan ángelnën amiribishi kakëxa:
—Min bëchikë uisabi oxuma ka ꞌat, bërí ka Nukën ꞌIbu Diosan mixmi asérabi ami sinánkëxun, min nuitu ꞌunánxa min kamina min bëchikë ñuñakima achúshira ꞌikëbi nuibakinma a rabikin ꞌakatsi ꞌian. 13Kakëx kaxú bësukin isi kuainakëkinbi ka Abrahamnën carnero achúshi i pëñanakëmi aín mancha utëanx a tanain nikë mërakëxa; usai ꞌikë mërakin ka Abrahamnën carnero bixun, aín bëchikë nëakë a tubuana rëtankëxun Nukën ꞌIbu Dios rabikin xaroxuankëxa. 14Usokin ꞌatankëxun ka Abrahamnën anuxuan usakin ꞌakë matá me anëkin: Nukën ꞌIbun ka nun sinánkëma ñu nu ꞌinania kixun anëakëxa, usa ꞌain ka bërí uni kia: Nukën ꞌIbun ka a matánuxun ꞌasaribiokin ꞌakinia kiax kikania. 15Usa ꞌain ka Nukën ꞌIbu ángelnën Abraham naínuxun amiribishi kuëntëkëankëxa, 16kuënkin ka kakëxa:
—Nukën ꞌIbu ka kiaxa: Kana isa kamina min bëchikë achúshira ꞌikëbi mi ñukákëxun ꞌën mi kakësabiokin ꞌan, usa ꞌaish kana ꞌëxbi asérabi sinanatëkëntima oi kin, 17usa ꞌain kana ꞌën upíokin sinánxunkin min rëbúnkinëxa. ꞌAisamaira ꞌispa imë́ naínu iskësa usaribi ꞌianan masi bëru parúmpapa kuëbínua iskësaribi ꞌinun ꞌimiti ꞌain. Usa ꞌain ka bëtsi ëmanu ꞌikë unikama ax ami nishkë akama ꞌën ꞌamikëxun abë ꞌakanankin atun abámikin ꞌati ꞌikën, 18usa ꞌain ka kamabi menu ꞌikë unikama atu kupin upíokin sinánxunkë ꞌiti ꞌikën, min kamina ꞌën kakësabiokin ꞌan usa ꞌain. 19Usokin ꞌabëtsini ka Abraham anua an ñu mëëmikë uni ëbiankë anubi utëkëankëxa. Utankëx ka akamaxbi biranankiani Beerseba kakë me anu kuantëkëankëxa, anu ka Abraham aín aintsi ꞌimainun an ñu mëëxunkë unikamabë tsóti bërúakëxa.
Nahornën bëchikëkama ꞌia ñuikë bana
20Usa ꞌain ka a basikëbëtan, Abrahamnën uni itsia Milcánënribi aín xukë́n Nahor tuaxunkë a ñuia kuakëxa. 21A paian tuákë ax ka Us kakë ꞌiakëxa; a ꞌatankëxun ka aín xukë́n Buz aribi ꞌakëxa, ꞌimainun ka bëtsiribi Quemuel kakë aribi ꞌakëxa, ax ka Aramnën papa ꞌiakëxa. 22Usokin ꞌatankëxun ka amiribishi bëchipakëxa aín anë ka ꞌiakëxa Quésed, Hazó, Pildás, Idlaf ꞌimainun Betuel. 23Betuel ax ka Rebecanën papa ꞌiakëxa. Usa ꞌain ka, mapai achúshi ꞌimainun rabë́ ꞌimainun achúshi akamax ka Milcámia ꞌakë tuá Abrahamnën ꞌanáka Nahor ain bëchikëkama ꞌiakëxa. 24Usa ꞌain ka Nahor an ñu ꞌaxunkë xanubia bikë Reumá aín xanusa ꞌain amiribi bëchipakëxa, ënëkamax ka aín anë ꞌikën Teba, Gáham, Tahas ꞌimainun Maacá.
Currently Selected:
Génesis 22: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.
